Ehstar 2 - Ojibwe Kihcimasina'ikan

Ehstar Ekihciokimaahkwewitc

¹ Naanaake hsa ahpii kihciokimaa Seraksiihs (Xerxes) kaah⁠poonikitaasotc, kii‑ishi maamihkawi Paahshtaaiwan (Vashti) aaniin kaye kaa⁠ishihcikenitc. Kii‑ishi maamihkawi kaye aaniin kaa⁠inahshowaanaatc.

² Miitahsh kaakii'ikotc i'i kaa⁠wiintamaakotc aaniin ke⁠ishihciketc, “Inashke ta⁠kakwe mihkawaawak ci⁠minonaakosiwaatc pehki oshkiniikihkwewak kihciokimaa ke⁠wiiciiwaatc.

³ Kiin onakim ikiweniwak wekimaahkantamowaatc entahsinkin ahkiin ci⁠kanawaapantamowaatc ci⁠piinimintc oshkiniikihkwe' i'imaa ihkwewikamikonk eshi'ayaak maawaci kihci ootenaank Soohsa (Susa). A'a hsa Iikaai (Hegai) kenawenimaatc ihkwewa' oka naanaakaci'aa'. Iki hsa tahsh oshkiniikihkwek ta⁠toocikaniwiwak awahshime ci⁠minonaakosiwaatc.

⁴ Kiin itahsh kika onaapamaa maawac ke⁠minonawatc ke⁠kihciokimaahkwewitc ci⁠naapishkawaatc Paahshtaaiwan.” A'a hsa kihciokimaa kii⁠minohtam o'o kaakii'inintc. Miitahsh i'i kaa⁠ishihciketc.

⁵ I'i hsa tahsh maawaciko kihci ootenaank Soohsa kii⁠ayaa Coowinini (Jew) ekiih ontahkaanesitc Pencimanink (Benjamin), Mwaartihkaai (Mordecai) ekii ishinihkaasotc. Oteten Cear (Jair) kii‑ishinihkaasowan, kaakii otetenitc Shimiaaiwan (Shimei), kaakii ani otetenitc Kish (Kish) kaakii ishinihkaasonitc.

⁶ Kihciokimaa Nepakanaasar (Nebuchadnezzar) Paapilan (Babylon) ahkiink kaakii onciitc, kii‑ishiwinaakopan kihciokimaan Cehooyakinan (Jehoiachin) Coota (Judah) ahkiink wenciinitc weti Paapilan ahkiink ekiih ishiwinaatc. Miitahsh i'imaa kewiin Mwaartihkaai kaa⁠ishi tako maaciicikaniwikopanen.

⁷ Mwaartihkaai okii ayaawaan otooshimihkweman Aahtaasa (Hadassah) ekii ishinihkaasonitc. Ehstar (Esther) ihsa kaye kii‑ishinihkaasowan wiinke ekii minonaakosinitc, kaye tahsh ekii minowiiyawenitc. Wiin iitok iko okii otaahpinaan ekii ompiki'aatc aaniihsh kii‑ishkwaa pimaatisinikopan oteteni, omaamaani kaye.

⁸ Ahpii hsa kihciokimaa kaa⁠wiintenik otoshki onahshowewin niipiwa' ihsa oshkiniikihkwewak kiih⁠piicikaniwiwak i'imaa ihkwewikamikonk eshi'ayaanik kihci ootenaank Soohsa. A'a hsa tahsh Iikaai kii⁠anoonaa ci⁠naanaakaci'aatc i'i ihkwewa'. Miitahsh kewiin i'imaa Ehstar kaah⁠takwiitc ekii ishiwicikaniwitc kihciokimaawikamikonk.

⁹ Shemaak itahsh iko Iikaai okiih saaki'aan, okii minwaapamaan kaye Ehstaran. Miihsh kaye kaa⁠ishi maaciihkawaatc ekiih tootawaatc ci⁠minonaakosinitc, miicim kaye ekii ahshamaatc ke⁠minoshkaakonitc. Kii⁠miinaawan kaye niishwaahso (7) oshkiniikihkwewa' kaakii onci onaapamimintc kihciokimaawikamikonk ci⁠pami'ikonitc. Kaye tahsh kii‑ishi piintikanaa maawac iko eshi onishihshininik ihkwewikamikonk.

¹⁰ Ehstar itahsh kaawiin kiih⁠tipaacimohsii Coo ekiih tinowitc aanti kaye wentahkaanesitc aaniihsh okii'ikoon Mwaartihkaaiyan i'i ci‑ishihciketc.

¹¹ Entahsokiishik ihsa Mwaartihkaai kii⁠nihtaa ayaashawoohse i'imaa akwaciink ihkwewikamikonk ekii anta kihkenimaatc aaniin eshi'ayaanitc Ehstaran, aaniin kaye eshiwepisinitc.

¹² Peshikopipoon itahsh kiih⁠tashiihkawaawak ihkwewak ci⁠minonaakosiwaatc. Ninkotwaahso kiisihs (6) kiih⁠poosinaawak pikiwi minaako'oni pimite (myrrh), kaye tahsh ninkotwaahso kiisihs minaako'on kii⁠aapatanini, kaye waweshi'owinan.

¹³ I'i tahsh kaa⁠ishkwaa tootawintwaa miihsh kaa⁠ishi ishiwinintwaa memeshkwac eshi'ayaanitc kihciokimaan. Wekonen itahsh iko waah⁠kikishkamowaatc kii⁠miinaawak ihkwewikamikonk ekii onci maacaawaatc kii‑ishaawaatc kihciokimaawikamikonk.

¹⁴ E⁠onaakohshininik itahsh ta⁠ishaa, kishepaawakaninik itahsh ta⁠ishiwicikaniwi pahkaan ihkwewikamikonk ci⁠naanaakaci'ikotc Shaashkaas (Shaashgaz) eshinihkaasonitc kaa⁠naanaakaci'aanitc kihciokimaan otaanihkewiiwini. Kaawiin itahsh miinawaa otaa anta waapamaahsiin kihciokimaan paanimaa kii⁠minwaapamikotc, antomikotc kaye ekii wiinikotc kaa⁠ishinihkaasotc.

¹⁵ Kekahpii tahsh kii⁠ocihcihseni Ehstar ci⁠anta waapamaatc kihciokimaan. Ehstar iitok otetepaniin Aapihel (Abihail) kii‑ishinihkaasowan, kaakii otooshiminitc Mwaartihkaaiyan. Mwaartihkaai iitok kaakii ompiki'aatc Ehstaran taapishkoo ekii otaanihsitc. Ahpii tahsh kaa⁠ishaatc ci⁠waapamikotc kihciokimaan mii hsa 'i kaa⁠ishi'otc kaakii'ikotc Iikaaiwan kaakiih kanawentaminitc ihkwewikamikoni. Kahkina hsa awiya' Ehstar kaakii waapamikotc okii minwaapamikoo'.

¹⁶ Mitaahsokiisihsoon (10) eh⁠pimakinsonitc, Tepaht (Tepeth) eshi wiinsonitc, niishwaahso pipoon kaa⁠kihciokimaawiwinitc ini Seraksiihsan, mii hsa iwe ahpii kaakii ishiwicikaniwitc kihciokimaawikamikonk ci⁠waapamikotc kihciokimaan.

¹⁷ Kihciokimaan tahsh okiih saaki'ikoon ahpiihc wiin kotak i'i oshkiniikihkwewa', wiin ehta kaye okii kashki'aan awahshime ci⁠minwenimikotc ahpiihc wiin i'i kotak ihkwewa'. Miitahsh kihciokimaan kaakii pihtaanohkwaane'ikotc kihciokimaahkwewaanohkwaan ekii ishi'intc ci⁠kihciokimaahkwewitc ci⁠naapishkawaatc Paahshtaaiwan.

¹⁸ Kihciokimaa tahsh kii⁠wiihkwanke ekiih kihci inenimaatc Ehstaran, ekii antomaatc kahkina wekimaawentaakosinitc, kaye hsa kaa⁠niikaanentaakosinitc. Kaye tahsh kii‑ihkito ci⁠kipihciinaaniwaninik misiwe ahkiink eshi okimaawitc ekii maamiikiwetc kihciokimaa ehta kaashi miikiwetc.

Mwaartihkaai Kiihpimaaci'aatc Kihciokimaan

¹⁹ Ahpii hsa niishink kaa⁠ohkwapiwaatc oshkiniikihkwewak, mii hsa 'i ahpii Mwaartihkaai (Mordecai) iinsan kaakii miinintc okimaawi anohkiiwin.

²⁰ Ehstar (Esther) itahsh kaawiin mahshi okii kihkentaakohtoohsiin Coo (Jew) ekiih tinowitc, aanti kaye kaah⁠pi'onciitc, ekii ishihciketc kaakii'ikotc Mwaartihkaaiyan. Mii hsa ko 'i kaa⁠nihtaa ishihciketc ekiih tootank kaakii'ikotc Mwaartihkaaiyan kiihpi ompiki'ikotc kii⁠akaahshiinsitc.

²¹ Mwaartihkaai hsa kii⁠okimaawanohkii i'imaa kihciokimaawikamikonk. Iki tahsh niishin wekimaawentaakosiwaatc kaakiih kanawentamowaatc eshi piintikenaaniwaninik Piktena (Bigthana) a'a kaye Tiirehsh (Teresh) okii ani nishkenimaawaan kihciokimaan Seraksiihsan (Xerxes). Miihsh kaakii inentamowaatc ewii nihsaawaatc.

²² Mwaartihkaai tahsh okii kihkentaan aaniin waah⁠tootawimintc kihciokimaan. Miihsh kaa⁠ishi wiintamawaatc Ehstaran kihciokimaahkwen. Miihsh Ehstar kaa⁠ishi wiintamawaatc kihciokimaan o'oweni, ekii wiinaatc Mwaartihkaaiyan ekii wiintamaakotc.

²³ Kiih⁠kakwe mihkikaate tahsh o'o inaacimowin. Ahpii tahsh kaa⁠kihkencikaatek eh⁠tepwewank iinsan, miihsh iki minciniish wekimaawentaakosiwaatc kaa⁠ishi akoonintwaa i'imaa kaashi akoonaakaniwitc awiya. O'o hsa kahkina kaakii ishihsek kii⁠oshipii'ikaate kaashi kihci inentaakwahk masina'ikanink enaahsamiitc kihciokimaa.