Ehstar 1 - Ojibwe Kihcimasina'ikan

Kihciokimaahkwe Paahshtaai, Kihciokimaa Seraksiihs

^1-2 Mii hsa owe kaa⁠ishihsek ahpii kii⁠kihciokimaawitc Seraksiihs (Xerxes) i'imaa eyaatc kihci ootenaank kehci inentaakwaninink Persha (Persia) ahkiink. Ninkotwaahk niishtanashiniishwaahso (127) hsa ahkiin okiih tipentaanan weti Iintiya (India) ekii onci maacihsenik piinihsh weti Soten (Sudan) ahkiink ekii ahkohsenik.

³ Nihsopipoon (3) itahsh kaa‑ani ishihsenik kii⁠kihciokimaawitc kii⁠kihci wiihkwanke kahkina wekimaawaatisinintc, i'i kaye kaa⁠niikaanentaakosinitc ekiih piishaanitc. I'i tahsh kaye shimaakanihsha' Persha ahkiink wenciinitc, i'i tahsh kaye Miitiya (Media) ahkiink wenciinitc i'imaa kii⁠ayaawa'. Kotak itahsh kaye wekimaawentaakosinitc pepahkaan ahkiink wenciinitc i'imaa kiih⁠piishaawa'.

⁴ Ninkotwaahsokiisihs (6) minihk kii⁠waapanta'iwe eshi wenootaninik otookimaawiwin, aaniin kaye ehpiihci minonaakwaninik, aaniin ehpiihci okimaawentaakwaninik.

⁵ O'o hsa kaa⁠ishkwaahsenik, kihciokimaa kii⁠wiihkwanke kihci ootenaank Soohsa (Susa) eshinihkaatenik. Kaa⁠wenootisinitc, i'i kaye ketimaakisinitc okii antomaa'. Niishwaahso kiishik (7) o'o kii‑inahkamikan. I'imaa hsa kiih⁠tanahkamikan kihciokimaa eshi piintikoowaninik okihtikaanikamik i'imaa ciikaya'ii otookimaawikamikonk.

⁶ I'imaa hsa piintik kaakiih tanahkamikahk kii⁠akootewan ishiikinoon e⁠osaawashkwaakin, aaninta kaye e⁠waapishkaakin. Mahkate mihskwekaneyaap ihsa kii⁠aapatan ekiih tahkopitekin ini ishiikinoon i'imaa waapaapihko shooniyaa waapihkowi wiimpayaahkinikanink ekii ishi kihciwihsinkin imaa mashkawahsiniink kaakiih patahkisowaatc i'imaa. Kihci tehsapiwinan kaye osaawi shooniyaa waapihkonk wenci oshihcikaatekin, waapaapihko shooniyaa waapihkonk kaye i'imaa kii⁠ahcikaatewan entanahkamikahk. Wiinke kaye eshi pimohsenk kii⁠onishihshin pepahkaan tino ahsiniik kaa⁠wawanihshishiwaatc, pepahkaan kaa⁠inasinaasowaatc, kaa⁠miskosiwaatc, kaa⁠waapishkisiwaatc, kaa⁠mahkatewisiwaatc kaye ekii aapatisiwaatc.

⁷ Shoominaapo kii‑ishi siikinikaate osaawi shooniyaa waapihkowi minihkwaakanink. Kahkina pepahkaan kii‑ishinaakwanoon. Kihciokimaa hsa kiih⁠pakitinamaake pisaaniko minihk ci⁠minihkwenaaniwaninik.

⁸ Kihciokimaa ihsa kii‑ihkito pisaaniko minihk ci⁠minihkwenaaniwaninik. Pemiihtaakewaatc i'imaa okimaawikamikonk kiih⁠kanoonaawak aaniin iko minihk ci⁠mina'aawaatc eshi mihsawentaminitc.

⁹ Kewiin itahsh a'a kihciokimaahkwe Paahshtaai (Vashti) kii⁠wiihkwanke i'imaa piintik kihciokimaawikamikonk, ekii antomaatc ihkwewa'.

¹⁰ Niishwaahsokiishik (7) itahsh kihciokimaa Seraksiihs kaa⁠wiihkwanketc, wiinke hsa kiih⁠ciihkahkisike. Miihsh kaakiih kanoonaatc niishwaahso kaakii ishi'imintc ci⁠wiitikehsinik iniweniwa' wiin iko kaakiih pamiihtaakotc i'imaa kihciokimaawikamikonk. Miihsh o'o kaa⁠ishinihkaasonitc, Miiyooman (Mehuman), Pista (Biztha), Arpoona (Harbona), Pikta (Bigtha), Apaakta (Abagtha), Siihtar (Zethar), shikwa kaye Kaarkas (Carkas).

¹¹ Miiwa' itahsh o'o kaakii anoonaatc ci⁠naasihkawaanitc kihciokimaahkwen Paahshtaai eshinihkaasonitc ci⁠kikishkaminitc okihciokimaahkwewaanohkwaanini. Ewii waapanta'iwetc aaniin ehpiihci minonaakosinitc, ci⁠waapamikonitc okimaa' i'i kaye kahkina kaakii antomaatc.

¹² Ahpii iki pemiihtaakewaatc kaah⁠kanoonaawaatc kihciokimaahkwen Paahshtaaiwan kaawiin kii‑inentansiiwan ci⁠piishaanitc. Wiinke tahsh kihciokimaa kii⁠nishkaatisi.

¹³ Miitahsh kihciokimaa kaa⁠nihtaa ishihciketc ewiih tashintank onahshowewin, ekiih kanoonaatc kekiihtaawentaminitc ininiwa' kehkentaminitc onahshowewin.

¹⁴ Miiwa' itahsh o'o kaa⁠ishinihkaasonitc kaakii nihtaa kanoonaatc kekoon kiiwiih kihkentank: Karshiina (Carshena), Shiihtar (Shethar), Aatmataa (Admatha), Taarshish (Tarshish), Miiras (Meres), Marsiina (Marsena) kaye tahsh Miimookan (Memucan). Miiwak itahsh oko niishwaahso (7) wekimaawentaakosiwaatc wenciiwaatc Miitiya ahkiink, Persha ahkiink kaye kii‑inentaakosiwak pisaan ci⁠piintikawaawaatc kihciokimaan, kaye tahsh ekii ishpentaakosiwaatc i'imaa okimaawiwinink.

¹⁵ Miitahsh kihciokimaa kaa'inaatc, “I'i hsa eshihsink onahshowewin, aaniin itahsh inaa ke⁠tootawintc a'a Kihciokimaahkwe Paahshtaai? Niin kihciokimaa Seraksiihs ekii anoonakwaa pemiihtawiwaatc ci⁠piinaawaatc kihciokimaahkwen, kaawiin iitok kii‑inentansiiwan ci⁠piishaanitc.”

¹⁶ Miimookan eshinihkaasonitc ihsa kii‑ihkitowan, “Kihciokimaahkwe Paahshtaai hsa kaawiin kwayahk ishihcikehsii. Kaawiin kiinehta kimamaashiihkantaakohsii. Kahkina hsa ko wekimaawentaakosinitc, kahkina kaye ininiwa' o'omaa eyaanitc ahkiink omamaashiihkantawaa'!

¹⁷ Kahkina ohsha ihkwewak okani kihkentaanaawaa aaniin kaa⁠ishihcikenitc Kihciokimaahkwen Paahshtaaiwan, miihsh ci⁠ani aanawenimaawaatc onaapemiwaa'. Miihsh ke⁠ihkitowaatc, Kihciokimaa Seraksiihs e⁠antomaatc Kihciokimaahkwen Paahshtaaiwan, kaawiin okiih tepwehtaakohsiin.

¹⁸ Inashke tahsh iki ihkwewak wenaapemiwaatc wekimaawentaakosinitc wenciinitc Miitiya ahkiink, Persha ahkiink kaye, ahpii noontamowaatc aaniin kaa⁠ishihciketc kihciokimaahkwe, mii peshikwan ke⁠tootawaawaatc onaapemiwaa'. Kaawiin itahsh oka kihci inenimaahsiwaawaa' onaapemiwaa', kaye ta⁠onci nishkentamo'.

¹⁹ Kiishpin itahsh ishi minwaapantaman, taka onahtoon kihciokimaa onahshowewin ci⁠oshipii'ikaatek otoonahshowewiniwaank Miitiya ahkiink wenciiwaatc, iki kaye Persha ahkiink wenciiwaatc. Kaawiin itahsh wiihkaa ta‑aancihcikaatehsinoon ci‑inahtek wiihkaa miinawaa Kihciokimaahkwe Paahshtaai ci⁠piintikehsik eshi'ayaanitc kihciokimaan. Taka hsa kihciokimaa oka inahtoon pehkaanisinitc ihkwewan ci⁠naapishkawaanitc kihciokimaahkwen.

²⁰ Ahpii tahsh kihciokimaa onahtootc onahshowewin misiwe papaa wiintenik otookimaawiwinink, kahkina hsa tahsh ihkwewak oka kihtenimaawaa' onaapemiwaa' mihsawaa ko kitimaakisiwaatc, komaa kaye wenootisiwaatc,” kii‑ihkito Miimookan.

²¹ Kihciokimaa hsa, iki kaye wekimaawentaakosiwaatc okii minohtaanaawaa kaakii ihkitonitc Miimookanan. Miitahsh kihciokimaa kaa⁠ishihciketc kaakii ihkitonitc.

²² Entahsininikin itahsh pepahkaan ahkiin tepentank okii ishinisha'aan otoonahshowewin entahswewaanakisinitc, entahso ishikiishwenitc kaye. Kii inahshowe kahkina ininiwa' ci⁠tipentaminitc otaawinini, kaye tahsh ci⁠okimaahkantaminitc otaawin.