ᑳᑭᑫᑖᓱᒡ 1 - Ojibwe Kihcimasina'ikan

Pimaatisiwin Kekoon E'inaapatahsinok

¹ Mii hsa onoweniwan otihkitowinan Kaakihkentaahsotc, Tepitoon (David) kaakii okosihsimikotc kaakiih kihciokimaawihpan Ceroosalamink (Jerusalem).

² O'o hsa ihkito Kaakihkentaahsotc, “Ishi anihshaa hsa ko ishi anihshaa. Mii hsa 'i kahkina kekoon enentaakwahk.”

³ Pemaatisitc hsa anohkii minihk iko pemaatisitc, kaawiin itahsh kekoon ci⁠naakwaninik wekotokwen kaa⁠kashkihtookwen kii⁠anohkiitc shiipaakiisihs.

⁴ Pemaatisiwaatc hsa pi⁠ayaanihke nihtaawiki'itiwak, miihsh kaye kenishi nipowaatc. O'o tahsh wiin ahki mooshak iko ta‑ayaamakan.

⁵ Kiisihs hsa moohka'am, pankihshimo kaye, miihsh i'i miinawaa eshi weyiipishkaatc e⁠ishaatc aaniinti ke⁠onci moohka'ank.

⁶ Shaawanonk hsa inahke inaaniman, kiiwetinonk kaye, e⁠mihci kishipaayaanimank, miihsh miinawaa pemishi kiiweyaanimank.

⁷ Kahkina hsa siipiin kihcikamiink ishiciwanoon, kaawiin tahsh kihcikam mahshi ci⁠mooshkinepiik. Miitahsh i'i nipi eshi kiiwemakahk aaniinti kaakii onci maaciiciwankipan nihtam.

⁸ Kahkina hsa kekoon ayehkosii'iwemakan, kaawiin kashkihcikaatehsinoon ci⁠wiincikaatekipan. Kaawiin hsa wiihkaa kite waapancikehsiimin, kaawiin kaye wiihkaa kitenooncikehsiimin.

⁹ Aaniin hsa kaakii ishiwepahkipan miinawaa ta⁠kiiwe ishiwepan, aaniin kaye kaakii ishihcikenaaniwankipan hsa miinawaa ta⁠kiiwe ishihcikenaaniwan, kaawiin hsa oshki kekoon ayaahsinoon o'omaa ahkiink.

¹⁰ Kaawiin hsa kekoonini awiya otaa'itansiin, “Inashke waapantamok i'i oshki kekoon.” Aasha iitok inaa i'i mewisha kii⁠onci ayaamakan cipwaa nihtaawikiyank.

¹¹ Kaawiin hsa kekoonan otaanaank kaakiih pi'ayaakin maamihkawinocikaatehsinoonan, ini tahsh kaye piciinak keni ayaakin. Kaawiin kaye awiya ayaahsii keni maamihkawinotank o'o noonkom kaa⁠ishihsenik, aaniin kaye weti piciinak keni ishihsenik.

Kaakihkentaahsotc Ehtashintank Kaakiikihkentank

¹² Niin hsa kaa⁠kihkentaahsoyaan ninkii kihciokimaaw i'imaa Ceroosalamink (Jerusalem) ekiih tipenimakwaa Isriyalak (Israel).

¹³ Mii hsa kaa⁠ishihcikeyaan ninkakiihtaawentamowin ekii aapacihtooyaan ekii wiih kakwe kihkentamaan kahkina kekoonan kaa⁠ishihcikenaaniwank o'omaa ahkiink. Etatawe hsa Kishemanitoo okitima'aan pemaatisinitc.

¹⁴ Kahkina hsa kekoonan nimpi waapantaanan kaapi ishihcikenaaniwank o'omaa ahkiink; mii hsa tahsh ishi anihshaa e⁠ishihcikenaaniwank! Mii hsa 'i enentaakwahk taapishkoo kaa⁠kakwe piminisha'ikaatek nootin.

¹⁵ I'i hsa kaa⁠waawaaki'ayaak kaawiin ta⁠kashkihcikaatehsinoon ci⁠miinonikaatekipan, kaawiin kaye ta⁠kashkihcikaatehsinoon ci⁠akincikaatekipan kekoon eyaahsinok.

¹⁶ Miitahsh o'o kaa'itisoyaan, “Inashke hsa niin aahpici nimpi kihci inentaakos, wiinke kaye ninkakiihtaawentam ahpiihc wiin iki kotak otaanaank kaakiih pi tipentamowaatc i'i Ceroosalam. Nawac hsa niin nimpi kihkentaan wekonen kaa'icikaatek kakiihtaawentamowin, kihkentamaawin kaye.”

¹⁷ Miitahsh miinawaa kaakii inentamaan ewiih kakwe kihkentamaan eshi pahkaanentaakwahk kihkentamaawin, kakiipaatisiwin kaye. Ewiih kakwe kihkentamaan kaye eshi pahkaanentaakwahk kakiihtaawentamowin, kiiwashkweyaatisiwin kaye. Miitahsh miinawaa kaa⁠ishi kihkentamaan i'i ekii ishinaakwahk taapishkoo ekiih kakwe piminisha'amaan nootin.

¹⁸ Aaniihsh o'o ishihse awiya hsa awahshime kaani kakiihtaawentank aanciihke ani ocaanimentam. Awiya kaye awahshime kaani okihkentamaawinitc, mii 'awe kaani maanentank.