ᑑᑕᕒᐋᓇᒦ 9 - Ojibwe Kihcimasina'ikan

Isriyalak Kaakii'ishishashiipihtamowaatc

¹ “Isriyalak (Israel), noontamok! Noonkom hsa kaa⁠kiishikahk kiwii aashawishkaam i'i Cwaartan (Jordan) siipi. Miitahsh ci⁠piintikeshkaayek ci⁠mahkamekwaa pemaatisiwaatc nawac kaa⁠paahtiinowaatc nawac kaye kaa⁠soonkentaakosiwaatc ahpiihc kiinawaa, okihci otootenaamiwaan kaye wiinke kaa⁠ishpi waahkaayaapihkinikaatenikin.

² Miiwak hsa iki pemaatisiwaatc kaa⁠soonkisiwaatc, kaa⁠kakaanoosiwaatc kaye, Enakonk (Anak) wentahkaanesiwaatc! Kikihkenimaawaak iitok, kinaanoontaam kaye e'inintwaa, ‘Awenen itahsh inaa ke⁠miikaanaahpan i'i Enakonk wentahkaanesinitc.’

³ Kehcinaa'ok hsa noonkom kaa⁠kiishikahk kaaTipenciketc kiKishemanitoomiwaa ohsha kaa⁠niikaaniihtamawinek o'o kaa‑aashawishkaayek, ishkote kaa‑ankwaahkisikemakahk e⁠inentaakositc. Wiin hsa oka nihshiwanaaci'aa', oka shaakooci'aa' kaye kaawii ani ishaayek. Kiinawaa tahsh kika saakitaama'waawaa', kitaahtap kaye kika caaki'aawaa', kaakii ishi ahshotamaawinek.”

⁴ “Ahpii tahsh kaaTipenciketc kiKishemanitoomiwaa saakitaama'waatc eshi'ayaawek, kaawiin hsa kika ihkitohsiim, ‘Niin ohsha eh⁠kwayahkwaatisiwak kaaTipenciketc kaakii onci piishitc o'omaa ci⁠tipinawewisiwak o'o ahkiini.’ I'i ohsha kaa⁠onci ishihciketc, onsaam e⁠maci'ishiwepisinitc i'i kotak pemaatisinitc kaaTipenciketc kaawii onci saakitaama'waatc eshi'ayaayek.

⁵ Kaawiin itahsh wiin kikwayahkwaatisiwiniwaank, kaawiin kaye eh⁠kwayahkonaakwahkin kite'iwaan, kaawii onci piintikeshkaayek ci⁠tipinawewisiyek otahkiimiwaa. I'i ohsha onsaam e⁠maci'ishiwepisinitc i'i pemaatisinitc kaaTipenciketc kiKishemanitoomiwaa kaawii onci saakitaama'waatc waa‑ani ishaawek ci‑ishihsenik kaakii ishi ayiici ahshotamawaakopanen kikehteya'aamiwaapanii', Eparahaaman (Abraham), Aaisikoon (Isaac), ini kaye Cekapoon (Jacob).

⁶ Kihkentamok itahsh kaawiin wiin kikwayahkwaatisiwiniwaank kaaTipenciketc kiKishemanitoomiwaa kaakii onci miininek o'o wenishihshininik ahkiini ci⁠tipinawewisiyek, kiinawaa iitok kinihtaa shashiipihtaam.”

⁷ “Maamihkawik itahsh, keko waniihkehkek aaniin kaakii ishi nishki'ek kaaTipenciketc kiKishemanitoomiwaa weti pikwatahkamik. Eh⁠kiishikahk hsa kaakii nakatamekipan i'i Iicipahki (Egypt) piinihsh itahsh o'o ishi'ahpii kaapi takohshinek, mii hsa eshihcikeyek eh⁠shashiipihtawek kaaTipenciketc.

⁸ Weti hsa kaye waciink Saainai (Sinai) ecikaatek kikii ishi nishki'aawaa kaaTipenciketc ekiih kakaanci'ek. Miitahsh kaa‑ahpiihcinawe'ek kitaakiih caaki'ikowaa iitok.

⁹ Ahpii kii⁠ahkwaamaciweyaan i'i waciw ci⁠ontinakwaa napakaapihkahsiniik, eshi oshipii'ikaatenik kaaTipenciketc kaakii onahtamawinekipan otahshotamaakewin. Miitahsh weti kaa‑ayaayaan wakitatin niimitana (40) tahso kiishik, niimitana tahso tipihk kaye. Kaawiin itahsh ninkii onci wiihsinihsii, kaawiin kaye ninkii onci minihkwehsii.

¹⁰ Miitahsh kaaTipenciketc kaa⁠miishitc niishin napakaapihkahsinii', wiin iko Kishemanitoo kaakii ishi oshipii'iketc. Miihsh i'imaa kaa⁠ishi oshipii'ikaatenikin kaaTipenciketc otinaahkonikewinan ekii'ininekipan weti kihci waciink ishkotenk ekii onci kiikitohpan, ahpii eh⁠kiishikahk nihtam kaakii maawaci'itiyankipan.

¹¹ E⁠ani ishkwaahsek itahsh niimitana (40) tahso kiishik, niimitana kaye tahso tipihk mii'i kaaTipenciketc kaakii miishitc niishin napakaapihkahsinii' eshi oshipii'ikaatenik kaakii oshihtootc ahshotamaakewin.”

¹² “Miihsh o'o kaaTipenciketc kaakii'ishitc, ‘Maacaan weyiip niihsaamaciwen, kipimaatisiimak ohsha Iicipahkiink kaakii onci saakiciwinatwaa wiinke maci'ishihcikewak. Etatawe wiipa onakataanaawaa i'i kaakii inakwaapan ci‑ishihcikehsikwaapan; kii⁠oshihtamaasowak ohsha piiwaapihko manitoohkaanan.’

¹³ “Miihsh kaa‑ani ihkitotc, ‘Niwaapamaak hsa iki pemaatisiwaatc, tepwehsa etatawe shashiipihtamok.

¹⁴ Keko tahsh papaamenimihshihken, ewii nihshiwanaaci'akwaa, ewiih kiisii'amowak kaye owiinsowiniwaan o'omaa shiipaakiishik. Kiin itahsh wiin kika ishi'in ci⁠mashkawentaakosiyan, ci⁠paahtiinowaatc kipiiwesiimak ahpiihc wiinawaa iki Isriyalak,’ ninkii'ik.”

¹⁵ “Miitahsh kaa⁠ishi kwehkiiyaan ekii niihsaciweyaan i'i kihci waciw mekwaa eh⁠piskanek. Ninkiih pimiwinaak itahsh kaye iki niishin napakaapihkahsiniik eshi oshipii'ikaatenik onahshowewin.

¹⁶ Miitahsh kaakii waapaminakook tepwe iinsan ekii macitootawek kaaTipenciketc kiKishemanitoomiwaa. Kikii oshihtamaasom iinsan piiwaapihkowi pishihkiihkaan; aahpici wiipa ekii nakatamowek kaaTipenciketc kaakii'ininekipan ci‑ishihcikehsiwekipan.

¹⁷ Miitahsh iki niishin napakaapihkahsiniik kaakii tahkonakwaa nininciink, kaa⁠ishi ahpakinakwaa ekii pikishkihshimakwaa eshi'ayaayek.

¹⁸ Miitahsh miinawaa kaa⁠ishi pankihshinaan ekii animihkohtaayaan enaahsamiitc kaaTipenciketc niimitana (40) tahso kiishik, niimitana kaye tahso tipihk. Kaawiin itahsh ninkii onci wiihsinihsii, kaawiin kaye ninkii onci minihkwehsii onsaam aaniihsh i'i kahkina kaakii ishi macitootamek, ekii ishihcikewek macikekoon enaahsamiitc kaaTipenciketc. Miitahsh kaakii onci nishki'ek.

¹⁹ Wiinke hsa ninkii kohtamowaan onishkaatisiwin, wiinke ekii aahkokitaasotc kaaTipenciketc, kii⁠ahpiihcikitaaso hsa ko cikiih caaki'inekipan. Miinawaa tahsh kaaTipenciketc ninkiih pisintaak.

²⁰ KaaTipenciketc hsa okii ahpiihci nishki'ikoon Eranoon (Aaron) cikii nihsaahpan; miihsh i'i ahpii Eran kaakii anami'ehtamawak.

²¹ Miitahsh kaakii otaahpinamaan i'i macikekoon kaakii oshihtooyek, pishihkiihkaan kaakii oshi'ek, ekii macohte wepinak ekiih piisa'wak. Miihsh wiinke kaa⁠ishi piihsipoonak piinihsh ekii mihci paashkinehsetc. Miitahsh kaa⁠ishi wepinamaan i'i paashkinehse i'imaa siipiinhsink kaakii onciciwank waciink.”

²² “Weti tahsh Taapera (Taberah) ecikaatek, Masa (Massah) kaye, weti kaye Kipraaht Hataa'apa (Kibroth Hattaavah) kikii ishi nishki'aawaa kaaTipenciketc.

²³ Ahpii hsa tahsh kaaTipenciketc kii⁠onci maacinisha'onek Katesh Parniya (Kadesh Barnea) o'o kikii'ikowaa, ‘Maacaak itahsh awi tipinawewisik i'i ahki kaakii miininakook,’ miitahsh kaa⁠ishi shashiipihtamowek otinaahkonikewinan kaaTipenciketc kiKishemanitoomiwaa. Kaawiin cikiih tepweyenimek, kaawiin kaye kikiih pisintawaahsiwaawaa.

²⁴ Weti hsa eh⁠kiishikahk wenci maacii kihkeniminakook kitoonci shashiipihtawaawaa kaaTipenciketc.”

²⁵ “Miitahsh kaakii onci animihkohshinaan niimitana (40) tahso kiishik, niimitana tahso tipihk kaye enaahsamiitc kaaTipenciketc, aaniihsh kaaTipenciketc kii‑ihkitokopan ewii nihshiwanaaci'inek.

²⁶ Miihsh kaakii anami'ehtawak kaaTipenciketc o'o ekii'inak, ‘Oo Tepencikeyan Kishemanitoo, keko nihshiwanaaci'aahken kipimaatisiimak, kiin tepenimatwaa, kikihci inentaakosiwinink kaakii onci shaapwii'atwaa, kimashkawisiiwin kaye kii⁠aapacihtaawatc kii⁠onci saakiciwinatwaa Iicipahkiink.

²⁷ Maamihkawinotaw kaakii otanohkii'aakanimiyan Eparahaam (Abraham), Aaisik (Isaac), a'a kaye Cekap (Jacob): keko tahsh papaapisiskentamowaahken eshi kakiipaatisiwaatc oko pemaatisiwaatc, i'i eshi maci'ishiwepisiwaatc, i'i kaye eshi macitootamowaatc.

²⁸ Maakishaa hsa o'o ta⁠ihkitowak weti eyaawaatc ahkiink kaakiih pi'onci saakiciwishiyaank, “KaaTipenciketc ohsha ekii kashkihtoohsik ci‑ishiwinaatc weti ahkiink kaakii ishi ahshotamawaahpan, eh⁠shiinkenimaatc kaye, mii hsa kaakii onci ishiwinaatc pikwatahkamikonk ewiih tashi nihsaatc.”

²⁹ Kiin iitok iki kipimaatisiimak, kiin kaa⁠tipinawewisiyan, kimashkawisiiwin iitok kikii aapacihtoon, kinihk kaye kaakii shiipinihkeniyan,’ ” kii‑ihkito Moosihs (Moses).