ᑑᑕᕒᐋᓇᒦ 8 - Ojibwe Kihcimasina'ikan

Wenishihshik Ahki Ketipinawewisink

¹ “Weweni tahsh ishihcikek ci⁠piminisha'amek kahkina inaahkonikewinan kaa⁠miininakook noonkom kaa⁠kiishikahk ci⁠pimaatisiyek itahsh, ci⁠ani paahtiinoyek kaye. Miitahsh kaye ci⁠piintikeshkaayek i'i ahki ci⁠tipinawewisiyek kaaTipenciketc kaakii aayiici ahshotamawaakopanen kikehteya'aamiwaapanii'.

² Maamihkawik itahsh kaaTipenciketc kiKishemanitoomiwaa aaniin misiwe kaah⁠pii'ishiwininek pikwatahkamik ono niimitana (40) tahso pipoon. Kikiih kakweci'ikowaa hsa ci⁠tapahsenimowek, ci⁠kihkentank kaye kite'iwaank taka ciwiih kanawentamowekwen enaahkoniketc, komaa kaye waah⁠kanawentamoowaahsiwekwen.

³ Miitahsh kaakiih tootawinek ci⁠tapasenintisoyek, kikiih pakitinikowaa kaye ci⁠noonteskateyek, menawan (manna) tahsh kikii ahshamikowaa kaakiih kihkenimimaahsiwek, kitetewaak kaye kaakiih kihkenimaahsikwaa. Ci⁠kihkentamowek itahsh kaakii onci tootawinek awiya hsa ehta pahkweshikanink e⁠onci pimaatisihsik, piko tahsh e⁠onci pimaatisitc kahkina kekoon ehkitonitc kaaTipencikenitc.

⁴ Kaawiin hsa kinoonteshkansiim kikikishkikaniwaan, kaawiin kaye kikiih papaakisitehsiim niimitana (40) tahso pipoon minihk.

⁵ Kite'iwaank hsa ishi kihkentamok taapishkoo inini kaashi maamiinomaatc okosihsan, mii hsa peshikwan kaaTipenciketc kiKishemanitoomiwaa entootawinek.

⁶ Miitahsh ci⁠kanawentamowek kaaTipenciketc kiKishemanitoomiwaa otinaahkonikewinan, ci‑ishi pimohsewek kaye eshihtwaatc ci⁠tako kohtaanenimek.

⁷ KaaTipenciketc kiKishemanitoomiwaa aaniihsh kiwii ishiwinikowaa eshi onishihshininik ahkiink. Wenootanoon hsa siipiinhsan, moohkiciwanipiin, misiwe piko nipi e⁠ayishiciwank eshi papahsatinaak, eshi papiihkwatinaak kaye.

⁸ Mii hsa 'iwe ahkiink eyaak pahkweshikaniwi kihtikaanehsan, parlii (barley) kaye tino manoomin. Shoominaahtikook, pik (fig) kaye tinowaahtikook, shiiwimiicimiwaahtikook kaye i'imaa ayaawak. Ayaa kaye'imaa aalip pimite, aamoowi siinsipaahkwat kaye.

⁹ I'imaa tahsh ahkiink kaawiin wiihkaa miicim ta⁠kwiinawentaakwahsinoon, kaawiin kaye kekoon kika noontehsehsiim. Mii hsa 'iwe kaye ahsiniik eshi piiwaapihkowiwaatc, eshi papiihkwatinaak kaye osaawaapihk kika ontaanihkaataam.

¹⁰ Ahpii tahsh kii⁠wiihsininek, kiihte inamanci'oyek itahsh, mii hsa 'i miikwehc ci'inek kaaTipenciketc kiKishemanitoomiwaa i'i onci ahkiini wenishihshininik kaakii miininek.”

Kii'ayaankwaamimintwaa Ciwaniihkenotawaahsikwaa KaaTipencikenitc

¹¹ “Ayaankwaamisik itahsh kehcinaac ci⁠waniihkenotawaahsiwek kaaTipenciketc kiKishemanitoomiwaa ci⁠manaa waniihkeyek kaye ci⁠kanawentamowek otinaahkonikewinan, otanami'ehcikewinan, otihkitowinan kaye noonkom kaa⁠kiishikahk kaa⁠wiintamawinakook.

¹² Ayaankwaamisik kaye ahpii kiih⁠tewiihsiniyek, kii‑ishkwaa oshihtooyek itahsh waahkaa'ikanan, taanotamek kaye,

¹³ ahpii kaye kipishihkiimiwaak, kimaanahcaanihshimiwaak kaye ani paahtiinowaatc, waapaapihko shooniyaa waapihk, osaawi shooniyaa waapihk ani paahtiinotc, kahkina kaye kekoon eyaayek ani paahtiinahtooyek,

¹⁴ kite'iwaank itahsh ani ishi kihci inenintisoyek, mii hsa 'i ci⁠waniihkenotawek kaaTipenciketc kiKishemanitoomiwaa Iicipahkiink (Egypt) kaakiih pi'onci saakiciwininek, kaakii ishi kakwaataki mihtanohkii'ikooyekipan.

¹⁵ Wiin iitok kaakiih shaapowininek i'imaa pikwatahkamik kaakii ishi kihci naniinsaanentaakwaninik, wiinke kaakii ishi paankohkamikaanik, awaac kaye e⁠nipiihkaahsininik. Eshi ayaanitc kaye kaa⁠ciihsowenitc kinepikoo', manicoosha' kaye kaa⁠ciihsowenitc. Nipiini hsa kikii onci piitamaakowaa mashkawahsiniink.

¹⁶ Weti hsa pikwatahkamikonk menawan (manna) kikii ahshamikowaa kitetewaapaniik wiihkaa kaakii amwaahsikwaa. Miitahsh kaakii onci tootawinek ci⁠tapahsenimoyek, kaakii onci kakweci'inek kaye, kiinawaa hsa piko ci⁠onci minohseyek.

¹⁷ Maakishaa aaniihsh o'o kitaa ihkitom, “Niinawint hsa ko nimashkawisiiwininaanink, eshi mashkawinihkeniyaank kaye nintoonci kashkihtamaasomin o'o kaashi wenootisiyaank,” kitaa'ihkitom.

¹⁸ Kika maamihkawim itahsh kaaTipenciketc kiKishemanitoomiwaa, wiin iitok kaa⁠miininek mashkawisiiwin ke⁠onci wenootisiyek. Miitahsh wenci ishihciketc ewii naakohtootc kaakii oshihtootc ahshotamaakewin kaakii aayiici ahshotamawaakopanen kikehteya'aamiwaapanii', taapishkoo noonkom kaa⁠kiishikahk kaa⁠ishinaakwahk.

¹⁹ Kiishpin itahsh wiin ani waniihkenotawek kaaTipenciketc kiKishemanitoomiwaa, kotak itahsh manitook ani nooci'ekwaa, anami'ehtawekwaa tahsh kaye, kiwiintamawininim hsa noonkom kaa⁠kiishikahk kehcinaac mii 'i ci⁠nihshiwanaaci'ikooyek.

²⁰ Taapishkoo hsa kotak pemaatisinitc kaaTipenciketc kaashi nihshiwanaaci'aatc enaahsamiiwek, mii hsa peshikwan keshi nihshiwanaaci'inek kiishpin kota na'ihtawaahsiwek kaaTipenciketc kiKishemanitoomiwaa.”