ᑑᑕᕒᐋᓇᒦ 34 - Ojibwe Kihcimasina'ikan

Moosihs Ahpii Kii'ishkwaapimaatisitc

¹ Moosihs (Moses) tahsh i'imaa kaa⁠ishi pashkwaak Moowap (Moab) kii⁠onci maacaa ekii ishaatc kaakii ishi'ayaanik kihci waciw Niipo (Nebo). Miihsh kaa‑ani maacaatc weti wakicaya'ii waciink Piskah (Pisgah) kaakii ishi'ayaanik waapanonk inahke Cerahko (Jericho) kihci ootenaani. Miitahsh weti kaa⁠ishi waapanta'ikotc kaaTipencikenitc i'i misiwe ahkiini. Ekii waapanta'ikotc ahkiini Kiliyat (Gilead) piinihsh weti Ten (Dan) ecikaatenik.

² Kii⁠waapanta'aa tahsh kaye ini pepahkaan kaakii ishi pahpahkwenikaatenik, Napihtalaai (Naphtali), Iihpariyam (Ephraim), i'i kaye kahkina ahkiini Coota (Judah) piinihsh weti kihcikamiink ninkaapii'anonk inahke.

³ Weti kaye nahke shaawanonk inahke Coota ahkiink, piinihsh weti kaakii ani ocihci pashkwaanik Swaar (Zoar) ecikaatenik, piinihsh weti ootenaank Cerahko eshi'ayaanitc Paam (palm) tinowaahtikoo'.

⁴ Miitahsh Moosihs kaa'ikotc kaaTipencikenitc, “Mii hsa 'iwe ahkiini kaakii ahshotamawakwaa Eparahaam (Abraham), Aaisik (Isaac), a'a kaye Cekap (Jacob) ewii miinimak opiiwesiimiwaa'. Kiin itahsh kipakitinin ci⁠waapantaman, kaawiin tahsh weti kiin kika ishaahsii,” ekii'ikotc.

⁵ Miitahsh Moosihs kaakii anohkiihtawaatc kaaTipencikenitc kaah⁠tashi ishkwaa pimaatisitc weti Moowap ahkiink, ekii ishihsenik kaakii ihkitonitc kaaTipencikenitc.

⁶ KaaTipencikenitc itahsh okii ishi na'inikoon eshi pahsatinaanik weti Moowap ahkiink, kwehkaya'ii inahke Peht pii'or (Beth peor) ootenaani kaakii ishinihkaatenik. Kaawiin itahsh awiyan okihkentansiini o'o ishi'ahpii noonkom kaa⁠kiishikaninik aniinti kaa⁠ishi na'inikaniwikopanen.

⁷ Moosihs hsa ninkotwaahk niishtana (120) kiih⁠tahso pipoonwe ahpii kii‑ishkwaa pimaatisitc. Kaawiin hsa noonta' kii⁠ahpiihciihsii, wawiinke kaye keyaapi kii⁠na'aapi i'i ahpii.

⁸ Isriyalak (Israel) tahsh i'imaa Moowap ahkiink okiih tashi mawimaawaan Moosihsoon nihsimitana (30) tahso kiishik minihk. Kekahpii tahsh kii⁠ocihcihseni ci⁠pooni mawimaawaatc.

⁹ A'awe tahsh Caahshowaa (Joshua) kaakii okosihsimikotc Nan (Nun) eshinihkaasonitc, wawiinke kiih⁠kakiihtaawi ayaa. Moosihsoon iitok okiih saaminikoon. Isriyalak tahsh okii na'ihtawaawaan, ekii ishihcikewaatc kaye kaaTipencikenitc kaakii inanoonaanitc Moosihsoon.

¹⁰ Kaawiin tahsh miinawaa wiihkaa kiihpi ayaahsii Kishemanitoon kaa⁠kanootamawaatc i'imaa Isriyalahkiink taapishkoo Moosihs. KaaTipencikenitc ohsha tipinawe okiih kihkino'amaakoon.

¹¹ Kaawiin kaye pahkaan okiikitohtamaake kiih⁠pimi ishihcikehsii taapishkoo Moosihs kaakii ishihciketc. Ekiih kashkihtootc ci⁠tootank ini kihkinawaacihcikewinan, maamahkaacihcikewinan ahpii kaaTipencikenitc kii‑ishinisha'okotc weti Iicipahkiink (Egypt) kaakii ishi'ayaanitc kihci okimaan Peroon (Pharaoh), i'i kaye kahkina kaakiih pamiihtaakonitc i'iwe kaye misiwe otahkiiminiink.

¹² Kahkina hsa kaa⁠kihci mashkawentaakwaninik, kahkina kaye kaa⁠kohtaanentaakwaninik Moosihs ekii ishihciketc, ekii waapamikotc kahkina Isriyala'.