ᑑᑕᕒᐋᓇᒦ 25 - Ojibwe Kihcimasina'ikan

¹ “Ahpii hsa ininiwak maanshi wiiciintiwaatc, ishaawaatc tahsh tipaahkonitiiwikamikonk, tipaahkonikewikimaan hsa ta⁠onentamoon aaniin ke⁠inaahkonintwaa. A'a tahsh kekoon kaakii ishi mamaashiihsik ta⁠pakitinaa, a'a tahsh kaakii mamaashiitc ta⁠inakimaa omamaashii.

² Kiishpin itahsh a'a inini kaakii mamaashiitc kashkihtamaasotc ci⁠pahpahkihte'ontc, otipaahkoniwen hsa ta⁠inaahkonikewan ci⁠animihkohshink. Miitahsh ci⁠pahpahshanshe'ontc enaahsamiinitc otipaahkoniwen. Minihk itahsh iko kaakii mamaashiitc, mii 'i minihk ke⁠pahshanshe'ontc.

³ Kaawiin itahsh awahshime niimitana (40) tahsink ta⁠pahshanshe'waahsii, aaniihsh kiishpin awahshime i'i minihk pahshanshe'ontc, maakishaa hsa ta⁠ososaami'aa eh⁠kanawaapamintc.”

⁴ “Keko kipotoonehpinaahkek pishihki mekwaa eh⁠pawishkawaatc pahkweshikanan.”

Ke'ishihcikehtamawintipan Kaa'ishkwaapimaatisitc Wiicihkiweyimaa

⁵ “Kiishpin hsa niishin wiicihkiweyimaak niishootaawaatc, peshik itahsh nipotc e⁠okosihsihsik, ini hsa wiiwan kaawiin pahkaanonk saakicaya'ii tashi wiitikehsiiwan. A'a tahsh kotak wiicihkiweyimaa oka otaahpinaan ini ihkwewan ci⁠wiiwitc. Mii hsa 'i eshinaakwaninik oncitako a'a wiicihkiweyimaa ci⁠wiitikemaahpan ini ihkwewan.

⁶ Ini tahsh nihtam ke⁠ayaawaawaatc okosihsiwaan, miiwan hsa ini keni aanihkewitoonitc wiinsowinini ini wiicihkiweyipaniin kaakii niponitc, kaawiin itahsh owiinsowinini ta⁠pooni ayaahsinini i'imaa Isriyalahkiink (Israel).

⁷ Kiishpin itahsh wiin a'a inini wii⁠wiitikemaahsik ini wiicihkiweyipaniin wiiwini, a'a tahsh ihkwe ta⁠ishaa eshi'ayaanitc kaa⁠niikaanisinitc o'o ci‑ihkitotc, ‘Ninaapemipan wiicihkiweyan hsa kaawiin inentansiiwan ci⁠ani pimiwitoonitc owiinsowini i'imaa Isriyalahkiink. Kaawiin hsa niwii tootaakohsii kekii ishihcikehpan, niinim itahsh e⁠inawemitc,’ ta⁠ihkito.

⁸ Iki tahsh kaa⁠niikaanisiwaatc ootenaank oka antomaawaan ini ininiwan ci⁠kakanoonaawaatc. Kiishpin itahsh aanciko ihkitonitc, ‘Kaawiin niwii wiitikemaahsii.’

⁹ A'a tahsh ihkwe oka naasihkawaan ini wiinimoon kaawii wiitikemikohsik ci⁠waapamikotc i'i kaa⁠niikaanisinitc ootenaank, miitahsh keshi kiitahkisinepinaatc ci⁠sihkwaanaatc owatenkoniink o'o ci‑ihkitotc, ‘Mii hsa 'o entootawintc inini kaa⁠tepwehtansik ci⁠oshihtamawaatc wiicihkiweyini opiiwesiimini,’ ta⁠ihkito.

¹⁰ A'a tahsh inini mii 'i keshi kihkentaakositc i'imaa Isriyalahkaank ‘Inawemaakan kaakiih kiitahkisinepicikaniwitc.’ ”