Cwaan 9 - Ojibwe Kihcimasina'ikan

A'a Ciisahs ekii'waapi'aatc ininiwan wiihkaa kaakii'waapihsinik

¹ Ciisahs enipimohsetc okii'waapamaan peshik ininiwan ekaa e'waapihsinik ekii'ishinihtaawikinitc.

² Okihkino'amawaakana' okiihkakwecimikoo': “Okihkino'amaake (Rabbi), awenen a'a kaa'macitootank, kaakii'onci‑ishinihtaawikitc ekaa kiiwaapihsik? Komaa wa'a inini, komaa oniiki'ikoo'?” okii'ikoo'.

³ Ciisahs okii'nahkwehtawaa': “Kaawiin wiin wa'a inini ekii'macitootank kaye i'i oniiki'ikoo'. Mii 'iwe kaaonci‑ishiayaatc ciwaapancikaatenik Kishemanitoo omashkawisiiwin aaniin i'i keshiwiici'ikotc.

⁴ Nantawentaakwan citootamank otanohkiiwin a'a kaapi‑ishinisha'otc mekwaa hsa kaakiishikahk. Tapitipihkan ihsa, miitahsh i'i ahpii awiya keanohkiihsik.

⁵ Minihk keayaayaan o'omaa ahkiink niwaahseshkawaak o'omaa kaa‑ayaawaatc ahkiink,” okii'inaa'.

⁶ Ahpii 'o kaa'ihkitotc, kiihsihko 'imaa mihtahkamik, ashishki okii'oncioshihtoon osihkowinink, ekiihshishoonamawaatc oshkiinshikoniink ini ekaa kaawaapihsinik ininiwan.

⁷ O'owehsh okii'inaan: “Maacaan, awikisiiyiinkwen 'imaa saaka'ikanihkaanenhsink Siloowam (Siloam) kaaishinihkaatek,” okii'inaan. Mii 'owe e'inwehtamawaatek ishinihkaasowin, “Maaciinisha'ikan.” Amiihsh 'iwe kii'ishaawan 'imaa, ekii'awikisiiyiinkwenitc. Miinawaa tahsh ehpiishaanitc kii'waapiwan.

⁸ I'i kaawiicitaamaanitc i'i kaye kayahte kaakii'nihtaa⁠waapamikonitc i'imaa ekiihpakohsenimonitc, mii 'owe kiihkakwetwewa': “Kaawiin ina mii wa'a kaakii'namatapitc ehpakohsenimotc?” kii'ihkitowa'.

⁹ Aanint kii'ihkitowak: “Eha', mii wa'a.” Kotak miinawaa kii'ihkitowak: “Kaawiin wiin a'a, mihci‑ishinaakosi ohsha.” Wiin itahsh kii'ihkito: “Niin ohsha wa'a,” kii'ihkito.

¹⁰ Miinawaa tahsh kii'ishikakwetwewa': “Aaniin itahsh kaaonciwaapiyan?” okii'ikoo'.

¹¹ Miihsh okii'nahkwehtawaa': “A'a inini Ciisahs kaaishinihkaasotc, ashishki okii'oshihtoon ekiihshishooyaapinitc, amiitahsh ninkii'ik: ‘Ishaan 'imaa Siloowam saaka'ikanihkaanenhsink, kisiiyiinkwen,’ ninkii'ik. Ninkiihtootam ekii'awikisiiyiinkweyaan, shemaak itahsh ninkii'waap,” kii'ihkito.

¹² “Aanti tahsh eyaatc?” okii'ikoo'. “Kaawiin ninkihkenimaahsii eyaatc,” kii'ihkito.

Perahsiik ekiihkakwe⁠kihkenimaawaatc wenciwaapinitc ini ininiwan

¹³ Okii'ishiwinaawaan itahsh ini kaakii'waapihsinik, i'imaa Perahsii' (Pharisees) eshiayaanitc.

¹⁴ E'Anwepiiwi kiishikaninik mii 'i ahpii Ciisahs kaakii'oshihtootc ashishki kaye kaakii'waapi'aatc ini ininiwan.

¹⁵ Iki tahsh Perahsiik okiihkakwecimaawaan: “Aaniin itahsh wenciwaapiyan?” okii'inaawaan. Miihsh 'iwe kaa'ihkitotc: “Ninkiihshishooyaapinik ashishki, amii ninkiihkisiiyiinkwe, miihsh iko noonkom eshiwaapiyaan,” kii'ihkito.

¹⁶ Aaninta tahsh Perahsiik kii'ihkitowak: “A'awe inini kaawiin Kishemanitoonk kii'onciihsii, aaniihsh kaawiin okanawentansiin onahshowewin kaainahtenik aaniin kekii'ishihcikehsikipan e'Anwepiiwi kiishikaninik.” Kotak itahsh kii'ihkitowak: “Aaniin tahsh wa'a inini keishikashkihtoohpan ono tino maamahkaacihcikewinan, kiishpin anoociko e'ishipimaatisitc?” kii'ihkitowak. Miihsh i'i pepahkaan okii'ayinenimaawaan.

¹⁷ Miinawaahsh 'owe okii'inaawaan ini kaakii'waapihsinikipan ininiwan: “Aaniin tahsh enenimatc kiin a'a kaakii'waapi'ihk?” O'ohsh kii'ihkito: “Mii 'awe tinowi peshik kaakanootamawaatc Kishemanitoon,” kii'ihkito.

¹⁸ Oniikaanisiiwi Coowak itahsh kaawiin kiiwiihtepwehtansiiwak kaainaacimimintc ini ekaa kaakii'waapihsinik, ekii'miinintc waapiwin, paanimaa piko kaa'nantomaawaatc oniiki'ikoni ini ininiwan.

¹⁹ Okiihkakwecimaawaa': “Tepwe na mii wa'a kikosihsiwaa? Wa'a na kaainek ekaa ekii'waapihsik ekii'ishinihtaawikitc? Aaniin tahsh ekwa' wenci⁠waapitc?”

²⁰ Oniiki'ikoo' itahsh kii'ishinahkwehtamoo': “Ninkihkentaamin niinawint wa'a ninkosihsinaan, kaye ekii'waapihsik ekii'ishinihtaawikitc.

²¹ Kaawiin tahsh ninkihkentansiimin wenciwaapitc. Kaawiin ninkihkenimimaahsiwaanaanin awenenan kaakii'minoayaa'ikotc oshkiinshikonk. Aasha kiishaapewi, kakwecimihk! Wiin kikawiintamaakowaa.”

²² Amiihsh 'owe kaakii'onci‑ihkitonitc oniiki'ikoo', ekiihkohsaawaatc oniikaanisiiwi Coowa', aaniihsh aasha ekii'inaahkonikenitc, kiishpin awiya inaatc Ciisahsoon mii wa'a Kishemanitoo kaaonaapamaatc cipimaaci'iwenitc, taoncisaakiciwepinaa awiya anami'ewikamikonk.

²³ Mii 'owe kaa'onci‑ihkitonitc oniiki'ikoo' kaakii'waapi'intc: “Aasha kiishaapewi, kakwecimihk!”

²⁴ Miinawaa iki Coowak okii'antomaawaan ini ininiwan kaakii'waapihsinikipan. “Kishemanitoo ahshotamaw citepweyan!” okii'inaawaan. “Ninkihkenimaanaan wa'a inini anoociko e'ishipimaatisitc.”

²⁵ O'owe okii'inaa': “Kiishpin anoociko eshipimaatisikwen komaa kaawiin, kaawiin ninkihkenimaahsii. Peshik ehta kekoon ninkihkentaan: kaawiin ninkii'waapihsii, shikwa noonkom niwaap!” kii'ihkito.

²⁶ O'o tahsh okii'ikoo': “Aaniihsh kaahtootawihk? Aaniihsh kaa'ishiminoyayaa'ihk ini kishkiinshikoon?” okii'ikoo'.

²⁷ Okii'nahkwehtawaa' itahsh: “Aasha ohsha kitaanakii'wiintamawininim,” okii'inaa'. “Kaawiin tahsh kikiihpisintansiinaawaa. Wekonehsh waa'oncinoontamek miinawaa? Kekiinawaa na kinantawentaam ciokihkino'amawaakaniminek?”

²⁸ Okiihkihci⁠nooci'aawaan itahsh: “Kiin peshik okihkino'amawaakanan a'a inini! Niinawint wiin Moosihs (Moses) okihkino'amawaakana'!

²⁹ Ninkihkentaamin Kishemanitoo ekiihkanoonaatc Moosihsoon. Wa'a tahsh inini kaawiin ninkihkentamowaahsiimin aanti kaahtashinihtaawikitc ootenaank,” kii'ihkitowak.

³⁰ A'a tahsh inini okii'nahkwehtawaa': “Maamahkaac tepwe 'owe, ekaa ehkihkenimaahsiwek aanti wenciitc, eniwehk itahsh ekii'waapi'itc!

³¹ Kikihkentaamin Kishemanitoo ehpisintawaahsik awiyan anoociko kaaishipimaatisinitc. Kiishpin tahsh awiya kaakihci‑inenimaatc Kishemanitoon, tootank itahsh kaye otinentamowinini, mii 'awe pesintaakotc Kishemanitoon.

³² Ahpan kaapionciahkiiwank kaawiin wiihkaa kii'onciahko⁠noontaakwahsinoon awiya ciwaapi'aatc awiyan ekii'ishinihtaawikinitc e'waapihsinik.

³³ Kiishpin wa'a inini Kishemanitoonk onciihsikipan, kaawiin kekoon otaakiihkashkihtoohsiin citootank.”

³⁴ Okii'nahkwehtaakoo' itahsh: “Wawiinke anoociko kikiihpi‑ishipimaatis ahpane kaakii'nihtaawikiyan! Kiwiihkakwe⁠kihkino'amawinaam inahsh!” Miitahsh kaa'ishisaakiciwepinaawaatc anami'ewikamikonk onci.

Aaniin enentaakositc awiya e'waapihsik otahcaahkonk inahke

³⁵ Ahpii tahsh Ciisahs kaa'noontank ekiihsaakiciwepinimintc, okii'awimihkawaan, ekii'inaatc: “Kitepweyenimaa na Inini oKosihsan kaainintc?” okii'inaan.

³⁶ O'o tahsh okii'ikoon: “Awenen a'a? Wiintamawihshin, keniin citepweyenimak.”

³⁷ Ciisahs o'owe okii'inaan: “Kikii'waapamaa, mii wa'a kaakakanoonihk.”

³⁸ O'o kii'ihkitowan: “Tepencikeyan! Nintepweyentam!” Amiihsh i'i kaashiociciinkwanapiihtaakotc.

³⁹ Ciisahs kii'ihkito: “Mii 'owe kaakii'oncipiishaayaan o'omaa ahkiink, oko pemaatisiwaatc cinaakwaninikin omacitootamowiniwaan; miitahsh ikiweniwak kaawaapihsikwaa ciwaapiwaatc, iki tahsh kaawaapiwaatc ciwaapihsikwaa,” kii'ihkito.

⁴⁰ Aanint iki Perahsiik (Pharisees) i'imaa kaawiicikaapawihtawaawaatc, ekii'noontamowaatc 'owe ihkitowin, miihsh kaa'ihkitowaatc: “Kaawiin maawiin kitishihsiiminaatok keniinawint e'waapihsiwaank?” kii'ihkitowak.

⁴¹ Ciisahs o'owe kii'ihkito: “Kiishpin waapihsiwekipan kaawiin kitaaonci‑inakimikoohsiim cikikishkaakoyek macihcikewin. Niwaapimin itahsh e'ihkitoyek, mii'iwe kaaonci‑inentaakosiyek keyaapi ehkikishkaakoyek macihcikewin,” okii'inaa'.