Cwaan 8 - Ojibwe Kihcimasina'ikan

Ciisahs ekiihpi‑ishiwitawintc ihkwewan cionahshowaanaatc

¹ Ciisahs itahsh kii'ishaa Aalip (Olive) Pihkwatinaank.

² Wiipa kikishep miinawaa kiihpiishaa Kihcianami'ewikamikonk. Kahkina tahsh i'i pemaatisinitc okiihpinaasihtaakoo'. Amiitahsh kaa'ishionapitc ehkihkino'amawaatc.

³ Iki tahsh kaakihkino'amaakewaatc Inaahkonikewin, Perahsiik (Pharisees) kaye, okiihpi‑ishiwitawaawaan ihkwewan ekii'onciotaahpinaawaatc mekwaa pihshikwaatisiwinink e'wiiciiwaanitc ininiwan kaaonaapemihsinik. I'imaahsh naawaya'ii okii'oshikaapawi'aawaan.

⁴ Miihsh 'iwe kaa'ihkitowaatc: “Okihkino'amaake! Wa'a ihkwe kii'mihtinaa pihshikwaatisiwinink. Kii'mihkawaa mekwaa e'ishihciketc ekii'wiiciiwaatc ininiwan kaaonaapemihsik.

⁵ Moosihs (Moses) ninkii'inaahkonikonaan wa'a tino cinihsipapiimwahsina'intc. Aaniin itahsh kiin ehkitoyan?”

⁶ O'owehsh wenci‑inaawaatc, ewiihkakwe⁠kashki'aawaatc ciwanikiishwenitc, ewii'ontinamowaatc keonci⁠tipaahkonaawaatc Ciisahsoon. Ciisahs itahsh kii'nawakikaapawi, oninc ekii'oshipii'ikaaketc 'imaa mihtahkamik.

⁷ Keyaapi tahsh ehkakwecimikotc kiihtashokaapawi, mii 'iwe ekii'inaatc: “Awiya kiinawaa ekaa wiihkaa meci‑ishihcikehsikwen maano miiwa'a niikaan okapimwahsina'aan,” okii'inaa'.

⁸ Miinawaa kii'nawakikaapawi ekii'oshipii'iketc mihtahkamik.

⁹ Iki tahsh ahpii kaanoontawaawaatc kiinioncimaamaacaawak eshipepeshikowaatc, nihtam kaakehteyaatisiwaatc piinihsh ekiihcaakimaacaawaatc. Piinihsh Ciisahs kii'mihcipeshiko, ini kaye ihkwewan i'imaa e'niipawinitc.

¹⁰ Ciisahs ehtashokaapawitc okii'inaan ini ihkwewan: “Aanti ahpan iki kaawiihtipaahkonihkwaapan? Kaawiin inahsh awiya nipowinink kikainakimikohsii?”

¹¹ Miihsh kaa'ikotc ini ihkwewan: “Kaawiin awiya.” Ciisahs itahsh 'owe kii'ihkito: “Kaawiin tahsh keniin kikainakimihsinoon. Animaacaan,” okii'inaan. “Keko miinawaa wiihkaa maci‑ishihcikehken.”]

Ciisahs kaapiwaahseshkawaatc ahkiink kaa‑ayaanitc

¹² Ciisahs miinawaa okiihkanoonaa': “Niin kaapiwaahseshkawakwaa ahkiink kaa‑ayaawaatc. A'a tahsh kepiminisha'otc kaawiin kashkiitipihkanonk tapimohsehsii,” kii'ihkito. “Oka‑ayaan waahseyaa tepwe keoncipimaatisinaaniwank,” kii'ihkito.

¹³ Perahsiik (Pharisees) itahsh okii'inaawaan: “Kiin kaatipaacintisoyan, kaawiin taoncikihkencikaatehsinoon ehtepweyan.”

¹⁴ Ciisahs itahsh o'owe okii'inaa': “Aanawiin niin nintipaacintis, eniwehk itahsh tepwemakan nintipaacimowin. Aaniihsh ninkihkentaan pemionciiyaan miinawaa kaye eshaayaan. Kiinawaa kaawiin kitaawiintansiinaawaa wenciiyaan miinawaa kaye eshaayaan.

¹⁵ Ininiiwi inentamowinink itahsh kiinawaa kiwii'onci⁠tipaahkoniwem. Kaawiin niin awiya niwiihtipaahkonaahsii.

¹⁶ Kiishpin itahsh niin tipaahkoniweyaampaan, taatepwemakan keshitipaahkoniweyaan, aaniihsh kaawiin nimpeshikohsii. Niwiiciiwik a'awe Weyoohsimak kaakiihpi‑ishinisha'otc.

¹⁷ Miihsh 'owe eshipii'ikaatek kitOonahshowewiniwaank, ‘Tatepwehtawaawak enaacimowaatc niishin ininiwak peshikwan kii‑inaacimowaatc.’

¹⁸ Niin peshik kaatipaacintisoyaan, miinawaa Weyoohsimintc kaakiihpi‑ishinisha'otc kewiin nintipaacimik,” kii'ihkito.

¹⁹ Okii'ikoo' itahsh o'oweniwa': “Aaniin a'a Weyoohsimatc?” Ciisahs itahsh okii'nahkwehtawaa': “Kaawiin kikihkenimihsiim, kaawiin kaye kikihkenimaahsiwaawaa 'a Weyoohsimak. Kiishpin kiikihkenimiwekopanen, Noohs kaye kitaatako‑⁠kiihkihkenimaawaa,” okii'inaa'.

²⁰ Miiwan onoweniwan kahkina kaakiihtashi⁠kihkino'amaaketc i'imaa e'ayaatc Kihcianami'ewikamikonk. Pehsho na'itaak kii'ayaa 'imaa shooniyaanhsak kaatashipakitinintwaa. Kaawiin mahshi okii'onciotihtinikohsiin awiyan. Kaawiin mahshi kii'ocihcihsehsinini i'i ci⁠shiwepisitc.

Niin weti eshaayaan kaawiin kikakii'ishaahsiim ekii'inaatc

²¹ Ciisahs miinawaa okii'inaa': “Nimaacaa, kikananaantonawim. Shikwa kika⁠kikinipom ini kimacihcikewiniwaan. Shikwa weti eshaayaan kaawiin kikakashkihtoohsiinaawaa cipiishaayek.”

²² Kii'ihkitowak itahsh niikaanisiiwi Coowak: “Wii'nihsitiso maawiin kaaonci‑ihkitotc: ‘Weti eshaayaan kaawiin kikakashkihtoohsiinaawaa cipiishaayek.’ ”

²³ Ciisahs itahsh 'owe kii'ihkito: “O'omaa niihsaya'iink kiinawaa kitoonciim,” okii'inaa'. “Niin itahsh ishpimink ninkiihpioncii. Kiinawaa tahsh wiin ahkiink kitooncitipentaakosim,” okii'inaa'. “Kaawiin niin ahkiink nintooncitipentaakosihsii.

²⁴ Mii 'owe kaaonci‑ininakook, kika⁠kikinipom kimacihcikewiniwaan. Kiishpin ekaa tepweyentansiwek niin A'awe mayaa ehTinowiyaan, kika⁠kikinipom kimacihcikewiniwaan.”

²⁵ Miihsh i'i kaa'inaawaatc: “Awenen a'a ehtinowiyan?” Ciisahs itahsh o'owe kii'ihkito: “Mii 'awe peshikwan kaakiihpiwiintamawinakook ehtinowiyaan, taapishkoo kaakiihpi‑ishimaaciiwiintamawinakook.

²⁶ Niipiwa' kekoon nintayaan ci‑ininakook kaye cioncitipaahkoninakook. A'awe kaahpi‑ishinisha'otc tepwewiniwi. Mii 'awe kaashinoontawak ehta niwiintamawaak 'omaa ahkiink kaa‑ayaawaatc,” kii'ihkito.

²⁷ Kaawiin itahsh okii'nihsitohtawaahsiwaawaan ehtipaacimaanitc Weyoohsimimintc, “a'a kaahpi‑ishinisha'otc” ehkitotc.

²⁸ Miihsh i'i kaa'onci‑ihkitotc: “Paamaa ahpii kiiompaahkonimek Inini oKosihsan, mii 'i ahpii kekihkenimiyek niin A'awe mayaa ehTinowiyaan. Kikakihkenimim itahsh niin enentamaan kekoon e'onci‑ishihcikehsiwaan; kaashikihkino'amawitc ohsha ehta Weyoohsimintc, mii 'i ehkitowak.

²⁹ A'a kaakiihpi‑ishinisha'otc niwiiciiwik. Kaawiin tahsh nimpeshikohsii, kaawiin wiihkaa ninakanikohsii. Aaniihsh mooshak nintootamowaan i'iwe kaaminwaapantank,” okii'inaa'.

³⁰ 'Oweni tahsh Ciisahs e'ishikakitotc, niipiwa' awiya' kaakii'noontaakotc okiihtepweyenimikoo'.

Owiinaa' awenenan tepenintisonitc, awenenan kaye kaatipenimaakaniwinitc

³¹ Okii'inaa' i'i Coowa' kaatepweyenimikotc: “Kiishpin 'iwe anitootamek ninkihkino'amaakewin, mii 'iwe tepwe kikaokihkino'amawaakanimininim.

³² Kikakihkentaanaawaa tahsh i'i tepwewin, tepwewin itahsh kikapakitinikom keyaapi citipenimaakaniwihsiwek,” okii'inaa'.

³³ O'owehsh okii'nahkwehtaakoo': “Niinawint Eparahaamink (Abraham) nintoontahkaanesimin. Kaawiin wiihkaa awiya ninkiihpakitinaahsiwaanaan citipenimiyamintc. Aaniihsh kiin eshiyaank, ‘kikapakitinikoom citipenimaakaniwihsiwek’?” okii'ikoo'.

³⁴ Ciisahs tahsh okii'inaa': “Tepwemakan o'o kaaininakook, awiya e'maci‑ishihciketc otipenimikon i'i macihcikewin.

³⁵ Kaawiin awiya anohkii'aakan ahpane tatipentaakosihsii i'imaa owaahkaa'ikaniniink ini kaatipenimikotc. A'awe wiin okosihsimaa pishihshik tatipentaakosi oteten owaahkaa'ikaniniink.

³⁶ Kiishpin itahsh Kishemanitoo oKosihsan pakitininek onci 'iwe kaawiihkakwetipenimikoyek, miitahsh i'i tepwe keishinaakosiyek taapishkoo awiya kaatipenimikohsik awiyan.

³⁷ Kikihkenimininim Eparahaamink e'ontahkaanesiyek. Kikii'nanaantonaanaawaa tahsh ewii'nihshiyek, aaniihsh ninkihkino'ikewinan kaawiin kiwii'otaahpinansiinaawaa.

³⁸ Iniweniwan niiniko kaakii'waapantamowak Noohs ekii'wiiciiwak, mii 'owe tepaatotamaan. Kekiinawaa tahsh koohsiwaa kaakii'ishinoontawek kitishihcikem,” okii'inaa'.

³⁹ Okii'nahkwehtaakoo' itahsh: “Eparahaam nintooyoohsimin kaaontahkaanesiyaank.” Ciisahs itahsh okii'inaa': “Kiishpin tepwe Eparahaam weyoohsiwekwen, kitaakii'naapitootaam a'a Eparahaam kahkina kaakii'ishihciketc.

⁴⁰ Noonkom itahsh waa'ishihcikeyek kikakwenihshim, niin kaakii'wiintamawinakook ehta tepwewin kaakii'ishinoontawak Kishemanitoo. Kaawiin wiin Eparahaam okiihtootansiin o'owe kaaishihcikeyek.

⁴¹ I'iwehsh kitishihcikem kiinawaa piko koohsiwaa kaatootank,” okii'inaa'. O'owehsh kii'ihkitowak: “Kaawiin wiin niinawint i'imaa pikwatooshaaniwiwinink ninkii'oncinihtaawikihsiimin. Peshiko a'awe nOohsinaan, mii 'awe ehta Kishemanitoo,” kii'ihkitowak. “Tepwe piko nintookosihsimikonaan.”

⁴² Ciisahs i'iwe okii'inaa': “Kiishpin Kishemanitoo kiioyOohsiyekipan kitaakiihsaaki'im, aaniihsh Kishemanitoonk ninkiihpioncii, miihsh noonkom o'omaa kaaonciayaayaan. Kaawiin niin enentamaan ninkiihpioncipiishaahsii. Wiin ninkiihpi‑ishinisha'ok.

⁴³ Wekonen itahsh 'iwe kaaonci⁠nihsitohtansiwek nintipaacimowin? Kaawiin kiwiihpisintansiinaawaa ini nintihkitowinan, mii 'i wencinihsitohtansiwek.

⁴⁴ Kiinawaa kitooncitipentaakosim a'a koohsiwaa kaaishiayaatc, amii wa'a maciaya'aa. I'iwe kaawiihtootank, miihsh kekiinawaa waahtootamek. Weshkac pishihshik kiihpionci⁠nihtaa⁠nihshiweshki. Kaawiin wiihkaa tepwewin okiihpiwiicihtoohsiin, aaniihsh kaawiin kanake kekoon tepwewin okikishkansiin. Ahpii ewiihkiiwanimotc, mii piko ehta ehtootank i'iwe kaainaatisitc. Aaniihsh pishihshik kakiinawishki. Otootetemikon kahkina kiiwanimowin.

⁴⁵ Niin itahsh kiikiikitoyaan ehtepweyaan, amii 'iwe kaawii'onci⁠tepwehtawihsiwek.

⁴⁶ Awenen itahsh kaatahshiyek ketipaacimitc ‘kikii'macihcike’ cikii'ishihpan? Kiishpin tahsh tiyepwewaanen, wekonen tahsh i'i wencitepwehtawihsiwek?

⁴⁷ Kishemanitoonk kaaonciitc opisintaanan Kishemanitoon otihkitowinini. Kiinawaa tahsh wiin wencipisintansiwek, aaniihsh Kishemanitoonk kaawiin kitooncitipentaakosihsiim,” okii'inaa'.

Awahshime na kikihci‑inentaakos ahpiihc Eparahaam ekii'inintc Ciisahs

⁴⁸ Okiihkakwecimaawaan tahsh iki Coowak: “Kaawiin ina kwayahk nintihkitohsiimin eh⁠Sameriyaawininiiwiyan (Samaritan) kaye ehkikishkawatc maciahcaahk?” okii'ikoo'.

⁴⁹ Ciisahs okii'inaa': “Kaawiin, kaawiin nintayaawaahsii maciahcaahk. Ninkihci‑inenimaa 'a Noohs; kiinawaa tahsh anoociko kitishim.

⁵⁰ Kaawiin niin tipinawe ninantone'ansiin ninkihci‑inentaakosiwin. Ayaa 'awe entone'ank i'iwe kaakihci‑inentaakosiyaan, kaye kwayahk enaahkoniwetc.

⁵¹ Tepwemakan 'owe kaawiintamawinakook: kiishpin awiya tootank ini ninkihkino'ikewinan, kaawiin wiihkaa tanipohsii.”

⁵² Miinawaa okii'nahkwehtaakoo' ini Coowa': “Miitahsh i'i ehkihkentamaank e'ayaawatc maciahcaahk,” kii'ihkitowa'. “Eparahaam (Abraham) kii'nipo, kaye Kishemanitoo otipaacimowininiima' kii'nipowa'. Kiin tahsh wiin kitihkit: ‘Kiishpin awiya kanawentank ninkihkino'ikewinan, kaawiin wiihkaa tanipohsii.’

⁵³ Awahshime nahsh kiin kikihci‑inentaakos ahpiihc a'a noohsinaapan Eparahaam kaakii'nipotc, kaye Kishemanitoo otipaacimowininiima' kaakii'niponitc? Awenehsh kiin enenintisoyan?” okii'ikoo'.

⁵⁴ Ciisahs okii'nahkwehtawaa': “Kiishpin niin kihci‑inakintisoyaampaan kaawiin kekoon taainaapatahsinoon ninkihci‑inakimikoowin. Noohs itahsh a'a kaakihci‑inakimitc, mii 'awe kaainek ‘ninKishemanitoominaan’.

⁵⁵ Kaawiin wiihkaa kitooncikihkenimaahsiwaawaa. Niin tahsh wiin ninkihkenimaa. Kiishpin ‘Kaawiin ninkihkenimaahsii’ ihkitoyaampaan ninkamihcikiiwanim taapishkoo kiinawaa kaaishihcikeyek. Tepwe tahsh niin ninkihkenimaa kaye ninkanawentamowaanan otihkitowinan.

⁵⁶ A'a tahsh Eparahaam koohsiwaapan kiih⁠ciihkentam piciinak ewii'waapantank ninkiishikaam ahpii ketakwihshinowak. Tepwe okii'niikaaniwaapantaan, kii'minwentam itahsh,” okii'inaa'.

⁵⁷ O'owehsh okii'ikoo' Coowa': “Kaawiin iitok mahshi naanimitana kitahsopipoonwehsii. Aanti tahsh inaa kekii'onsaapamatipan Eparahaam?” okii'ikoo'.

⁵⁸ Ciisahs tahsh kii'ihkito: “Nintepwe e'wiintamawinakook: cipwaa ayaatc Eparahaam, aasha o'o kaaTinowiyaan ninkiihTinow,” kii'ihkito.

⁵⁹ Okii'otaahpinaawaa' itahsh ahsinii' iki Coowak ewiih⁠papiimwahsina'aawaatc. Ciisahs itahsh kiihtapasii ekii'anionci⁠maacaatc i'imaa Kihcianami'ewikamikonk onci.