Cwaan 7 - Ojibwe Kihcimasina'ikan

Ciisahs ehtepweyenimikohsik wiicihkiweya'

¹ Kaaishkwaahsek o'o Ciisahs kiihpapaamohse i'imaa Kaalaliink (Galilee). Kaawiin kii'inentansii i'imaa cipapaaishaatc Cootiiyaank (Judea) aaniihsh weti Coowa' oniikaanisiimini okii'ahkamaakoo' ekii'nanaantone'okotc ewii'nihsikotc.

² Aasha kekaa kii'aniocihcihseni Coowak ewii'ishi⁠wiihkwantiwahkamikisiwaatc akawaahte'ikiwaamink ekii'ayishitaawaatc acina.

³ Okiihkanoonikoo' Ciisahs wiicihkiweya': “'Omaa oncimaacaan, ishaan weti Cootiiyaank, wiinawaa weti kaakiihpiminisha'ohkwaapan ciwaapantamowaatc ini kimaamahkaacihcikewinan kaatootaman,” okii'ikoo'.

⁴ “Awiya misiwe wiihkakwekihkenimintc kaawiin okaatoohsiin ominohcikewinan. Kiishpin aaniihsh ono eshihcikewanen, naakosin misiwe ahkiink ehtootamowanen,” okii'ikoo'.

⁵ Aaniihsh ampooshke kewiinawaa wiicihkiweya' kaawiin okiihtepweyenimikohsii'.

⁶ Ciisahs itahsh 'owe okii'inaa': “Kaawiin niin mahshi na'ihsehsinoon ci‑ishaayaan. Kiinawaa wiin aaniin iko 'iwe ahpii taishihse,” okii'inaa'.

⁷ “Kaawiin aaniihsh kiinawaa kikashiinkenimikohsiiwaak ahkiink kaaoncitipentaakosiwaatc. Niin itahsh wiin ninshiinkenimikook, aaniihsh nintipaatotamowaan otishihcikewiniwaan e'maci‑ishiwepaninikin.

⁸ Ishaak kiinawaa 'imaa kaashiwiihkwantiwahkamikisinaaniwank. Kaa mahshi niin ninkaishaahsii 'imaa kaawii'inahkamikisinaaniwank. Kaa mahshi niin ishihsehsinoon ci‑ishaayaan,” okii'inaa'.

⁹ Ahpii 'owe kaa'ihkitotc keyaapi 'imaa kii'ayayaa Kaalaliink (Galilee).

Ciisahs ekii'ishaatc kaashiwiihkwantiwahkamikisinaaniwank Cootiiya ahkiink

¹⁰ Ahpiihsh i'i wiicihkiweya' kaa'animaacaanitc ekii'ishaanitc kaawii'ishiwiihkwantiwahkamikisinaaniwaninik, kewiin tahsh kii'ishaa, kiimoociko, kaawiin wiin mohsheya'ii, cikihkenimikohsik awiya' aweneniwitc.

¹¹ Weti tahsh kaashiwiihkwantiwahkamikaninik okii'nanaantonikoo' i'i Coowa' oniikaanisiimini, 'iwe ekii'ihkitonitc: “Aanti eyaatc?”

¹² Niipiwa' i'imaa kiihkiimooci kanoonitiwak iki piyaahtenowaatc wiin onci: “Kwayahk ininiiwi,” kii'ihkitowak aaninta. Kotak itahsh: “Kaawiin,” kii'ihkitowak, “owayeshimaa' ini pemaatisinitc.”

¹³ Kaawiin iko awiya mohshe okiihtashimaahsiwaawaan, aaniihsh okiihkohsaawaa' oniikaanisiiwi Coowa'.

Kaa'ishikihkino'amaaketc Ciisahs i'imaa kaashiwiihkwantiwahkamikaninik

¹⁴ Ahpii kekaa aapihta e'ani‑ishihsek kaashiwiihkwantiwahkamikaninik, kii'ishaa Ciisahs i'imaa Kihcianami'ewikamikonk, amiihsh i'imaa kii'maaciikihkino'amaake.

¹⁵ Oniikanisiiwi Coowak itahsh kii'maamahkaatentamook: “Aaniin itahsh wencikihkentaahsotc wa'a inini, wiihkaa e'oncikihkino'amawaahsiwintc,” kii'ihkitowak.

¹⁶ Ciisahs okii'nahkwehtawaa': “Kaawiin niin ninkihkino'amaakewin, a'awe hsa kaakiihpiicinisha'otc, mii'awe okihkino'amaakewin,” okii'inaa'.

¹⁷ “Kiishpin awiya wiihtootank kaainahtenik otinentamowinini Kishemanitoon, okakihkentaan kiishpin Kishemanitoonk wenciimakanokwen ninkihkino'amaakewin, kemaa niin piko wenciimakanokwen ninkiikitowin.

¹⁸ A'awe wiin iko i'imaa kaaoncikiikitotc, wiin iko onantonaan okihci‑inentaakosiwin. A'ahsh wiin kaa‑anohkiitc cioncikihci‑inentaakosinitc ini kaakiihpi‑ishinisha'okotc, mii wa'a wiinke misiwe kaakwayahkotepwetc inini. Kaawiin tahsh kekoon wayeshinkewin otayaahsiin kaaishihciketc,” okii'inaa'.

¹⁹ “Moosihs (Moses) iitok kikii'miinikowaa 'iwe Onahshowewin. Kaawiin tahsh awiya kaatahshiyek otipitootansiin 'iwe Onahshowewin. Wekonen tahsh waaoncinihshiyek?” okii'inaa'.

²⁰ Okii'nahkwehtaakoo' itahsh i'i kaapaahtiinonitc: “Kehcinaac iitok maciahcaahk kitayaawaatok! Awenen waahkakwenihsihk?” okii'ikoo'.

²¹ Ciisahs itahsh okii'nahkwehtawaa': “Peshik kihcianohkiiwin ninkii'ishihcike e'Anwepiiwi kiishikahk, kahkina tahsh kikii'maamahkaatentaanaawaa.

²² Moosihs (Moses) kikii'inaahkonikowaa cikihkinawaatashakeshontiyek. Kaawiin wiin mayaa Moosihs otInaahkonikewinink kii'onciimakahsinoon, ikiweniwak koohsiwaapaniik, mii weti kaa'onciimaacihsek. Mooshak kikihkinawaatashakeshwaawaak kwiiwisenhsak aanawiin e'Anwepiiwi kiishikaninik.

²³ Kiishpin awiya kwiiwisenhs ishihcike'intc e'Anwepiiwi kiishikaninik ekaa cipoonihcikaatehsininik Moosihs otInaahkonikewin, wekonen itahsh wencinishkenimiyek misiwe ekii'minoayaa'ak a'a inini e'Anwepiiwi kiishikaninik?” okii'inaa'.

²⁴ “Keko wiin ehta wakicaya'ii eshiwaapantamek ishionahshowaashiwehkek, i'iwe eshikwayahkwahk ishionahshowaashiwek,” okii'inaa'.

Koonike tepwe mii wa'a Kishemanitoo kaaonaapamaatc cipimaaci'iwenitc e'ihkitowaatc

²⁵ Mekwaa aaninta kii'ihkitowak i'imaa Ceroosalamink kaa‑ayaawaatc: “Kaawiin ina miiwan ono kaawiihkakwenihsaawaatc kiniikaanisiiminaanik?

²⁶ Nashke pisaaniko mohshe piko kiikito! Kaawiin awiya' kekoon otikohsii'. Koonike mii 'i ehkihkenimaawaatc oniikaanisiik miiwan ono Kishemanitoo kaakii'onaapamaatc cipimaaci'iwenitc e'aawinitc?

²⁷ Ahpii tahsh takwihshink a'a kaakii'Onaapamintc, kaawiin awiya okakihkenimaahsiin aanti wenciitc. Kahkina tahsh kiinawint kikihkenimaanaan a'a inini wenciitc,” kii'itiwak.

²⁸ Mekwaa tahsh ehkihkino'amaaketc Kihcianami'ewikamikonk Ciisahs kiihshaakowe e'ihkitotc: “Tepwe na kikihkenimim? Kikihkentaanaawaa na wenciiyaan? Kaawiin niin tipinawe nintinentamowinink nintooncipiishaahsii. A'awe tahsh kaahpi‑ishinisha'otc tepwewiniwi, kaawiin tahsh kiinawaa kikihkenimaahsiwaawaa.

²⁹ Niin itahsh wiin ninkihkenimaa. Wiin kaashiayaatc nimpioncii, ninkiihpi‑ishinisha'ok itahsh,” kii'ihkito.

³⁰ Miihsh miinawaa okiihkakwe tahkonaawaan. Kaawiin tahsh awiya okii'otihtinaahsiin. Kaawiin aaniihsh mahshi kwayahk kii'ocihcihsehsinini i'iwe ci‑ishiwepisitc.

³¹ Niipiwa' itahsh iki kaakii'maawaci'itiwaatc okiihtepweyenimaawaan i'iwe e'ihkitowaatc: “Ahpii takwihshininitc Kishemanitoo kaakii'onaapamaatc cipimaaci'iwenitc, awahshime na tamaamahkaacihcikewan ahpiihc wiin wa'a inini aasha kaa'ishihciketc?” kii'itiwak.

Shimaakanihshak ekii'maacinisha'ontwaa citahkonaawaatc Ciisahsoon

³² Iki aaninta Perahsiik (Pharisees) okii'noontawaawaa' kaapaahtiinonitc ehkiimoocitashimaanitc ini Ciisahsoon. Miihsh 'i ahpii oko Perahsiik kaye Kihcianami'ewikimaak okii'maaciinisha'waawaa' kanawencikewi⁠shimaakanihsha' ciawitahkonaanitc ini Ciisahsoon.

³³ Ciisahs itahsh kii'ihkito: “Kaawiin aahpici kinwesh kikawiiciiwihsinooninim, aasha kekaa e'ocihcihsek cimaacaayaan cinaasihkawak a'awe kaakiihpiicinisha'otc.

³⁴ Kikananaantonawim itahsh 'i ahpii, kaawiin tahsh kikamihkawihsiim. Aaniihsh weti niin keshiayaayaan kaawiin kiinawaa kikakashkihtoohsiim cipiishaayek,” okii'inaa'.

³⁵ Kiihkakwecintiwak itahsh iki oniikaanisiiwi Coowak: “Tipi waa'ishaakwen, cimihkawaahsiwank itahsh? Koonikehsh weti wii'ishaatok Kariihka' (Greeks) otootenaaminiink kaashisasiihswetataanitc kiwiicitinohkaaniminaani'? Koonike owiihpapaa kihkino'amawaatokena' i'i Kariihka'?

³⁶ Wekotokwen o'o tino kaaitank: ‘Kikananaantonawim, kaawiin itahsh kikamihkawihsiim,’ shikwa: ‘I'imaa keshiayaayaan kaawiin kiinawaa kikapiishaahsiim,’ kaaininank?” kii'itiwak.

Kaatashintank Ciisahs i'i nipi kaapimaatisiishkaakemakaninik

³⁷ Ishkwaac itahsh ekii'ishikiishikahk ekii'wiihkwantiwahkamikisinaaniwank, amii 'iwe maawac kaakihci‑inentaakwahk ekii'ishikiishikahk, mii 'i ahpii Ciisahs kii'niipawi ekiihshaakowetc e'ihkitotc: “Kiishpin awiya nwaantaayaapaakwekwen, maano ninkapinaasihkaak, miihsh 'i taminihkwe.

³⁸ Mayaa kaaihkitoomakahk 'iwe kihcioshipii'ikewin: ‘A'a hsa kaatepweyenimitc, i'imaa ote'ink taonciciwaniniwan siipiiwan kaapimaatisiishkaakemakaninik nipi,’ ” kii'ihkito.

³⁹ Kishemanitoon otAhcaahkwan ini kaa'inaatc a'a Ciisahs, miiwan ini Ahcaahkwan keotaahpinaanitc awenena' iko ketepweyenimikotc. Kaawiin aaniihsh mahshi kii'oncimiikiwaaniwihsii a'a Ahcaahk, aaniihsh kaa mahshi Ciisahs kii'ompinaahsii okihci‑inentaakosiwinink.

Pepahkaan ekii'inenimaawaatc Ciisahsoon awenenan tenowinitc

⁴⁰ Niipiwa' itahsh i'imaa okii'noontawaawaan i'i kaa'ihkitonitc, miihsh i'i ehkitowaatc: “Amii wa'a tepwe kaa‑ahshawaapamimintc Kishemanitoo oTipaacimowininiiman!” kii'ihkitowak.

⁴¹ Kotak itahsh kii'ihkitowak: “Kehcinaac amii wa'a Kishemanitoo kaakii'onaapamaatc cipimaaci'iwenitc!” Aaninta miinawaa kii'ihkitowak: “Kaawiin ohsha tapionciihsii Kaalaliink (Galilee) a'a kaaOnaapamintc!

⁴² Kaawiin ina kihcioshipii'ikewin ihkitoomakahsinoon a'a kaakii'Onaapamintc ciontahkaanesitc Tepitink (David), shikwa Pehtalihemiink (Bethlehem) citashinihtaawikitc, mii 'iwe ootenawenhs i'imaa Tepit (David) kaakii'ishiotaawinitc,” kii'ihkitowak.

⁴³ Miihsh i'imaa pepahkaan okii'ayinenimaawaan oko kaapaahtiinowaatc, awenen eyaawinikwen.

⁴⁴ Aanint awiya okiiwiihtahkonaawaan, kaawiin tahsh awiya kekoon okiihtootawaahsiin.

Iki niikaanisiiwi Coowak ekiiwiihtepweyenimaahsikwaa

⁴⁵ Miitahsh Kanawencikewi-shimaakanihshak kaa'ishikiiwe naasihkawaawaatc i'i Perahsii' (Pharisees) kaye Kihcianami'ewikimaa' kaakii'ishinisha'okowaakopanen. Miitahsh kaa'ikowaatc: “Wekonehsh wencipiinaahsiwek?” okii'ikowaa'.

⁴⁶ Iki tahsh shimaakanihshak okii'nahkwehtawaawaa': “Kaawiin wiihkaa inini ishikiikitohsii o'o kaashikiikitotc wa'a inini,” kii'ihkitowak.

⁴⁷ Perahsiik (Pharisees) itahsh okii'nahkwehtawaawaa': “Kekiinawaa na tahsh kiwanihshimikowaa?

⁴⁸ Wiihkaa na awiya onahshowewinini komaa kaye Perahsiik okiihtepweyenimaawaan? Kaawiin awiya!

⁴⁹ Oko pemaatisiwaatc kaawiin okihkentansiinaawaa Moosihs (Moses) otInaahkonikewin. Kishemanitoon okii'inakimikowaan cinihshiwanaatisiwaatc!” okii'inaa'.

⁵⁰ Nihkatiimahs (Nicodemus) kewiin kiihtinowi Perahsiik. Mii wa'a kaakii'naasihkawaatc Ciisahsoon otaanaank 'iweti. Okiihkakwecimaa' itahsh owiicionahshowewininiima':

⁵¹ “Kaawiin inahtehsinoon kitInaahkonikewininaan cionahshowaanank awiya, paanimaa ehta ko kiinoontawintc kaye kiikihkenimintc eshihciketc,” okii'inaa'.

⁵² Kii'nahkwehtamook itahsh: “Kekiin ina kitooncii Kaalaliink (Galilee)? Haw kakwemihkan, antone'an kihcioshipii'ikewinink, kikawaapantaan. Kaawiin wiihkaa awiya Kishemanitoo otipaacimowininiiman i'imaa onciihsiiwan Kaalaliink,” okii'inaawaan.

⁵³ [Miitahsh kahkina i'imaa entahshiwaatc kaani‑ishikakiiwewaatc entaawaatc.