Cwaan 5 - Ojibwe Kihcimasina'ikan

Imaa waashipiiyaank ekiihpimaaci'aatc otaahkosiin a'a Ciisahs

¹ Ahpii e'ishkwaaishiwepahk kii'maacaa Ciisahs weti Ceroosalamink (Jerusalem) ekii'ishaatc, ekii'ocihcihsenik kaashiwiihkwantiwahkamikisiwaatc iki Coowak otanami'aawiniwaank.

² I'imaa tahsh Ceroosalamink ayaa peshik saaka'ikanihkaanenhs i'imaa waahkaaya'ii e'ayaakin e'naanwewaanakahkin kaashitapinawahkitekin. Mii 'imaa takwan i'i saaka'ikanihkaanenhs i'imaa pehsho KihciMaanahcaanihshiwi Ishkwaantemink. Peht Saahta (Bethzatha) ishinihkaate 'i saaka'ikanihkaanenhs, Hiiparoo (Hebrew) ishikiishwewinink.

³ Mii 'imaa kaa'ishipimihshinowaatc kaakiihpaahtiinowaatc otaahkosiik, ekaa kaakii'waapihsikwaa kaye kaamaahkishkaawaatc kaye kaanipowiayaawaatc.

⁵ Kii'ayaa 'imaa peshik inini aasha nihsimitanahshinihshwaahso (38) tahsoahki e'aahkositc.

⁶ Ciisahs itahsh okii'waapamaan ehpimihshininitc, shikwahsh ehkihkenimaatc aasha kinwesh mii 'iwe ekii'ishiayaanitc, okiihkanoonaan: “Kinantawentaan ina ciminoayaayan?” okii'inaan.

⁷ Miitahsh kaa'ikotc ini kaa‑aahkosinitc: “Kaawiin awiya nintayaawaahsii cipahkopii'otc ahpii e'maataakamishkaak nipi. Mekwaa tahsh iko ehpiishaayaan, aasha kotak awiya nintaacinaa'ik ehpahkopiitc.”

⁸ Ciisahs itahsh okii'inaan: “Wanishkaan, otaahpinan kitahpihshimon, pimohsen,” okii'inaan.

⁹ Shemaak a'a inini kii'minoayaa. Okii'otaahpinaan otahpihshimon ekiihpimohsetc. Mii 'iwe e'Anwepiiwi kiishikaninik ahpii kaakiihpimohse'intc.

¹⁰ Miitahsh i'i kaa'oncikanoonikotc oniikaanisiiwi Coowa': “Anwepiiwi kiishikan ohsha,” okii'ikoo'. “Kaawiin inahtehsinoon kitOonahshowewininaan cipimiwitooyampan kitahpihshimon,” okii'ikoo'.

¹¹ Miihsh kaa'ishinahkwehtawaatc: “A'awe kaakiihpimaaci'itc mii 'owe kaakii'ishitc: ‘Otaahpinan kitahpihshimon, pimohsen, ninkii'ik.’ ”

¹² Miihsh okihkakwecimikoo': “Awenen a'a kaakii'inihk?”

¹³ A'a tahsh kaakiihpimaaci'intc kaawiin okiihkihkenimaahsiin awenenan ini. Aasha aaniihsh Ciisahs i'imaa kii'oncimaacaa, mii 'imaa eshipaahtiinonitc mekweya'ii ekii'ishiwaninaako'itisotc.

¹⁴ Naake tahsh miinawaa Ciisahs okii'mihkawaan Kihcianami'ewikamikonk ini ininiwan. O'owehsh okii'inaan Ciisahs: “Inashke aasha kiminoayaa. Keko miinawaa animacitootanken, nawac awahshime kekoon kikamaashiotihsikon,” kii'ihkito.

¹⁵ Miihsh kaa'ishi‑ishaatc a'a inini ekii'awiwiintamawaatc i'i oniikaanisiiwi Coowa', Ciisahsoon iniweniwan kaakiihpimaaci'ikotc.

¹⁶ Miitahsh o'omaa onci oniikaanisiik kaa'oncimaaciimikoshkaaci'aawaatc ini Ciisahsoon, ekiihtootaminitc i'iwe ekiihpimaaci'iwenitc e'Anwepiiwi kiishikaninik.

¹⁷ O'o tahsh Ciisahsoon okii'ishinahkwehtaakowaan: “NinTete ahpane piko pitootam 'owe anohkiiwin, miihsh keniin eshinaakwahk ci‑inanohkiiyaan.”

¹⁸ Miihsh o'owe onci ekii'ihkitonitc, oniikaanisiiwi Coowak awahshime okii'nanaantone'aanaawaa ewii'nihsaawaatc Ciisahsoon, kaawiin wiin ehta 'iwe ekiihpiikonaminitc Anwepiiwi kiishikani Onahshowewin, i'iwe ohsha kaye “Kishemanitoo ninTete” ekii'ihkitonitc; mii 'iwe “Kishemanitoo kaashiahpiihtentaakositc, kaye niin peshikwan nintahpiihtentaakos” ekii'ishikiishwenitc.

Owiintaan aanti kaa'oncimiinintc okashki'ewisiwin Ciisahs

¹⁹ Miihsh imaa 'owe okii'inaa': “Tepwemakan i'i kaawiintamawinakook. A'awe oKosihsimaa kaawiin tipinawe kekoon taatootansiin, piko eshiwaapamaatc oTeten e'ayintootaminitc. 'Iwe kaa‑ayishihciketc Weyoohsimintc, amii kewiin mayaa peshikwan 'iwe kaa‑ayintootank a'a oKosihsimaa.

²⁰ A'a tahsh Oyoohsimaa osaaki'aan ini oKosihsimaan, shikwa kahkina kekoon owaapanta'aan eshihciketc. Shikwa keyaapi awahshime kaakihci‑inentaakwaninikin okawaapanta'aan kihcianohkiiwinan citootaminitc ahpiihc ono kaahtoocikaatekin, cimaamahkaatentamek.

²¹ Shikwa 'awe Weyoohsimintc kaaishi kiiwepimaatisi'aatc kaaniponitc awiya' e'miinaatc pimaatisiwin, kewiin peshikwan oKosihsimaa omiinaa' pimaatisiwin awenena' iko kaainenimaatc.

²² Shikwa 'awe Oyoohsimaa kaawiin wiin awiyan otipaahkonaahsiin. Okii'miinaan tahsh kahkina tipaahkoniwewin ini oKosihsimaan wiin citipaahkoniwenitc.

²³ Mii peshikwan kahkina iki pemaatisiwaatc cikihci‑inenimaawaatc ini oKosihsimaan taapishkoo kaaishi kihci‑inenimaawaatc ini Oyoohsimaan. A'a tahsh kaakihci‑inenimaahsik oKosihsimaan kaawiin okihci‑inenimaahsiin kaye Oyoohsimaan kaakiihpi‑ishinisha'okonitc.

²⁴ “Tepwemakan o'o kaawiintamawinakook: awenen iko kenoontank nintihkitowinan kaye tiyepweyenimaatc ini kaakiihpi‑ishinisha'onitc, otayaan pimaatisiwin wiihkaa keishkwaahsehsinok. Kaawiin tatipaahkonikaniwihsii, aasha 'imaa nipowinink ekii'onciaashawishkaatc, weti e'ayaatc pimaatisiwinink.

²⁵ Tepwewin kiwiintamawininim: piciinak hsa tapiocihcihse, aasha hsa ko ocihcihse ahpii, ikiweniwak aasha kaanipowaatc cinoontamowaatc otinwewinini ini Kishemanitoo oKosihsan. Ikiweniwak itahsh kaanoontamowaatc tapimaatisiwak.

²⁶ Shikwa 'awe Weyoohsimintc kaashikashkihtamawaatc pimaatisiwin awiya', mii peshikwan okii'inahsaan ini oKosihsan kewiin cikashkihtamawaanitc pimaatisiwin.

²⁷ Kaye okii'miinaan ini oKosihsimaan citipaahkoniwenitc, aaniihsh Inini oKosihsan tinowiwan.

²⁸ Keko maamahkaatentankek o'o kaaininakook, aaniihsh aasha weyiip taishihse ahpii kahkina kaakii'ishkwaapimaatisiwaatc kenoontamowaatc nintinwewin.

²⁹ Tapionciwanishkaawak i'imaa kaa'ishina'inintwaa. Iki kaakii'minoishihcikewaatc tawanishkaawak cikiiwepimaatisiwaatc tepwe pimaatisiwinink. Ikihsh kaye kaakii'macihcikewaatc taishikiiwepimaatisiwak wiinawaa wiin cionahshowaanintwaa.”

Aanti wencikihkenimintc Ciisahs e'onciitc Kishemanitoonaank

³⁰ Shikwa kii'ani‑ihkito: “Kaawiin niin kekoon e'mihcipeshikoyaan nintaakashkihtoohsiin. Eshinoontawak ehta 'a ninTete, nintishitipaahkonike. Kwayahkwan hsa kaaishitipaahkonikeyaan, aaniihsh kaawiin ninantonansiin niin nintinentamowin, otinentamowin hsa 'a kaakiihpi‑ishinisha'otc.

³¹ “Kiishpin niinehta tipaacintisoyaan cikanootamaatisoyaan, kaawiin iinsan tepwe kitaainihtawihsiim.

³² Ayaa tahsh kotak kaatipaacimitc. Ninkihkentamowaan otipaacimowin kaainaacimitc ehtepwemakaninik.

³³ Kikii'ishinisha'waawaak awiyak cikakwecimaawaatc Cwaanan (John). Okiihtipaatotaan 'iwe tepwewin.

³⁴ Kaawiin wiin awiya inini nimpakohsenimaahsii citipaacimitc, mii 'iwe ehta wencitipaacimak Cwaan kaakii'ishitashimitc, kiinawaa cipimaaci'ikooyek.

³⁵ Waahsahkonencikan e'minwaahsahkonek kii'inwaanaa 'a Cwaan citinowitc. Kikii'inentaanaawaa noomake cionciminwentamek owaahsesiwin.

³⁶ Nawac itahsh nintayaan kihcitipaacimikoowin ahpiihc a'a Cwaan kaa'inaacimitc. Ini hsa anohkiiwinan kaakii'miishitc a'a ninTete cikiishihtooyaan, miiwan ono anohkiiwinan noonkom entootamaan kaatipaacimikoyaan tepwe ekiihpi‑ishinisha'otc a'a Weyoohsimintc.

³⁷ Wiin a'a Weyoohsimintc kaakiihpi‑ishinisha'otc kaye wiin nintipaacimik. Kaawiin wiihkaa kikii'oncinoontansiinaawaa otinwewin, kaye kaawiin kikii'onciwaapamaahsiwaawaa eshinaakositc.

³⁸ Kaye kaawiin kikiih kikishkaakohsiinaawaa otihkitowin, aaniihsh kaawiin kitepwehtawimaahsiwaawaan ini kaakiihpi‑ishinisha'waatc.

³⁹ Kinanaantone'ike i'imaa kihcioshipii'ikewinink aaniihsh mii 'imaa nintoonciayaamin pimaatisiwin keishkwaahsehsinok kitinentaam. Mii ohsha 'imaa kihcioshipii'ikewinink kaaishitipaacimikooyaan.

⁴⁰ Kaawiin itahsh kiwiihpinaasihkawihsiim ciayaayek pimaatisiwin.

⁴¹ “Kaawiin wiin 'imaa ininiink nintoonciantone'ansiin kihci‑inentaakosiwin.

⁴² Kikihkenimininim itahsh aaniin entinowiyek, ekaa ehkikishkansiwek Kishemanitoo cisaaki'ek.

⁴³ NinTete otishinihkaasowin ninkiihpikikis, kaawiin itahsh kiwii'otaahpinihsiim. Kiishpin tahsh kotak awiya tipinawe wiiniko otishinihkaasowin pikikisitc, amii wa'a kikaotaahpinaawaa.

⁴⁴ Kiinawaa kiminwentaanaawaa e'miinitiyek i'i minwakimikoowin, kaawiin itahsh kitoonciantone'ansiinaawaa minwakimikoowin 'awe kaashipeshikotc Kishemanitoo kemiininekipan. Aaniihsh i'i keshitepwehtawiyek i'iwe kaaishiayaayek?

⁴⁵ “Keko niin inenimihshihkek cimaci‑inaacimohtawak a'a ninTete kiinawaa enaatisiyek. Ayaa hsa peshik e'maashitipaaciminek, amii wa'a Moosihs (Moses) kaa‑ahpenimonotawek.

⁴⁶ Kiishpin tepwe kiitepwehtawaawekopanen a'a Moosihs, keniin kitaakiihtepwehtawim. Niin aaniihsh kaakiihtipaacimitc i'imaa otooshipii'ikewinink.

⁴⁷ Iniwe tahsh ekaa ehtepwehtansiwek otooshipii'ikewinan, aaniin itahsh niin kekii'ishitepwehtamek nintihkitowin?” okii'inaa' Ciisahs i'i niikaanisiiwi Coowa'.