Cwaan 3 - Ojibwe Kihcimasina'ikan

Ciisahs ekiihpiwaapamikotc Nihkatiimahsan

¹ Kii'ayaa 'a peshik Perahsii (Pharisee) Nihkatiimahs (Nicodemus) ekii'ishinihkaasotc. Mii hsa wa'a peshik otoonahshowewininiimiwaan Coowak.

² Amii wa'a okii'naasihkawaan Ciisahsoon ehtipihkaninik, mii 'iwe ekii'inaatc: “Okihkino'amaake, kikihkenimikoo e'okihkino'amaakewiyan Kishemanitoo ekiihpiicinisha'ohk. Kaawiin awiya inini taatootansii ono maamahkaacihcikewinan kiin kaatootaman, Kishemanitoon ehta wiiciiwikotc taatootam.”

³ Ciisahs okii'nahkwehtawaan: “Tepwe kiwiintamawin, kiishpin ekaa awiya miinawaa nihtaawikihsik, kaawiin okawaapantansiin Kishemanitoon oTipencikewinini,” okii'inaan.

⁴ Nihkatiimahs kii'ihkito: “Aaniihsh keishinihtaawikihpan inini aasha ehkihtaatisitc? Kehcinaac kaawiin otaakashkihtoohsiin cipiinsihkawaahpan ini omaamaan miinawaahsh cinihtaawikihpan.”

⁵ Ciisahs itahsh okii'nahkwehtawaan: “Tepwemakan o'o kaawiintamawinaan, kiishpin ekaa awiya nipiink kaye Kishemanitoon otAhcaahkoniink oncinihtaawikihsik, kaawiin tapiintikehsii Kishemanitoon oTipencikewininiink.

⁶ Awiya oniiki'ikoo' kaaoncinihtaawikitc, mii 'imaa wentinank wiiyawink ehpimaatisitc. Shikwa tahsh Kishemanitoon otAhcaahkoniink e'oncinihtaawikitc awiya, mii 'imaa keontinank tepwe cipimaatisinitc otahcaahkwan.

⁷ Keko maamahkaatentanken e'ininaan oncita piko miinawaa cinihtaawikiyek.

⁸ Inashke tahsh waa'ayishinoowek nootin ayishinoowe. Kinoontaan e'matwenoowek, kaawiin itahsh kikakii'wiintansiin aanti wenciik kaye aanti eshaamakahk. Mii 'iwe eshiayaatc kahkina awiya Kishemanitoon otAhcaahkoniink kaaoncinihtaawikitc.”

⁹ Nihkatiimahs okii'nahkwehtawaan: “Aaniihsh o'o keishiayaak kaaihkitoyan?”

¹⁰ Ciisahs itahsh okii'inaan: “Kiin kikihkino'amawaak Isriyalak (Israel). Kaawiin ina kikihkentansiin o'o?

¹¹ Tepwe kiwiintamawin, niwiintaamin ini kaakihkentamaank, nintipaatotaamin kaye kaakii'waapantamaank. Kaawiin tahsh kiwii'otaahpinansiinaawaa nintipaacimowininaan.

¹² Kiishpin tepweyentansiwek ahpii wiintamawinakook ahkiink kaa‑ayishiwepahk, aaniihsh keshitepweyentamekipan wiintamawinakook kihcikiishikonk kaa‑ayishiwepahk?

¹³ Kaawiin awiya wiihkaa kihcikiishikonk kii'ishimaacaahsii, mii ehta 'a kihcikiishikonk kaakiihpionciniihsiitc, mii 'awe Inini oKosihsan, weti kihcikiishikonk kaa‑ayaatc.

¹⁴ “Shikwa kaakii'ishiompaahkwa'waatc Moosihs (Moses) okinepikohkaanan pikwatahkamikaank, mii 'iwe keshiompaahkwa'ikaniwitc Inini oKosihsan.

¹⁵ Miitahsh o'owe keoncitoocikaniwitc, piko awiya ehtepweyenimaatc pishihshik ciayaatc pimaatisiwin ekaa wiihkaa keishkwaahsehsinok.

¹⁶ Aaniihsh Kishemanitoo ehpiihcishawenimaatc pemaatisinitc ahkiink, kii'miikiwe ehpeshikonitc oKosihsan, awenenan itahsh iko ketepweyenimaatc, ekaa cinihshiwanaatisihsik, ciayaatc itahsh i'iweni pimaatisiwin wiihkaa keishkwaahsehsininik.

¹⁷ Kishemanitoo okiihpi‑ishinisha'waan oKosihsan omaa ahkiink, kaawiin wiin cipitipaahkonaanitc i'i ahkiink kaa‑ayaanitc, wiin cioncipimaatisinitc i'i ahkiink kaa‑ayaanitc.

¹⁸ A'a tahsh tiyepweyenimaatc ini oKosihsimaan kaawiin tatipaahkonaahsii. A'a tahsh ekaa kaatepweyenimaahsik, mii wa'a aasha kiihtipaahkonikaniwi, ekiihtepwehtawaahsik eshinihkaasonitc kaaopeshikoKosihsaamikonitc Kishemanitoon.

¹⁹ Amii 'owe eshihsek i'i tipaahkonikoowin, waahseyaa ekiihpimi takwihshinoomakaninik omaa ahkiink, iki tahsh pemaatisiwaatc nawac okiihsaakihtoonaawaa kashkiitipihkan. Kaawiin okii'minwentansiinaawaa 'iwe waahseyaa, aaniihsh otootamowiniwaank kii'maci‑ishiwepisiwak.

²⁰ Tahsin awiyak kaamacitootamowaatc oshiinkentaanaawaa 'i waahseyaa. Kaawiin owii'naasihkansiinaawaa 'i waahseyaa, ekaa cinaakwahsininik otishihcikewiniwaan.

²¹ A'awehsh wiin kwayahk kaatootank onaasihkaan 'i waahseyaa cinaakwaninik otishihcikewinan, Kishemanitoonk kaakii'onciimakaninik ekii'nana'ihtawaatc.”

Cwaan kii'wiintamaake ini Ciisahsoon ehkihci‑inentaakosinitc

²² Ahpii 'owe e'ishkwaaishihsek, Ciisahs kaye okihkino'amawaakana' kii'ishaawak i'imaa Cootiiya (Judea) ahkiink. Kinweshiihsh i'imaa okii'ishiwaawiiciiwaa' okihkino'amawaakana' kaye ekiihtashisiika'antaaketc.

²³ Cwaan (John) kewiin kiihtashi siika'antaake Iinanink (Aenon) ciikaya'ii 'imaa Selim (Salim) ekii'nipiihkaanik i'imaa. Kiihpaapiishaawak awiyak ewiihsiika'antawintwaa.

²⁴ Kaa mahshi o'o ahpii kiihkipa'waahsii Cwaan.

²⁵ Aanint Cwaan okihkino'amawaakana' kaye peshik Coo kii'ishikakwe shaakoosontiwak aaniin e'inentamowaatc i'iweni kiikisiiyaapaawacikenk kaye kiikisiiyaapaawasonk i'imaa kaaishianami'aawaatc.

²⁶ Okii'naasihkawaawaan ini Cwaanan ekii'inaawaatc: “Okihkino'amaake, kikihkenimaa na a'a kaakii'wiiciiwihk akaamink Cwaartanink (Jordan), a'a tahsh kaakiihtipaacimatc? Nashke noonkom siika'antaake, kahkina opinaasihkaakoo'.”

²⁷ Cwaan okii'nahkwehtawaa': “Kaawiin awiya okakashkihtoohsiin kekoon ciayaatc, paanimaa ehta Kishemanitoon miinikotc.

²⁸ Kiinawaahsh iko kikatipaacimim ekii'ihkitoyaan: ‘Kaawiin niin Kishemanitoo oPimaaci'iwewininiiman. Niin tahsh ninkiihpi niikaaninisha'okoo kepi‑ishaatc,’ ninkii'ihkit.

²⁹ A'a kaakihciwiikihtootc inini, mii wa'a waatikemaatc ini ihkwewan. Inihsh owiiciiwaakanan a'a kaaoshkihkwewetc owiicikaapawiihtaakoon ehpisintaminitc. Minwentamoon itahsh e'noontaakotc a'a weshkihkwewetc. Mii 'owe peshikwan keniin nimooshkine minwentam.

³⁰ Nawac wiin awahshime taishpentaakosi, niin itahsh wiin pankii ninkani‑inentaakos.”

WeKosihsimintc a'awe ishpimink kaaonciitc

³¹ “A'a tahsh ishpimink kaaonciitc amii 'awe maawac kehci‑inentaakositc. A'awe tahsh ahkiink kaaonciitc, ahkiink oncitipentaakosi, kaye ahkiink kaaishihsenikin otashintaanan. A'a tahsh kihcikiishikonk kaaonciitc amii 'awe maawac kihci‑inentaakosi ahpiihc kahkina awiya'.

³² 'Iwe kaakii'waapantank kaye kaakii'noontank, amii 'owe tepaatotank. Kaawiin tahsh awiyan otootaahpinamaakohsiin otipaacimowin.

³³ Awenen itahsh iko kaaotaahpinamawaatc otipaacimowinini, amii 'imaa eshikihkinawaacihtootc ehtepweyenimaatc Kishemanitoon ehtepwewiniwinitc.

³⁴ A'awe Kishemanitoon kaakiihpi‑ishinisha'okotc otashintaan Kishemanitoon otihkitowinini, aaniihsh wiinke piko eshi mooshkine ishiayaanitc otAhcaahkoni okii'miinikoon Kishemanitoon.

³⁵ A'a Weyoohsimintc osaaki'aan oKosihsan, kahkina hsa ko kekoon ekii'miinaatc citipentaminitc.

³⁶ A'a tahsh tiyepweyenimaatc ini weKosihsimimintc otayaan pimaatisiwin wiihkaa keishkwaahsehsininik. A'a tahsh ekaa kaatepweyenimaahsik ini oKosihsimaan kaawiin wiihkaa okawaapantansiin pimaatisiwin. Kishemanitoon onishkaatisiwinini okapatakoshkaakon mooshak pishihshik.”