Cwaan 20 - Ojibwe Kihcimasina'ikan

Na'initiiwikamikonk ekii'ayaahsininik Ciisahs wiiyaw

¹ Paanimaa e'aniAnami'ekiishikahk wiipa cipwaa piitaapaninik, Meri (Mary) Maakatalaank (Magdala) kaaonciitc kii'ishaa weti na'initiiwikamikonk. Okii'waapamaan ini ahsiniin aasha ekiihtawinikaniwinitc 'imaa na'initiiwikamikonk kaahkipapinihpan.

² Kii'maaciipahtoo, ekii'naacipa'aatc Saaiman Piitaroon (Simon Peter) kaye kotak kihkino'amawaakanan ini maawac Ciisahs kaakiihsaaki'aatc. Miihsh okii'wiintamawaa': “Awiyak okii'otaahpinaanaawaa kaaTipencikenitc wiiyawini, kaawiin tahsh ninkihkentansiimin aanti kaa'ahtoowaatc,” okii'inaa'.

³ Miitahsh kii'animaacaawak Piitar kaye kotak a'a kihkino'amawaakan, ekii'ishaawaatc na'initiiwikamikonk.

⁴ Minciniish kii'anipimipahtoowak. A'ahsh kotak kihkino'amawaakan okii'nakacipa'aan Piitaroon. Niikaan okii'aniotihtaan i'i na'initiiwikamik.

⁵ Kii'nawakii ekiihpiinsaapitc. Okii'waapantaanan ini waapishkiikinoon ehta e'ahtenikin. Kaawiin wiin kiihpiintikehsii.

⁶ Miihsh Piitar otaanaank kiihpioncitakohshin. Kwayahk iko kiihpiintike 'imaa na'initiiwikamikonk. Okii'waapantaanan ini waapishkiikinoon e'ahtenikin.

⁷ Kaye okii'waapantaan waapishkiikinoonhs kaakiih titipeyiikihtikwaanehpisonitc Ciisahsoon. Kaawiin 'imaa kiihtakwahtehsinoon ini waapishkiikinoon kaashiayaakin, pihkihsh itahsh 'imaa kii'ahte ekiihtitipeyiikihsink.

⁸ Miitahsh kewiin kaa'ishipiintiketc a'a kotak kihkino'amawaakan nihtam kaakiihtakwihshink i'imaa na'initiiwikamikonk. Okii'waapantaan tahsh, miitahsh kiihtepweyentam.

⁹ Kaawiin aaniihsh mahshi okiikihkentansiinaawaa Kihcioshipii'ikewin, oncita piko cikiiwepimaatisinitc ahpii ishkwaaniponitc kaaihkitoomakahk.

¹⁰ Miihsh iki kihkino'amawaakanak kii'anikiiwewak 'imaa kaa'ishitaawaatc.

Meri e'waapamaatc Ciisahsoon, ehkanoonaatc kaye

¹¹ Meri (Mary) tahsh kii'niipawi akwaciink na'initiiwikamikonk e'mawitc. Mekwaa tahsh e'mawitc kii'nawakii, ekiihpiinsaapantank na'initiiwikamikonk,

¹² ekii'waapamaatc itahsh niishin encala' e'waapishki kikishkikenitc, e'namatapinitc i'imaa kaakii'ishiahtenikopanen wiiyawini Ciisahsoon. Peshik 'imaa kaakii'ishihtikwaanehsininikopanen kii'ishinamatapiwan, shikwa peshik kaakii'ishisitehsininikopanen.

¹³ Okiihkanoonikoo' itahsh: “Wekonen wencimawiyan?” okii'ikoo'. 'Owehsh okii'inaa': “Awiyak okii'maaciitoonaawaa ninTipencikeman wiiyawini, kaawiin tahsh ninkihkentansiin aanti kaa'ishiahtoowaatc.”

¹⁴ Miitahsh kiihkwehkikaapawi, e'waapamaatc Ciisahsoon e'niipawinitc. Kaawiin tahsh okiihkihkenimaahsiin Ciisahsoon e'aawinitc.

¹⁵ Okiihkanoonikoon: “Wekonen wencimawiyan,” okii'ikoon. “Awenen nenaantawaapamatc?” okii'ikoon. Wiin tahsh a'a ihkwe, kihtikewinini maawiin ekii'inenimaatc ciaawinitc, mii 'o kaa'inaatc: “Kiishpin kaa'maaciitoowanen i'i wiiyaw, wiintamawihshin aanti kaa'ahtooyan, ninka‑awiotaahpinaan,” okii'inaan.

¹⁶ Ciisahs itahsh okii'inaan: “Meri!” Meri tahsh kiihkwehkikaapawi. “Oraapooni!” kii'ihkito. Miihsh i'iweni kaa'itank “ninKihkino'amaakem” 'imaa Hiiparoo (Hebrew) ishikiishwewinink.

¹⁷ Okii'ikoon tahsh: “Keko minciminihshihken. Kaa mahshi nintishiompishkaahsii cinaasihkawak a'awe ninTete. Awikanoohsh itahsh iki niicihkiweyak kaaishinihkaanakwaa, 'owe ciawi‑inatwaa: ‘Niwii'ishpishkaa, ninkiiwenotawaa 'awe ninTete kaye kiinawaa kaaoTeteyek. Mii wa'a niin ninKishemanitoom kaye kiinawaa kiKishemanitoomiwaa,’ ” nintinaak.

¹⁸ Miitahsh Meri Maakatalawihkwe (Mary Magdalene) okii'awiwiintamawaa' kihkino'amawaakana'. “Ninkii'waapamaa kaaTipenciketc,” kii'ihkito. Shikwa okii'wiintamawaa' 'iwe Ciisahsoon kaakii'ikot.

Ekii'naako'itisohkantawaatc Ciisahs okihkino'amawaakana'

¹⁹ Miitahsh 'iwe e'anionaakohshik i'iwe e'anami'ekiishikahk, kihkino'amawaakanak piintik kii'maawaci'itiwak, ekiihkipaahkwa'amowaatc ishkwaanteman, ekiihkohsaawaatc aaniihsh oniikaanisiiwi Coowa'. Ciisahs itahsh 'imaa naawaya'ii kiihpiniipawi, miihsh ekiihkanoonaatc: “Pisaanentamowin kikawiiciiwikom,” okii'inaa'.

²⁰ Ahpiihsh 'iwe kaa'inaatc okii'waapanta'aa' oninciin kaye 'i ohpimenaw kaashiena'ikaniwitc e'ociihshisitc. Kiihkihciminwentamook kihkino'amawaakanak ahpii e'waapamaawaatc kaaTipencikenitc.

²¹ Miinawaa keyaapi okii'inaa' Ciisahs: “Pisaanentamowin kikawiiciiwikom. Kaakii'ishipiicinisha'otc a'a ninTete, keniin itahsh kitishimaacinisha'oninim kekiinawaa.”

²² Miitahsh okiihpaapootaanaa', miihsh kaa'inaatc: “Otaahpinihk Kishemanitoo otAhcaahkwan cipiincishkawinek.

²³ Awiyak omacitootamowiniwaan inekwaa ehpoonentamawintwaa, kewiin okapoonentamawaa' Kishemanitoo, ahpan iko poonentamawaawak. Kiishpin poonentamawaahsiwek, takihciwinamawaawak.”

NinTipencikem, ninKishemanitoom ekii'inaatc Twaamahs ini Ciisahsoon

²⁴ Peshik a'a kaakii'mitaahshiniishiwaatc kihkino'amawaakanak, Twaamahs (Thomas), Niishoote kaa'ishi nekaaminihkaacikaniwitc, kaawiin 'imaa kii'wiici'iwehsii ahpii Ciisahsoon kiipinaakosinitc.

²⁵ Kotak itahsh kihkino'amawaakanak kiihtipaacimowak: “Ninkii'waapamaanaan kaaTipenciketc,” okii'inaawaan Twaamahsoon. Miihsh i'i kaa'ihkitotc Twaamahs: “Kiishpin waapantamowaahsiwak oninciink eshi⁠eshihsininikin saka'ikanan kaye nininc saaminamawaahsiwak kaashiena'ikaniwitc kaye ohpimenaw saaminamawaahsiwak, kaawiin wiihkaa ninkatepwehtansii,” kii'ihkito.

²⁶ Nihshwaahsokiishik itahsh e'ishihsenik miinawaa kii'maawaci'itiwak. Twaamahs kaye wiin kii'wiici'iwe. Aanawiin kiihkipa'ikaatewan ishkwaanteman, kii'onciayaa 'imaa piintik a'a Ciisahs, naawaya'ii 'imaa e'niipawitc. “Pisaanentamowin kikawiiciiwikom,” okii'inaa'.

²⁷ Miitahsh okiihkanoonaan Twaamahsoon: “Pi‑ishininciinin o'omaa, waapantan nininciin,” okii'inaan. “Kaye pi‑ishinihkenin, pisaaminihshin 'imaa ohpimenaw. Keko keyaapi ihkitohken e'aanwehtaman, tepwehtan,” okii'inaan.

²⁸ Miitahsh okii'ikoon Twaamahsoon: “Kiin ninTipencikem! Kiin ninKishemanitoom!” kii'ihkitowan.

²⁹ Ciisahs itahsh okii'inaan: “Ekii'waapamiyan ina kitooncitepwehtam? Aahpici tahsh tashawentaakosiwak iki ekaa kaawaapamihsikwaa, shaakooc itahsh kaashitepwehtamowaatc!”

Wekonen i'i kaa'oncioshipii'ikaatek o'o masina'ikan

³⁰ Niipiwa' itahsh kotak kekoonan kii'maamahkaacihcike Ciisahs ekii'waapamikotc okihkino'amawaakana', ekaa kaaoshipii'ikaatehsinokin o'omaa masina'ikanink.

³¹ Onoweniwan tahsh oshipii'ikaatewan citepwehtawek Ciisahs, amii wa'a Kishemanitoo oKosihsan kaakii'onenimaatc cipimaaci'iwenitc. O'owe tahsh e'ishitepweyenimek, wiin cioncimiinikooyek pimaatisiwin.