Cwaan 2 - Ojibwe Kihcimasina'ikan

Ekiihkihciwiitikenaaniwank i'imaa Kena

¹ Eniniishokiishikwakaanik itahsh kiihkihciwiitikenaaniwan i'imaa ootenawenhsink Kena (Cana) ekii'ishinihkaatek, Kaalaliiwi ahkiink (Galilee) kaa‑ayaak. Omaamaan a'a Ciisahs i'imaa kii'ayaawan.

² Kewiinawaa ekii'antomintwaapan Ciisahs kaye okihkino'amawaakana' kii'ayaawak kihciwiitikentiwinink.

³ Ahpiihsh e'aninoontehsenik shoominaapo, Ciisahs omaamaan okiihkanoonikoon: “Kaawiin tepihsehsinoon shoominaapo,” okii'ikoon.

⁴ Ciisahs kii'ihkito: “Aaniin niin eshipapaamimiyan,” okii'inaan. “Kaa mahshi tipihsehsinoon cimaatanohkiiyaan,” okii'inaan omaamaan.

⁵ Miitahsh kaa'ishikanoonaanitc omaamaan i'i anohkii'aakana': “Aaniin iko keininek, mii 'i ishihcikek,” okii'inaa'.

⁶ Kii'ayaawan i'imaa ninkotwaahso ahsiniiwi ahtoopaanan e'mihshaakin, nipi kaashiahtek tino. Wiinawaa Coowak otanami'aawiniwaank okii'inwaataanaawaan ahsiniiwi ahtoopaanan ekiihpehkaapaawacikaakewaatc kaye ehkisiiyaapaawasowaatc. Kanapac niishtana tahso tipa'oopaaneyaa kemaa nihsimitana pepeshik kiihtepipiiwan.

⁷ Ciisahs itahsh okiihkanoonaa' ini anohkii'akana': “Mooshkinepatook nipi ahsiniiwi ahtoopaanink.” Wiinkehsh okiihtipi⁠mooshkinepatoonaawaa.

⁸ Miihsh okii'inaa': “Haw kwaapa'amohk, awimiinihk itahsh awe wiihkwankewikimaa,” okii'inaa'. Okii'ishiwitawaawaan itahsh i'i nipi

⁹ aasha ekiihshoominaapowaninik. Miihsh ehkocihpitank a'a wiihkwankewikimaa, kaawiin okiihkihkentansiin aanti kaaonciinik i'i shoominaapo. Ikihsh wiin kaakiihkwaapa'amowaatc anohkii'aakanak okiihkihkentaanaawaa kaaonciinik. A'a tahsh wiihkwankewikimaa okiihkanoonaan ini wiikihtoowininiwan:

¹⁰ “Kotak awiya e'wiihkwanketc, niikaan kaaonishihshininik mina'iwe shoominaapo, paamaahsh niipiwa' e'animinihkwenitc, kaawentakintek shoominaapo ishkwaac okamina'aa',” okii'inaan. “Kiin itahsh kikiihkanawentaan wenishihshink shoominaapo, noonkom o'owe ishkwaac mena'iweyan,” kii'ihkito.

¹¹ Mii 'owe nihtam maamahkaacihcikewin Ciisahs kaa'ishihciketc i'imaa Kenaank Kaalaliink ekii'ayaatc. Mii 'omaa kaa'ishinaakohtootc okihci‑inentaakosiwin. Shikwahsh okii'oncitepweyenimikoo' okihkino'amawaakana'.

¹² Miihsh kaa'ishkwaaishiwepahk o'o, weti kii'ishaa Kaparniyamiink (Capernaum). Okii'aniwiiciiwikoo' omaamaan, wiicihkiweya' kaye okihkino'amawaakana'. Kaawiin tahsh aahpici kinwesh imaa tahsokon kii'ayaahsiiwak.

Ciisahs ekiihsaakicinisha'waatc kaakii'wanaacihtoonitc Kihcianami'ewikamik

¹³ Aasha kekaa kii'ocihcihseni kaaishiwiihkwantiwahkamikisinaaniwank Pimaaci'ikoowi Wiihkwantiwin kaaishinihkaatek, ekii'nihtaaishihcikewaatc Coowak. Mii 'o ahpii Ciisahs kii'ishaatc Ceroosalamink (Jerusalem).

¹⁴ Miihsh i'imaa okii'otihsaa' Ciisahs iniweniwa' ehtanataawaakenitc Kihcianami'ewikamikonk pishihkiwa', maanahcaanihsha', omiimiinhsa', kaye iniweniwa' shooniyaan kaameshkwatoonikenitc e'namatapinitc.

¹⁵ Miihsh okii'oncioshihtoon pahshanshe'ikan piiminahkwaanink, ekiihsaakicipahshanshe'waatc i'imaa Kihcianami'ewikamikonk kahkina, maanahcaanihsha' kaye pishihkiwa'. Shikwahsh okiihkwanapowepinamawaa' ini wiihsiniwinaahtikoon kaatashimeshkwatoonikenitc, ekii'ohswewepinamawaatc kaye oshooniyaamini.

¹⁶ Miihsh kaa'inaatc i'i ininiwa' omiimiinhsa' kaakii'ataawaakenitc: “Maaciinihkook! Saakisi'ihkook! Keko ishihtoohkek ninTete owaahkaa'ikan citashiataawewikamikohkeyek!” okii'inaa'.

¹⁷ Kii'maamihkawiwa' okihkino'amawaakana' eshipii'ikaatenik Kihcimasina'ikanink: “Oo Kishemanitoo, taapishkoo kekoon kaacaakitek nintinamanci' ehpiihcisaakihtooyaan kiWaahkaa'ikan,” ishipii'ikaate.

¹⁸ Miitahsh kaa'ishikakwecimikotc Ciisahs ini Coowa' oniikaanisii': “Wekonen tino maamahkaacihcikewin ketootaman kewaapanta'iyaank ehtepakentaakosiyan o'o kaatootaman?” okii'ikoo'.

¹⁹ Miihsh kaa'ishinahkwehtawaatc Ciisahs: “Piikopitooyek o'o Anami'ewikamik, nihsokiishikahk (3) itahsh aasha ninkakiishipatahkitoon,” okii'inaa'.

²⁰ Miihsh okii'ikoo': “Niimitana hshi ninkotwaahso (46) ahki ohsha kiihtashiihkikaate 'o Kihcianami'ewikamik, nihsokiishikahk (3) itahsh kiin ewiihkiiwepatahkitooyan?” okii'ikoo'.

²¹ Wiin itahsh i'i wiiyaw kaakii'itank Kihcianami'ewikamik.

²² Paanimaahsh ekiihkiiwepimaatisi'intc kii'ishkwaanipotc, kii'maamihkawiwa' okihkino'amawaakana' 'iwe kaakii'ihkitotc. Miihsh i'i kiihtepweyentamowaatc i'i kaaishihsink kihcioshipii'ikewin, kaye kaakii'ihkitonitc Ciisahsoon.

Ciisahs ehkihkenimaatc i'i pemaatisinitc 'iwe kaakikishkaakonitc ote'iniink

²³ Ahpii e'ayaatc i'imaa Ciisahs Ceroosalamink ehPimaaci'ikoowi Wiihkwantinaaniwank, okiihtepweyenimikoo' niipiwa' e'waapantaminitc omaamahkaacihcikewinan.

²⁴ Kaawiin tahsh Ciisahs okiihtepwewakenimaahsii' ciwiiciiwaatc, aaniihsh kahkina wiinke okiihkihkenimaa' eshiayaanitc.

²⁵ Kaawiin kaye awiyan okii'antawenimaahsiin ciwiintamaakotc eshiayaanitc i'i pemaatisinitc. Wiin kahkina okiihkihkenimaa' wekonen kekishkaakonitc ote'iniink.