Cwaan 17 - Ojibwe Kihcimasina'ikan

Kaakii'ishi anami'ehtamawaatc okihkino'amawaakana'

¹ O'oweniwan kaa'ishkwaa ihkitotc Ciisahs, miitahsh ishpimink kii'inaapi kihcikiishikonk, owe e'ihkitotc: “NinTete! Aasha tipihse 'iwe tipa'ikan. Noonkom waapanta'iwen eshikihci inentaakositc kiKosihs, kaye wiinihtam itahsh kiKosihs cikiionciwaapanta'iwetc kiin eshikihci inentaakosiyan.

² Aaniihsh niin kiKosihs kikii'miish citipenimakwaa kahkina pemaatisiwaatc, miitahsh kahkina niin cimiinakwaa pimaatisiwin wiihkaa keishkwaahsehsinok, kahkina kaatahshiwaatc kaakii'miishiyan cimiinakwaa.

³ Mii aaniihsh 'owe pimaatisiwin wiihkaa keishkwaahsehsinok, ehkihkenimikooyan kiin piko tepwe kaaKishemanitoowiyan, kaye ehkihkenimintc Ciisahs Christ, kiin kaakiihpiicinisha'watc.

⁴ O'omaa ahkiink ninkii'waapanta'iwe eshikihci inentaakosiyan. Aasha ninkiihkiishihtoon i'i anohkiiwin kaakii'miishiyan citootamaan.

⁵ NinTete! Noonkom miishihshin citashi kihci inentaakosiyaan 'imaa kiin eshiayaayan. I'iwe kihci inentaakosiwin peshikwan ishimiishihshin kaakii'ayaayaan weti kaakii'wiiciyayaaminaan cipwaa pimaaciahkiiwank, taka miinawaa mii 'iwe kiiwemiishihshin!

⁶ Ninkiihkihkentamoonaak eshiayaayan, cioncikihkenimihkwaa oko ininiwak kaakii'oncimiishiyan 'imaa ahkiink kaa‑ayaawaatc. Kiin kikiihtipenimaak. Kikii'miish itahsh, kaye okiihtootaanaawaa 'iwe kaakii'ihkitoyan.

⁷ Amiitahsh noonkom okihkentaanaawaa kahkina kekoon kaakii'miishiyan kiin e'onciimakahk.

⁸ I'ihsh tipaacimowin kaakii'miishiyan, ninkii'animiinaak oko ininiwak. Okii'otaahpinaanaawaa tahsh, kaye ninkihkenimikook kehcinaac tepwe 'imaa kiin ekiihpionciiyaan, kaye tepwehtamook ekiihpi‑ishinisha'oyan.

⁹ “Nintanami'ehtawaak itahsh okoweniwak. Kaawiin wiin o'omaa ahkiink kaaoncitipentaakosiwaatc nintanami'ehtamawaahsiik, ikiweniwak ihsa kaakii'miishiyan. Aaniihsh kiin kitipenimaak.

¹⁰ Kaye kahkina kekoon niin kaa‑ayaayaan, kiin 'iwe kitipentaan. Kaye kiin kaa‑ayaayan, niin nintipentaan. Okoweniwak itahsh kaa‑ayaawakwaa, mii 'imaa wencikihkentaakwahk ninkihci inentaakosiwin.

¹¹ Niin tahsh kaawiin keyaapi ninka‑ayaahsii o'omaa ahkiink. Wiinawaa tahsh ahkiink ayaawak, niin itahsh ninkapiishaa eshiayaayan. Kiin Weyoohsimikooyan Maawac Eshpentaakosiyan! I'imaa eshikashki'ewisiimakahk kiwiinsowin, i'iwe kaakii'miishiyan, mii 'imaa ishikanawenim okoweniwak, kewiinawaa cimihcipeshiko wiiciintiwaatc, taapishkoo kekiinawint kaaishiwiiciintiyank.

¹² Mekwaa ekii'wiiciiwakwaa ninkii'oncikanawenimaak imaa eshikashki'ewisiimakahk kiwiinsowin, mii 'owe kiwiinsowin kaakii'miishiyan, ninkii'ishikanawenimaak. Kaawiin awiya wani'aahsii cinihshiwanaatisitc, mii 'awe ehta kaakii'inentaakositc cinihshiwanaatisitc. Mii 'iwe keishitipihsek 'iwe kihcioshipii'ikewin.

¹³ Noonkom tahsh ninkapiishaa eshiayaayan. Nintipaatotaanan tahsh ono kekoonan o'omaa ahkiink, wiinawaa tahsh cimooshkineshkaakowaatc enikohkwaak 'iwe ninciihkentamowin.

¹⁴ Ninkii'miinaak i'i kitipaacimowin. Okiihshiinkenimikowaa' itahsh iniweniwa' o'omaa ahkiink kaa‑ayaanitc. Kaawiin aaniihsh oko 'omaa ahkiink oncitipentaakosihsiiwak, taapishkoo kaye niin ekaa kaashitipentaakosihsiwaan ahkiink.

¹⁵ Kaawiin wiin kitinihsinoon ci‑ishiotaahpinatwaa ciayaahsikwaa ahkiink. Kitishikakwecimin tahsh cikanawenimatwaa, ekaa kekoon citootaakohsikwaa ini maciaya'aan kaaishinihkaasonitc.

¹⁶ Kaawiin ihsa 'omaa ahkiink oncitipentaakosihsiiwak, taapishkoo kaye niin kaashitipentaakosihsiwaan 'omaa ahkiink.

¹⁷ Kiin itahsh 'imaa kitepwewinink ishiotaahpinamaason okoweniwak, kiin ehta citipenimatwaa. Tepwewin ihsa 'iwe kitihkitowin.

¹⁸ Taapishkoo kiin kaakiihpi‑ishinisha'oyan 'omaa ahkiink, mii 'i niinihtam keniin ninkii'ishinisha'waak ahkiink.

¹⁹ Kaye niin itahsh ninkii'onahsitis citipenimiyan. Wiinawaa hsa ko nintoonci‑ishihcike, mii kewiinawaa peshikwan kitepwewinink cioncionahsintwaa misiwe citipenimatwaa.

²⁰ “Kaawiin wiinehtawaa nintanami'ehtamawaahsiik: kahkina hsa ko kaye kenioncitepweyeniminitc otipaacimowiniwaank oko kaatipenimakwaa, amiiwa' ihsa 'i kaa‑anami'ehtamawimak.

²¹ Kikakwecimin kahkina cimihcipeshikowiiciintiwaatc. NinTete! Maano kewiinawaa pehsho kikawii'wiiciiwikonaanik taapishkoo kiin maawac pehsho kaashiwiiciiwiyan, kaye niin kaashipeshikowiiciiwinaan. Miitahsh ikiweniwak ahkiink kaa‑ayaawaatc cioncitepweyentamowaatc kiin ekiihpiishinisha'oyan.

²² I'iwe kihci inentaakosiwin kaakii'miishiyan, mii 'iwe peshikwan ninkii'miinaak ciwiiciiwikowaatc, kewiinawaa cimaamawi peshiko wiiciintiwaatc, taapishkoo kekiinawint eshipeshikwentaakosiyank.

²³ Miitahsh o'owe keshiayaak i'i peshikwentaakosiwin, niin ehpeshikowiiciiwakwaa, kaye kiin itahsh ehpeshikowiiciiwiyan, piinihsh iko wawiinke cimaamawipeshikwentamowaatc. Miitahsh ahkiink kaa‑ayaawaatc cioncikihkentamowaatc kiin ekiihpi‑ishinisha'oyan, kaye ehsaaki'atwaa oko kaatepweyenimiwaatc, peshikwan iko keniin kaashisaaki'iyan.

²⁴ “NinTete! Kikii'miish okoweniwak. Ninantawenimaak i'imaa keayaayaan, kewiinawaa 'imaa ciwiiciayaamiwaatc, mii 'imaa ciwaapantamowaatc ninkihci inentaakosiwin kaakii'miishiyan. Aaniihsh kikiihsaaki' cipwaa oshihcikaatek ahki.

²⁵ Oo ninTete, kwayahk enaatisiyan! Kaawiin kikiihpi kihkenimikohsiik ahkiink kaatipentaakosiwaatc. Niin wiin kikihkenimin. Okoweniwak itahsh kaye kaatepwehtawiwaatc okihkentaanaawaa kiin ekiihpi‑ishinisha'oyan.

²⁶ Ninkiihkihkentamoonaak kiin enentaakosiyan. Keyaapi tahsh ninkanikihkentamoonaak. Miitahsh peshikwan kaakii'ishisaaki'iyan kewiinawaa kotak awiya' cisaaki'aawaatc, kaye niin itahsh pehsho ciwiiciiwakwaa,” kii'ihkito.