Cwaan 15 - Ojibwe Kihcimasina'ikan

Ciisahs Kwayahk Shoominaahtik e'ishinihkaanitisotc

¹ “Niin tepwe a'a kwayahk shoominaahtik. A'ahsh ninTete Kihtikewininiiwi kaakanawenimaatc shoominaahtikoon.

² Minihk itahsh entahso watihkwaniwiyaan kaashoominiwansinok opahkwacipitoon. Tahsin itahsh kaashoominiwaninik, pankii okiishkishaan, mii ehkiishaacihtootc awahshime ciminoshoominiwaninik.

³ Kekiinawaa aasha kikiihkiishaaci'ikoom ekiihpehki'ikoyek o'owe kaapiwiintamawinakook.

⁴ Mooshak iko wiiciiwihshik. Kekiinawaa hsa kikawiiciiwininim. Inashke, kaawiin taanihtaawikihcikemakahsinoon piniskweayaak watihkwan. Mii ehta keoncishoominiwank ahpan iko 'imaa oncinihtaawikik shoominaahtikonk. Amiihsh i'i peshikwan kekiinawaa kaawiin kekoon kikakashkihtoohsiim, pishihshik ehta wiiciiwiyek kikakashkihtoom.

⁵ Niin shoominaahtik, kiinawaa tahsh watihkwanan. A'a tahsh pishihshik kaawiiciiwitc, kaye niin e'wiiciiwak, miitahsh a'awe niipiwa' kekoon cikashkihtootc, taapishkoo watihkwan ehshoominiwank. Aaniihsh kaawiin kekoon kikakashkihtoohsiinaawaa ekaa wiiciiwihsiwek.

⁶ Awiya piko ahpane ko wiiciiwihsik, mii 'i keishinaakositc taapishkoo watihkwan kaashoominiwansinok kaawepinikaatek e'ani‑ishipaahtek itahsh. Ono tahsh tino watihkwanan maamawinikaatewan, macohtewepinikaatewan, miihsh eshicaakitekin.

⁷ Kiishpin itahsh pishihshik wiiciiwiyek kaye nintihkitowinan wiiciiwikoyek, piko kekoon kaa‑antawentamek kikakanoonaawaa Weyoohsimintc, kikamiinikowaa tahsh.

⁸ Miihsh 'owe keshikihkencikaatenik okihci‑inentaakosiwin a'a ninTete, niipiwa' kekoon kashkihtooyek. Amiitahsh 'imaa kikaishi okihkino'amawaakanimininim.

⁹ Kaaishisaaki'itc itahsh a'a Weyoohsimintc, mii keniin peshikwan eshisaaki'inakook. Ahpan iko ayaak ninsaaki'iwewinink.

¹⁰ Kiishpin kanawentamek ini kaaihkitoyaan citootamek, ahpan iko kika/⁠ayaam ninsaaki'iwewinink. Mii kaye niin kaaishikanawentamowak kaaishitc a'a ninTete kaye e'ayaawak osaaki'iwewinink.

¹¹ “Miihsh o'owe kaaonciwaawiintamawinakook, peshikwan kaye niin kaashiciihkentamaan, kaye kiinawaa ciwiiciiwikoyek ciihkentamowin, kaye kiciihkentamowiniwaa misiwe cimooshkineshkaakoyek.

¹² Mii 'owe eshianooninakook: ishisaaki'itik taapishkoo kaashisaaki'inakook.

¹³ Kaawiin aaniihsh awahshime awiya osaaki'iwewinihsii, ahpiihc wiin cipakitinank opimaatisiwin, awiya' kaasaaki'aatc cipimaatisinitc.

¹⁴ Kiinawaa hsa kaasaaki'akwaa, kiishpin ishihcikeyek i'iwe kaaishiwiintamawinakook.

¹⁵ Kaawiin wiin ekwa' nintanohkii'aakanak kitinihsinooninim. Awiya mihcianohkii'aakaniwitc, kaawiin tepwe okakihkentansiin otinentamowinini ini kaatipenimikotc wekonen i'i waahtootaminitc. Kiinawaa tahsh ekwa' kaasaaki'inakook kitishinihkaanininim. Aaniihsh kahkina kekoon kaakii'noontawak ninTete, kikiih⁠kihkentamoonininim.

¹⁶ Inashke hsa, kaawiin kiinawaa niikaan kikii'onaapamihsiim. Niin aaniihsh kikii'onaapamininim, kaye kikii'onahsininim cimaacaayek, niipiwa' ciantakashkihtooyek. 'Iwe tahsh aaniin iko kekoon keshikashkihtooyek, miitahsh ciayaamakahk pishihshik. Amiitahsh piko kekoon keoncikakwecimek Weyoohsimintc, niin ehpiminisha'oyek, kikamiinikowaa.

¹⁷ Amiihsh 'owe eshikanooninakook, cisaaki'itiyek.”

Kikashiinkenimikook ahkiink kaa‑ayaawaatc

¹⁸ “Kiishpin ahkiink kaa‑ayaawaatc shiinkeniminekwaa, maamihkawik itahsh niin niikaan ekiihshiinkenimiwaatc.

¹⁹ Kiishpin kiiwiicitipentaakosiimekwaapan iki ahkiink kaa‑ayaawaatc, kitaakiihsaaki'ikowaak. Aaniihsh niwiicitipentaakosiimikonaanik kitaaikowaak. Kaawiin itahsh 'imaa kitooncitipentaakosihsiim ahkiink. Niin itahsh kikii'onaapamininim 'imaa ahkiink cioncitipentaakosihsiwek. Miihsh o'owe wencishiinkeniminekwaa.

²⁰ Maamihkawik itahsh o'o kaakii'ininakook: ‘Kaawiin awahshime inentaakosihsii anohkii'aakan ahpiihc otookimaaman, kikii'inininim.’ Kiishpin niin ahkiink ekiihpi‑ishikakwaataki'iwaatc, mii kekiinawaa peshikwan keni‑ishikakwaataki'inekwaa. Kiishpin kaye ehkanawentamowaatc nintihkitowinan, kaye kiinawaa tahsh kikakanawentamaakowaak keihkitoyek.

²¹ 'Owe tahsh kahkina kikaonciayintootaakowaak kaawiihkakwaataki'iwewaatc, niin onci ehtipeniminakook. Aaniihsh kaawiin okihkenimaahsiwaawaan ini kaakiihpiicinisha'onitc.

²² Kiishpin kiipikakanoonaahsiwakwaapan, kaawiin taakii'inentaakosihsiiwak macitootamowin cikikishkamowaatc. Aasha tahsh okii'noontaanaawaa ekiihkakanoonintwaa, kaawiin taaihkitohsiiwak, ‘Kaawiin ninkiihkihkentansiimin,’ cikii'ihkitowaahpan, 'iwe kaaishicikewaatc.

²³ Awiya kaashiinkenimitc, ninTeten kaye oshiinkenimaan.

²⁴ Ninkiihpimiayishihcike i'iwe ekaa wiihkaa awiya kaa'ishihcikehsik. Kiishpin itahsh i'iwe kaa'ishihcikehsiwaampaan, kaawiin omacihcikek taakii'inentaakosihsiiwak. Aasha tahsh tepwe ninkii'waapamikook onoweniwan e'ishihcikeyaan, ninshiinkenimikook itahsh niin, kaye ninTeten oshiinkenimaawaan.

²⁵ Mii piko keishiwepahk, citipihsek 'iwe kaakii'oshipii'ikaatenik otOonahshowewiniwaa e'ihkitoomakahk: ‘Anihshaa hsa ko ninkiihshiinkenimikook, kekoon ekii'onciwanitootansiwaan,’ ihkitoomakan.

²⁶ “Piciinak tapitakwihshin a'awe Owiici'iwe, mii 'awe Ahcaahk kaawaapanta'iwetc i'i tepwewin eshikihkenimimintc Kishemanitoon, kaye Weyoohsimimintc wenciitc. Kikapi‑ishinisha'amawininim wa'a Ahcaahk 'imaa Weyoohsimimintc cipionciitc cipiotihsinek. Amiihsh wa'a niin ninkatipaacimik.

²⁷ Kekiinawaa tahsh kikatipaacimim kaaishiwaapamiyek, aaniihsh ahpan iko kaakiihpi‑ishimaatanohkiiyaan kikiihpionciwiiciiwihshim,” okii'inaa'.