Cwaan 13 - Ojibwe Kihcimasina'ikan

Ciisahs ekiihkisiipiikisitenaatc okihkino'amawaakana'

¹ Noonkom itahsh miihsh i'i aniwaapank Pimaaci'ikoowi Wiihkwantiwin ci‑ishihsek. Ciisahs itahsh okiihkihkentaan aasha cianiocihcihsenik cioncinakatank o'o ahki ewii'naasihkawaatc ini Weyoohsimimintc. Mooshak okiihpioncisaaki'aa' ini ahkiink kaa‑ayaanitc wiin iko kaatipenimaatc. Piinihsh itahsh kahkina ekii'ani‑ishkwaahsek okii'aniahpiihcisaaki'aa'.

² Mekwaa kii'onaakohshiwiihsiniwak Ciisahs kaye okihkino'amawaakana'. A'awe tahsh Cootahs (Judas), Saaiman Iskeriyatan (Simon Iscariot) kaaoyoohsitc, aasha mii wa'a okii'inite'eshkaakoon ini maciaya'aan ekii'ishionentank ewii'ishihcike'aatc citahkonimintc ini Ciisahsoon.

³ Ciisahs itahsh okiihkihkenimaan ini Weyoohsimimintc misiwe ekii'miinikotc cikashki'ewisitc. Kaye okiihkihkentaan weti ekiihpionciitc Kishemanitoonk, miinawaahsh ewiihkiiwenaasihkawaatc Kishemanitoon.

⁴ Miitahsh kaa'oncipasikwiitc 'imaa kaaishiohpimeyaahkohshink wiihsiniwinaahtikonk. Miihsh ekiihkiihcikoshkank okashkiikiiwin kaa'ishiotaahpinaatc kisiihsipasowikisiinkwaanan ekiihkihcihpiswaaketc.

⁵ Amiihsh kaa'ishisiikinank nipiini kisiinkwaninaakanink, ekii'maacii kisiipiikisitenaatc okihkino'amawaakana'. Miitahsh kaa'ishipaankosite'waatc ekii'aapaci'aatc kisiinkwaanan kaakiihkihcihpiswaaketc.

⁶ Miitahsh piinihsh itahsh okii'aninaasihkawaan Saaiman Piitaroon (Simon Peter) eshisitehshininitc. “Tepencikeyan,” okii'ikoon, “kiin ina kiwiihkisiipiikisitenihsh?” okii'ikoon.

⁷ Ciisahs okii'nahkwehtawaan: “'Owe kaatootawinaan kaawiin noonkom kikihkentansiin. Paanimaa tahsh kikakihkentaan,” okii'inaan.

⁸ “Kaawiin!” okii'ikoon. “Kaawiin wiihkaa kikakisiipiikisitenihsii,” okii'ikoon ini Piitaroon. Miitahsh kaa'inaatc: “Kiishpin ekaa kisiipiikinihsinowinaan, kaawiin iinsan awaac kitaawiitoohkawihsii,” okii'inaan a'a Ciisahs.

⁹ Miitahsh kaa'ikotc ini Saaiman Piitaroon: “Tepencikeyan, kaawiin ehta ninsitan kikakisiipiikinansiinan, nininciin kaye, nihtikwaan kaye,” okii'ikoon.

¹⁰ Ciisahs itahsh okii'inaan: “'Awe aasha kaakiihkisiipiikiitc, kaawiin memwehc miinawaa onantawentansiin cikisiipiikiitc, piko ositan ehta, aasha misiwe ehpehkisitc,” okii'inaan. “Kiinawaa hsa kipehkisim,” okii'inaan. “Kaatahshiyek peshik kaawiin pehkisihsii,” kii'ihkito.

¹¹ Aaniihsh okiihkihkenimaan iniweniwan waa'ishihcike'ikotc citahkonintc. Mii 'iwe wenci‑ihkitotc: “Kaatahshiyek peshik kaawiin pehkisihsii.”

¹² Ahpii kaa'ishkwaakisiipiikisitenaatc kii'anipihcihkonaye. Miihsh 'i miinawaa kiihkiiweonaahkohshin. “Kikihkentaanaawaa na 'o kaa'ayintootawinakook?” okii'inaa'.

¹³ “Okihkino'amaake kaye Tepencikeyan kitishinihkaashim. Kwayahk ihsa kitihkitom. Mii wa'a aaniihsh entinowiyaan.

¹⁴ Noonkom iko niin kikiih kisiipiikisitenininim, niin Tepencikeyan kaye Okihkino'amaake kaaishiyek,” kii'ihkito. “Kekiinawaa tahsh kitaaishi kisiipiikisitenitim.

¹⁵ Aaniihsh ninkii'ishihcike kekihkinawaapantamek, peshikwan tahsh ciayintootamek taapishkoo 'owe kaahtootawinakook.

¹⁶ Nintepwe kaaininakook: a'a anohkii'aakan kaawiin awahshime inentaakosihsii ahpiihc ini otookimaaman. Kaawiin awahshime inentaakosihsii opiitaacimo ahpiihc ini kaapi‑ishinisha'okotc.

¹⁷ Aasha tahsh ono ekiihpikihkentamek, wawiinke kikashawentaakosim ono tootamek,” okii'inaa'.

¹⁸ “Kaawiin tahsh kahkina kitinihsinooninim,” kii'ihkito. “Ninkihkenimaak iki kaakii'onenimakwaa. Taishiwepan itahsh citipihsek o'o kihcioshipii'ikewin: ‘A'a kaawiiciwiihsiniimak e'amwaatc nimpahkweshikaniman, maano ninkii'inenimik ewii'macitootawitc,’ ihkitoomakan.

¹⁹ Noonkom kiishaac kiwiintamawininim cipwaa ishiwepahk. Ahpii tahsh kii‑ishiwepahk kikatepweyenimim niin A'awe mayaa ehTinowiyaan.

²⁰ Tepwemakan o'o kaawiintamawinakook: a'awe wetaahpinaatc awiyan kaapi‑ishinisha'omak, niin nintootaahpinik. A'awehsh wetaahpinitc otootaahpinaan ini ninTeten kaakiihpi‑ishinisha'onitc.”

Ekii'niikaaniwiintank Ciisahs ewii'mamishimintc

²¹ Kaa'ishkwaaihkitotc itahsh o'o Ciisahs kiihkihcimikoshkaatentam. Miitahsh okii'mihcitipaatotaan o'owe e'ihkitotc: “Tepwemakan o'owe kaaininakook: peshik iko 'omaa kaatahshiyek ninkamamishimik citahkonikoowak.”

²² Kihkino'amawaakanak itahsh kiihkakanawaapantiwak e'wawaanentamowaatc, awekwenan kaainaatc e'inentamowaatc.

²³ Peshik itahsh kihkino'amawaakan, onoweniwan Ciisahs nawac kaakiihsaaki'aatc, pehsho 'imaa okii'wiitaahkohshinoomikoon.

²⁴ Miitahsh Saaiman Piitar (Simon Peter) kaa'ishi‑inihkwehtaatc ini kihkino'amawaakanan cikakwecimaanitc Ciisahsoon awenenan kaatashimaanitc.

²⁵ Miitahsh a'a kihkino'amawaakan kaa'ishi‑inihtaatc pehsho ohkaahkikaniniink Ciisahsoon, ehkanoonaatc: “Tepencikeyan, awenen a'a ketootawihk?” okii'inaan.

²⁶ Ciisahs itahsh okii'nahkwehtawaan: “Kiikintaanak a'a pahkweshikan 'imaa apoopiink, mii 'awe ninkamiinaa. Mii 'awe ketootawitc.” Miihsh okiihpahkwepinaan ini pahkweshikanan. Miihsh kaahkintaanaatc okii'miinaan Cootahsan (Judas), Saaiman Iskeriyat (Simon Iscariot) okosihsan.

²⁷ Ahpii kaa'amwaatc ini pahkweshikanan a'a Cootahs, okiihpiincinaweshkaakoon ini Setanan (Satan). Ciisahs tahsh okii'inaan Cootahsan: “Kaawiihtootaman weyiip ishihciken.”

²⁸ I'iweniwa' itahsh kaawiiciwiihsiniimikotc kaawiin awaac peshik awiyan okii'nihsitohtansiini wekonen i'i kaaonci‑inaatc.

²⁹ Aaniihsh mii 'oweni kaa'inentamowaatc aaninta: okii'inaatokenan Cootahsan: “Awiataawen keaapacihtooyank e'mekwaawiihkwantiwahkamikisink.” Maakishaa kaye, “Awimiish kekoon kaakitimaakisiwaatc,” ekii'inaakwen, kii'inentamook. Aaniihsh okii'inanohkii'aawaan Cootahsan cikanawentaminitc oshooniyaawashiwaa.

³⁰ Kaa'otaahpinaanitc itahsh ahpii ini kaakiihkintaanimintc pahkweshikanan, amiihsh i'i shemaak kaa'ani ishi saaka'aminitc. Aasha ehtipihkaninik.

Otooshki‑inaahkonikewin e'wiintank Ciisahs

³¹ Ahpii tahsh kaa'animaacaanitc Cootahsan Ciisahs kii'ihkito: “Mii aasha ciwaapancikaatenik okihci inentaakosiwin Inini oKosihsan. Kishemanitoo tahsh kaye taonci waapancikaateni okihci inentaakosiwin i'iwe kaawii'ishihcikenitc oKosihsan.

³² Kiishpin tahsh Kishemanitoo okihci‑inentaakosiwin ishiwaapancikaatenik 'iwe oKosihsan kaatootaminitc, kaye wiin Kishemanitoo tipinawe okanaakohtamawaan okihci‑inentaakosiwinini ini oKosihsan. Shemaak itahsh taishihcike.

³³ Kiinawaa niniicaanihsak kaashaweniminakook! Acina ehta keyaapi kikawiiciiwininim. Piciinak kikananaantone'ohshim. Miihsh o'owe mayaa kaakii'inakwaa oniikaanisiiwi Coowak: ‘'Iweti waa'ishaayaan kaawiin kikapiishaahsiim,’ ekii'inakwaa, peshikwan o'owe noonkom kekiinawaa eninakook.

³⁴ Oshki‑inaahkonikewin itahsh kimiinininim: cisaaki'itiyek. Mayaa kaakii'ishisaaki'inakook, amiitahsh kekiinawaa ci‑ishisaaki'itiyek.

³⁵ Miitahsh o'owe kahkina kikaoncikihkenimikowaak niin ninkihkino'amawaakanak ehtinowiyek, ishihcikeyek saaki'itiyek,” okii'inaa'.

Ciisahs ekiih kiishaaciwiintank Piitaroon ciaanawenimikotc

³⁶ Okii'ikoon itahsh Saaiman Piitaroon (Simon Peter): “Tepencikeyan, aanti eshaayan?” okii'ikoon. Ciisahs okii'nahkwehtawaan: “'Iweti waa'ishaayaan, kaawiin noonkom kikapiminisha'ohsii. Paanimaa tahsh kikapiminisha',” okii'inaan.

³⁷ Miihsh 'iwe kaa'ikotc: “Tepencikeyan, wekonen tahsh ekaa keoncipiminisha'ohsinoowaan noonkom? Ninkapakitinaan nimpimaatisiwin kiin onci,” okii'ikoon.

³⁸ Ciisahs itahsh okii'nahkwehtawaan: “Kikapakitinaan ina kipimaatisiwin niin onci? Tepwehtan o'o kaaininaan: naapepaahka'aahkwaan noontaakositc, mii aasha nihswaa (3) kaawiin ninkihkenimaahsii ci‑ishiyan,” okii'inaan.