Cwaan 10 - Ojibwe Kihcimasina'ikan

Ciisahs ekii'aawehcikaaketc okanawimaanahcaanihshiwen

¹ Miitahsh kaa'ihkitotc: “Tepwewiniwan 'owe kaawiintamawinakook: awiya ekaa kaapiintikehsik e'ishi‑ishkwaantemiwaninik ahsiniiwi⁠waahkaayaapihkihsicikan maanahcaanihsha' kaashipiinsonitc, pahkaan itahsh kaaoncipaashitaantawetc, mii wa'a kiimoocishkiiwinini komaa omahkantwe.

² A'a tahsh ishkwaantemink kaaoncipiintiketc, mii wa'a okanawimaanahcaanihshiwe.

³ Wiin kaapaahkintenamaakotc ini okanawishkwaantawen, shikwa eshipepeshikonitc e'ishinihkaasonitc otishiantomaa' wiin tipinawe omaanahcaanishima'. Onoontaakoo' itahsh kaainihtaakositc. Miihsh i'i eshisaakisi'aatc.

⁴ Ahpii tahsh siyaakisi'aatc, aniniikaani‑ishaa. Miihsh enipiminisha'okotc omaanahcaanihshima', wiin e'nihsitohtaakotc enihtaakositc a'a kaakanawenimaatc.

⁵ Pahkaan awiyan kaawiin owiihpiminisha'waahsiwaawaan, tapasiiwak itahsh, aaniihsh opahkaanihtawaawaan enihtaakosinitc,” kii'ihkito.

⁶ Mii 'owe aawehcikan Ciisahs kaakii'wiintamawaatc. Kaawiin tahsh okii'nihsitohtaakohsii' wekonen kaakii'wiintamawaatc.

KaaKwayahko⁠kanawenimaatc Maanahcaanihsha' e'ishinihkaanitisotc Ciisahs

⁷ Miitahsh 'i miinawaa kaa'ishiwiintamawaatc Ciisahs. “Tepwewiniwan 'owe kaawiintamawinakook: niin 'iwe otishkwaantemiwaa maanahcaanihshak.

⁸ Kahkina iki kaakiihpiayaawaatc cipwaa ayaayaan, okiimoocishkak, omahkantweshkak kiihtinowiwak. Maanahcaanihshak itahsh kaawiin okiihpisintawaahsiwaawaa'.

⁹ Niin ishkwaantem. Kiishpin niin awiya oncipiintiketc, mii 'awe kepimaatisitc. Tapiintike miinawaa tasaaka'am. Okamihkaan itahsh keontanciketc.

¹⁰ A'a tahsh okimootishk, amii ehta 'o wencipiishaatc, ewiihkimootitc, ewii'nihshiwetc, ewiihpinihshiwanaaci'iwetc kaye. Niin itahsh ninkiihpiayaa cionciayaayek pimaatisiwin, cionciwenoociayaayek itahsh kaye.

¹¹ “Niin a'a kaakwayahkokanawenimaatc omaanahcaanihshima'. A'a kwayahk kaakanawimaanahcaanihshiwetc kaawiin inkotano wanihtootc opimaatisiwin cipimaaci'aatc omaanahcaanihshima'.

¹² A'a tahsh kaamihcianohkiitc, ekaa kaatinowihsik ciokanawimaanahcaanihshiwewitc, ekaa wiin ehtipinawewisihsik i'i maanahcaanihsha', e'waapamaatc ma'iinkanan ehpiicipahtoonitc, amii eshitapasiitc, amii eshinakacipa'aatc i'i maanahcaanihsha'. Miihsh a'a ma'iinkan eshikaahcitinaatc i'i maanahcaanihsha' e'ompwenisha'waatc.

¹³ 'Awe kaamihtanohkiitc, mii eshimaaciipa'iwetc. Kaawiin weweni onaakatawenimaahsii', aaniihsh mihcianohkii.

¹⁴ Niin tahsh kwayahk kaakanawimaanahcaanihshiwetc. Ninkihkenimaak nimaanahcaanihshimak, kaye ninkihkenimikook iki kaa‑ayaawakwaa,

¹⁵ taapishkoo kaashikihkenimitc a'a ninTete, kaye niin tahsh kaashikihkenimak ninTete. Kaye nintinentam kaawiin inkotano wanihtooyaan nimpimaatisiwin cioncipimaatisiwaatc nimaanahcaanihshimak.

¹⁶ Ayaawak itahsh kotak maanahcaanihshak kaatipenimakwaa, o'omaa kaa‑ayaahsikwaa waahkaayaapihkihsicikanink kaashikanawenimintwaa maanahcaanihshak. Miiwak okoweniwak kaye ninkapiinaak, ninkapisintaakook enwewak. Maamaw itahsh tamihcipeshikwewaanakisiwak, shikwa tamihcipeshikowan ini kekanawenimikowaatc.

¹⁷ “Mii 'owe wencisaaki'itc ninTete, aaniihsh nintinentam ewiihpakitinamaan nimpimaatisiwin, miinawaahsh ewiihkiiwepimaatisiyaan.

¹⁸ Kaawiin awiya okakashkihtoohsiin ciotaahpinamawitc nimpimaatisiwin. Niin aaniihsh e'inentamaan iko nimpakitinaan. Nintayaan itahsh kashki'ewisiwin cipakitinamaan, shikwahsh nintayaan kashki'ewisiwin miinawaa cikiiwepimaatisiyaan. Mii 'owe kaakii'ishikanooshitc a'a ninTete citootamaan,” kii'ihkito.

¹⁹ Mii miinawaa pepahkaan kii'ayinenintiwak iki Coowak, onoweniwan kaakii'ihkitonitc Ciisahsoon.

²⁰ Niipiwa' itahsh kii'ihkitowak: “Okikishkawaan maciahcaahkwan, kiiwashkweyentam!” okii'inaawaan. “Aaniihshwiin wencipisintawek?” kii'ihkitowak.

²¹ Kotak itahsh kaye kii'ihkitowak: “Kaawiin i'i taainihtaakosihsii awiya maciahcaahkwan kaa‑ayaawaatc! Aaniin o'o kekii'ishikashkihtoohpan maciahcaahk ciwaapi'aatc ini kaawaapihsinik?” kii'ihkitowak.

Ekii'aanawenimaawaatc Ciisahsoon

²² Kiihpipoon 'iwe ahpii. Kii'wiihkwantiwahkamikisinaaniwan itahsh i'imaa Ceroosalamink (Jerusalem), Coowak e'maamihkawinotamowaatc kaakii'onaapihkihsitoowaakopanen i'i Kihcianami'ewikamik Kishemanitoon citipentaminitc.

²³ Ciisahs itahsh kiihpimohse 'imaa Swaalaman (Solomon) oTapinawahkicikanink eshiwiintek Kihcianami'ewikamikonk kaakii'ayaanik.

²⁴ Coowak itahsh kiihpiwaahkaakaapawi'itiwak i'imaa eshiayaanitc ehpikakwecimaawaatc: “Aaniin minihk keyaapi kewawaanentami'iyaank? Kwayahk wiintamawihshinaam! Tepwe na kiin a'a kitaaw Kishemanitoon kaakii'onenimikotc cipimaaci'iwetc?” okii'inaawaan.

²⁵ Ciisahs okii'nahkwehtawaa': “Aasha ohsha kikii'wiintamawininim. Kaawiin tahsh kikiiwiihtepwehtawihsiim. Ini anohkiiwinan kaakiihtootamaan ninTete kaakii'ishikanooshitc, amiiwan ono kaatipaacimikoyaan ehtepwewiniwiyaan.

²⁶ Kaawiin tahsh kiwiihtepwehtawihsiim, aaniihsh kaawiin kiinawaa kitinowihsiim nimaanahcaanihshimak.

²⁷ Inashke nimaanahcaanihshimak opisintaanaawaa nintinwewin, kaye ninkihkenimaak, kaye nimpimiwiiciiwikook.

²⁸ Nimiinaak 'iwe wiihkaa keishkwaahsehsininik pimaatisiwin. Kaawiin wiihkaa tanipohsiiwak. Kaawiin awiya otaakashkihtoohsiin cimahkamitc ehkanawenimimak.

²⁹ Shikwa 'awe ninTete kaakii'miishitc nimaanahcaanihshima', mii 'awe awahshime meshkawentaakositc ahpiihc wiin kahkina kekoon, kaye kaawiin awiya okakashkihtoohsiin ciotaahpinamawaatc ninTeten ehkanawenimaanitc.

³⁰ Niin kaye ninTete mii eshipeshikwentaakosiyaank,” kii'ihkito.

³¹ Coowak itahsh miinawaa okii'otaahpinaawaa' ahsinii' ewiihpapiimwahsina'aawaatc ewii'nihsaawaatc.

³² Ciisahs itahsh okii'inaa': “Niipiwa' minoanohkiiwinan kikii'waapamim ekii'ishihcikeyaan, ninTete kaakii'miishitc ini citootamaan. Wekonehsh ono waa'oncipimwahsina'iyek?” okii'inaa'.

³³ Miihsh Coowak okii'inaawaan: “Kaawiin wiin minoanohkiiwinan kaawii'oncipimwahsina'ikooyan,” okii'inaawaan, “ehpaahpinotawatc ohsha Kishemanitoo wencitootaakooyan. Kiin aaniihsh e'mihci‑inininiiwiyan, ‘Niin Kishemanitoo’ kitihkit,” okii'inaawaan.

³⁴ Ciisahs okii'inaa': “Kaawiin ina inahtehsinoon 'imaa kiinawaa kitOonahshowewiniwaank, Kishemanitoo ekii'ihkitotc, ‘Kimanitoowim’?

³⁵ Kaawiin ohsha wiihkaa tapoonitepwewiniwansinoon 'iwe Kihcioshipii'ikewin. Ikiweniwak itahsh Kishemanitoon otihkitowinini kaa'otihsikowaatc, ‘Kimanitoowim’ kii'inaawak.

³⁶ Niin a'a Kaakii'onenimikotc ini Wetetemimintc, kayehsh a'a ekiihpiicinisha'okotc o'omaa ahkiink. Kitishim ina tahsh, ‘Kipaahpinotawaa Kishemanitoo’, i'iwe ekii'ihkitoyaan, ‘Kishemanitoo oKosihsan nintaaw’?

³⁷ Kiishpin ekaa entootansiwaanen otanohkiiwinan ninTete kaashiantawenimitc citootamaan, amii 'iwe ci‑ishinaakwahk citepwehtawihsiwek.

³⁸ Kiishpin tahsh tepwe ehtootamowaanen, aanawiin niin ehtepwehtawihsiwek, eniwehk itahsh kitaatepwehtaam ini anohkiiwinan kaatootamaan, miihsh cikehcinaa'entamek tepwe ehkikishkawitc ninTete, kaye niin itahsh ehkikishkawak,” kii'ihkito.

³⁹ Miinawaa tahsh keyaapi okiihkakwetahkonikoo'; okiihpaninikoo' itahsh.

⁴⁰ Ciisahs itahsh miinawaa kii'ishaa weti akaamink Cwaartanawi-siipiink (Jordan), Cwaanan (John) nihtam i'imaa kaakii'ishisiika'antaakenitc. Mii 'iweti kii'ayayaa Ciisahs.

⁴¹ Niipiwa' itahsh 'imaa okiihpinaasihkaakoo', o'owehsh ekii'ihkitonitc: “Cwaan kaawiin wiin kii'maamahkaacihcikehsii. Kahkina tahsh kekoon kaakii'ishitipaacimaatc ono ininiwan kiihtepwe!” kii'ihkitowa'.

⁴² Niipiwa' itahsh i'imaa okii'oncitepweyenimaawaan Ciisahsoon.