Cwaan 1 - Ojibwe Kihcimasina'ikan

A'a Kishemanitoo otIhkitowin kaainintc kaapimaatisiishkaaketc

¹ Maawac nihtam cipwaa maacihsek ahki aasha kii'ayaa a'a Ihkitowin kaaishinihkaasotc. Wa'a tahsh Ihkitowin okii'wiiciyayaamaan ini Kishemanitoon, shikwahsh wa'a Ihkitowin kiihKishemanitoowi.

² Mii hsa ko wa'a maawac nihtam kaahpiwiiciiwaatc Kishemanitoon.

³ A'a tahsh Ihkitowin kii'aapatisi kahkina kekoon kiioshihcikaatenik. Wiin anohkiihsikipan kaawiin kekoon taakii'oshihcikaatehsinoon i'i minihk kaakii'oshihcikaatek.

⁴ Wiin kaaoncipimaatisinaaniwaninik. O'o tahsh pimaatisiwin okiihpiitamaakonaawaa waahseyaa kahkina pemaatisiwaatc.

⁵ I'i tahsh waahseyaa saakaahte i'imaa kashkiitipihkisiwinink. Shikwahsh i'iwe kashkiitipihkisiwin kaawiin wiihkaa okiihpiaahtawe'ansiin i'i waahseyaa.

⁶ Kiihpiayaa peshik inini Cwaan (John) e'ishinihkaasotc, Kishemanitoon ekiihpi‑ishinisha'okotc.

⁷ Mii hsa wa'a kaakiihpiayaatc ciwiintamaaketc aweneniwinitc ini Waahseyaan, kahkina tahsh pemaatisinitc wiin cioncitepweyentaminitc.

⁸ Kaawiin Cwaan kii'aawihsii i'iwe waahseyaa. Wa'a tahsh inini kiihpi‑ishinisha'waa citipaacimaatc ini Waahseyaan.

⁹ Mii hsa wa'a tepaacimintc tepwe mayaa kwayahk Waahseyaa ehpitakwihshink omaa ahkiink, mii 'awe kaawaahseshkawaatc kahkina kaapimaatisinitc ahkiink.

¹⁰ O'omaa ahkiink kii'ayaa a'a Ihkitowin. Wiin kii'oncioshihcikaateni ahkiini. Kaawiin tahsh okiihkihkenimikohsii' o'omaa ahkiink kaa‑ayaanitc.

¹¹ Okiihpiotihtaan tipinawe otanahkiiwin, wiin tipinawe owiicionciimaakana' kaawiin okii'otaahpinikohsii'.

¹² Kahkina tahsh kaakii'otaahpinikotc, miiwa' kaakiihtepweyenimikotc, okii'miinaa' cioniicaanihsimikonitc Kishemanitoon.

¹³ I'iwe tahsh e'oniicaanihsimikowaatc Kishemanitoon, kaawiin i'imaa ininiinaank kii'onciimakahsinoon, pemaatisiwaatc e'ayaanihkenihtaawiki'itiwaatc. Kaawiin i'imaa omihsawencikewinink inini ewii'oniicaanihsitc kii'oncinihtaawikihsiiwak. Wiin Kishemanitoon okii'miinikowaan cioyOohsimaawaatc.

¹⁴ Wa'a Ihkitowin kiihpi‑ininiiwi, shikwahsh kikiihpiwiiciyayaamikonaan e'mooshkinetc kishewaatisiwin, tepwewin. Okihtakinsowin kaye kikii'waapantamowaamin, mii 'iwe okihtakinsowin kaaoncimiinikotc ini Weyoohsimimintc, e'mihcipeshikotc kaaoKosihsimikotc ini oTeten.

¹⁵ Cwaan okiihtipaacimaan e'matweshaakowetc: “Miitahsh 'aweti kaakiihtipaacimak e'ihkitoyaan: ‘Piayaahpiihtenti kepinaapishkawitc awiya awahshime kaakihci‑inentaakositc ahpiihc niin. Aasha aaniihsh kii'ayaa cipwaa nihtaawikiyaan,’ ” kii'ihkito.

¹⁶ Wiin e'ishipaahtiinatininik okishewaatisiwin kahkina kiinawint kikii'oncishawenimikonaan, ayaakwiihtaw ekiihpishaweniminank.

¹⁷ Kishemanitoo okii'aapaci'aan ini Moosihsoon (Moses) cipiitoonic onahshowewin. Ciisahs Christan tahsh wiin okii'aapaci'aan ciwaapanta'iwetc okishewaatisiwin, cinaako'ikotc kaye aaniin tepwe eshiayaatc.

¹⁸ Kaawiin awiya wiihkaa okii'onciwaapamaahsiin Kishemanitoon. A'a ehta piyeshikotc kaaoKosihsimaawitc, wiin ehKishemanitoowitc kaye kaasaaki'ikotc ini Weyoohsimimintc, wiin mayaa kwayahk okiihtipaacimaan Kishemanitoon.

Cwaan Siika'antaakewinini otipaacimiwewin

¹⁹ Aapitink itahsh kaaniikaanisiwaatc Coowak Ceroosalamink (Jerusalem) kaa‑ayaawaatc okii'ishinisha'waawaa' anami'ewikimaa' kaye anami'ewanohkii'aakana' cikakwecimaanitc Cwaanan (John): “Awenen kiin?” ci‑inaanitc.

²⁰ Miihsh i'i kaa'ishitipaacimotc Cwaan, kaawiin kii'manaaihkitohsii, kwayahk kii'ihkito: “Kaawiin niin ini Kishemanitoo kaakii'onenimaatc cipimaaci'iwenitc,” kii'ihkito.

²¹ Shikwahsh okiihkakwecimikoo': “Awenen itahsh kiin? Ilaaica (Elijah) na?” Miitahsh kaa'inaatc: “Kaawiin nintaawihsii.” Miinawaahsh okii'ikoo': “Kiin ina kaa‑ahshawaapamintc kaawiihpiTipaacimowininiiwitc?” Kii'nahkwehtam itahsh: “Kaawiin.”

²² Miinawaa tahsh okii'ikoo': “Wiintamawihshinaam awenen eyaawiyan, ninkawiintamawaanaanik itahsh kaapi‑ishinisha'oyamintwaa. Aaniin keishiwiinitisoyan?”

²³ Cwaan tahsh kii'ihkito: “Niin a'a kaamatwetepihtaakositc pikwatahkiink: Kwayahkwamohtawihk Tepenciketc otishaawin!” Mii peshikwan kaakii'ihkitokopanen Aaiseya (Isaiah) Kishemanitoo otipaacimowininiiman.

²⁴ Okoweniwak itahsh kaakiihpikakwetwewaatc okiihpianoonikowaa' i'i Perahsii' (Pharisees).

²⁵ Miitahsh miinawaa kaa'ishikakwecimaawaatc Cwaanan: “Kiishpin eyaawihsiwanen Kishemanitoo kaa'onaapamaatc cipimaaci'iwenitc, kemaa Ilaaica kemaa Kishemanitoo oTipaacimowininiiman, wekonen wencisiika'antaakeyan?” kii'ihkitowak.

²⁶ Cwaan okii'ishiwiintamawaa': “Nipi hsa niin nintaapacihtoon ehsiika'antaakeyaan. Peshik itahsh kiwiicikaapawihtaakowaa, ekaa kaakihkenimaahsiwek.

²⁷ Mii hsa wa'a kepikihkentaakositc cikihci‑inentaakositc ishkwaawanentaakosiyaan. Kaawiin tahsh niin ninteinakinsohsii ciaapa'amowakipan omahkisineyaap,” kii'ihkito.

²⁸ I'imaa tahsh kiihpiayishiwepan Pehtaniink (Bethany), weti akaamink Cwaartanawi siipiink (Jordan) ootenawenhs kaa‑ayaak, miihsh i'imaa Cwaan kaakiihtashisiika'antaaketc.

Kishemanitoo oMaanahcaanihshenhsiman wiin kaapakitinaahswaanaatc

²⁹ Miinawaa tahsh eniwaapaninik Cwaan (John) okii'waapamaan Ciisahsoon ehpinaasihkaakotc. O'o tahsh kii'ihkito: “Ina 'aweti Maanahcaanihshenhs Kishemanitoo keoncipoonentamawaatc omaa ahkiink kaa‑ayaanitc omaci‑ishiwepisiwinini.

³⁰ Mii hsa wa'a kaakii'inak: ‘Ninkapinaapishkaak a'awe inini kepikihkentaakositc, awahshime ehkihci‑inentaakositc ahpiihc itahsh niin.’ Aaniihsh aasha wiin kii'ayaa cipwaa nihtaawikiyaan.

³¹ Kaawiin itahsh mahshi ninkiihkihkenimaahsii awenen a'awe ketinowitc. O'o tahsh kaakiihpioncisiika'antaakeyaan nipi, cikihkentamoonakwaa Isriyal (Israel) ininiwak awenenan eyaawinitc.”

³² Shikwahsh okii'ishitipaacimaan Cwaan: “Ninkii'waapamimaan Kishemanitoon otAhcaahkoni ekiihpioncinaashahkiinitc kihcikiishikonk, omiimiinhsink e'ishinaakosinitc ekiihpooniihsantaakonitc, miihsh kaa'ishinehpicikikishkaakonitc.

³³ Keyaapi kaawiin nintaakiihkihkenimaahsii awenen kaatinowitc. A'a tahsh kaakiihpi‑ishinisha'otc cisiika'antaakeyaan nipiini, aasha mii 'owe ninkii'ik: ‘Kikawaapamaa awiya cipooniihsantaakotc ini Ahcaahkwan, nehpic i'imaa ciayaanitc, mii wa'a kesiika'antaakaaketc Kishemanitoon otAhcaahkoni,’ ninkii'ik.

³⁴ Ninkii'waapantaan, miitahsh wencitipaacimak mii 'awe kaaoKosihsimikotc Kishemanitoon,” kii'ihkito Cwaan.

Ini nihtam kaaokihkino'amawaakanitc a'a Ciisahs

³⁵ Miinawaahsh eniwaapaninik Cwaan (John) okii'wiicikaapawiihtawaa' niishin okihkino'amawaakana'.

³⁶ Okiihkanawaapamaan Ciisahsoon i'imaa ehpimohsenitc. Miitahsh kaa'ihkitotc Cwaan: “Ina iniweniwan oMaanahcaanihshenhsiman Kishemanitoo kaaontinamaaketc!” kii'ihkito.

³⁷ Iki niishin kihkino'amawaakanak okii'noontawaawaan Cwaanan ehtipaacimaanitc Ciisahsoon, miihsh kaani‑ishipiminisha'waawaatc Ciisahsoon.

³⁸ Miitahsh Ciisahs kaapi‑ishikwehkikaapawitc, ehkanawaapamaatc ehpiminisha'okotc, shikwa okii'inaa': “Wekonen nentawaapantamek?” Miihsh kaa'ikotc: “Oraapaai (Rabbi), aanti eshitaayan?” okii'ikoo'. O'owehsh Oraapaai kaaicikaatek, okihkino'amaake.

³⁹ “Piishaak, waapantamohk,” okii'inaa'. Kanapac aasha kii'niiyotipa'ikaneyaa 'i ahpii. Okii'aniwiiciiwaawaan itahsh e'awiwaapantamowaatc eshitaanitc. Piinihsh i-naakohsh itahsh okii'wiiciiwaawaan.

⁴⁰ Oko niishin ininiwak kaa'noontawaawaatc Cwaanan kaye kaahpiminisha'waawaatc Ciisahsoon, mii 'awe peshik Entaroo (Andrew) Saaiman (Simon) wiicihkiweyan.

⁴¹ Kwayahk hsa okii'mihkawaan Saaimanan wiicihkiweyan ekii'inaatc: “Ninkii'mihkawaanaan a'a Kishemanitoon kaakii'onaapamikotc cipimaaci'iwetc,” okii'inaan. Mii 'owe Christ kaaicikaatek Kishemanitoo kaakii'onaapamaatc.

⁴² Miitahsh kaa'ishi‑ishiwinaatc ini Saaimanan eshiayaanitc Ciisahsoon. Ciisahs itahsh okiihkanawaapamaan Saaimanan, miitahsh ekii'inaatc: “Kiin Saaiman okosihsan Cwaan. Mii 'omaa ahkonaak kikaishinihkaas Siihpahs (Cephas),” kii'ihkito. Mii peshikwan ekii'ishinihkaasotc Piitar (Peter), ahsin e'ishinihkaatek wiinsowin.

Ekiihkanoonaatc Ciisahs Pilapoon, Nahtaaniyalan

⁴³ Miinawaa eniwaapaninik Ciisahs kiiwii'ishaa Kaalalii (Galilee) ahkiink. Okii'mihkawaan ini Pilapoon (Philip). “Wiiciiwihshin,” okii'inaan.

⁴⁴ A'ahsh Pilap kii'oncii i'imaa ootenawenhsink Pehseta (Bethsaida) ekii'ishinihkaatenik. Mii 'iwe peshikwan ootenawenhs kaaonciiwaatc Entaroo (Andrew) kaye Piitar (Peter).

⁴⁵ Pilap itahsh okii'mihkawaan ini Nahtaaniyalan (Nathanael), miihsh kaa'inaatc: “Ninkii'mihkawaanaan a'a kaatipaacimintc Moosihs (Moses) otinaahkonikewinink, Kishemanitoo kaye otipaacimowininiima' kaakiihtashimaanitc. Mii hsa wa'a Ciisahs Naasaritink (Nazareth) kaaonciitc, Coosap (Joseph) okosihsan,” kii'ihkito.

⁴⁶ Okii'ikoon itahsh ini Nahtaaniyalan: “Kekoon ina taaonciimakan i'iwe wenishihshink i'imaa Naasaritink?” okii'ikoon. “Inashke piwaapam,” itahsh okii'inaan a'a Pilap.

⁴⁷ Miihsh Ciisahs ekii'waapamaatc Nahtaaniyalan ehpinaasihkaakotc, okii'inaan: “Mii wa'a tepwe Isriyal (Israel) inini,” okii'inaan. “Kaawiin kekoon okikishkaakohsiin wayeshimiwewin!” okii'inaan.

⁴⁸ Miihsh kaa'ishikanoonikotc Nahtaaniyalan: “E, aanti wencikihkenimiyan enaatisiyaan?” Miihsh eshinahkwehtawaatc: “Cipwaa antomihk Pilap, kikii'waapamin kaakii'namatapiyan i'imaa eshiaakawahkisotc shoominaahtik,” okii'inaan.

⁴⁹ Miihsh kaa'ikotc: “Okihkino'amaake! Kiin Kishemanitoo oKosihsan! Kiin Isriyalak keokihciokimaamiwaatc!” kii'ihkito.

⁵⁰ Ciisahs itahsh okii'inaan: “Kitooncitepweyentam ina ekii'ininaan ekii'waapaminaan i'imaa eshiaakawahkisotc shoominaahtik? Awahshime tahsh kikawaapantaanan kehci‑inentaakwahkin ahpiihc itahsh wiin o'o kaawaapantaman.”

⁵¹ Shikwahsh okii'inaa': “Tepwe kiwiintamawininim o'o: piciinak kikawaapantaam kihcikiishik cipaahkinikaatek, kaye kikawaapamimaawaa' Kishemanitoo otencalima' pisaan iko ishpimink ci‑inaapiikamonitc kaye cipiontaapiikamonitc i'imaa eshiayaanitc ini Inini oKosihsan,” kii'ihkito.