Coowel 2 - Ojibwe Kihcimasina'ikan

Pahpahkinek Kii'aapatisiwaatc Ke'oncikihkencikaatek Enentaakwaninik KaaTipenciketc Okiishikanom

¹ Pootaatamok pootaacikan Saayanink, i'imaa waciink kaa⁠tanentaakosiyaan ishi tipaacimok e⁠naniisaanentaakwahk. Nininkaanimisik Coota (Judah) ahkiink eyaayek, aasha ohsha kekaa ocihcihseni kaaTipenciketc okiishikanom. Tepwe pehshwentaakwanini!

² Aahpici hsa ta⁠kashkiitipihkan, ta⁠piikihskaatentaakwan ci‑inentaakwahk taapishkoo kaa⁠ninkwahkwahk e⁠mahkatewaanahkwahk. Etatawe hsa ta⁠paahtiinowak pahpahkinek ci⁠pinaakosiwaatc taapishkoo kaapi kashkiitipihkahk kaashi misihteshkaak kihci waciihkaank. Kaawiin hsa 'i kekoon otaanaank wiihkaa pimi ishiwepahsinoon, kaawiin kaye'i wiihkaa miinawaa tani ishiwepahsinoon.

³ Taapishkoo hsa ishkotenk inentaakosiwak e⁠miiciwaatc nehtaawikininikin eni ishaawaatc. Eni ishaawaatc hsa mii 'i ishinaakwanini ahkiini taapishkoo Iitin kihtikaanahkamik. Otaanaank tahsh kaakiih piishaawaatc taapishkoo pikwatahkamikonk ishinaakwanini. Kaawiin kanake kekoonini oshaapwiihkantaakohsiinaawaa.

⁴ Mihtatimoonk hsa ishinaakosiwak, ehpiihci nihtaa pimipahtoowaatc taapishkoo miikaasowi mihtatimoonk.

⁵ Mii hsa 'i enihtaakosiwaatc taapishkoo miikaasowi otaapaanaahkwak kaa⁠pimi ayaawaatc, eyaayaashawi kwaashkwaniwaatc kaashi wawaciihkaanik. Mii 'i enihtaakosiwaatc taapishkoo kaashi kaakaahpahkwanekin mashkohsiin, taapishkoo shimaakanihshak kaa⁠oshi ayaawaatc ewii anta miikaasowaatc.

⁶ Pemaatisinitc itahsh e⁠waapamikowaatc eh⁠pinaakosiwaatc mii 'i eshi waapinewisinitc ehpiihtaanimisinitc.

⁷ Taapishkoo hsa shimaakanihshak kaa⁠moohkiihcikewaatc mii hsa 'i mayaa eshinaakosiwaatc; taapishkoo shimaakanihshink ahpiihci nihtaawaantawewak e⁠ahkwaantawewaatc waahkaayaapihkinikanink. Kahkina hsa kwayahkoshkaawak aanti nahke eshaawaatc, kaawiin kanake ci⁠pahkeshkaawaatc.

⁸ Kaawiin kaye ci⁠kakiipishkotaatiwaatc. Shaaposhkaawak kaye eshi'ayaayiici kanawentaakwaninik, kaawiin kekoon okipihtinikohsiinaawaa.

⁹ Miihsh eshi moohkiihtamowaatc ootenaani, eh⁠paashitaantawewaatc waahkaayaapihkinikanini; waahsehcikanink e⁠onci kashki'owaatc eh⁠paapiintikewaatc waahkaa'ikanan taapishkoo okimoocishkak.

¹⁰ Miihsh eshi koshkohsenik ahki e⁠ani pimi ayaawaatc; kiishik kaye nininkishkaani. Kiisihsoon, tipihkikiisihsoon kaye mii 'i eni ishi kashkiitipihkinaakosinitc, wanankohsha' kaye kaawiin awahshime ci⁠saakaahsikenitc.

¹¹ KaaTipenciketc hsa pinehsiiwihtaakosi eh⁠kanoonaatc oshimaakanihshiima' keni ishihcikenitc. Wiinke hsa ko paahtiinowa', soonkentaakosiwa' kaye i'i kaa⁠na'ihtaakotc aaniin eshi anoonaatc. Etatawe hsa ta⁠kihci kakwaanihsakentaakwanini kaaTipenciketc okiishikanom. Awenen itahsh inaa ke⁠shaapwiihpan?

Pemaatisiwaatc Kii'antomintwaa Cikwehkaatisiwaatc

¹² Miitahsh kaaTipenciketc ehkitotc, “Noonkom hsa ko pi⁠kwehkihtaak misiwe piko kite'iwaank, ci⁠wiihsinihsiwek ci⁠anami'aayek, ci⁠mawiyek kaye.

¹³ Taka kite'iwaan ta⁠piikonaakwanoon e⁠maanentamek, kaawiin wiin kikikishkikaniwaan. Ampeyohk, pikiiwenotawihk kaaTipenciketc kiKishemanitoomiwaa. Wiin ohsha minotootaake, koohpaatenimiwe kaye. Aahpici ohsha pecikitaaso, wiinke kaye saaki'iwe. Manaa ishihcike ohsha noociko ci⁠tootaaketc.

¹⁴ Maakishaa hsa kaaTipenciketc kiKishemanitoomiwaa ta‑aantentam meshkwac ci⁠minohse'inek ci⁠miininek niipiwa' ke⁠nihtaawikihtaawek. Miitahsh i'i ci⁠ayaawimek pahkweshikanan, ci⁠ayaawek kaye shoominaapo ke⁠aapacihtooyek ahpii pakitinamawek kaaTipenciketc kiKishemanitoomiwaa.”

¹⁵ Weti hsa waciink Saayan (Zion) kaa⁠ishinihkaatek tashi pootaatamok i'i pootaacikan; anoohkiin tahsh kaye ci‑ishihcikaaniwank kehtentaakwahk ci⁠wiihsininaaniwansinok ci⁠anami'aank, antom kaye pemaatisiwaatc ci⁠maawaci'itiwaatc!

¹⁶ Maawatoon pemaatisiwaatc, kanoosh kaye ci⁠kwayaanciiwaatc ci⁠anami'e nakishkotaatiwaatc. Maawatoon kaye kaa⁠niikaanisiwaatc, apinoonciishak kaye, iki kaye kaa⁠nooniwaatc. Iki kaye kaa⁠oshki wiitikentiwaatc oka nakataanaawaan otaawiniwaa ci⁠piishaawaatc.

¹⁷ Taka anami'ewikimaak pemiihtawaawaatc kaaTipencikenitc enaahsamiinitc ta⁠tashi mawiwak i'imaa nahsawaya'ii kihci anami'ewi ishkwaantemink, eshi'ayaanik kaye kaa⁠tashi pakitinaahsowintc. O'owe hsa ci‑ihkitowaatc, “Tepencikeyan, koohpaatenimihshinaam, kitipeniminaam iitok! Keko pakitinaahken kotak pehkaanwewaanakisiwaatc pemaatisiwaatc ci⁠maanenimiyamintwaa, ci⁠aanawenimiyamintwaa kaye ci‑ihkitohsikwaa, ‘Aaniin tahsh ini oKishemanitoomiwaan,’ ” ta⁠ihkitowak.

Kishemanitoo Kiikiiwe'ishihtootc Ahkiini Cinihtaawikihcikemakaninik

¹⁸ Miitahsh kaaTipenciketc kaakii naakohtootc e⁠naanaakatawentank i'i ahkiini, ekiih koohpaatenimaatc opimaatisiima'.

¹⁹ Miitahsh kaa⁠ishi nahkwehtawaatc, “Kika ishinisha'amawininim hsa pahkweshikan, oshki shoominaapo, pimite kaye ci⁠ayaayek; minihk iko ci⁠tepihseyek. Kaawiin tahsh miinawaa wiihkaa kotak pemaatisiwaatc kika maanenimikohsiiwaak.

²⁰ Pahpahkinek hsa kiiwetinonk kaakiih pi onciiwaatc ninkoci ninka inaamwa'waak, ci‑inaamwa'wakwaa pikwatahkamik kaashi paahtenik. Kaa⁠niikaanishkaawaatc hsa waapanonk inahke Shiiwihtaakanaapowi saaka'ikaniink tashi maaciishkaawak. Otaanaank tahsh kaa⁠pimi ayaawaatc ninkaapii'anonk kihcikamiink inahke tashi maaciishkaawak. Wiinke hsa ta⁠wiihtaasomaakosiwak kaa⁠nipowaatc. Tepwe hsa kaaTipenciketc kihci kekoon ishihcike.”

²¹ “Kiin ahki keko sekisihken; minwentan, ciihkentan kaye aaniihsh kaaTipenciketc kihci kekoon ishihcike.

²² Aya'aawihshak, keko sekisihkek, kaashi pahpashkwaak ohsha tani osaawashko mashkohsiihkaa. Mihtikook kaye okani nihtaawikihtoonaawaa shiiwimiicim, pik (fig) kaye tinowiminan, shoominak itahsh kaye ta⁠nihtaawikiwak wiinke ci⁠wenooci ayaawaatc.”

²³ “Pemaatisiyek, Saayanink eyaayek taka minwentamok. Onci ciihkentamok e⁠wiiciiwek kaaTipenciketc, wiin iitok kaa⁠ishihcikehtamawinek na'i piko minihk ci⁠kimiwaninik eh⁠takwaakininik. Wiin kaa⁠ishihciketc wenci kimiwaninik eh⁠takwaakininik, ci⁠kimiwaninik kaye kiih⁠siikwaninik kaapi nihtaa ishiwepahk otaanaank.

²⁴ Kaa⁠tashi pawikanaancikaasotc pahkweshikan hsa kaye ta⁠mamooshkinewan; kaashi pawihshkikaasowaatc shoominak hsa kaye ta‑ayaamipiiwan. Aalip tino pimite kaye ta‑ayaamipii.

²⁵ Miitahsh ci⁠kiiwe miininakook kahkina tahsopipoon minihk kekoon kaakii wanihcikeyek ahpii pahpahkinek kiih⁠kitaawaatc kaakii kihtikaatamowekipan. Niin iitok kaakiih piicinisha'wakwaa iki pahpahkinek kaashi ayaayek kaakiih paahtiinowaatc taapishkoo shimaakanihshak kaa‑ahpiihci paahtiinowaatc.

²⁶ Aahpici tahsh kika wenoocihtoom miicim ke⁠miiciyek, miihsh wiinke ci⁠tewiihsiniyek. Miihsh kaye ci⁠miikwehciwentamowek otishinihkaasowin kaaTipenciketc kiKishemanitoomiwaa, aaniihsh wiin kaa⁠kihci ishihcikehtamawinek. Kaawiin tahsh miinawaa wiihkaa nimpimaatisiimak ta‑akacihsiiwak.

²⁷ Mii hsa tahsh i'i ci⁠kihkentamek niin kaaTipenciketc eh⁠tinowiyaan i'imaa Isriyalihkaank. Niin kaaTipenciketc eh⁠oKishemanitoomimiyek, kaawiin pahkaan manitoo ayaahsii. Kaawiin tahsh miinawaa wiihkaa nimpimaatisiimak ta‑akacihsiiwak.”

KaaTipenciketc Okiishikanom Ehpehshonaakwaninik

²⁸ “Naanaake tahsh ninka siikinamawaak nintAhcaahkwan kaashi ayaawaatc kahkina pemaatisiwaatc. Kikosihsiwaak, kitaanihsiwaak kaye ta⁠miinikoowisiwak ci⁠kanootamawaawaatc Kishemanitoon. Kitahkiwensiimiwaak hsa ta⁠pawaacikewak. Kitooshkiniikiimiwaak tahsh oka waapantaanaawaan ishinamowinan.

²⁹ Ahpii hsa kiishikahk siikinak nintAhcaahk nintanohkii'aakanak ehkwewiwaatc, eniniiwiwaatc kaye hsa kewiinawaa ta⁠miinikoowisiwak.”

³⁰ “Ninka naakohtoonan tahsh nimaamahkaacihcikewinan kiishikonk, i'imaa ahkiink, ci⁠naakwahk miskwi, ishkote, wiinke kaye ci⁠wahkwiiwaapahtek.

³¹ A'a tahsh kiisihs tani kashkiitipihkisi, tipihkikiisihs tahsh tani miskosi taapishkoo miskwi cipwaa ocihcihsenik kaawii kihci ishikiishikaninik, kaawiih kakwaanihsakentaakwaninik kaaTipenciketc okiishikanom.

³² Awenen tahsh iko ke⁠kanoonaatc kaaTipencikenitc ci⁠naatamaakotc ta⁠pimaaci'aa. Mii iitok o'o kaaTipenciketc ehkitotc, ‘Aaninta hsa Ceroosalamink (Jerusalem) eyaawaatc ta⁠shaapwiiwak; ikiweniwak niin wiin ke⁠onaapamakwaa ta⁠pimaatisiwak.’ ”