Coot 1 - Ojibwe Kihcimasina'ikan

¹ Niin Coot (Jude) Ciisahs Christ otanohkii'aakanan. Ciimis (James) ishinihkaaso niicihkiwensi. Kitooshipii'amawininim kahkina kiinawaa kaa⁠/antominek, kaasaaki'inek kaye Kishemanitoo Kaaoyoohsimintc, Ciisahs Christ itahsh kaakanaweniminek.

² Miitahsh i'i eshipakohsenimoyaan mooshak iko cikoohpaateniminek Kishemanitoo cianikaantentaakwahk kipisaanentamowiniwaa maano kaye cianikaancisaaki'itiyek.

Owanikihkino'ikek ehtashimintwaa

³ Kaasaaki'inakook, aahpici ohsha weweni nikiihkakwe'ishihcike cioshipii'amawinakook kipimaaci'ikoowininaan onci kaamaamawihtooyank. Noonkom itahsh ninkii'inamanci' cioshipii'amawinakook ehkaancikanooninakook kiinawaa cikakwenaatamaatamek i'i tepwehtamowin Kishemanitoo kaakii'miinaatc opimaatisiima'.

⁴ Aninta enami'ewaatisihsikwaa ohsha kikiihpiintikaakonaanik ekiihkihkentaakosihsikwaa entinowiwaatc. Miiwak itahsh i'i kaakiihkwehkinamowaatc enaatotenik Kishemanitoon okishewaatisiwinini, miish meshkwac enaapacihtoowaatc pisaan keoncitootamowaatc noociko otishihcikewiniwaan. Miiwak itahsh iki kaa⁠/aanawenimaawaatc Ciisahs Christan kaamihcipeshikonitc kitOokimaaminaanin, kaaTipenimiminank kaye. Mewisha iitok kii'ishipii'ikaatekopan aaniin keshikakwaataki'intwaa.

⁵ Aanawiin aasha kahkina ehkihkentamek o'o, shaakooc itahsh nimihsawentaan cimaamihkawimininakook kaaTipenciketc ekii'onci⁠shaapwii'aatc opimaatisiima' weti Iicipahkiink (Egypt) kiisaakiciwinaatc. Naanaake tahsh okii'nihshiwaanaaci'aa' i'i kaakiihtepweyentansinik.

⁶ Maamihkawinotawihkwak itahsh encalak kaakii'ishitashiihkehsikwaa kaakii'ishimiinintwaapan cishitipencikewaatc, kaakii'nakatamowaatc kekii'ishitaawaahpan. Noonkom itahsh piiwaapihkweyaapiin wiihkaa kepooni⁠ayaasininikin aapataniniwan e'mamaancikwahpisowaatc. Anaamink kaaishikashkiitipihkaninik itahsh Kishemanitoon otashikipa'okowaan ehkanawenimikowaatc ewiihtipaahkonikowaatc ahpii kihcitipaahkonikewi⁠kiishikaninik. Miitahsh i'i ahpii kenihshiwanaaci'intwaa.

⁷ Maamihkawik itahsh kaye Swaatam (Sodom), Kamwaara (Gomorrah), ini kaye ootenawan kaakii'ayaakin i'imaa ciikaya'ii. Ikiweniwak kaye kaakiihtashiihkewaatc i'imaa ootenaahkaank peshikwan kii'ishihcikewak kaakii'ishihcikenitc maciencala' noociko ekii'ishihcikewaatc, ekii'nahpaaci‑⁠pihshikwaacihcikewaatc kaye. Ini tahsh ootenawan, iki kaye kaakiihpimaatisiwaatc kii'nana'ahsaawak cinehpici‑⁠caakisontwaa. Miihsh i'imaa eshiwaapanta'ikooyank, pehkish itahsh e'ayaankwaamimikooyank.

⁸ Miitahsh peshikwan oko owanikihkino'ikek eshihcikewaatc, otishinamowiniwaank iko nahke e'ishi⁠noociko⁠tootamowaatc owiiyawiwaan. Kaawiin kaye opapaapisiskentansiinaawaan okimaawiwinan Kishemanitoon kaa'onahtoonitc. Noociko kaye otinaawaa' encala' kaakihtentaakosinitc ishpimink kaa⁠/ayaanitc.

⁹ Inashke wiin a'a kaaniikaanentaakositc encal Mayihkal (Michael) kaawiin i'i kii'ishihcikesii. Ahpii kiikakweshaakoosomaatc maciaya'aan aaniin kekiihtoocikaatenikipan Moosihsoon (Moses) owiiyawini, kaawiin Mayihkal kanake okiihkakwe‑⁠nihshiwanaasomaahsiin maciaya'aan anoociko ishikiishwewinan cikii'aapacihtoohpan. Mii ehta kaa'inaatc: “Taka kaaTipenciketc kikakihcinooci'ik,” okii'inaan.

¹⁰ Okoweniwak itahsh wiin ininiwak mii hsa ko 'i eshimaci‑itamowaatc kekoonan nehsitohtansikwaa. Ini hsa wiin pankii kekoon kaakihkentamowaatc, otishikihkentaanaawaa ehta taapishkoo aya'aawihsha' kaaishimihci‑⁠pawikihkencikenitc tepwe e'naanaakatawentansinik. Miiwan tahsh ini tino kenihshiwanaaci'ikowaatc.

¹¹ Wiinke hsa takihcikoohpaasinaakosiwak! Mii hsa mayaa eshihcikewaatc enaapihcikewaatc kaakii'ishihcikenikopanen Kenan (Cain) mewisha. Mii kaye peshikwan eshihcikewaatc kaakii'ishihcikenikopanen Pelamoon (Balaam) kaakii'ishimamaashiinitc shooniyaan onci. Miish kaye peshikwan eshishashiipihtamowaatc taapishkoo kaakii'ishishashiipihtamonikopanen Kwaara (Korah) kaakii'ishinihkaasonitc. Miitahsh peshikwan inahke keshinihshiwanaatisiwaatc kekii'ishihsenitc.

¹² I'iweni hsa kaa⁠/akatentansikwaa kaaishi⁠nihtaa⁠papaamahkamikisiwaatc, mii hsa 'imaa wenciwiinishkamowaatc kiinawaa e'wiitoohkaasowaatc kaaishisaaki'itiiwi‑⁠wiihkwantiyek, wiinehtawaa piko e'naanaakaci'itisowaatc. Miish eshinaakosiwaatc taapishkoo wahkwi kaapimiwepaahsink, kaakimiwanohkemakahsinok. Taapishkoo mihtikonk kiitakwaakihk ishinaakosiwak, kaanihtaawikihtoohsikwaa kaye kekoonini kekiimiicinaakaatenikipan, e'ishinaakosiwaatc kaye kikiciipihk kaapihkwatahkiipicikaniwiwaatc mihtikook, wiinke tahsh e'aayiicinipowaatc.

¹³ Mii kaye eshinaakosiwaatc taapishkoo kaakihcimamaankaashkaak kihcikamiink, otishihcikewiniwaan kaaishimoohkinaakwaninikin taapishkoo piihte kaamoohkinaakwahk kiikihcinootink. E'ishinaakosiwaatc kaye taapishkoo wanankohshak noociko kaapapaamakoocinowaatc, Kishemanitoo okii'onahsaa' nehpic iko ci'ayaanitc maawac iko waahsa anaamink kaaishikashkiitipihkaninik.

¹⁴ Miiwa' itahsh o'o kaakiihtashimaakopanen Iinohk (Enoch), niiwink Aatamonk (Adam) kaakii'onci⁠aanihkoopisotc, kaakii'ihkitokopanen: “KaaTipenciketc ohsha wiihpitakohshin ewiihpiwiiciiwaatc mitaahswaahk kihcimitaahswaahk Kishemanitoon okihtentaakosiimini,

¹⁵ ewiihpitipaahkonaatc kahkina, cionaahkonaatc kaye aaniin ketootawimintc i'i kahkina kaaishihcikehsinik Kishemanitoo kaaishi'antawentank, i'i kaye kahkina noociko kaa'inaahpinemikotc omaci‑ishiwepisii',” kii'ihkitokopan.

¹⁶ Miiwak ihsa oko mooshak kaanihtaa⁠kihci⁠kaakiikitowaatc, kotak kaye awiya' kaa⁠/anaamimaawaatc; wiinawaa ko e'ishihcikewaatc eshimacimihsawentamowaatc. Aahpici oncita kaye eminoinaawaatc awiya' wiinawaa piko ehta ewii'onciminohse'itisowaatc.

Ekii'ayaankwaamimintwaa, ekiihkihkino'amawintwaa kaye aaniin ketootawaawaatc owanikihkino'ike'

¹⁷ Kiinawaa tahsh wiin kaasaaki'inakook, maamihkawiwaahk otaanaank kaakiihpi‑ininekwaapan kaaTipenciketc Ciisahs Christ otishinisha'waakana'.

¹⁸ Mii hsa 'oweni kaa'ininekwaa: “Ahpii tahsh ishkwaac anikakiishikahk, tani/ayaawak hsa kepaahpinotaakewaatc, keishihcikewaatc wiinawaa piko omacimihsawencikaniwaan, ehkohsaahsikwaa Kishemanitoon.”

¹⁹ Miiwak ihsa oko kaanihtaa‑⁠nenaawishkawaawaatc otepwehtamoo', wiinke kaatipenimikowaatc kaaishimihsawentamomakaninikin owiiyawiwaan. Kaawiin kaye otayaawaahsiwaawaan Kishemanitoon otAhcaahkoni.

²⁰ Kiinawaa tahsh wiin kaasaaki'inakook, ehkihtentaakwahk kitepwehtamowiniwaa, e'inentaakwahk waahkaa'ikan kaaishionaapihkihsicikaatek, mii 'imaa ishiompikaapawi'itik. Ishianami'aak itahsh kaye kaaishikihkinowiniminek Kishemanitoo otAhcaahkwan.

²¹ Kishemanitoo osaaki'iweninink ishiayaak keshikanawentaakosiyek, ci/aaskonipii'ek kaaTipenciketc Ciisahs Christ kaaishikoohpaasinaaketc kaawii'ishimiininek pimaatisiwin wiihkaa kepoonihsehsininik.

²² Koohpaatenimihkwak iki kaanihtaa‑aanwehtamowaatc.

²³ Aaninta tahsh wiin pimaaci'ihkwak, saakiciwiihkopinihkwak i'imaa maci‑ishkotenk. Koohpaatenimihkwak itahsh kotak aaninta citako⁠kohtaanentamek. Kakwaanihsakentamowaahk otishihcikewiniwaan. Ayaankwaamisik kiinawaa i'imaa cionciwiinishkaakoohsiwek.

E'miikwehciwenimintc Kishemanitoo

^24-25 Taka hsa noonkom miikwehciwenimaataa kaamihcipeshikotc Kishemanitoo Kaapimaaci'inank. Wiin iitok kaakashkihtootc cikanaweniminek cipankihshinsiwek, cipiininek kaye kaaishiokimaawentaakwaninik kaaishiayaatc, awaac iko kekoon cishianaamentaakosihsiwek, wiinke kaye ciminwentamowek. Ciisahs Christ kaaTipeniminank e'wiiciiwank, taka hsa oncimiikwehciwenimaataa Kishemanitoo aaniihsh kihci‑inentaakosi, kihciokimaawentaakosi, mashkawentaakosi, wiin kaye kaakashki'ewisitc. Mii hsa 'oweni kaa'inentaakositc cipwaa ayaanik ahki, noonkom kaye, mii kaye 'i nehpic iko keni‑ishiayaatc! Emen!