Coop 5 - Ojibwe Kihcimasina'ikan

¹ “Noonkom itahsh taka kiikiton, taka awekwen ke⁠nahkwehtawinokwen! Awenen itahsh inaa kehtentaakositc ke⁠naasihkawatipan?

² Kekiipaatisitc ihsa kaa⁠shiinkentank onihsikoon, awiya hsa kaye kehkentansik kekoon onihsikoon kaa‑aayaahshentank.

³ Niin hsa piko nimpi waapamaak kekiipaatisiwaatc eh⁠kotaawikiwaatc ke⁠onci kehcinaac ayaawaatc, miihsh kaa⁠ishi kwetahto maci'itamowak otaawiniwaan.

⁴ Oniicaanihsiwaa' hsa kaawiin wiihkaa ta‑ayaahsiiwa' pisaan keshi pimaatisinitc, kaawiin hsa awiyan oka naatamaakohsiini tipaahkonimintc.

⁵ Kewaskatewaatc hsa awiyak oka miicinaawaa kekiipaatisinitc kehtikaataminitc, mihsawaa ko ini pahkweshikaniminan nehtaawikininikin eshi kaawiminakashiihkaanik. Ke⁠noontayaapaakwenitc hsa oka ayaahshenimikoo' kaashi wenootisitc!

⁶ Wiihsakentamowin hsa kaawiin onciimakahsinoon mahkatewahkamikonk, kaawiin kaye maanshihsewin ahkiink onci nihtaawikihsinoon.

⁷ Shaakooc itahsh inini ishi nihtaawiki ci⁠maanshihsetc, taapishkoo ko kehcinaac kaashi ishpihsek kaa⁠pahkinek.

⁸ Kiishpin itahsh i'i ishihsekipan, niin hsa wiin nintaakii naasihkawaa Kishemanitoo ci⁠pakitinamawakipan o'o ishihsewak.

⁹ Wiin iitok okihci ishihcikewinan kaa⁠kashkihcikaatehsininikin ci⁠nihsitohcikaatenikin, omaamahkaacihcikewinan kaye kaawiin kashkihcikaatehsininiwan ci⁠akincikaatenikin.

¹⁰ Wiin iitok kaa⁠ishihciketc ci⁠kimiwaninik o'omaa ahkiink, kaa⁠ishiciwanihtootc nipiini mihshawahkamik.

¹¹ Otishpentaakosi'aa' kaye i'i kaa⁠tapahsenimonitc, onaakaci'aa' hsa i'i kaa⁠maanentaminitc.

¹² Owanashkwe'aa' hsa waa⁠ishihcikenihpan kaa⁠nakaci kakayenisinitc, miihsh eshi aanawewisinitc waa⁠ishihcikenihpan.

¹³ Miitahsh kaye eshi kaahcitinaatc kekiihtaawenintisonitc kaashi nakaci kakayenisinitc, miihsh waa⁠ishihcikenihpan kaawiin kihkentaakwahsinini.

¹⁴ Kaa⁠kashkiitipihkaninik hsa otootihsikonaawaa eh⁠kiishikaninik, kii⁠naawahkwenik ishinaakosiwak taapishkoo kaa⁠nanaantonciiniketc kaa⁠kashkiitipihkaninik.

¹⁵ Kishemanitoo hsa onaatamawaa' ketimaakisinitc ci⁠otihsikohsinik nipowin, onaatamawaa' kaye ketimaakisinitc ci⁠wehsaani'imaahsiwimintc.

¹⁶ Miitahsh ketimaakisinitc wenci ahpenimonitc, kaa⁠macentaakwahk hsa tahsh kaawiin ta⁠noontaatiimakahsinoon.

¹⁷ Shawentaakosi hsa inini ke⁠kwayahkonikotc Kishemanitoon, keko tahsh aanawentamowaahken kii⁠maamiinonihk Kaa⁠Maawaci mashkawisiitc.

¹⁸ Osiitoohpitoon hsa kekoon kii⁠maahkihtootc, oninciink hsa onci wiihsakentamo'iwe, miihsh kaye i'imaa oninciink wenci antawi'iwetc.

¹⁹ Ninkotwaahcink hsa otihsikowatc maanshihsewinan, kika nanaatamaak. Niishwaahcink itahsh otihsikowatc, mii 'i kaawiin kanake kika ishi wiihsakentansii.

²⁰ Ahpii hsa ayaahsininik miicim o'omaa ahkiink, kika naatamaak hsa ci⁠kawaskatewaahsiwatc, miikaatiwintc kaye kika naatamaak ci⁠nihsikoowaahsiwatc.

²¹ Kishemanitoo hsa kaye kika naatamaak maci tashimikoowatc, kika kanawenimik kaye miikaatiwintc ci⁠nihsikoowaahsiwatc.

²² Kika paahpihtoon hsa neshiwanaacihcikemakahk, miicim kaye kaa⁠noontehsek, kaawiin kika kohsaahsiik aya'aawihshak eyaawaatc ahkiink.

²³ Kaawiin hsa kaye ahsiniik ta‑ayaahsiiswak keshi pikishkahkamika'ikeyan mihshawahkamik, pikwaci aya'aawihshak pisaan kika wiiciiwikook.

²⁴ Miitahsh ci⁠kihkentaman pisaan ci⁠ayintaayan kipakwaanekamikonk; naanaakasawaapantaman hsa kitaya'iiman, kaawiin hsa kekoon kika wanihtoohsiin.

²⁵ Kika kihkentaan hsa kaye ci⁠paahtiinowaatc kiniicaanihsak, kipiiwesiimak hsa ta⁠tahshiwak taapishkoo mashkohsiin kaa⁠tahsinkin o'omaa ahkiink.

²⁶ Taapishkoo hsa pahkweshikaniminan kaa⁠kiishikinkin ci⁠manishikaatekin, mii hsa ke⁠ishinaakwahk kipimaatisiwin ahpii ahkiwensiiwiyan.

²⁷ Inashke hsa ninkii anta kihkentaamin o'o, ninkihkentaamin hsa eh⁠tepwewiniwank. Noontan hsa 'o, ci⁠kihkentaman ci⁠minotootaakoyan.