Coop 31 - Ojibwe Kihcimasina'ikanCoop Ishkwaac Kiikanootamaasotc 1 “Miitahsh kaaishi ayiici ahshotamaatisoyaan, nishkiishikonk wiihkaa miinawaa cimaci mihsawenimaahsiwak kanawaapamak oshkiniikihkwe.” 2 “Aaniin itahsh inini ketootaakohpan KaaMaawaci mashkawisiinitc Kishemanitoon ishpimink eyaanitc? Aaniin hsa naa keshi kiiwe tipa'amaakohpan? 3 Wiin iitok Kishemanitoo kaatootawaatc mecaatisinitc, memaashiinitc kaye cinihshiwanaatisinitc, cimaanshihsenitc kaye. 4 Okihkentaan iitok inahke eshihcikewak, ewaapantank entahso tahkohkiiwak.” 5 “Kiishpin kii‑ishi pimaatisiyaampaan cikiiwanimoyaan, piminisha'amaampaan kaye kakayenisiwin, 6 taka hsa Kishemanitoo ninkashi anta kihkenimik kaatepwemakaninik otipaapiishkoocikanink, miihsh cikihkentank kekoon eishi anaamentaakosihsiiwak! 7 Kiishpin kaanakatamowaanen kwayahk miihkana, komaa kaye ninte'ink onci naasihkamaampaan ewaapantamaan macikekoon, komaa kaye nininciink onci macitootamaan, 8 mii hsa iinsan kotak cimiiciwaatc kaakiih kihtikaatamowak, miihsh nehtaawikihtooyaan cipahkwatahkiipicikaatekin.” 9 “Kiishpin hsa kaye ninte'ink onci mihsawenimimak niwiicitaamaakan wiiwan, tashi ahkamawimak ihsa ishkwaantenk, awiya keshi waapamihsik 10 miihsh iinsan niwiiw pisaan cikishitepoonaahpan pahkaan ininiwan, ciwiihpemikohpan kaye kotak pahkaan ininiwan. 11 Aahpici iitok i'i takihci akatentaakwan, macihcikewin kenana'ahcikaatekipan! 12 Mii hsa 'iwe ishkote kaa‑ankwaahkisikemakahk, keonci caakaahkitek kahkina kekoon eyaayaan.” 13 “Kiishpin hsa weweni kaahtootawaahsiwakwaapan nintanohkii'aakanak, ahpii ehkanooshiwaatc kekoon eishi maanshi tootawakwaa, 14 aaniin itahsh inaa keishihcikewakipan ahpii Kishemanitoo oncishkawikaapawihtawak? Aaniin ihsa inaa keshi nahkwehtawakipan onaahkonitc? 15 Mii iitok a'a peshikwan Kishemanitoo kaakii oshi'itc omihsataaniink nimaamaan, kaakii oshi'aatc kaye nintanohkii'aakana'.” 16 “Kaawiin hsa wiihkaa nintaanwehtansii ciwiici'akwaapan ketimaakisiwaatc eshi noontehsewaatc; kiiwaacihkwewak kaye kaawiin wiihkaa nimpakitinaahsiik cikoohpaacihsewaatc. 17 Kaawiin hsa wiihkaa nintishihcikehsii cinoonteskatetc ciahshamaahsiwakipan kwiiwahshishaan mekwaa ewiihsiniyaan. 18 Ahpii hsa ko kiihpionci oshkaatisiyaan, ninkiih pionci naanaakaci'aa taapishkoo otetemaa eshihciketc, kiinihtaawikiyaan hsa ninkiih pionci naanaakaci'aa kiiwaacihkwe. 19 Ahpii hsa kiiwaapamak awiya kekoon enoontehsetc, onsaam ehkitimaakisitc ciataawetc kikishkikanan, 20 mii hsa eshi miinak kekikishkank wenciinik maanahcaanihshiwayaanink, kaaontinamowak nimaanahcaanihshink. Miitahsh eshi miikwehciwenimitc misiwe ote'ink.” 21 “Kiishpin hsa kaamaanshi tootawaawakwen kwiiwahshishaanan, kihkentamaampaan cipahkinaakeyaan eshi tipaahkonitink, 22 taka hsa ninihk taonci pahkwacihse eshi sakihsink nintinimaakanink, kaye cipohpoohkohsekin ninihkan. 23 Ninkohtamowaan ohsha Kishemanitoo onana'ahshiwewin, ekohtamowak kaye eshi okimaawentaakositc, kaawiin i'i nintaa ishihcikehsii.” 24 “Kiishpin hsa ahpenimonotawak osaawi shooniyaa, ishinihkaanak kaye osaawi shooniyaa wenci kehcinaa'owenimoyaan, 25 onci kihci inenimoyaan kaye ekihci wenootisiyaan, wenootisiwin nininciink kaakii onci kashkihtooyaan, 26 kiishpin kaye kanawaapamakipan kiisihs kiisaakaahsiketc, komaa kaye tipihkikiisihs kiiminwaahsiketc, 27 kiishpin itahsh i'imaa ninte' onci kiimooci kashki'ikoyaampaan cikihtenimakwaa, ociintamaampaan kaye nininc ci‑inwaatamaan ekihtenimakwaa, 28 miiwan hsa ono macitootamowinan eshinaakwahkipan citipaahkonikaatekipanen, aaniihsh mii 'i iinsan eihkitoyaan eayaahsik Kishemanitoo ishpimink.” 29 “Wiihkaa na nintoonci ciihkentomowaan emaanshihsewaatc kaashiinkenimiwaatc, nintoonci minwentam ina kaye kiiotihsikowaatc macikekoon? 30 Kaawiin hsa nimpakitinintisohsii nintoonink cionci macitootamaan, cikakwetwewakipan cimacakintenikin opimaatisiwiniwaan. 31 Wiihkaa na ininiwak enohkiihtawiwaatc taihkitowak, ‘Koonike awiya tamihkawaa wiihkaa wenci tewiihsinihsik Coopan (Job) omiicimiminiink?’ 32 Kaawiin hsa wiihkaa piiwite akwaciink ishi nipaahsii, mooshak hsa ko nintishkwaantem paahkihsin pisaan pemi ayaawaatc cipiintikewaatc niwaahkaa'ikanink. 33 Kaawiin hsa wiihkaa ninkakwe kaatoohsiin nimacitootamowin taapishkoo Aatam (Adam) kaakii ishihciketc, cikakwe kaatooyaampaan nimaci'inentamowin ninte'ink, 34 aaniihsh ninkohsaak awiyak kaapaahtiinowaatc; ekohtamowak keshi miihkinsomiwaahpan, mii hsa kaakii onci noontaatihsiiwaan wiihkaa ekiih saaka'ansiwaan. 35 Ampehsh inaa awiya noontawitc o'o kaaihkitowak! Kahkina ohsha kaaihkitoyaan nintishi tepwe. Taka KaaMaawaci mashkawisiitc Kishemanitoo ninka nahkwehtaak. Taka hsa iki enaamimiwaatc masina'iikinonk oka ishi oshipii'aanaawaa aaniin eshi anaamimiwaatc. 36 Kehcinaac hsa nintinimaakanink nintaa papaa naapishkaan, nihtikwaanink kaye nintaa kikishkaan ci‑inwaatamaampaan kihciokimaawaanohkwaanink. 37 Miitahsh keshi wiintamawakipan kahkina kekoon kaahpi ishihcikewak; cipi naasihkawakipan ci‑inenimoyaampaan taapishkoo kihciokimaa okosihsan. 38 Kiishpin hsa kaahkiimootiyaampaan ahki kehtikaatamaan, kaamahkamakipan awiya mayaa tepentank, 39 kiishpin i'imaa ontancikeyaampaan, tipa'ikehsiwaampaan itahsh, komaa kaye nintishihcikewinink onci kawaskatewaatc okihtikek, 40 taka hsa meshkwac mashkohsiin, kaawiminakashiin kaye tanihtaawikinoon kekii ishi nihtaawikihpan pahkweshikan, manoomin kaye,” kii‑ihkito Coop. Mii hsa 'i minihk kaaihkitotc Coop. |
Ojibwe Shorter Bible (Roman Script) © 2008 Canadian Bible Society
Canadian Bible Society