Coop 2 - Ojibwe Kihcimasina'ikan

Coop Kiihkakweci'ikotc Onanakaaniwen

¹ Miinawaa tahsh e⁠ishi kiishikaninik kihcikiishiko awiyak kaakii nihtaa anta waapamaawaahpan kaaTipencikenitc, kewiin hsa Onanakaaniwe i'imaa kiih⁠pi takwii, ekiih pi anta waapamaatc kaaTipencikenitc enaahsamiinitc.

² Miitahsh kaaTipenciketc kaa⁠ishi kakwecimaatc Onanakaaniwen, “Aaniinti kiin kaah⁠pionci takohshinan?” okii ishi kakwecimaan. Miihsh o'o Onanakaaniwen kaa⁠ishi nahkwehtaakotc, “Weti hsa ninkiih pi oncii ahkiink kaashi nihtaa papaamohseyaan, kaashi nihtaa aayaashawishkaayaan kaye,” okii'ikoon.

³ Miitahsh kaaTipenciketc kaa'inaatc Onanakaaniwen, “Kitoonci naanaakatawaapamaa na nintanohkii'aakan Coop (Job)? Kaawiin hsa awiyan i'imaa ahkiink ishi'ayaahsiiwan i'i kaa⁠ishi'ayaatc. Kaawiin awaac kekoonini ishi anaamentaakosihsii, wiinke kwayahkwaatisi. Okohtaanenimaan kaye Kishemanitoon, kaawiin kaye opapaapisiskentansiin macikekoon. Aanciko hsa okihciwentaan ominwaatisiwin, aana kota wiin ekiih kashkimiyan ci⁠pakitininaan aaniin iko ci⁠tootawatc, wencitoo hsa ko ishi anihshaa i'i kaa⁠tootawatc,” okii'inaan.

⁴ Miihsh kaa⁠ishi nahkwehtaakotc, “Inini ohsha kahkina kekoonini oka pakitinaan ci⁠pimaacihtootc wiin iko opimaatisiwin.

⁵ Inashke kekoonini tootaw owiiyawink, miitahsh ci⁠maci'inaahpinemihk enaahsamiiwatc,” okii'ikoon.

⁶ Miihsh kaaTipenciketc kaa'inaatc Onanakaaniwen, “Haw, pisaan hsa ko waah⁠tootawatc tootaw, keko tahsh wiin nihsaahken,” okii'inaan.

⁷ Miitahsh Onanakaaniwen kaa⁠ishi nakanikotc eshi'ayaatc kaaTipenciketc. Onanakaaniwe tahsh okii ishi'aan Coopan ci⁠oshinkipihsiminitc, ohtikwaaniniink piinihsh ositiniink.

⁸ Coop tahsh kii‑ishaa wepinikanink ekii awi nanamatapitc. Miitahsh ahkihkonk kaakii onci pahkwehsenik okii aapacihtoon ekiih kaahkashka'otisotc.

⁹ Miihsh wiiwan kaa'ikotc, “Keyaapi na kikihci inentaan kiminwaatisiwin? Inashke maci'inaahpinem Kishemanitoo cipwaa nipoyan,” okii'ikoon.

¹⁰ O'o hsa okii ishi nahkwehtawaan wiiwan, “Kaa⁠kakiipaatisiwaatc ihkwewak kaa⁠ishikiishwewaatc hsa mayaa kitishikiishwe. Kaawiin ina ishinaakwahsinoon pisaan ci⁠otaahpinamawankipan Kishemanitoo kii⁠piicinisha'amawinank i'i wenishihshininik, i'i kaye wesitaawentaakwaninik?” kii‑ihkito. O'o hsa kahkina Coop eshihsetc, kaawiin kanake kekoon kii‑ihkitohsii cikii onci macitootank.

Coop Kiipi'anta waapamikotc Nihsin Kaakiihsaakiwiiciiwaatc

¹¹ Nihsin (3) tahsh Coop kaakiih saaki'ikotc e⁠noontaminitc e⁠kihci kakwaatakihtootc okiih pi anta waapamikoo' ewii minwentamo'ikotc. Miiwa' itahsh o'o Elipaas (Eliphaz) ootenaank Tiiman (Teman) wenciinitc, Piltaat (Bildad) Shooa (Shuah) ahkiink wenciinitc, a'a tahsh kaye Soohpar (Zophar) Neama (Naamah) ahkiink wenciinitc. Kii‑inentamonikopan ewii nakishkotaatinitc maamaw ewiih pi anta waapamikotc.

¹² Niiyaak tahsh waahsa e⁠onci tepaapamaawaatc iki ininiwak Coopan, kaawiin tahsh okii nihsitawinawaahsiwaawaan. Ahpii tahsh kaa⁠nihsitawinawaawaatc, mii hsa 'i kaa⁠ishi kishiiwewaatc ekii mawiwaatc. Miihsh kaa⁠ishi taashkiikipitoowaatc okashkiikiiwiniwaan. Pinkwiini kaye okii ishi piwiwepinaanaawaa otihkwaaniwaan ekiih pinkwiiwihtoowaatc.

¹³ Mihtahkamik tahsh kii‑ishi onapiwak ekii wiitapimaawaatc Coopan. Niishwaahsokiishik, niishwaahsotipihk kaye minihk kaawiin kii⁠onci kiikitohsiiwak, aaniihsh okii waapamaawaan aaniin kaa‑ahpiihci wiihsakentaminitc.