Coop 19 - Ojibwe Kihcimasina'ikan

Coop Kaakii'ishinahkwehtawaatc Kaakii'antawaapamikotc

¹ Miitahsh o'o Coop kaa⁠ishi nahkwehtank,

² “Aaniin itahsh minihk waah⁠kakwaatakimiyek? Kitooniwaank ewii ontaahpinanshiyek?

³ Aasha tahsh mitaahciink kaawiin sesik kipi tootawihsiim, kaawiin kaye awaac pankii kitakacihsiim ewii maanshi tootawiyek.

⁴ Mihsawaa hsa ko tepwe kaa⁠mamaashiiwaanen, kaawiin hsa kiinawaa kekoon kika pakamishkaakohsiim.

⁵ Kiishpin hsa enenintisowekwen nawac kiinawaa eh⁠paashitentaakosiyek ahpiihc niin, i'i kaye kaashi maanshihseyaan wii⁠onci kakwe anaamimiyek,

⁶ miihsh i'i ci⁠kihkentamek Kishemanitoo iitok kaa⁠maanshi tootawitc, wiin kaye kaa⁠kakwe pita'aashitc otahsapiink.

⁷ Aana kiishi shaakoweyaan, ‘Niwanitootaakoo,’ kaawiin hsa awiya ninoontaakohsii, aana kaye kii‑ihkitoyaan ci⁠wiici'ikoyaan, kaawiin hsa awiya nimpapaamihtaakohsii.

⁸ Wiin kaye okiih kipaahkonaan inahke kaa⁠ishaawak, miihsh kaa⁠onci pwaanawihtooyaan ci⁠shaaposhkaayaan, okashkiitipihkihtoon hsa miihkanaani kaa⁠ishaawak.

⁹ Ninkii mahkamik kaye eshi wenootisiwakipan, wiin kaye kaakii otaahpinamawitc kaakii ishi sasekaawentaakosiwakipan.

¹⁰ Misiwe kaye waahkaaya'ii nintoonci piikopinik, miihsh i'i piinihsh kaawiin ninka ayaahsii. Mihtik hsa kaa⁠pahkwacipicikaniwitc kikiciipihk, mii hsa 'i entootank kaa‑ahpenimowak.

¹¹ Kishemanitoo ohsha onishkaatisiwin nimooshihtaawaan, miitahsh kaye enakimitc taapishkoo kaa⁠shiinkenimikotc.

¹² Oshimaakanihshiima' kaye nintootihsikowaanaa', e⁠oshihtoonitc kekoon ke⁠onci shaakooci'imitc, e⁠waahkaashkawimitc kaashi ayaanik nimpakwaanekamik.

¹³ Okii ishi'aa' kaye niicihkiwensiwa' ci⁠wepinimitc, nimpiiwitewenimikook kaye wiinke iki kaakii kihkenimiwaahpan.

¹⁴ Nintinawemaakanak kaye ninkii wepinikook, niwaniihkenotaakook kaa⁠saaki wiiciiwiwaahpan.

¹⁵ Iki hsa kaa⁠wiicitaamakwaa nintaawinink, iki kaye ihkwewak kaa‑anohkiihtawiwaatc, wiinke nimpiiwitewenimikook. Mii 'i eshi kanawaapamiwaatc taapishkoo awiya kaa⁠mayakisitc.

¹⁶ Aana kiih⁠kanoonak kaye nintanohkii'aakan, kaawiin ninoontaakohsii, mihsawaa ko weweni aanakiih⁠kanoonak ci⁠wiici'itc.

¹⁷ Niwiiw kaye wiinke omaanshimaantaan aaniin eshi maakonaamowak, niicihkiweyak hsa kaye awaac nimanaa pehshwaapamikook.

¹⁸ Mihsawaa hsa ko apinoonciishak nintaanawenimikook, kii⁠waapamiwaatc mii 'i eshi paahpi'iwaatc.

¹⁹ Kahkina hsa kaa⁠saaki'akwaa kii⁠kanawaapamiwaatc nishiinkinaakook. Iki kaye maawac kaa⁠saaki'akwaa, noonkom nimaanshi wiiciiwikook.

²⁰ Nishakay ohsha nihkanink, niwiiyawink kaye panankakoociin. Aahpici hsa kihci akaawaa ninkiih shaapwiihtoon nimpimaatisiwin.

²¹ Taka kiinawaa kaa⁠saaki'inakook koohpaatenimihshik. Kishemanitoo ohsha oninc nimpatapinikowaan.

²² Wekonen itahsh wenci kakwaataki'iyek taapishkoo Kishemanitoo kaa⁠tootawitc, kaawiin teminihk ninkakwaataki'aahsiwaanaan ina, kitinenimim?

²³ Ampehsh ono nintihkitowinan oshipii'ikaatekipanen i'imaa masina'ikanink,

²⁴ cikii aapatahkipan piiwaapihko aapacihcikan cikii nehpici masinaapihka'ikaatekipan i'imaa ahsiniink.

²⁵ Ninkihkenimaa hsa nimPimaaci'iwem eh⁠pimaatisitc, wiin hsa ishkwaac ci⁠niipawitc ahkiink, mii hsa awe ke⁠naatamawitc.

²⁶ Mihsawaa hsa ko nishakay aahkosiwinink onci nihshiwanaatisitc, shaakooc itahsh o'omaa niwiiyawink keyaapi ayaayaan, Kishemanitoo hsa ninka waapamaa.

²⁷ Niin hsa piko nishkiishikonk ninka onci waapamaa, kaawiin hsa ninka piiwitewakimaahsii. Mii hsa 'iwe ninte'ink eshi mihsawentamaan.

²⁸ Kiishpin tahsh ishiyek, ‘Aaniin tahsh inaa keshi kakwaataki'ank, aaniihsh wiin i'i kaa⁠tootaasotc kaa⁠onci maanshihsetc?’

²⁹ Kiinawaa hsa piko, kohtamok i'i pashipa'ikewihkomaan, mii iitok i'imaa pashipa'ikewihkomaanink Kishemanitoo ke⁠onci nana'ahtootc macitootamowin. Miitahsh i'i ci⁠kihkentamek e⁠ayaak i'i tipaahkonikoowin.”