Coona 1 - Ojibwe Kihcimasina'ikan

Coona Kiishashiipihtawaatc KaaTipencikenitc

¹ Coona (Jonah) tahsh kaakii otetetc Amihtaaiwan (Amittai), okiih kanoonikoon kaaTipencikenitc,

² “Taka weti ishaan kaa⁠mihcaak kihci ootenaank Ninipe (Nineveh) ecikaatek, soonki wiintamaw i'imaa kaa‑ayaawaatc eh⁠tepimikowaatc omacitootamowiniwaan. Ninkihkentamowaan ohsha aaniin eshi maci'ishiwepisiwaatc,” okii'ikoon.

³ Tekwac itahsh Coona nahpaac inahke kii‑ishi maacaa ekii maaciipa'iwaanaatc kaaTipencikenitc, ekii ani naasipiitc Caahpa (Joppa) ootenaank. Miitahsh kaakii mihkank kihci naapihkwaan Taarshish (Tarshish) inahke ewii ishaamakaninik. Kaa⁠ishkwaa tipa'iketc itahsh, mii 'i kaa⁠ishi wiicipoosiimaatc naapihkwaaniiwininiwa' eshaanitc Taarshish inahke. Mii 'i kaa⁠onci ishaatc ekiih tapasiinotawaatc kaaTipencikenitc.

⁴ Kishemanitoo tahsh kii‑ishihcike ci⁠kihci pakamaanimaninik i'imaa kihcikamiink, mii hsa kaa‑ahpiihci aahkwaanimaninik aahpici hsa kii⁠naniisaanentaakwan ci⁠piikwa'ank i'i kihci naapihkwaan.

⁵ Miihsh kahkina naapihkwaaniiwininiwak wiinke kaakiih sekisiwaatc, entahshiwaatc hsa okiih shaakowaanaawaa' omanitoomiwaa' ci⁠wiici'ikowaatc. Miitahsh kaye kaa⁠ishi papahkopii wepinamowaatc poositaahsonan ci⁠naankakwantenik i'i kihci naapihkwaan. Coona tahsh wiin anaamoonak kii‑ishaakopan ekii awi pimihshink wiinke ekii kihpakinkwashitc.

⁶ Miitahsh naapihkwaaniiwikimaan kaakii mihkaakotc e⁠nipaatc. Okii aamaci'ikoon tahsh ekii'ikotc, “Wekonen tahsh inaa wenci nipaayan? Taka wanishkaan, ci⁠kanoonatc kekiin kimanitoom. Maakishaa kimanitoom kika koohpaatenimikonaan miitahsh ci⁠nihshiwanaatisihsiwank,” okii'ikoon.

⁷ Naapihkwaaniiwininiwa' tahsh kii⁠ayitiwa', “Awiyohk, taka hsa ishpi wepiniketaa ci⁠anta kihkenimank kaanaka awekwen otishihcikewin o'o kaa⁠onci naniisaanihseyank.” Miitahsh kaa⁠ishi ishpiwepinikenitc. Coona tahsh mayaa okii miihkoshkaakon i'i ishpi wepinikan.

⁸ Miitahsh o'o kaa'ikotc naapihkwaaniiwininiwa', “Taka hsa noonkom iko wiintamawihshinaam! Awenen hsa 'o otishihcikewin o'o kaa⁠onci ishiwepisiyank? Aaniin kiin enanohkiiyan? Aaniinti kaye wenciiyan? Aaniin eshinihkaatek kitahkiim? Awenen kiin kaye entinowiyan?” ekii'ikotc.

⁹ Miitahsh o'o Coona kaa⁠ishi nahkwehtank, “Niin ohsha Hiiparoo (Hebrew) nintinow, ninkohtaanenimaa hsa kaaTipenciketc kaa'inintc. Mii 'awe kaaKishemanitoowitc kihcikiishikonk, kaakii oshihtootc kihcikam, ahki kaye.”

¹⁰ Wiinke tahsh kiih⁠sekisiwa' i'i ininiwa', miihsh kaa'ikotc, “Wekonen tahsh i'i kaa⁠onci ishihcikeyan?” Okii kihkenimikoo' hsa ekii maaciipa'iwaanaatc kaaTipencikenitc aaniihsh aasha okii wiintamawaa'.

¹¹ Miitahsh o'o kaa'ikotc, “Aaniin tahsh inaa ke⁠tootaakooyan ci⁠anwaahtink niinawint onci?” aaniihsh awahshime kii⁠ani kihcinootinini.

¹² Miihsh Coona kaa'inaatc, “Inashke pahkopii wepinihshik i'imaa kihcikamiink. Miitahsh i'i ci⁠anwaahtink. Ninkihkentaan aaniihsh niin i'i nintishihcikewin kaa⁠onci kihci pakamaanimanihshiyek,” okii inaa'.

¹³ Tekwac itahsh iki naapihkwaaniiwininiwak kiih⁠kihci ashepwiyewak ekiih kakwe mishaka'amowaatc. Kaawiin tahsh kiih⁠kashki'ohsiiwak onsaam aaniihsh awahshime kii⁠ani kihci mamaankaashkaani.

¹⁴ Miitahsh kaakiih kanoonaawaatc kaaTipencikenitc, “Kiin Tepencikeyan, taka keko ninka nihshiwanaatisihsiimin o'o kaa⁠tootamaank wa'a inini ci⁠onci nipotc. Taka kaye kaawiin kekoon ninka onci anaamentaakosihsiimin nihsankitc inini kaa⁠mamaashiihsik. Kiin iitok kitishihcike aaniin iko eshi minwaapantaman,” kii‑ihkitowak.

¹⁵ Mii hsa 'i kaa⁠ishi manipinaawaatc Coonawan ekiih pahkopii wepinaawaatc. Miitahsh shemaak kaa⁠ishi anwaayaanimaninik.

¹⁶ Miitahsh iki ininiwak kaa⁠ishi kihci kohtaanenimaawaatc kaaTipencikenitc. Miihsh kaa⁠ishi pakitinaahsoohtamawaawaatc, miihsh kaye kaa⁠ishi ahshotamawaawaatc ewii anohkiihtawaawaatc.

¹⁷ KaaTipenciketc tahsh kii‑ishihcike ci⁠ehpemiinitc kehci mintitonitc kinoonshen ci⁠konaanitc Coonawan. Miitahsh Coona kaakii ayaatc nihsokiishik, nihsotipihk kaye piincimihsat kihci kinoonshenk.