ᑲᓬᐋᔑᔭᓇᒃ 4 - Ojibwe Kihcimasina'ikan

¹ Kiinawaa kaaokimaawiyek, kwayahk tootawihkwak, weweni ko kaye tootawihkwak iki kaapamiihtawinekwaa kaatipenimekwaa. Ishimaamihkawik kekiinawaa e'ayaatc kitOokimaamiwaa kihcikiishikonk.

Pwaal ekiihkihkino'amawaatc kahkina awiyan aaniin miinawaa keishihcikenitc

² Keko pakiciihkek cianami'ehtawek Kishemanitoo, na'aasik kaye mekwaa e'anami'aayek, e'miikwehciwenimek kaye Kishemanitoo.

³ Mekwaa tahsh e'anami'aayek, anami'ehtamawihshinaam keniinawint, Kishemanitoo citawinamawinankitc ciwaawiintamaakeyaank otipaacimowin kaaishitashimimintc Christan, kaakiihkihkencikaatehsininik otaanaank. Miitahsh niin noonkom kaaoncikipa'okooyaan e'wiintamaakeyaan.

⁴ Miitahsh kaye ishianami'ehtamawihshik niin weweni cinihsitohtaakooyaan aaniin ehkitoyaan, aaniihsh mii 'iwe eshimiinikooyaan ci‑ishihcikeyaan.

⁵ Kakiihtaawiik kaye aaniin entootawekwaa iki kaatepwehtansikwaa, aahpici hsa kwayahk inaapacihtook i'i kaashitawinamaakooyek.

⁶ Taka kaye kitihkitowiniwaan taminohtaakwanoon, ci‑inihtaakwahkin awiya ciwii'noontank, miitahsh kaye eshinaakwahk cikihkentamek kwayahk ci‑ishinahkwehtawek kahkina awiya.

Pwaal ekiihpooshoo'aatc otepwehtamoo'

⁷ A'a tahsh kaashawenimankitc niitanami'aanaan Tihkihkahs (Tychicus) aahpici tepwe anohkii, kaawiitanohkiimitc i'imaa kaaTipencikenitc otanohkiiwininiink. Kikawiintamaakowaa aaniin eshiayaayaan.

⁸ Miitahsh o'oweni kaaonci‑ishinisha'wak weti kaaishiayaayek, ciwiintamawinek aaniin kahkina eshihseyaank o'omaa kaaishiayaayaank, kiinawaa cioncimashkawentamek.

⁹ Ini tahsh kiiciotepwehtamoonaanin Onehsimahsan (Onesimus) kaatepweyentaakosinitc kaasaaki'imintc kaye, okapiwiiciiwaan ahpii otihsinek. Aaniihsh Onehsimahs weti kaaishimaawaci'itiyek oncitipentaakosi. Kikawiintamaakowaak itahsh aaniin eshiwepaninik o'omaa kaaishiayaawankitc.

¹⁰ Eristaarhkahs (Aristarchus) kaawiicikipa'okoomak kewiin kipooshoo'ikowaa. Maarhk (Mark), Paarnapahs (Barnabas) wiicihkiwensiwan kaye kipooshoo'ikowaa. Aasha kikii'wiintamaakoom weweni ciotaahpinek kiishpin otihsinek.

¹¹ Caahshowaa (Joshua), Castahs (Justus) kaaishinihkaacikaniwitc kewiin kipooshoo'ikowaa. Oko tahsh nihsin kaawiinakwaa, mii hsa iki ehta nihsin okwehkaatisiik kaaCoowiwiwaatc kaawiitanohkiimakwaa o'o kaa‑anohkiihtamowak Kishemanitoo otOokimaawiwin. Aahpici kaye niipiwa' nintishiwiici'ikook cimashkawite'eyaan.

¹² Ehpahparahs (Epaphras) itahsh kewiin kipooshoo'ikowaa, aaniihsh kewiin mii weti kaaishimaawaci'itiyek wencitipentaakositc, Christ Ciisahsoon itahsh kaye e'anohkiihtawaatc. Mooshak itahsh kewiin oncikakwaatakanohkii'itiso e'anami'ehtamawinek cimashkawikaapawiyek, cikiishaapewiwek, kehcinaac cikehcinaa'owek kaaishitepwehtamowek, wiinke piko cina'ihtamowek Kishemanitoo kaaishimihsawentank.

¹³ Keniin itahsh iko niwiintamowaan aahpici ehkihcianohkiitc kiinawaa onci, i'i kaye weti Leyaatihsiiyaahkaank (Laodicea) weti kaye Haayaraahpalihsihkaank (Hierapolis) kaa‑ayaanitc.

¹⁴ Lok (Luke) kaye kaasaakihcikaniwitc mashkihkiiwinini kipooshoo'ikowaa. Tiimahs (Demas) kewiin kipooshoo'ikowaa.

¹⁵ Pooshoo kaye nintinaanaanik niitanami'aanaanik weti Leyaatihsiiyaahkaank (Laodicea) kaa‑ayaawaatc, a'a kaye nimpooshoo'aanaan Nimpa (Nympha), otaawinink kaaishipiintikenaaniwaninik.

¹⁶ Ahpii tahsh kii‑ishkwaa‑anamihcikaatek o'o oshipii'ikan weti kaaishiayaayek, kehcinaac kaye weti kaaishipiintikewaatc iki Leyaatihsiiyaawininiwak (Laodiceans) ta‑anamihcikaate. Kekiinawaa tahsh kika‑anamihtoom i'i oshipii'ikan Leyaatihsiiyaawininiwak kaakii'oshipii'amawakwaa.

¹⁷ O'o tahsh inihk a'a inini Aarhkihpahs (Archippus): “Kehcinaac iko kiishihtoon i'i anohkiiwin kaakii'miinikooyan kaaTipenciketc e'anohkiihtawatc.”

¹⁸ Niin itahsh iko nininc nintaapacihtoon ono ishkwaac ihkitowinenhsan kaaoshipii'amawinakook, Niin Pwaal (Paul) ehpooshoo'inakook. Keko waniihkehkek ehkipa'okooyaan. Taka Kishemanitoo okishewaatisiwin kikawiiciiwikom.