Ciimis 5 - Ojibwe Kihcimasina'ikan

Eshiayaankwaamimintwaa kaawenootisiwaatc

¹ Kiinawaa kaawenootisiyek, mawik cikakwaatakentamek. Kakwaatakihsewinan ohsha kiwii'otihsikom.

² Kiwenootisiwiniwaan ohsha wanaatanoon, iki kaye pinehsiwiotihkomak okiihkitaanaawaan kikikishkikaniwaan.

³ Kitoosaawaapihko shooniyaamiwaa, a'a kaye kiwaapaapihko shooniyaamiwaa wiinke akwaakwaapihkihshinook. I'iweni tahsh kaashi akwaakwaapihkihshinowaatc kitipaacimikowaam aaniin eshi ayaayek, miihsh kaye 'iwe kenihshiwanaaci'ikoyek taapishkoo ishkote kaashi caakaahkisowemakahk.

⁴ Kaawiin iitok kikiih tipa'amawaahsiwaawaak kaakii'-anohkiihtawinekwaa kikihtikewahkamikowaank kiimanishikewaatc. KaaTipenciketc Kaamaawaci mashkawisiitc ohsha onoontawaa' ehshaakowenitc i'i kaakii'-manishikenitc kikihtikewahkamikowaank.

⁵ Cikihci wenootisiyek, ciminwentami'itisoyek ehta kitishi pimaatisim o'omaa ahkiink. Eaancipoonitisoyek taapishkoo pishihki kaa'aancipoonintc kaashiwinintc tahsh ketashinihsintc cinanawishontc.

⁶ Kikiih tepimaawaak cinihsintwaa kaye tahsh kikii'-nihsaawaak ininiwak kekoon eshi anaamentaakosihsikwaa, kaawiin kaye kikii'-nanaahkonikohsiiwaak.

Eshinaakwahk shashiipentamowin

⁷ Niici otepwehtamook, shashiipentamok piinihsh cipitakohshink kaaTipenciketc. Inashke kihtikewininiwak opiihtoonaawaan okihtikaaniwaan cionci nihtaawikininikin okihtikewahkamikowaank. Shashiipentamok ehpiihtoowaatc cikimiwaninik ehtakwaakininik kaye tahsh ehsiikwaninik.

⁸ Miitahsh kekiinawaa ishi shashiipentamok. Keko pakiciihkek eshi ahpenimoyek, aasha ohsha peshonaakwanini kaaTipenciketc kaawiih pitakohshink.

⁹ Keko onci maanshikakanoonitihkek kiinawaa onci, kaawiin tahsh kika onaahkonikoohsiim. I'imaa ohsha ishkwaantenk niipawi otipaahkoniwe.

¹⁰ Niici otepwehtamook, kihkinawaapamihkwahk iki kekanootamawaawaatc Kishemanitoon kaakii'-aapacihtoowaatc kaaTipencikenitc owiinsowinini aaniin kaakiih shashiipentamowaatc aanawiin ekiih kakwaatakihtoowaatc.

¹¹ Shawentaakosiwak kitinaanaanik iki kaapi shashiipentamowaatc. Kipi noontaam kaye aaniin Coop (Job) kaaishi shashiipentank, aaniin kaye kaaTipencikenitc kaaishi wiici'ikotc weti ishkwaac. KaaTipenciketc ohsha owenoocihtoon koohpaasinaakewin, minotootaakewin kaye.

¹² Niici otepwehtamook, mii 'iwe maawac iko ishihcikek. Keko kekoon ahpimohkek ahpii ahshotamaakeyek. Keko ahpimohkek kiishik, ahki, kekoon ihsa piko. Eha' kii'ihkitoyan, mii piko 'i eha'; kaawiin ihkitoyan, mii piko 'o kaawiin. Kaawiin tahsh kika tipaahkonikoohsii.

¹³ Maanshihse na awiya kaatahshiyek? Taka ta'anami'aa. Awiya na minwentam? Tanikamo tino miikwehciwinikamonan.

¹⁴ Awiya na aahkosi kaatahshiyek? Oka'antomaa' kaaniikaanisinitc anami'ewikamikonk cipi anami'ehtaakotc tako kaye cipoosinikotc pimiteni otishinihkaasowininiink kaaTipencikenitc.

¹⁵ Tepweyentamonaaniwank itahsh ahpii anami'aaniwank, miihsh ciminoayaatc a'a kaa'‑aahkositc. KaaTipencikenitc okii minoayaa'ikoon. Kiishpin tahsh kii'macitootank, tapoonentamawaakaniwi.

¹⁶ Waawiintamaatik itahsh eshimamacitootaatiyek, anami'ehtamaatik kaye, miitahsh ci'antawi'ikoowisiyek. Eshi anami'aatc okwayahkwaatis mashkawaani, anohkiimakanini kaye.

¹⁷ Ilaaica (Elijah) hsa wiin kii'ishi'-ininiiwi taapishkoo kiinawint. Weweni tahsh kii'anami'aa cionci kimiwansininik. Nihsopipoon ishi aapihta tahsh kaawiin kii'onci kimiwansinini.

¹⁸ Miinawaa tahsh kii'anami'aa, miihsh kiishikonk kaakii'onci kimiwaninik. Kii'nihtaawikinoon tahsh o'omaa ahkiink kihtikewinan.

¹⁹ Niici otepwehtamook, kiishpin awiya kaatepwehtank pahkenotank tepwewin, awiyan ohsha otakakwe pikiiwewinikoon.

²⁰ O'o tahsh maamihkawik; Awenen iko kekwehkinaatc omacitootamoon eshi wanihshininitc okapimaaci'aan cinipohsinik, miihsh kaye niipiwa' macitootamowinan cipoonencikaatenikin.