Ciimis 4 - Ojibwe Kihcimasina'ikan

Eshinaakwahk kiisaakihcikaatekin ahkiiwikekoonan

¹ Aanti tahsh wenciikin miikaatiwinan, kiihkaantiwinan kaye? I'imaa hsa onciimakanoon kaashi mihsawentamek ewii'-minwentami'itisoyek. Miiwan tahsh ini kaamaamiikaatiimakahkin kipimaatisiwiniwank.

² Kekoon hsa kinantawentaanaawaa, kaawiin tahsh kitepinansiim. Kinihshiwem, kimihsawencikem kaye, kaawiin tahsh kitepinansiim entawentamek. Kikiihkaantim, kimiikaatim kaye, kaawiin tahsh kitepinansiim entawentamek aaniihsh kaawiin kikakwecimaahsiwaawaa Kishemanitoo.

³ Aahpii tahsh kiikakwetweyek kaawiin kimiinikoohsiim onsaam aaniihsh kaawiin sesik kitinentansiim. I'iwe kaakakwetweyek kiwii'inaapacihtoom kiinawaa piko ewii'-minwentami'itisoyek.

⁴ Kaawiin kitepweyentaakosihsiim taapishkoo ihkwe kaamino wiiciiwaahsik onaapeman. Kaawiin ina kikihkentansiim awiya kiisaakihtootc o'o ahkiini mii 'i iinsan ehshiinkenimaatc Kishemanitoon? Awenen hsa piko kaashi onentank ewiih saakihtootc ahkiini mii 'i e'ani tinowitc kaashiinkenimaatc Kishemanitoon.

⁵ Keko tahsh aanwehtankek Kihcimasina'ikan kii‑ishipii'ikaatek: “Aahpici wiin onantawenimaan citipinawewisitc iniweniwan ahcaahkwan kaakikishkamooninankitc.”

⁶ I'i hsa Kishemanitoo kaashi shaweniminank maawac mashkawentaakwanini. Kihcimasina'ikan ishipii'ikaate: “Kishemanitoo onakaashkawaan kehci'-inenintisonitc, oshawenimaan tahsh wiin ini tepahsenimonitc.”

⁷ Pakitinitisohtawihk Kishemanitoo. Nakaashkawihk maciaya'aa, miihsh citapasiihkantawinek.

⁸ Pehsho pinaasihkawihk Kishemanitoo, kewiin tahsh pehsho kika naasihkaak. Kisiininciik kiinawaa kaamacitootamek. Pehkihtook kite'iwaan kiinawaa niishwayek kaainentamek.

⁹ Kakwaatakentamok, maanentamok kaye cimawiyek. Kipaahpiwiniwaa tashi kwehkinikaate cimaanentamek kaye tahsh kiminwentamowiniwaa tashi kwehkinikaate cisiipiskaatentamek.

¹⁰ Tapahsenintisok enaahsamiitc kaaTipenciketc, miihsh ciompininek.

Keko maci'inaahken kiicipimaatis

¹¹ Niici otepwehtamook, keko awiya maci'inaahkek. Kiishpin maci tashimatc komaa kaye onaahkonatc kiitanami'aa mii 'i emaci'itaman e'onaahkonaman kaye Onahshowewin. Kiishpin tahsh onaahkonaman Onahshowewin kaawiin kiin kina'ihtansiin Onahshowewin, miihsh kiin iinsan e'onaahkoniweyan.

¹² Peshiko ohshehta kaamiikiwetc onahshowewin, onaahkoniwetc kaye. Mii hsa 'awe kaakashkihtootc cipimaaci'iwetc, kaakashkihtootc kaye cinihshiwanaaci'iwetc. Awenen tahsh kiin enenintisoyan e'onaahkonatc kiicipimaatis?

Keko kihcikaakiikitohkek

¹³ Pisintamok kiinawaa kaaihkitoyek: “Noonkom kaakiishikahk komaa kaye waapank kika ishaamin weti kihci ootenaank ciawi ayaayank peshikopipoon ciawi anohkiiyank kaye tahsh cishooniyaahkeyank.”

¹⁴ Kaawiin iitok kikihkentansiim aaniin keishiwepahk waapank. Mii hsa 'i eshinaakosiyek taapishkoo kaapaashkinek, acina ehta e'ayaamakahk, miihsh eshi ankonaakwahk.

¹⁵ O'owe ohsha kitaaihkitom: “Kiishpin kaaTipenciketc inentank, kika pimaatisimin, o'o kika ishihcikemin, i'i kaye kika ishihcikemin.”

¹⁶ Miitahsh eshihcikeyek ekihci'-inenintisoyek, kaye tahsh ekihci kaakiikitoyek. I'i tino kihci kaakiikitowin macitootamowiniwan.

¹⁷ Kiishpin tahsh kihkentamek ciminotootamekipan, ishihcikehsiwek itahsh, mii 'i winiwan.