Ciimis 3 - Ojibwe Kihcimasina'ikan

Mitenaniw ehtashintek

¹ Niici otepwehtamook! Keko wiin kakwe paahtiinohkek ciwii kihkino'amaakeyek. Kikihkentaam iitok kiinawint kaakihkino'amaakeyank nawac ta'aahkwentaakwan ahpii onaahkonikooyank ahpiihc wiin iki kotak awiyak.

² Kiinawint tahsh kaapimaatisiyank mooshak kiwanitootaamin. Kiishpin tahsh wiin awiya wiihkaa wawaniihsik aaniin ehkitotc, mii 'awe kaakiishinaakwaninik opimaatisiwin, ehtetako ekashkihtootc citipenintisotc misiwe opimaatisiwinink.

³ Inashke piwaapihkoonhs kitahtaawaamin mihtatim okonewink keonci na'ihtawinank. Miihsh i'imaa wenci kashki'ank a'a mihtatim ci'ishaatc eshi antawenimank.

⁴ Inashke kihci ciimaan aanamihcaak, kihci nootinonk onci maaciiyaahsin. Aahpici tahsh akaahsin i'i tahkwa'ikan, miihsh i'imaa ciimaaniiwikimaa otaahkewinini wenci kwehkwehkaahsitootc i'i ciimaan aanti piko waa'inaahshitc.

⁵ Miitahsh mayaa eshinaakwahk mitenaniw aanawiin e'akaahsink i'imaa wiiyawimaank, shaakooc kihci maamiihkwaanitisoomakan. Inashke aapitink kiipahkinek, mii 'imaa wencikihci sahkitek.

⁶ Mitenaniw mayaa ishinaakwan kaapahkinek, e'onci maaciishkaamakahk emisiweshkaamakahk maci-'ishihcikewin i'imaa kiiyawinaank. Miitahsh eshi maaciihkonek misiwe kipimaatisiwininaank i'iwe ishkote kaaonciimakahk maci-'ishkotenk.

⁷ Kahkina aya'aawihsha', pinehshiinsha', kinepikowi aya'aawihsha', i'i kaye aya'aawihsha' eyaanitc kihcikamiink kashki'aawak ciwaankawi'intwaa, inini kaye ewaankawi'aatc.

⁸ Kaawiin tahsh awiya okashkihtoohsiin ciwaankawihtootc mitenaniw. Macentaakwan, ekashkihcikaatehsinok citipencikaatek, mii 'imaa eshi mooshkinek kaanihshiwemakahk pihcipowin.

⁹ Miitahsh i'imaa mitenaniwink wenci nanaahkomank Kishemanitoon Koohsinaan. Mii kaye 'imaa wenci maci'inankwaa awiyak kaakii'-ishi'ikowaatc Kishemanitoon ci'ishinaakosiwaatc otishinaakosiwininiink.

¹⁰ Mii 'imaa peshikwan otoonimaank wencihsek mino shawenimiwewin, miihsh kaye 'imaa wencihsek kiihkaantiwin. Niici otepwehtamook, kaawiin i'i takii ishihsehsinoopan.

¹¹ Taaishihse na nipi kaapehkaakamik, i'i kaye nipi kaashiiwihtaakanaakamik peshikwan cionci moohkiciwankin?

¹² Kaawiin iitok pik (fig) tinowaahtik onihtaawikihtoohsiinan aalip (olive) tinowiminan. Kaawiin kaye shoominaahtik onihtaawikihtoohsiinan pik tinowiminan. Kaawiin nipi kaapehkaakamik taaonciihsinoon shiiwihtaakaniwinipi kaaonciciwank.

Kakiihtaawentamowin ishpimink kaaonciik

¹³ Awenen tahsh kaatahshiyek kekiihtaawentank, awenen kaye wenihsitohtamowinitc? I'imaa okashinaakohtoon okwayahkwaatisiwinink ehtapahsenimotc kaye tahsh ekakiihtaawentank aaniin eshi pimaatisitc.

¹⁴ Kiishpin tahsh ontentamek, nishkentamek kaye, niikaanenintisoyek kaye kite'iwaank, keko tahsh wiin kihci maamiihkwaanitisohkek keonci piikonamek i'i tepwewin.

¹⁵ I'i hsa tino kakiihtaawentamowin kaawiin ishpimink onciimakahsinoon, o'omaa ahkiink onciimakan. Kaawiin kaye ahcaahkowansinoon, maciahcaahkonk onciimakan.

¹⁶ Aanti hsa piko eyaakwen ontentamowin, niikaanenintisowin kaye, mii 'imaa kaye keayaamakahk piikwahkamikisiwin kahkina kaye kaatahsink macitootamowin.

¹⁷ I'i tahsh kakiihtaawentamowin ishpimink kaaonciik maawac pehkentaakwan. Mii 'imaa wenciik pisaanentamowin, saaki wiiciintiwin, koohpaatenimiwewin, minwanohkiiwinan, tepwewin kaye, kaawiin kaye awiya onci pahkaanenimaahsii.

¹⁸ Iki hsa kaawiicihtwaawaatc cimino wiiciintinaaniwaninik ahpii kihtikaatamowaatc pisaanentamowin, okanihtaawikihtoonaawaa kwayahkwaatisiwin.