Ciimis 2 - Ojibwe Kihcimasina'ikan

Keko pahkaanenimaahken awiya

¹ Niici otepwehtamook, ehtepweyenimank kaaTipeniminank Ciisahs Christ kaakihci'-inentaakositc, keko pahkaanenimaahken awiya otishinaakosiwinink onci.

² Kiishpin awiya otihsinek kaatashimaawaci'itiyek kikishkawaatc osaawi shooniyaa waapiko naapininciipisonan, wiinke kaye minohkonayetc, onci piintiketc itahsh awiya ehkitimaakisitc ehkoohpaacihkonayetc.

³ Kiishpin tahsh nawac kihtenimek a'a kaaminohkonayetc o'o inek: “O'omaa ishiapin minwapiwinink.” O'o tahsh wiin inek kaakitimaakisitc: “Weti awi ishi niipawin,” komaa kaye inek: “Eshisitepiyaan mihcihsak ishiapin.”

⁴ Miitahsh eshihcikeyek epahkaanenimekwaa awiyak, e'onci onahshowaanekwaa kimaci-'inentamowiniwaank.

⁵ Pisintawihshik, kaasaaki'inakook niici otepwehtamook, Kishemanitoo ohsha okii'onaapamaa' ketimaakisinitc o'omaa ahkiink ciwenoocihtoonitc tepweyentamowin, citipinawewisinitc kaye oTipencikewin. Aaniihsh mii 'iweni kaakii'-ahshotamawaatc kaasaaki'ikotc.

⁶ Kaawiin tahsh kikii kihtenimaahsiwaawaa kaakitimaakisitc. Kaawenootisiwaatc iitok kaakakwaataki'inekwaa, miiwak kaye iki kaaishiwininekwaa eshi ayaanitc otipaahkowe'.

⁷ Miiwak iitok iki kaamaci'itamowaatc i'iweni kehci'-inentaakwaninik wiinsowin kaakii'-miinikoowisiyek.

⁸ Kwayahk kika ishihcikem kiishpin na'ihtamek kehci'-inentaakwahk onahshowewin kaaishipii'ikaatek: “Kikasaaki'aa kiwiicitaamaakan taapishkoo kaashi saaki'itisoyan.”

⁹ Miitahsh wiin eshinaakwahk ehpiikonamek Kishemanitoo otOnahshowewin kiishpin awiyak otishinaakosiwiniwaank ishi kakiikinekwaa, mii 'i emacitootamek.

¹⁰ Awenen tahsh iko kiipiikonank peshik inaahkonikewin, mii 'i iinsan ehpiikonank kahkina inaahkonikewinan, mii 'i e'macitootank.

¹¹ Kishemanitoo tahsh miinawaa kii'ihkito: “Keko pihshikwaaci'aahken ihkwe kaawiitiketc,” miihsh kaye ehkitotc: “Keko nihshiwehken.” Aanawiin epihshikwaatisihsiwan, nihshiweyan itahsh, mii 'i ehpiikonaman i'i inaahkonikewin.

¹² Ishi kaakiikitok itahsh, ishi pimaatisik kaye taapishkoo iki tino pemaatisiwaatc kaawii'onci onaahkonintwaa onahshowewinink awiya kaaonci pakitinikoowisitc.

¹³ Kaawiin ohsha Kishemanitoo okakoohpaatenimaahsiin awiyan ahpii onaahkonaatc ini kaakoohpaatenikehsinik. Koohpaasinaakewin nawac mashkawentaakwan ahpiihc wiin onahshowaanikoowin.

Tepweyentamowin, anohkiiwin kaye ehtashintekin

¹⁴ Niici otepwehtamook, aaniin tahsh ina keinwaatankipan awiya kii'ihkitotc: “Nintayaan tepwewakentamowin,” kiishpin tahsh ishihcikehsik aaniin kekii'ishi pimaatisihpan? Otaa pimaaci'ikon ina otepweyentamowin?

¹⁵ Kiishpin tahsh kiiwiici otepwehtamoo kaaininiiwitc komaa kaye ihkwewitc noontehsetc kikishkikanan, tepihsehsik kaye miicim entahsokiishik,

¹⁶ aaniin tahsh inaa keinaapatahkipan kiishpin o'o inekwaa: “Pisaan animaacaan, nimpakohsentaan ciminohseyan. Kwayahk kiishoosin, weweni kaye wiihsinin.” Kiishpin tahsh wiici'aahsiwek aaniin eshi noontehsetc, kaawiin kekoon ta'inaapatahsinoon.

¹⁷ Miitahsh mayaa eshinaakwahk tepwehtamowin. Kiishpin awiya kiimihci'-ihkitotc ehtepwehtank eshihcikehsik tahsh ehkihtotc, nipoomakan i'i tino tepwehtamowin.

¹⁸ Peshik maawiin awiya taihkito: “Kiin hsa kitayaan tepwehtamowin, niin tahsh wiin nintayaan ishihcikewin.” O'o maawiin ta'icikaniwi: “Waapanta'ihshin tahsh aanti wenci ayaayan tepwehtamowin kekoon tahsh ishihcikehsiwan. Niin tahsh wiin nintishihcikewinink kikaonci waapanta'in e'ayaayaan tepwehtamowin.”

¹⁹ Kitepwehtam ehpeshikotc Kishemanitoo. Mii 'i kwayahk! Maciahcaahkwak kewiinawaa i'i ishi tepwehtamook, miihsh kaaonci nininkishkaawaatc ehsekisiwaatc.

²⁰ Kiin kaakakiipaatisiyan! Kikihkentaan ina i'i tepwehtamowin kekoon e'inaapatahsinok kiishpin kekoon ishihcikemakahsinok?

²¹ Aaniin tahsh kikehte aya'aaminaapan Eparahaam (Abraham) kaa'onci minwakimikotc Kishemanitoon? Otishihcikewinink okii'onci minwakimikoon ahpii kiipakitinaatc okosihsan Aaisikoon (Isaac) i'imaa pakitinaahsowinink.

²² Kiwaapantam ina tahsh i'i otepwehtamowin, i'i otishihcikewin kaye ekii'niishoo anohkiimakaninikin? Miitahsh i'imaa otishihcikewinink kaakii'onci kiishinaakwaninik otepwehtamowin.

²³ Miitahsh Kihcimasina'ikan ehtepwemakahk o'o kaaishipii'ikaatek: “Eparahaam okiihtepwehtawaan Kishemanitoon, miihsh kaa'kiionci'-inakimikotc ehkwayahkwaatisitc,” kaasaakiwiiciiwak kaye okii'ishinihkaanikoon.

²⁴ Miitahsh i'imaa eshi waapantamank kitishihcikewininaanink e'onci minwakiminank Kishemanitoo, kaawiin wiin ehta kitepwehtamowininaanink.

²⁵ Inashke mii peshikwan a'a Orehaap (Rahab) pihshikwaacihkwe. Okii'onci minwakimikoon Kishemanitoon aaniin kaakii'-ishihciketc ekiih piintikanaatc i'i okiimoosaapii' owaahkaa'ikanink, pahkaan inahke ekii'-ani'inaatc ciani'ishi kiiwenitc.

²⁶ Miitahsh taapishkoo miiyaw kaa'ahcaahkowansinok, nipoomakan, miihsh kaye tepwehtamowin kekoon kaaishihcikemakahsinok nipoomakan.