Ciimis 1 - Ojibwe Kihcimasina'ikan

¹ Niin Ciimis (James) Kishemanitoo otanohkii'aakanan, a'a kaye kaaTipenciketc Ciisahs Christ. Kahkina kipooshoo'ininim kaamitaahshi niishwewaanakisiyek Isriyalak (Israel) eyaayek misiwe pepahkaan ahkiink.

Tepweyentamowin kakiihtaawentamowin kaye ehtashintekin

² Niici otepwehtamook, tepinawewakentamok kiinakishkamek kaapepahkaanatihkin kahkina koci'ikoowisiiwinan.

³ Kihkentamok ahpii koci'ikoowisiimakahk kitepwehtamowiniwaa, mii 'imaa keonciimakahk shashiipentamowin.

⁴ Miitahsh ishikape shashiipentamok misiwe piko cipakiciihsiwek, miihsh cikiishi'ikoowisiyek, cikiishinaakosiyek itahsh kaye kekoon cinoontehsehsiwek.

⁵ Kiishpin kaatahshiyek peshik noontehsetc kakiihtaawentamowin, oka'-antotamawaan Kishemanitoon, miihsh cimiinintc eshi kakwetwetc. Wiinke iitok Kishemanitoo wenooci miikiwe, kaawiin kaye okakwe mihkansiin keshi anaamimiwetc.

⁶ Ahpii tahsh anami'aatc tatepweyentam, kaawiin tayaanwehtansii. Awiya kaatepwehtansik mii 'i eshinaakositc taapishkoo kaapimaashkaak kihcikamiink, aanti piko wentaanimaninik e'ishiwepaahshitc.

⁷ A'a tino kaawiin tainentansii kekoon cimiinikotc kaaTipencikenitc;

⁸ onsaam eniishininikin otinentamowinan, ehtepwewentaakwahsininik kahkina kaaishihciketc.

Kitimaakisiwin i'i kaye wenootisiwin ehtashintekin

⁹ A'awe hsa wiin otepwehtamoo kaawenoocihtoohsik kekoonini, taminwentam e'ishpakimikotc Kishemanitoon.

¹⁰ A'a tahsh wiin kaawenootisitc taminwentam eniihsakimikotc Kishemanitoon taapishkoo tainentaakosi pikwaciwaapikwan kaani kihkentaakwahsinok.

¹¹ Ahpii e'ani'-ishpakoocink kiisihs e'ani kishaahsiketc mii 'i enishi paahtek i'i waapikwanikihtikaan. Mii 'i enishi pankihsink aanawiin emino naakwahkipan enihshiwanaatahk. Miitahsh peshikwan kaawenootisitc eni'ishi nihshiwanaatisitc mekwaa piko ehpimanohkiitc.

Aaniin kotenimikoowin enentaakwahk

¹² Shawentaakosi awiya kaapakiciihsik kiinakishkank wahsitaawihsewin. Kiishpin aaniihsh kashkihtootc cishaapwiihtank kaashi koci'ikoowisitc, okatepinaan pimaatisiwi okimaawaanohkwaan Kishemanitoon kaakii'-ahshotamaakenitc ewii'-miinaanitc i'i kaasaaki'ikonitc.

¹³ Ahpii awiya kotenimintc cimacitootank kaawiin taaihkitohsii: “Kishemanitoo ninkotenimik.” Kaawiin iitok taakotenimaahsii Kishemanitoo cimacitootank, kaawiin kaye awiyan okotenimaahsiin cimacitootaminitc.

¹⁴ Awiya ohsha onci kotenimaa eshimaci mihsawentank, miihsh i'imaa wenci kaahcitinintc kaye tahsh wenci tahkonintc.

¹⁵ Maci mihsawentamowinink ohsha onciimakan macitootamowin. Ahpii tahsh macitootamowin kiikiishanohkiimakahk, mii 'imaa wenciik nipowin.

¹⁶ Keko kika wanimikoohsiim, kaasaaki'inakook niici otepwehtamook.

¹⁷ Kahkina miikiwaanan wenishihshinkin, kaakiishi naakwahkin kaye ishpimink onciimakanoon. E'onciimakahkin Kishemanitoonk kaakii'-oshihtootc kaawaahseyaanikin kiishikonk. Kaawiin wiihkaa pahkaan taishi ayaahsii taapishkoo kaashi ayaancishkaamakahk kaa'akawaahtek.

¹⁸ Miitahsh wiin eshi minwentank Kishemanitoo ekii miininank oshki pimaatisiwin i'imaa onci kaatepwemakaninik otihkitowin. Miitahsh keishinaakosiyank taapishkoo eoshki otapinoonciishiminank maawac eniikaaneniminank ahpiihc wiin kahkina kekoon kaakii oshihtootc.

Cinoontamank, citootamank kaye Kishemanitoo otIhkitowin

¹⁹ Niici otepwehtamook, nawac onishihshin cinihtaa pisintamekipan ahpiihc wiin cikaakiikitoyekipan, keko kaye wahkewakitaasohkek.

²⁰ Nishkaatisiwinink kaawiin onciimakahsinoon kikwayahkwaatisiwin Kishemanitoo kaa'antawentank.

²¹ Wepinamok tahsh kahkina kekoon kaawiinentaakwahk, i'i kaye kahkina macitootamowin. Tapahsenintisok ciotaahpinamowek otihkitowin kaakihtikaatek kipimaatisiwiniwaank, mii iitok i'i kepimaaci'ikoyek.

²² Keko wiin waniwinitisohkek, keko mihci pisintankek i'i ihkitowin, tootamok aaniin ehkitoomakahk.

²³ Awiya kaamihci noontank i'i ihkitowin, ishihcikehsik tahsh kaaihkitoomakaninik, mii 'i eshinaakositc awiya kaawaapantisotc waapamonink.

²⁴ Kaa'ishkwaa waapamotc itahsh e'animaacaatc, mii 'i shemaak eshi waniihketc aaniin eshinaakositc.

²⁵ I'iwe ishipimaatisiwin kaaonahtootc Kishemanitoo misiwe minwaahshin. Kaawiin i'imaa awiya kekoonini otoonci kipihtinikoohsiin kwayahk ci'ishi pimaatisitc. Awenen itahsh peyahtak ehkanawaapantank, waniihkehsik i'i kaanoontank, Kishemanitoon itahsh okashawenimikoon aaniin piko kaaishihciketc.

²⁶ Kiishpin hsa awiya inenintisotc e'anami'ewaatisitc, kashkihtoohsik itahsh ciminciminank otenaniw, mii 'i iinsan ewayeshintisotc, otanami'aawin kaawiin kekoon inaapatahsinini.

²⁷ Kishemanitoo Koohsinaan hsa ominwaapantaan i'i tino anami'aawin kaapehkaninik, kaye tahsh kaatepwewaninik. Cinaanaakaci'intwaa kwiiwahshishaanak, iki kaye kiiwaacihkwewak kaakakwaatakihtoowaatc, awiya kaye kaakanawenintisotc ciwiinishkaakohsik ahkiiwi pimaatisiwin.