Ceramaaya 1 - Ojibwe Kihcimasina'ikan

¹ Mii hsa 'oweni Ceramaaya (Jeremiah) kaakii ihkitokopanen kaakii otetetc Hilkaayawan (Hilkiah). Kewiin iitok peshik anami'ewikimaan kiih⁠tinowinikopan i'imaa ootenaank Anataht (Anathoth) ecikaatek, weti inahke ahkiink Penciman (Benjamin) kaakii icikaatenik.

² KaaTipencikenitc hsa tahsh okiih kanoonikoon Ceramaaya mitaahshinihsopipoon (13) aasha minihk kii⁠kihciokimaawinitc Cosaayawan (Josiah) i'imaa Coota (Judah) ahkiink, kaakii otetenitc Aman (Amon) kaakii ishinihkaasonitc.

³ Miinawaa tahsh okiih kanoonikoon kaaTipencikenitc kii⁠ani kihciokimaawinitc ini Cosaaya okosihsan Cihooyahkim (Jehoiakim) kaa⁠ishinihkaasonitc. Mooshak hsa i'i ahpii okiih kanoonikoon piinihsh kii⁠ani mitaahshipeshikopipoonakaanik kii⁠kihciokimaawinitc Setihkaayawan (Zedekiah), kaakii otetenitc Cosaayawan. Mii hsa 'i ahpii eh⁠pipooninik naanokiisihs e⁠ani ishihsenik, pemaatisiwaatc Ceroosalamink (Jerusalem) kaakii onciiwaatc kaakii maaciinintwaa pahkaan ahkiink ekii ishiwinintwaa.

Ceramaaya Kii'antomikotc Kishemanitoon

⁴ Miitahsh o'o Ceramaaya (Jeremiah) kaa⁠ihkitotc, “KaaTipenciketc hsa ninkiih pinaasihkaak o'o ekii'ishitc,

⁵ ‘Cipwaa hsa oshi'inaan omihsataamaank aasha kikii kihkenimin, cipwaa nihtaawikiyan kaye pahkaan kikii inakimin, ekii onaapaminaan ci⁠tinowiyan kaa⁠kanootamawaawaatc Kishemanitoon ci⁠kakanoonatwaa pemaatisiwaatc.’ ”

⁶ Miihsh o'o kaa⁠ishi nahkwehtawak, “Etatawe kikoohpaasom, Tepencikeyan Kishemanitoo, kaawiin ohsha ninihtaa kaakiikitohsii; nintapinoonciishiw iitok inaa.”

⁷ Miitahsh o'o kaaTipenciketc kaa'ishitc, “Keko ihkitohken e⁠apinoonciishiwiyan. Misiwe hsa kika ishaa pemaatisiwaatc kaa⁠ishi'ayaawaatc ke⁠ishinisha'onaan, aaniin tahsh iko kaye eninaan mii hsa 'i ke⁠ihkitoyan.

⁸ Keko kaye kohsaahken awiya, niin ohsha ko kika wiiciiwin ci⁠naatamawinaan,” ninkii'ik kaaTipenciketc.

⁹ Miitahsh kaaTipenciketc kaakiih shiipinihkenitc ekiih saaminank nintoon o'o ekii'ishitc, “Inashke hsa mii 'i e⁠miininaan aaniin ke⁠ihkitoyan.

¹⁰ Noonkom hsa kaa⁠kiishikahk kitonakimin ci⁠tipenimatwaa pemaatisiwaatc, okimaawiwinan kaye ci⁠nihtaa aanihsawewihtooyan, ci⁠nihtaa piikonaman kaye. Kika kashkihtoon kaye ci⁠nihtaa nihshiwanaacihcikeyan, ci⁠nihtaa shaakoocihtwaayan, ci⁠nihtaa onahkihcikeyan, ci⁠nihtaa kihtikeyan kaye.”

Ceramaaya Niishink Kekoon Kii'ishinank

¹¹ KaaTipenciketc tahsh o'o ninkii ishi kakwecimik, “Ceramaaya (Jeremiah) wekonen weyaapantaman?” Miihsh o'o kaa'inak, “Watihkwan niwaapantaan kaa⁠onciik Aalmant (Almond) tinowaahtikonk.”

¹² Miitahsh kaa⁠ishinahkwehtawitc, “Mii hsa 'i kwayahk kii‑ishinaman, ninanta kihkentaan ohsha taka tepwe ci‑ishihsekwen kaa⁠ihkitoyaan.”

¹³ Miinawaa tahsh o'o ninkii'ik, “Wekonen hsa miinawaa weyaapantaman?” Miihsh o'o kaa⁠ishi nahkwehtawak, “Ahkihk hsa niwaapamaa kiiwetinonk inahke ehtashi onsotc, o'omaa inahke ewiih pishi kwanakohsetc.”

¹⁴ Miitahsh kaaTipenciketc kaa'ishitc, “Kiiwetinonk hsa tapi oncii ke⁠nihshiwanaaci'iwemakahk, taapishkoo ahkihk kii⁠kwanakohsetc ta⁠ishinaakwan ke⁠nihshiwanaaci'ikowaatc o'omaa ahkiink eyaawaatc.

¹⁵ Niwiih kanoonaak ohsha aasha pemaatisiwaatc kiiwetinonk kaa⁠tashikimaawiwaatc, kihciokimaak hsa ta⁠pitakohshinook cipi onahtoowaatc otookimaawapiwiniwaan i'imaa kaashi ishkwaantemiwaninik Ceroosalam (Jerusalem). Oka waahkaashkaanaawaa ewiih kakwe shaakoocihtoowaatc kaye i'i ootenaani, ini kaye kahkina ootenawan Coota ahkiink eyaanikin.

¹⁶ Mii hsa 'i ewii onaahkonakwaa nimpimaatisiimak, onsaam aaniihsh noociko ishihcikewak e⁠wepiniwaatc, e⁠minaahsamawaawaatc kaye pahkaan manitoohkaana', e⁠anami'ehtawaawaatc kaye manitoohkaana' oninciiwank kaa⁠onci oshi'aawaatc.

¹⁷ Taka tahsh kiishiin, Ceramaaya ci⁠niipawiyan, ci‑ihkitoyan kaashi anooninaan ci'inatwaa; keko hsa tahsh kohsaahken, kika ishi'in kiishpin ci⁠sekisiyan wiiciiwatwaa.

¹⁸ Noonkom kaa⁠kiishikahk hsa kitishi'in taapishkoo kaa⁠soonkihcikaatek kihci ootena, taapishkoo waahkaayaapihkinikan kaa⁠osaawaapihkowank, kaa⁠mashkawaapihkowank aaswaahkwa'ikan kaye ci⁠miikaataman o'o kahkina ahki. Ci⁠miikaanatwaa kaye kihciokimaak, aanihkewikimaak, anami'ewikimaak, kahkina kaye pemaatisiwaatc ahkiink kaa‑ayaawaatc.

¹⁹ Kika miikaanikook hsa, kaawiin tahsh kika shaakooci'ikohsiik, aaniihsh niin kiwiiciiwin, niin kaye kika shaapwii'in,” ninkii'ik kaaTipenciketc.