Cenisihs 7 - Ojibwe Kihcimasina'ikan

Ahki Kiinihkipacikaatek

¹ KaaTipencikenitc tahsh Noowa (Noah) okii'ikoon, “Poosin i'i kihci ciimaan, kahkina ko entahshiyan; kiin ohsha ehta kiwaapamin o'omaa misiwe ahkiink kwayahk e⁠ishihcikeyan enaahsamiiyaan.

² Niishwaahswewaan (7) tahsh payehkentaakosiwaatc aya'aawihshak kika poosi'aak, ayaapeya'aak, noonsheya'aak itahsh kaye. Pehpeshikwewaan tahsh wiin ehta kika poosi'aak aya'aawihshak kaa⁠pehkentaakosihsikwaa, ayaapek, noonsheya'aak kewiinawaa.

³ Kika poosi'aak tahsh kaye niishwaahswewaan (7) pinehshiinshak ishpimink kaa⁠papaamihsewaatc, naapeya'aak, noonsheya'aak kaye, maano eyaantahswewaanakisiwaatc cini ayaawaatc cini ayaanihke nihtaawiki'itiwaatc o'omaa misiwe ahkiink.

⁴ Niishwaahsokiishik (7) ishihsek niwii ishihcike ci⁠kimiwank ahkiink. Niimitana (40) tahso kiishik tahsh ta⁠kimiwan, niimitana (40) tahso tipihk kaye. Wiinke hsa piko kahkina kekoon pemaatahk kaakii oshihtooyaan o'omaa ahkiink niwii nihshiwanaacihtoon,” okii'ikoon.

⁵ Noowa tahsh kii‑ishihcike kahkina kekoon kaakii ishi anoonikotc kaaTipencikenitc.

⁶ Noowa tahsh ninkotwaahswaahk (600) kiih⁠tahso pipoonwe ahpii kii⁠nihkipiinik ahki.

⁷ Kiih⁠poosi tahsh i'i kihci ciimaan, wiiwan kaye. Okosihsa' tahsh kaye kiih⁠poosiwa', wiiwini tahsh kaye aaniihsh kiiwii ani nihkipiini ahki.

⁸ Ayaapeya'aa', noonsheya'aa' kaye entahswewaanakisinitc aya'aawihsha', pinehshiinsha', kahkina kaye kaa⁠pimootenitc ahkiink peyehkisinitc, peyehkisihsinik iko kaye

⁹ okii wiici poosiimikoo' Noowa kihci ciimaanink, mayaa kaakii inanoohkiitc Kishemanitoo.

¹⁰ Niishwaahsokiishik tahsh kaa⁠ishkwaa ishihsek mii 'i kaakii maacii nihkipiik ahki.

¹¹ Noowa (Noah) itahsh ninkotwaahswaahk (600) kiih⁠tahso pipoonwe, niishokiisihsoon mitaahshiniishwaaso kiishik (17) e⁠ishihsenik. Mii 'i ahpii eh⁠kiishikahk, nipi anaamahkamik kii⁠onci moohkiciwan, ishpimink kaye kii⁠paahkishkaa, nipi ekii onci pankihsink.

¹² Kiih⁠kimiwan tahsh o'omaa ahkiink niimitana (40) tahso kiishik, niimitana tahso tipihk kaye.

¹³ I'i tahsh ahpii eh⁠kiishikaninik Noowa, wiiwan kaye aasha i'imaa kiih⁠poosiwak kihci ciimaanink. Okosihsa' Shem (Shem), Hem (Ham), Cepat (Japheth), wiiwini kaye kiih⁠poosiwa' i'imaa.

¹⁴ Aya'aawihshak kaye kaa⁠tahswewaanakisiwaatc, pishihkiwak kaa⁠tahswewaanakisiwaatc, kaa⁠papaamootewaatc kaye mihtahkamik kaa⁠tahswewaanakisiwaatc. Pinehshiinshak kaye kaa⁠tahswewaanakisiwaatc kahkina hsa piko pinehshiinshak.

¹⁵ Kii‑ishaawak kahkina ekiih poosiwaatc kihci ciimaanink kaakii ishi'ayaanitc Noowawan. Kii⁠neniishiwak aya'aawihshak ekiih poosiwaatc.

¹⁶ Kaakiih poosiwaatc tahsh kii⁠ayaapewiwak, kii⁠noonsheya'aawiwak kaye. Kahkina hsa entahshiwaatc kiih⁠poosiwak Kishemanitoo aaniihsh okii'inaa' ci⁠poosinitc. KaaTipenciketc tahsh akwaciink okii onci kipa'aan ishkwaantem.

¹⁷ Niimitana tahso kiishik tahsh kiih⁠tashi mooshka'an, piinihsh ekii ani kiishkaayawaak. Miitahsh i'i kihci ciimaan kaa⁠ishi aaposhka'akwantek i'imaa wakicipiik, ekiih saamihsihsinok mihtahkamik.

¹⁸ Nipi tahsh piinihsh kii⁠ani kiishkaayawaa misiwe ahkiink. Miitahsh kihci ciimaan kaakii ishi aaposhka'akwantek wakicipiik.

¹⁹ Piinihsh itahsh kii⁠ani nihkipii o'o ahki. Maawac hsa kaa⁠ishpatinaakin kihci waciin kii⁠nihkipiiwan misiwe ahkiink.

²⁰ Wiinke piinihsh kii⁠ani kiishkaayawaa, piinihsh niishtanashinaanomisit (25) ekiih paashicipiikin maawac eshpatinaakin kihci waciin.

²¹ Kahkina tahsh kekoon kaakiih pimaatahk ahkiink kii⁠nipoomakan. Kaa⁠tahshiwaatc pinehshiinshak, aya'aawihshak kaye, kahkina kaye pemaatisiwaatc.

²² Kahkina tahsh kekoon kaakiih pimaatahk kaashi papaankohkamikaak, kaa⁠pakitanaamoomakahk kii⁠nipoomakan.

²³ KaaTipenciketc kahkina kekoonini okii nihshiwanaacihtoon kaakiih pimaataninik. Pemaatisinitc, aya'aawihsha', kaa⁠papaamootenitc, pinehshiinsha' kaye. Miiyehtako Noowa, i'i tahsh kaakii wiici poosiimikotc kaah⁠pimaatisinitc.

²⁴ Ninkotwaahk naanimitana (150) tahso kiishik tahsh kii⁠mooshka'an o'o ahki.