Cenisihs 50 - Ojibwe Kihcimasina'ikan

Isriyal Kii'ishkwaapimaatisitc

¹ Coosap (Joseph) itahsh i'imaa kii‑ishi ahpani'o kaa⁠ishi pimihshininitc oteten ekii mawitc, ekii ociimaatc kaye.

² Miitahsh Coosap kaa⁠ishi anoonaatc kaakii anohkiihtaakotc mashkihkiiwininiwa' ci⁠kwayaanci'imintc oteten, ci‑ishi'imintc kaakii ishi'intwaa kaakii na'inimintc. Kii‑ishihcikewa' tahsh i'i mashkihkiiwininiwa'.

³ Niimitana (40) tahso kiishik tahsh awiya kiih⁠tashihkikaniwi kiih⁠kwayaanci'intc kii‑ishi'intc ci⁠waanaatisihsik. Pemaatisiwaatc tahsh Iicipahkiink (Egypt) kaakii onciiwaatc niishwaahsimitana (70) tahso kiishik okii mawimaawaan Isriyalan (Israel).

⁴ Ekii ishkwaahsenik tahsh minihk tahso kiishik kaakii mawimimintc Isriyalan, Coosap okii'inaa' kaakii anohkiihtawaanitc kihciokimaan, “Kiishpin minwaapamiyek, taka o'owe awi inihk kihciokimaa niin e⁠ihkitoyaan:

⁵ ‘Ahpii hsa nintetepan aasha kekaa kiiwii ani ishkwaa pimaatisitc, ninkiih kashkimik ci⁠ahshotamawak, cishi na'inak kaakii ishi oshihtamaasokopanen cishi na'inintc weti Kenan (Canaan) ahkiink. Taka pakitinihshin ci‑ishaayaan ci⁠awi na'inak nintetepan. Miinawaa tahsh ninka pikiiwe takohshin.’ ”

⁶ O'o tahsh kihciokimaan okiih pi'ikoon, “Pisaaniko ishaan ci⁠awi na'inatc kitetepan kaakii ishi ahshotamawaawatipanen.”

⁷ Coosap tahsh kii⁠ani maacaa ekii awi na'inaatc otetepaniin. Kihciokimaan kaakiih pamiihtawaanitc, kaakiih kanawentaminitc kaye otaawinini, i'i kaye kaakii niikaanentaakosinitc ininiwa' i'imaa Iicipahkiink ekii wiiciiwikotc.

⁸ Kahkina kaye entahshinitc wiicihkiweya', kahkina kaye otetepaniin kaakii inawemaanitc kii‑ishaawa'. Oniicaanihsiwaa' tahsh wiin kaakii ayakaahshiinshinitc, ini kaye omaanahcaanihshimiwaa', omaanatihkomiwaa', i'i kaye opishihkiimiwaa' okii nakanaawaa' i'imaa Kooshin (Goshen) ahkiink.

⁹ Ininiwa' tahsh kaye kaakiih pimitaapa'aanitc otaapaanaahkwa', i'i kaye kaakiih pimiwanepa'ikonitc mihtatimonk kiih⁠tako ishaawa'. Wiinke hsa ko kiih⁠paahtiinowak.

¹⁰ Ahpii tahsh ekiih takohshinowaatc i'imaa Etat (Atad) kaakii nihtaa tashi pawakanaasonitc pahkweshikanan waapanonk inahke Cwaartan (Jordan) siipink, mii 'imaa enikohk kaah⁠tanatemowaatc kinwesh iko. Coosap tahsh niishwaahsokiishik (7) kii‑ishihcike kaakii nihtaa ishihcikenk awiya kiiwii na'inintc.

¹¹ Iki tahsh pemaatisiwaatc kaakii ayaawaatc Kenan ahkiink e⁠waapamaawaatc e⁠mawinitc i'imaa Etat kii‑ihkitowak, “Inashke kiniin enahkamikisiwaatc Iicip kaa⁠onciiwaatc e⁠mawiwaatc,” kii‑ihkitowak. Mii 'imaa tahsh kaakii onci ishinihkaatenik kaakii ishi mawiwaatc, “Otanatemowiniwaa Iicip kaa⁠onciiwaatc.”

¹² Isriyal tahsh okii ishihcike'ikoo' kaakii'inaakopanen okosihsa' cipwaa ishkwaa pimaatisitc.

¹³ Okosihsa' ekii ishiwitoonitc owiiyaw Kenan ahkiink ekii anta na'inaminitc weti kaakii ishi wiimpaapihkaanik Mahkpiila (Machpelah), waapanonk inahke Mamri (Mamre). Eparahaam (Abraham) iitok kii⁠ataamaakopan ini ininiwan Heht (Hittite) kaakiih tinowitc, Iihparan (Ephron) kaakii ishinihkaasonitc, i'i otahkiimini ciipekamik ewii inwaatank.

¹⁴ Coosap itahsh kaa⁠ishkwaa na'inaatc otetepaniin kii‑ishi kiiwe Iicipahkiink i'i kaye wiicihkiweya', kahkina hsa piko kaakii wiiciiwikotc.

Coosap Kiipoonentamawaatc Wiicihkiweya'

¹⁵ Coosap (Joseph) wiicihkiweya' kii‑ihkitowa' kii‑ishkwaa niponitc otetewaan, “Wekonen itahsh wiin keyaapi Coosap neshkeniminowankwen, enentamokwen kaye ewiih tipa'amawinank kahkina kaakii ishi maanshi tootawank!”

¹⁶ Okii anoonaawaan tahsh awiyan ci⁠awi wiintamawaanitc Coosapoon ekii ihkitowaatc, “Kitete hsa kii‑ihkito cipwaa ishkwaa pimaatisitc.

¹⁷ O'oweni hsa inaahkek Coosap ‘Kipakohsenimin ci⁠poonentamawatwaa tipinawe kiicihkiweyak kaakii ishi mamaashiihkantawihkwaa, i'i kaye kaakii ishi macitootamowaatc ahpii kii⁠wani tootawihkwaa.’ Taka tahsh noonkom poonentamawihshinaam kaakii wani tootaakooyan, niinawint iitok kaa⁠pamiihtawankitc kitetepan oKishemanitooman.” Coosap tahsh kii⁠mawi ahpii e⁠noontank kaakii'inintc.

¹⁸ Wiicihkiweya' okiih pi naasihkaakoo' ekii animihkohtaanitc kaakii ishi'ayaatc ekii'ikotc, “Inashke kaa⁠pamiihtawihkwaa nintinowimin,” okii'ikoo'.

¹⁹ Coosap tahsh okii ishi nahkwehtawaa', “Keko sekisihkek. Niin nintaa ishicihkewaan ina Kishemanitoo otishihcikewin?

²⁰ I'i tahsh kaakii inentamek kaawii ishi macitootawiyekipan, Kishemanitoo tahsh wiin i'imaa kii⁠onciini ominotootaakewin. Miitahsh i'i noonkom niipiwa' pemaatisiwaatc kaa⁠onci pimaatisiwaatc i'i kaakii ishihsenik.

²¹ Inashke tahsh keko sekisihkek, kika naanaakaci'ininim hsa, iki kaye kiniicaanihsiwaak.” Miihsh kaa⁠ishi minwentaminitc weweni ekiih kakanoonaatc.

Coosap Ehtashintenik Kiinipotc

²² Coosap (Joseph) hsa i'imaa Iicipahkiink (Egypt) kii⁠ayintaa, i'i kaye kahkina oteten otinawemaakanini. Ninkotwaahk mitaahso (110) tahsh kiih⁠tahso pipoonwe.

²³ Coosap tahsh kiihte pimaatisi ekii waapamaatc otaanihkoopisooma' Iihpariyamink (Ephraim) kaakii ontahkaanesinitc. Okiih te waapamaa' kaye otaanihkoopisooma' kaakii oniicaanihsimikonitc Mekiroon (Machir). Manaahsa (Manasseh) iitok kii⁠okosihsi ini Mekiroon. Miiwa'i i'i kaye kaakiih tepimaatisitc ci⁠waapamaatc.

²⁴ Miitahsh Coosap kaa'inaatc wiicihkiweya', “Mii'aasha kekaa ci‑ishkwaa pimaatisiyaan, shaakooc tahsh Kishemanitoo tepwe kika naanaakaci'ikowaa. O'omaa kaye ahkiink Iicip kika onci maaciinikowaa ci‑ishiwininek weti kaakii ishi ahshotamawaakopanen Eparahaaman (Abraham), Aaisikoon (Isaac), ini kaye Cekapoon (Jacob).”

²⁵ Coosap tahsh okii'inaa' Isriyala' ci⁠ahpimonitc ekii'inaatc, “Ahshotamawihshik, ahpii Kishemanitoo ishiwininek weti Kenan (Canaan) ahkiink, maaciitoohkek nihkanan,” ekii'inaatc.

²⁶ Iicipahkiink, tahsh Coosap kiih⁠tashi ishkwaa pimaatisi, ninkotwaahk mitaahso (110) ekiih tahso pipoonwetc. Kiih⁠kwayaancihcikaateni tahsh kaye owiiyaw, ekiih piina'ikaatenik cipemahkahkonk.