Cenisihs 49 - Ojibwe Kihcimasina'ikan

Isriyal Ishkwaac Kaakii'inaatc Okosihsa'

¹ Cekap (Jacob) itahsh okii antomaa' okosihsa' ekii'inaatc, “Maamawipiishaak ewii wiintamawinakook aaniin keni ishihseyek ani kakiishikahk niikaanaya'ii inahke.

² Maamawipiishaak, pisintawihshik, kiinawaa Cekap kaa⁠okosihsiminek; Pisintawihk itahsh Isriyal (Israel) kitetewaa.

³ Oroopin (Reuben), kiin hsa nihtam kaakii nihtaawikiyan, Kiin hsa mii 'i enentaakosiyan, nimashkawisiiwin, Kaakii onci maacihsek nintininiiwentaakosiwin, Wiinke kikihtentaakos, Wiinke kaye kimashkawentaakos.

⁴ Mii hsa 'i eshinaakosiyan Taapishkoo kaa⁠pimiciwank ewii mooshka'ank, Kaawiin itahsh awahshime kika kihtentaakosihsii, Onsaam aaniihsh kikii wiihpemaa nintaanihkewiiw, Noociko ekii inentaakohtaawatc kitete onipewinaahk.

⁵ Inashke Simiyan (Simeon), Liipaai (Levi) itahsh wiicihkiwentiwak. Mii hsa 'i enaapacihtoowaatc Omiikaasowi aapacihtaakaniwaan E⁠onci kihci ompwehkamikisiwaatc.

⁶ Kaawiin hsa ninka ishaawaahsiin eshi kiimooci kakanoonitiwaatc, Kaawiin kaye ninka wiitoohkaasowaahsiin kaa⁠tashi onaahkonikewaatc, Kii⁠nishkaatisiwaatc ohsha mii 'i eshi nihsaawaatc ininiwa', Omaahki'aawaa' kaye aape pishihkiwa' e⁠mihci otaminowaatc.

⁷ Ta⁠maci'icikaateni hsa onishkaatisiwiniwaa, Aaniihsh onsaam aahkwentaakwanini, Otaahkokitaasowiniwaa kaye Onsaam kakwaanihsakentaakwanini; Misiwe hsa Isriyal ahkiink ninkashi misihteyaama'waak, Misiwe kaye ninka onci ishinisha'waak Eshi ayayaanitc pemaatisinitc.

⁸ Coota, kiicihkiwensiwak ihsa kika minwaapamikook. Ohkwekaniwaank itahsh kika taninaak Iki kaa⁠shiinkenimihkwaa. Kiicihkiwensiwak ihsa ta‑animihkohtaawak enaahsamiiyan.

⁹ Coota hsa mihshipishiwink inentaakosi, E⁠ishkwaa nishiwetc, mii 'i eshi kiiwetc owaashink. Eh⁠shiipiikiciihshink itahsh, eh⁠pimihshink kaye, Awenen itahsh ke⁠kashkite'enihpan ci⁠mikoshkaaci'ikotc.

¹⁰ Coota otahkonaan kihciokimaawi sahka'onaahk Shikwahsh opiiwesiima' tani okimaawiwa', Piinihsh takohshink awenen kaa⁠tipinawewisitc. Wiin tahsh inentaakosi ci⁠nana'ihtaakotc Kahkina kaa⁠tahswewaanakisinitc pemaatisinitc.

¹¹ Shoominaahtikonk hsa Otishi tahkopinaan omaanshimihtatimooman, Omaanshimihtatimoomenhsan itahsh Maawac eshi onishihshininik shoominaahtikonk. Shoominaapoonk ihsa otishi kisiihsipatoonan okikishkikanan, Otookimaawayaanan tahsh Otishi kisiihsipatoonan shoomina' kaashi miskwaakamishkikenitc.

¹² Oshkiishikoon hsa nawac miskonaakwaniniwan Kaa‑ahpiihci miskwaanik shoominaapooni, Wiipitan kaye nawac waapishkaaniwan Aahpiihc wiin eshi waapishkaanik coocoohshaapo.

¹³ Sepalan (Zebulun) itahsh wiin ciiki kihcikamiink ta⁠ishi kapehshi. Niipiwa' hsa i'imaa ciikew Tashi tapinawihshimoomakanoon kihci ciimaanan, Weti tahsh kika ahko tipentaan i'i ahki Eshi'ayaak Saaitan (Sidon) ootena.

¹⁴ Isahkaar (Issachar) hsa ishinaakosi Maanshimihtatimoonhs kaa⁠soonkisitc, Eh⁠papimihshink nahsawaya'ii Eshi ahtenikin niishin pimiwanaaniwashan.

¹⁵ Ahpii e⁠waapantank i'i kaashi anwehshink e⁠onishihshininik, I'i kaye ahkiini e⁠minonaakwaninik, Miitahsh eshi pihciwanaatank ini pimiwanaanan ewiih pimiwitootc, Miihsh ke⁠ishi kashkihtamaasotc Ci⁠tinowitc kaa⁠kakwaataki pamiihtaaketc.

¹⁶ Ten (Dan) hsa oka tipenimaa' opimaatisiima', Taapishkoo 'i peshikwewaan Isriyala'.

¹⁷ Ten taapishkoo hsa kinepik kaa‑ayaatc miihkanaank, Kaa⁠ciihsowetc tino kinepik kaa‑ayaatc enamoninik miihkana, Miitahsh eshi ciihswaatc mihtatimoon opemikaatiniink, Miihsh eshi aashekitakoocininitc ini kaa⁠pimiwanaasonitc.

¹⁸ Oo Tepencikeyan, nimpiihtoon hsa kipimaaci'iwewin!

¹⁹ Kaat (Gad) itahsh wiin oka miikaanikoo' Ci⁠paahtiinonitc nehtaa mahkantwenitc, Ta⁠kwehkipani'o hsa tahsh ci⁠maaciiyaama'waatc.

²⁰ Aahshar (Asher) itahsh wiin, omiicimim wiinke oka wenoocihtoon, Ke⁠nihtaawikihtootc hsa Ta⁠te'ahpiihtetaakwanini ci⁠miicinihpan kihciokimaan.

²¹ Naapihtalaai (Naphtali) itahsh taapishkoo noonshe wawaashkehshi Kaa⁠pakitinintc ci⁠papaamipahtootc, Kaa‑ayaawaatc itahsh wenishihshinitc wawaashkehshiinhsa'.

²² Coosap (Joseph) itahsh wiin ishinaakosi Taapishkoo kaa⁠wenooci nihtaawikihciketc shoominaahtik Kaa⁠patahkisotc ciikaya'ii eshi moohkiciwaninik nipi, Owatihkwanan kaa‑ahkwaantawekininikin aahsamaapihk.

²³ I'i tahsh opimocike' wiinke okihci miikaanikoo', Eh⁠papiimokotc, e⁠mikoshkaaci'ikotc kaye.

²⁴ Omihtikwaapiin itahsh awaac pankii ci⁠maacishkaanitc, Onihkan kaye ani mashkawisiimakaniniwan. Omashkawisiiwininiink e⁠onci mashkawisiishkaakotc Meshkawisiinitc Kishemanitoon wemanitoomikonitc Cekapoon (Jacob), Tenowinitc Okanawi maanahcaanihshiwen, KaaNaatamawaanitc Isriyala',

²⁵ Kitete ohsha oKishemanitooman kaa⁠wiici'imihk, KaaMaawaci mashkawisiitc Kishemanitoo kaa⁠shawenimihk, Kiishikonk e⁠onci shawenimihk, Waahsa kaye anaamiintim e⁠onci shawenimihk. Kika shawenimik wenci nihtaawiki'imatc shikwa kaa⁠onci nooni'imatc apinoonciisha'.

²⁶ Kitete hsa kaashi shawenimihk nawac kihci inentaakwanini Ahpiihc wiin oshawencikewiniwaa niin kaakii okehteya'aamiyaan, Nawac kaye eshi shawencikemakahkin nehpic eyaakin waciin; Taka ono shawentaakosiwinan Coosap oka otihsikoonan ohtikwaanink Kaye oshkaahtikoonk wiin e⁠okimaawentaakositc kaa⁠tashinitc wiicihkiweya'.

²⁷ Penciman (Benjamin) itahsh ishinaakosi taapishkoo kaa‑aahkwaatisitc ma'iinkan, Eh⁠kishepaawakaninik kaa⁠kitaatc kaa⁠nihtootc, E⁠onaakohshininik itahsh e⁠nenaawa'oohkiitc onihtaakan,” mii 'i kaa⁠ihkitotc Isriyal.

²⁸ Miiwa' hsa 'i kaakii mitaahshiniishwewaanakisinitc Isriyal. Miitahsh o'o kaakii'ikowaatc otetewaan kii⁠shawenimikowaatc, entahshiwaatc ekii'ikowaatc keshi na'ishkaakowaatc.

Eh⁠tashintenik Cekap Kii'ishkwaapimaatisitc, Aaniinti Kaye Kaa'ishina'inintc

²⁹ Cekap tahsh okii'inaa' okosihsa', “Mii osha'i aasha e⁠otisaapantamaan ci⁠wiiciiwakwaa nintinawemaakanak kaa⁠pimaatisihsikwaa. A'a hsa Iihparan (Ephron) Heht (Hittite) kaatinowitc, kaashi tipentank mihshawahkamikoni, ayaani e⁠wiimpaapihkaanik. Mii hsa weti ishi na'inihshiihkek kaashi na'inintwaa kaakii oteteyaan.

³⁰ I'i tahsh kaa⁠wiimpaapihkaak weti Mahkpiila (Machpelah) ishi'ayaa, waapanonk inahke Mamri (Mamre) i'imaa Kenan (Canaan) ahkiink. Eparahaam (Abraham) kii⁠ataawekopan i'i wiimpaapihk, i'i kaye ahkiini ewii inwaatank kaashi na'inintwaa kaa⁠nipowaatc. Ini tahsh ininiwan Iihparanoon kii⁠ataamaakopan.

³¹ Mii hsa weti kaa⁠ishi na'inintc Eparahaam, ini kaye wiiwan Serawan (Sarah). Mii kaye weti Aaisik (Isaac), wiiwan kaye Oripehkawan (Rebekah) kaa⁠ishi na'inintwaa. Miitahsh kaye weti niin kaa⁠ishi na'inak Liiya (Leah).

³² I'i tahsh ahkiini kaakii ataamintwaa iki ininiwak Heht kaatinowiwaatc, mii hsa imaa eyaak i'i kaa⁠wiimpaapihkaak.”

³³ Ahpii tahsh kaa⁠ishkwaa waawiintamawaatc aaniin ke⁠ishihcikenitc okosihsa', kii⁠wakiicihtaa onipewinink. Miihsh kaa⁠ishi ishkwaanaamotc ekii ishkwaa pimaatisitc.