Cenisihs 48 - Ojibwe Kihcimasina'ikan

Cekap Kiishawenimaatc Iihpariyaman, Manaahsawan Kaye

¹ Naanaake tahsh e⁠ani ishihsenik, Coosap (Joseph) kiih⁠piwiintamawaa ekii'inintc, “Kitete ohsha aahkosi,” kii‑inaa. Kii‑ishaa tahsh ekiih tako maaciinaatc kaakii niishinitc okosihsa' Manaahsa (Manasseh), Iihpariyam (Ephraim) kaye kaakii ishinihkaasonitc.

² Ahpii tahsh Cekap (Jacob) kaa⁠wiintamawintc okosihsan Coosapoon eh⁠pi takohshininitc, mii hsa 'i kaa⁠ishi kakwe te'ahpiihciitc ekii mayaawapitc nipewinaahkonk.

³ Miitahsh o'o Cekap kaa'inaatc Coosapoon, “Kishemanitoo kaaMaawaci mashkawisiitc hsa ninkii naakosiihtaak Laas (Luz) ecikaatenik Kenan (Canaan) ahkiink. Miitahsh weti kaa⁠ishi shawenimitc

⁴ o'o ekii'ishitc, ‘Kiwii ishi'in hsa ci⁠ani paahtiinowaatc kiniicaanihsak. Miihsh kipiiwesiimak ci⁠ani pepaahtiinwewaanakisiwaatc. Miiwak hsa iki ke⁠miinakwaa o'o ahkiini ci⁠nehpici tipinawewisiwaatc,’ mii 'i kaa'ishihpan.”

⁵ “Inashke tahsh iki niishin kikosihsak o'omaa Iicipahkiink (Egypt) kaakiih tashi nihtaawikiwaatc cipwaa takohshinaan, niin hsa iki ta⁠inakinsowak eh⁠tipinawewisiyaan, taapishkoo Oroopin (Reuben), a'a tahsh Simiyan (Simeon) kaa⁠ishi tipinawewisiyaan.

⁶ Kiishpin itahsh kotak ani ayaawatwaa apinoonciishak oko kaashi niishiwaatc, miiwak ihsa iki kiin ke⁠tipinawewisiyan. Kekoonan itahsh keni tepinamowaatc wiicihkiweyiwaa' ta⁠onciimakaniniwan Iihpariyamink, Manaahsahkank kaye.

⁷ Weti hsa eh⁠pionci kiiweyaampaan Mesopohtemiya (Mesopotamia) ecikaatek, wiinke hsa ninkiih kihci maanentaanaapan mekwaa eh⁠pimi ayaayaankipan; Orehcal (Rachel) kii‑ishkwaa pimaatisiipan Kenan ahkiink weti pehsho Ehparaht (Ephrath) ecikaatenik. Mii hsa tahsh weti ohpimehkana kaa⁠ishi na'inakipan enamoninik Ehparaht mii hsa 'iwe Pehtalihem (Bethlehem) kaa'icikaatek,” kii‑ihkito.

⁸ Ahpii tahsh Isriyal (Israel) kaa⁠waapamaatc Coosapoon okosihsini o'o kii‑ihkito, “Awenenak itahsh oko?”

⁹ Coosapoon itahsh okii ishi nahkwehtaakoon, “Miiwa' ihsa 'i Kishemanitoo kaakii miishitc o'omaa ke⁠okosihsiwak,” kii‑ihkitowan. Isriyal tahsh kii‑ihkito, “Taka o'omaa piish ci⁠shawenimakwaa.”

¹⁰ O'o tahsh ishi ahpii Isriyal kaawiin aasha aahpici kii⁠waapihsii aaniihsh kii⁠kihci ahkiwensiiwi. Coosapoon itahsh pehsho okiih piitamaakoon okosihsini, miitahsh kaa⁠ishi ociimaatc kwiiwisenhsa' pehkihsh ekii minciminaatc.

¹¹ Isriyal itahsh okii'inaan Coosapoon, “Kaawiin miinawaa ta⁠ishihsehsinoon ci⁠waapaminaan itahsh ekii inentamaampaan, inashke tahsh Kishemanitoo nimpakitinik ci⁠waapamimak kiniicaanihsa',” okii'inaan.

¹² Coosap itahsh okii otaahpinaa' i'i kwiiwisenhsa' ociinkwaniniink Isriyalan e⁠ayaanihpan, miihsh mihtahkamik kaa⁠ishi animihkohtaatc.

¹³ Okii ishi niipawi'aan itahsh Iihpariyaman onamantinihkiniink inahke oteten eshi'ayaanitc, ini tahsh wiin Manaahsawan okihcinihkiniink inahke okii ishi niipawi'aan.

¹⁴ Isriyal tahsh kii⁠aashitenihkeni okihcinihk ekii aapacihtootc eh⁠saaminaatc Iihpariyaman ohtikwaaniniink, aanawiin ini ekii ohshiimenshimaawinitc. Onamantinihk itahsh okii aapacihtoon eh⁠saaminaatc Manaahsawan ohtikwaaniniink aanawiin ini nihtam ekii nihtaawikinitc.

¹⁵ Miitahsh kaa⁠ishi shawenimaatc Coosapoon o'o ekii'inaatc, “Taka Kishemanitoo, ninkehteya'aamipaniik Eparahaam, Aaisik kaye kaakii anohkiihtawaawaatc, oka shawenimaa' o'o kwiiwisenhsa'. Kishemanitoo kaakiih niikaaniihtamawitc minihk iko kaa⁠pi pimaatisiwak piinihsh o'o ishi ahpii noonkom kaa⁠kiishikaninik, oka shawenimaa'.

¹⁶ Taka ini encalan kaa⁠pinaatamawimitc kahkina wahsitaawihsewinink; oka shawenimikowaan iki kwiiwisenhsak. Taka wiinawaa tani onci nehpici ayaani niwiinsowin, i'i kaye ninkehteya'aamipanii' Eparahaaman, Aaisikoon kaye. Taka okani paahtiino'aawaa' opiiwesiimiwaa' o'omaa ahkiink,” kii‑ihkito.

¹⁷ Coosap itahsh kaawiin okii minwaapantansiin e⁠waapamaatc oteten okihcinihkini e⁠aapacihtoonitc eh⁠saaminaanitc Iihpariyaman ohtikwaaniniink. Miitahsh kaa⁠ishi manipitawaatc oninciini eh⁠saaminaanitc Iihpariyaman ewii ishi ninciinaatc Manaahsawan ohtikwaaniniink.

¹⁸ O'o tahsh Coosap ekii'inaatc oteten, “Nintete, kaawiin wiin i'inahke, wa'a iitok nihtam kii⁠nihtaawiki; wa'a hsa saamin kikihcinihk ci⁠aapacihtooyan,” okii'inaan.

¹⁹ Oteten tahsh o'o okii'ikoon, “Ninkosihs, ninkihkentaan ohsha; kewiin hsa Manaahsa tani paahtiinwewaanakisi, opiiwesiima' ta‑ani paahtiinowa'. Ohshiimenshan itahsh nawac tani paahtiinwewaanakisiwan, opiiwesiimini nawac tani paahtiinowa' ci⁠ani pepahkaanwewaanakisinitc,” kii‑ihkito.

²⁰ Miitahsh i'i eh⁠kiishikaninik kaakii'inaatc ci⁠minohsenitc, o'o tahsh ekii ihkitotc, “Isriyalak hsa oka aapacihtoonaawaan kiwiinsowiniwaan ahpii ihkitowaatc eh⁠shawencikewaatc. O'owe tahsh kika'ikowaak, ‘Taka Kishemanitoo kika ishi'ikowaa taapishkoo enentaakosinitc Iihpariyaman Manaahsawan kaye,’ ” kii‑ihkito. Mii hsa'inahke Isriyal kaakii inahsaatc Iihpariyaman ci⁠niikaanishkawaanitc Manaahsawan.

²¹ Isriyal tahsh okii'inaan Coosapoon, “Inashke mii aasha kekaa ci⁠nipoyaan, Kishemanitoo tahsh kika wiiciiwik, ci‑ishiwinihk weti ahkiink kaakii ishi tipinawewisiwaatc kikehteya'aama'.

²² Kiin itahsh e⁠niikaanishkawatwaa kiicihkiweyak, kimiinin i'i ahki Shehkam (Shechem) ecikaatek kaashi wahke nihtaawikink kekoon kaakii mahkamakwaa Emorii (Amorites) kaatinowiwaatc, kii⁠aapacihtooyaan nimpashipa'ikewihkomaan, nimihtikwaap, nimpihkwahk kaye kii⁠aapacihtooyaan,” okii'inaan.