Cenisihs 45 - Ojibwe Kihcimasina'ikan

Coosap Kiihkihkentaako'itisotc Awenen Tenowitc

¹ Coosap (Joseph) itahsh kaawiin awahshime okiih kashkihtoohsiin ci⁠manaa ompweyentank i'imaa kaakii ishi'ayaanitc i'i otanohkii'aakana', miihsh kaa⁠ihkitotc, “Taka kahkina awiya o'omaa eshi'ayaawak ta⁠onci saaka'am,” kii‑ihkito. Kaawiin itahsh awiya' i'imaa kii⁠ayaahsiiwa' ahpii Coosap kiih⁠kihkentaako'itisotc ci⁠kihkenimikotc wiicihkiweya' awenen tenowitc.

² Kiih⁠kishiiwe tahsh e⁠mawitc, mii 'i kaakii noontaakotc Iicip (Egypt) kaa⁠onciinitc, Peroo (Pharaoh) tahsh kaye owaahkaa'ikanink kaakii ayaanitc kii⁠noontamoo'.

³ Coosap itahsh okii'inaa' wiicihkiweya', “Niin ohsha Coosap! Keyaapi na pimaatisi nintete?” okii'inaa'. Wiicihkiweya' itahsh kaawiin okii nahkwehtaakohsii', aaniihsh kiih⁠sekisiwa' i'imaa kaa⁠ishi'ayaatc.

⁴ O'o tahsh okii'inaa' wiicihkiweya', “Taka pehsho naasihkawihshik.” Pehsho tahsh okiih pi naasihkaakoo'. Miitahsh kaa'inaatc, “Niin ohsha Coosap kiicihkiweyiwaa, Iicipahkiink inahke kaakii ishi ataawaakaahshiyekipan.

⁵ Keko tahsh noonkom i'i onci maanaapantisohkek, keko onci nishkenintisohkek o'omaa hsa inahke kaakii ishi ataawaakaashiyek; Kishemanitoo iitok kaakiih pi niikaaninisha'otc ci⁠pimaaci'imak pemaatisinitc.

⁶ Inashke aasha niishopipoon kaawiin o'omaa ayaahsinoon miicim, keyaapi tahsh naanopipoon kaawiin ta⁠piikwahkamikipicikenaaniwansinoon, kaawiin ta⁠manishikehsiim.

⁷ Kishemanitoo tahsh wiin ninkii niikaaninisha'ok cipwaa piishaayek o'omaa kiinawaa o'o nahke cishi kihci pimaaci'ikooyek, kehcinaac iko kaye kipiiwesiimiwaak ci⁠ani pimaatisiwaatc.

⁸ Inashke tahsh kaawiin kiinawaa kaakiih piicinisha'oyek o'omaa, Kishemanitoo ohsha. Ninkii ishi'ik ohsha ci⁠aanihke okimaahkantawimak ini Peroon. Niin kaye ninkiih tipentamo'ik kahkina kekoon kaa⁠tipentank. Misiwe hsa ko Iicipahki nintipentaan.”

⁹ “Weyiip itahsh maacaak kiiwek ci‑ishaayek nintete, o'o kika'inaawaa, ‘Mii hsa 'oweni kikosihs Coosap ehkitotc: Kishemanitoo ohsha ninkii ishi'ik misiwe ci⁠tipentamowak Iicipahkiini; taka piishaan o'omaa kaashi ayaayaan, keko pwaahtawiihken.

¹⁰ Weti hsa kika ishitaa Kooshin (Goshen) ahkiink kaa'icikaatek, pehsho kika ishi'ayaa eshi'ayaayaan, kiniicaanihsak kaye, kooshisak kaye, kitaanihkoopisak kaye, kimaanahcaanihshimak kaye, kipishihkiimak itahsh kaye, kahkina hsa ko kekoonan eyaayan.

¹¹ Miitahsh weti ketashi naanaakaci'inaan, keyaapi iitok naanopipoon kaawii ayaahsinok miicim. Maakishaa maawiin kitaawahsitaawihse, iki kaye kitaawinink eyaawaatc, iki kaye kahkina kaa‑ayaawatwaa ta⁠kawaskatewak.’ ”

¹² “Kiinawaa hsa ko kiwaapamim, Penciman (Benjamin) niwaapamik, niin hsa tepwe Coosap eyaawiyaan kaa⁠kakanooninakook.

¹³ Wiintamawihk itahsh kaye nintete kahkina eshi kihtentaakosiwak o'omaa Iicipahkiink, kahkina kaye kekoonini kaa⁠waapantamek. Weyiip itahsh piinaahkek nintete o'omaa,” kii‑ihkito.

¹⁴ Miitahsh kaa⁠ishi kihkincikwepinaatc wiicihkiweyan Pencimanan ekii mawitc, miihsh Pencimanan kaa⁠ishi kihkincikwepinikotc ekii mawinitc.

¹⁵ Kahkina tahsh okii ociimaa' kotak wiicihkiweya', ekiih kihkincikwenaatc. Miitahsh naanaake kaa⁠ishi kakanoonikotc.

¹⁶ Ahpii kaa⁠ocihci noontaakaaniwank Peroo owaahkaa'ikanink Coosap wiicihkiweya' ekiih takohshininitc, Peroo hsa kii⁠minwentam, i'i kaye otaanihke okimaama'.

¹⁷ O'o tahsh okii'inaan Coosapoon, “O'oweni hsa ishi kiicihkiweyak, ‘O'o ishihcikek; pihciwane'ihkwak kitawahkaaniwaak ci‑ishaayek Kenan (Canaan) ahkiink.

¹⁸ Piinaahkek kitetewaa, iki kaye kitaawiniwaank eyaawaatc piinaahkekwaanik o'omaa eshi'ayaawak. Kika miinininim hsa maawac wenishihshink ahki o'omaa Iicipahkiink, miitahsh i'imaa ke⁠ontancikeyek eshi wenootahk o'o ahki.’

¹⁹ Miitahsh kaye'owe ke'inatwaa, ‘O'owe hsa ishihcikek; o'omaa hsa Iicipahkiink onci maaciinihkwak otaapaanaahkwak keshi poosiwaatc kiniicaanihsiwaak, kiwiiwiwaak kaye, ci⁠piinek itahsh kaye kitetewaa, miihsh i'i ishi piishaahkek.

²⁰ Keko wiin papaapisiskentankek kekoonan tepentamek, aaniihsh maawac iko wenishihshink misiwe Iicipahkiink kika tipinawewisim,’ ” okii'inaan.

²¹ Miitahsh i'i Isriyal (Israel) okosihsa' kaa⁠ishihcikenitc. Coosap okii miinaa' otaapaanaahkwa' ekii ishihciketc Peroon kaakii'ikotc. Okii miinaa' kaye ke⁠nawahponitc ani pimi ayaanitc.

²² Entahso peshikonitc itahsh okii miinaa' kikishkikanan ke⁠meshkosihkaminitc. Pencimanan itahsh wiin nihswaahk (300) waapaapihko shooniyaa' okii miinaan, naanwewaan kaye kikishkikanan okii miinaan.

²³ Miitahsh o'oweni kaa⁠ishinisha'amawaatc oteten: mitaahso maanshimihtatimoo' ekiih pimiwitoonitc ehkotepiinitc i'i maawac wenishihshininikin kekoon Iicipahkiink wenciinikin, mitaahso kaye noonshe maanshimihtatimoo' ekiih pimiwitoonitc ehkotepiinitc miicim, pahkweshikanan kaye, kotak kaye kekoon ke⁠aapacihtoonitc pimi ayaanitc.

²⁴ Miitahsh Coosap kaa⁠ishi maacinisha'waatc wiicihkiweya', e⁠ani maacaanitc itahsh o'o okii'inaa', “Keko ani kiihkaantihkek ani pimi ayaayek,” ekii'inaatc.

²⁵ Miitahsh i'imaa Iicipahkiink kaa‑ani onci maacaanitc ekii ishaanitc oteteni Cekapoon (Jacob) eshi'ayaanitc Kenan ahkiink.

²⁶ O'o tahsh okii'inaawaan otetewaan, “Coosap ohsha iinsan keyaapi pimaatisi! Wiin ohsha misiwe Iicipahkiini otipentaan,” okii'inaawaan. Wiinke tahsh kiih⁠koshkwentamoon, kaawiin okiih tepwehtaakohsiiwaan.

²⁷ Ahpii tahsh kaa⁠wiintamawaawaatc kahkina kekoon kaakii'ikowaatc Coosapoon, e⁠waapamaanitc itahsh kaye otaapaanaahkwa' Coosapoon kaakiih pi ishinisha'waanitc ke⁠ani ishi pimiwinintc, miitahsh otetewaan Cekapoon kaakiih kiiwe mashkawaatisinitc.

²⁸ Isriyal tahsh kii‑ihkito, “Mii'i eh⁠tepwehtamaan! Ninkosihs Coosap keyaapi iinsan eh⁠pimaatisitc. Ninka ishaawaan, ci⁠awi waapamak cipwaa nipowak,” kii‑ihkito.