Cenisihs 40 - Ojibwe Kihcimasina'ikan

Coosap Kiiwiintank Aaniin Enaapantaminitc Tahkonikana'

¹ Ninkotink itahsh iko e⁠ani ayishihsenik, kaa⁠naakacihtootc shoominaapo, a'a kaye okimaawi ciipaahkwewinini kaakiih kiishitepoonaatc kihciokimaan, okii maanaapamikowaan otookimaamiwaan kaakiih kihciokimaawinitc Iicipahkiink (Egypt).

² Peroo (Pharaoh) hsa wiinke okii nishki'ikoo' o'o niishin aanihkewikimaa', neyaanaakacihtoonitc shoominaapo, okimaawi ciipaahkwewininiwan itahsh kaye.

³ Okii ishi pakitinaa' itahsh cishi kipa'omintc owaahkaa'ikaniniink tahkoniwewikimaan kaa⁠tipenimaanitc okanawencike' kipa'otiiwikamikonk. Mii hsa 'iwe peshikwan kaakii ishi kipa'omintc Coosapoon (Joseph).

⁴ Tahkoniwewikimaa tahsh okii miinaan Coosapoon ci⁠naakaci'aanitc. Kinwesh itahsh i'imaa kii⁠ayaawa'.

⁵ Minciniish itahsh i'i ininiwa', kaa⁠naakacihtoonitc shoominaapo, ciipaahkwewininiwan itahsh kaye kihciokimaan kaakiih tipenimikonitc, eh⁠kipa'omintc, kiih⁠pawaacikewa' peshikwan eh⁠tipihkaninik. Otinaapancikanini tahsh eshi pehpeshikonitc pepahkaan kii‑ishi nihsitohtaakwaniniwan.

⁶ Keshepaawakaninik itahsh ahpii Coosap kaa⁠otihsaatc, okii waapamaa' wiinke e⁠mikoshkaatentaminitc.

⁷ Okiih kakwecimaa' itahsh i'i aanihkewikimaa' kaakii anohkiihtawaanihpan Peroon kaakii wiici tahkonikoomaatc otookimaaman owaahkaa'ikaniniink, “Wekonen itahsh wenci maanentamowinaakosiyek?” ekii'inaatc.

⁸ O'o tahsh okii'ikoo', “Minciniish ohsha ninkiih pawaacikemin, kaawiin itahsh awiya ayaahsii ke⁠wiintankipan eshihsininikin,” okii'ikoo'. Coosap itahsh okii'inaa', “Kishemanitoo iitok ehta okashkihtoon ci⁠wiintank inaapancikanan eshihsininikin. Wiintamawihshik kipawaacikaniwaan,” okii'inaa'.

⁹ Ini tahsh minihkwaakan kaakiih pimiwitoonitc okii wiintamaakoon aaniin kaa⁠inaapantaminitc ekii'ikotc, “Shoominaahtik ninkiih pawaanaa ekii waapamak inaahsamiiyaan.

¹⁰ Kii⁠nihsinoon (3) iinsan watihkwanan i'imaa shoominaahtikonk. Ahpii tahsh iko iinsan e⁠ani maacii nohkatihkwanesitc, mii 'i kaa⁠ishi kiishipakiitc, shoominak ekiih kiishatihsowaatc.

¹¹ Kihciokimaa tahsh iinsan ninkiih tahkonamowaan ominihkwaakan; miitahsh iinsan kaa⁠ishi otaahpinimak shoomina' ekiih piinci siiskoopiikinimak i'imaa minihkwaakanik. Miitahsh kaa⁠ishi miinak i'i minihkwaakan,” okii'ikoon.

¹² Coosap itahsh okii'inaan, “Mii hsa 'owe eshihsink kitinaapancikan. Ini hsa nihsin watihkwanan kaakiih pawaataman, mii hsa 'i nihsokiishik.

¹³ Nihsokiishik hsa ishihsenik Peroo kika pakitinik, ci⁠kiiwe ahsihk aaniin kaakii inanohkiiwatipan. Miinawaa tahsh kika miinaa kihciokimaa minihkwaakan, taapishkoo kaakii⁠nihtaa ishihcikeyampan kii⁠pimiwitooyan ominihkwaakan.

¹⁴ Mihkwenimihshiihkan itahsh ahpii ani minohseyan, taka kayehpii minotootawihshiihkan ci⁠maamihkoomiyan ci⁠wiintamawatc Peroo, ci⁠saakisi'itc o'omaa kipa'otiiwikamikonk.

¹⁵ Aaniihsh niin maano kakaancihc ninkii onci piinikoo Hiiparoowak (Hebrews) otahkiiwaank. O'omaa tahsh kaye kaawiin kekoon ninkii ishihcikehsii ci⁠kashkihtamaasoyaampaan ke⁠onci kipa'okooyaan,” okii'inaan.

¹⁶ Ahpii tahsh a'a okimaawi ciipaahkwewinini e⁠noontank e⁠mino wiintenik eshihsininik otinaapancikanini ini kaa⁠pimiwitoonitc minihkwaakan, miihsh kaa'inaatc Coosapoon, “Keniin hsa ninkiih pawaacike. Nihtikwaaniink iinsan ninkiih pimiwitoonan nihsin (3) pahkweshikani mahkahkoon.

¹⁷ I'iwe tahsh wakicaya'ii pahkweshikani mahkahk kaakii ayaak, kii⁠pepahkaanatinoon iinsan iniswehkwaanan Peroo ke⁠miicitc. Pinehshiinshak itahsh iinsan okii miicinaawaa i'i miicim i'imaa pahkweshikani mahkahkonk,” ekii ihkitotc.

¹⁸ Coosap itahsh okii'inaan, “Mii hsa 'owe eshihsink kipawaacikan. Ini nihsin pahkweshikani mahkahkoon, mii hsa 'i nihsokiishik.

¹⁹ Nihsokiishik hsa ishihsenik, Peroo kika pakitinik, ci⁠kiishkikweta'ohk. Mihtikonk itahsh oka akootoon kiwiiyawini, pinehshiinshak itahsh oka miicinaawaa kiwiiyawini,” okii'inaan.

²⁰ E⁠nihsokiishikwakaanik itahsh Peroo kiih⁠tipishkam. Okii wiihkwamaa' itahsh kahkina otanohkii'aakana'. Okiih pakitinaan itahsh ini minihkwaakan kaa⁠pimiwitoonitc, ini kaye okimaawi ciipaahkwewininiwan enaahsamiinitc kotak aanihkewikimaa'.

²¹ Okiih kiiwe inahsaan itahsh ini kaa⁠pimiwitoonitc minihkwaakan kaakii inanohkiinihpan. Miinawaa tahsh okii miinaani minihkwaakanini Peroon oninciiniink.

²² Okii akoonaan itahsh wiin ini okimaawi ciipaahkwewininiwan, taapishkoo Coosapoon kaakii inaanikopanen e⁠wiintamawaanitc eshihsininik opawaacikanini.

²³ A'a tahsh kaakiih pimiwitootc minihkwaakan, kaawiin kii⁠onci maamihkawihsii Coosapoon; mii 'i kaa⁠ishi waniihketc.