Cenisihs 4 - Ojibwe Kihcimasina'ikan

Ken, Epal Ehtashimintwaa

¹ Aatam (Adam) tahsh okii wiihpemaan wiiwan Iip (Eve) eshinihkaasonitc. Miitahsh kaakii oniicaanihsinitc, kwiiwisenhsan ekii ayaawaanitc. Miitahsh Iip kaa⁠ihkitotc, “KaaTipenciketc hsa ninkii wiici'ik ci⁠ayaawimak kwiiwisenhsan.” Ken (Cain) tahsh okii ishinihkaanaan.

² Naanaake tahsh miinawaa kotak kwiiwisenhsan kii⁠nihtaawikiwan wiicihkiweni, Epal (Abel) ekii ishinihkaanaatc. Epal okii naanaakaci'aa' maanahcaanihsha'. A'a tahsh wiin Ken kii⁠kihtikewininiiwi.

³ Naanaake tahsh e⁠ani ishihsenik Ken okiih piitoon kaakii nihtaawikihtootc okihtikewahkamikonk, ekiih pakitinamawaatc kaaTipencikenitc.

⁴ Epal tahsh kaye okiih pakitinamawaan kaaTipencikenitc, ekiih piinaatc maawac iko nihtam kaakii nihtaawikinitc maanahcaanihshenhsa' kaakii onciinitc omaanahcaanihshimink. Ekiih pakitinaatc maawac hsa piko eshi pimitewinitc. KaaTipenciketc hsa okii minwaapamaan Epalwan, okii minwaapantamawaan kaye kaakiih pakitinaminitc.

⁵ KaaTipenciketc tahsh kaawiin okii minwaapamaahsiin Kenan, i'i kaye kaakiih pakitinamaakotc. Ken tahsh wiinke kii⁠nishkaatisi, kii⁠nihsitawinaakosi kaye ekii maanaapantank.

⁶ KaaTipenciketc tahsh okii'inaan Kenan, “Wekonen wenci nishkaatisiyan, wekonen kaye wenci nishkinaakosiyan?

⁷ Kiishpin kwayahk ishihcikeyan kitaa nakanikoon i'i kaashi maanaapantaman. Kiishpin tahsh kwayahk ishihcikehsiwan, macitootamowin ohsha ciikaya'ii kitahkamaakoon ci⁠otihtinikoyan. Keko pakitinanken macitootamowin ci⁠tipenimikoyan.”

⁸ Ken tahsh okii'inaan Epalwan wiicihkiweyan, “Taka weti ishaataa kihtikewinink.” Ahpii tahsh ekii ani ayaawaatc weti kihtikewinink, Ken okii otihtinaan Epalwan wiicihkiweyan ekii nihsaatc.

⁹ KaaTipenciketc tahsh okii'inaan Kenan, “Aaniinti tahsh a'a Epal kiicihkiwensi?” Ken tahsh kii‑ishi nahkwehtam, “Kaawiin ninkihkenimaahsii aaniinti eyaakwen. Niin ina ke⁠kanawenimakipan niicihkiwensi?”

¹⁰ Miitahsh kaa'ikotc, “Aaniin tahsh kaa⁠onci ishihcikeyan? Kiicihkiwensi ohsha omiskwiim kaakii oncikawininik, mihtahkamik ohsha nintonci kanoonikowaan.

¹¹ Noonkom tahsh ahkiink kitonci macakins, aaniihsh mii 'i eshinaakwahk i'i taapishkoo mihtahkamik ekii minihkwaatank kiicihkiwensi omiskwiim kaakii oncikawininik: kiin tahsh i'i kitishihcikewin.

¹² Ahpii tahsh kihtikeyan i'imaa kihtikewahkamikonk, kaawiin kekoon kika kashkihtoohsiin ci⁠nihtaawikihtooyan. Kiin kaye kika tinow awiya ninkoci kaa⁠ishitaahsik, misiwe ahkiink kika papaawawaanentam.”

¹³ Ken tahsh okii'inaan kaaTipencikenitc, “O'owe kaashi nana'ahshiyan, wawiinke nisanakentaan ci⁠pimiwitooyaan.

¹⁴ Inashke kaye noonkom kaa⁠kiishikahk ninkoci kitinaamohka'ish o'omaa kihtikewahkamikonk, ninkoci kaye kitinaamohka'ish o'omaa enaahsamiiyan. Niin tahsh kaawiin ninkoci ninka ishitaahsii, misiwe kaye ahkiink ninka papaawawaanentam. Awiyak hsa kaye ke⁠mihkawiwaatc pisaaniko ninka nihsikook.”

¹⁵ KaaTipenciketc tahsh okii'inaan Kenan, “Kiishpin hsa awiya nihsihk, niishwaahcink minihk ninka ishi kiiwenamawaa ke⁠tootawihk.” KaaTipenciketc tahsh okii kihkinawaaci'aan Kenan ke⁠onci nihsaahsiwimintc awiyan nakishkaakonitc.

¹⁶ Ken tahsh anoociko kii⁠onci ishaa eshi'ayaanitc kaaTipencikenitc. Weti tahsh Naat (Nod) ahkiink kii‑ishi kapehshi, waapanonk inahke Iitin (Eden) kihtikewahkamikonk.

Ken Opiiwesiima' Ehtashimimintc

¹⁷ Ken (Cain) tahsh okii wiihpemaan wiiwan, miihsh kaakii nihtaawiki'aanitc kwiiwisenhsan. Iinaahk (Enoch) tahsh okii ishinihkaanaawaan. Ken tahsh okii oshihtoon kihci ootena Iinaahk ekii ishinihkaatank eshinihkaasonitc okosihsan.

¹⁸ Iinaahk (Enoch) tahsh kii⁠okosihsi Aairaatan (Irad); Aairaat tahsh kii⁠okosihsi Mehyoocelan (Mehujael); Mehyoocel tahsh kii⁠okosihsi Metooshaelwan (Methushael); Metooshael tahsh kii⁠okosihsi Lemehkoon (Lamech).

¹⁹ Lemehk tahsh kii⁠niishiwa' (2) wiiwa'. Etah (Adah) peshik kii‑ishinihkaasowan, kotak tahsh Silah (Zillah).

²⁰ A'a tahsh ihkwe Etah okii nihtaawiki'aan Cepalwan (Jabal). Miiwan tahsh ini kaakii opiiwesiiminitc i'i pakwaanekamikonk kaakii ishitaanitc, kaakii ayaawaanitc kaye awahkaana'.

²¹ Kaakii owiicihkiwenitc tahsh Coopal (Jubal) kii‑ishinihkaasowan. Miitahsh wiin ini opiiwesiimini kaakii nihtaa kitohcikenitc pootaacikanenhs, kihci metweyaapiikipicikaatenik kaye e⁠aapacihtoonitc.

²² A'a tahsh kewiin kotak ihkwe Silah okii nihtaawiki'aan kwiiwisenhsan Toopal Ken (Tubal Cain) e⁠ishinihkaasonitc. Miiwan tahsh ini osaawaapihkonk, piiwaapihkonk kaye kaakii onci oshihtoonitc aapacihcikanan. Otawemaan tahsh Neamah (Naamah) kii‑ishinihkaasowan.

²³ Lemehk tahsh o'o okii'inaa' wiiwa', “Etah (Adah) kekiin tahsh Silah kaa⁠wiiwiminakook, taka pisintawihshik! Ninkii nihsaa inini aaniihsh ninkii maahki'ik, kii⁠oshkaatisi ninkii pahkite'ok.

²⁴ Kiishpin niishwaahso (7) awiyak ci⁠nihsintwaapan enakintekwen Ken onci, niishwaahsimitanashiniishwaahso (77) tahsh niin Lemehk awiyak ta⁠nihsaawak kiishpin nihsikooyaan,” kii‑ihkito.

Seht A'a Kaye Iinos Kiinihtaawikiwaatc

²⁵ Aatam (Adam) tahsh okii wiihpemaan wiiwan Iipan (Eve), miitahsh kaakii nihtaawiki'aanitc kwiiwisenhsan. Seht (Seth) tahsh okii ishinihkaanaawaan. Iip tahsh kii‑ihkito, “Kishemanitoo hsa nimiinik kotak kwiiwisenhsan ci⁠naapi ayaanitc Epalwan (Abel) kaakii nihsikonitc Kenan (Cain),” kii‑ihkito.

²⁶ Seht tahsh kewiin kii⁠ani okosihsi, Iinaash (Enosh) okii ishinihkaanaan. Miitahsh i'i ahpii awiyak pemaatisiwaatc kaakii maacihtaawaatc e⁠aapacihtoowaatc kaaTipencikenitc owiinsowinini e⁠anami'ehtawaawaatc.