Cenisihs 39 - Ojibwe Kihcimasina'ikan

Coosap Kiihkakwekashki'ikotc Paatiparan Wiiwini

¹ Coosap (Joseph) itahsh kii‑ishiwicikaniwi Iicipahkiink (Egypt). Paatipar (Potiphar) itahsh kii‑ishinihkaaso aanihkewi shimaakanihshiiwikimaa kaakii naakaci'aatc okanawencike'. Okii anohkiihtawaan itahsh kaye Peroon (Pharaoh). Mii 'awe Paatipar kii⁠ataawe Coosapoon. Iishmeyal kaatinowinitc (Ishmaelites) ekii ataamaatc kaakiih piinaanitc weti Iicipahkiink.

² KaaTipencikenitc itahsh Coosap okii wiiciiwikoon. Miihsh wiinke kaakii minohsetc. Otaawininiink itahsh ini otookimaaman Iicipiiwininiwan kii‑ishitaa.

³ Otookimaaman tahsh owaapantamini kaaTipencikenitc e⁠wiiciiwikotc, aaniin kaye kaakii ishi minohse'ikotc kahkina kekoon kaakii ishihciketc.

⁴ Okii minwaapamikoon itahsh otookimaaman, miihsh kaa⁠ishi'ikotc ci⁠naakacihtamawaatc otaya'iimini. Okii ishi'ikoon kaye ci⁠naakacihtamawaatc owaahkaa'ikanini, kahkina kaye kekoon kaakiih tipentaminitc.

⁵ Miitahsh i'i ahkonaak Paatipar kaakii inakimaatc Coosapoon ci⁠naanaakaci'aanitc kahkina eyaanitc otaawinink, kahkina kaye kekoon kaa⁠tipentank. KaaTipencikenitc hsa wiinke okii minohsehtooni owaahkaa'ikan a'a Iicipiiwinini onci Coosapoon. Kahkina kekoon kaakii ayaatc Paatipar kii⁠minohseni otaawinink, kahkina kaye kaakiih tipentank eshi kihtiketc.

⁶ Paatipar hsa okiih pakitinaan Coosapoon ci⁠naanaakacihtoonitc kahkina kekoon kaakiih tipentank. Kaawiin itahsh memwehc kekoon okiih papaapisiskentansiin, miiyehtako miicim kaakii miicitc. Coosap itahsh wiinke kii⁠minokii, kii⁠minonaakosi kaye.

⁷ Naake tahsh e⁠ani ayishihsenik, otookimaaman wiiwini okii mihsawinaakoon Coosap ekii ihkitonitc, “Taka, wiihpemihshin,” ekii'ikotc.

⁸ Kaawiin itahsh okiih tepwehtawaahsiin o'o ekii'inaatc, “Inashke, nintookimaam o'omaa e⁠ayaawak, kaawiin kekoon opapaapisiskentansiin owaahkaa'ikanink. Kahkina iitok kekoon kaa⁠tipentank nintepweyenimik ci⁠naanaakacihtaawak.

⁹ Kaawiin hsa awiya awahshime ishpentaakosihsii niin kaa‑ahpiihtentaakosiwak o'omaa owaahkaa'ikanink. Kaawiin hsa kekoonini ninkihciwinamaakohsii ci⁠ayaawaahsiwak, kiin hsa ehta ninkihciwinamaak, aaniihsh kiin kiwiitikemik. Aaniin itahsh inaa ke⁠onci ishihcikeyaampaan kihci macikekoon, ci⁠macitootawakipan Kishemanitoo,” kii‑ihkito.

¹⁰ Aana tahsh wiin entahso kiishik aanakiih kakwe kashkimikotc, kaawiin itahsh okiih tepwehtawaahsiin ci⁠wiihpemaatc, pooshke ko ci⁠wiiciiwaatc.

¹¹ Aapitink itahsh eh⁠kiishikaninik Coosap eh⁠piintiketc waahkaa'ikanink ewii anohkiitc, kaawiin tahsh kii⁠ayaahsiiwa' i'imaa ininiwa' kaakii nihtaa ayaanitc.

¹² Miitahsh kaakii nawacipinikotc ini ihkwewan okashkiikiiwinink ekii'ikotc, “Ampe taka wiihpemihshin!” ekii'ikotc. Miitahsh kaa⁠ishi nakacipahtwaatank okashkiikiiwin eh⁠tahkonaminitc ini ihkwewan, ekiih saakicipahtootc waahkaa'ikanink.

¹³ Ahpii tahsh a'a ihkwe e⁠waapantank ekii nakacipahtwaanitc okashkiikiiwinini eh⁠tahkonank, ekiih saakicipahtoonitc itahsh kaye waahkaa'ikanink,

¹⁴ miitahsh kaa⁠ishi antomaatc owaahkaa'ikanink kaakii tashi pamiihtaakotc ekii'inaatc, “Inashke naa waapantamok o'o! A'a hsa Hiiparoowinini (Hebrew) o'omaa kaakiih piinintc kimiihkinci'ikonaan! Kiih⁠pi piintike o'omaa ewii wiihpemitc, ninkiih shaakowewaan itahsh.

¹⁵ Ahpii kaa⁠noontawitc eh⁠shaakowewak, mii 'i kaa⁠ishi nakacipahtwaatc o'o okashkiikiiwin o'omaa eshi'ayaawak, ekiih saakicipahtootc waahkaa'ikanink.”

¹⁶ Miitahsh kaa⁠ishi kanawentank i'i kashkiikiiwin piinihsh ekiih takohshininitc otookimaamini.

¹⁷ Miitahsh o'o kaa⁠inaacimohtawaanitc, “A'a hsa Hiiparoo anohkii'aakan kaakiih piitamawiyank, ninkiih pi naasihkaak ekii wii maanenimitc;

¹⁸ Miihsh o'o kaa⁠ishihsek, ahpii eh⁠shaakowewak eh⁠kishiiwewak, mii 'i kaakii nakacipahtwaatc o'o okashkiikiiwin eshi'ayaawak, ekiih saakicipa'iwetc,” kii‑inaacimo.

¹⁹ Ahpii tahsh otookimaaman kaa⁠noontawaanitc wiiwini o'o kaa⁠inaacimohtaakonitc, “Mii hsa 'i kaah⁠tootawitc a'a kitanohkii'aakan,” wiinke tahsh kii⁠nishkaatisiwan.

²⁰ Coosap tahsh otookimaaman okii otaahpinikoon ekiih kipa'okotc. Eshi kipa'omintc itahsh kihciokimaan otahkonikanini, mii'iweti kaa⁠ishi kipa'ontc.

²¹ KaaTipencikenitc itahsh Coosap okii wiiciiwikoon, okii minohse'ikoon kaye. Okii ishi'aani kaye tahkoniwewikimaan ci⁠minwaapamikotc.

²² Tahkoniwewikimaan itahsh Coosap okii ishi'ikoon ci⁠naakaci'aatc kahkina i'i kaakiih kipa'omintc. Kahkina kaye kekoon ci⁠opapaamisiwinitc i'imaa aaniin kaakii ishihsenik.

²³ Tahkoniwewikimaan itahsh kaawiin kekoon okiih papaapisiskentansiini kekoon iko Coosap kaakii naakacihtootc, aaniihsh kaaTipencikenitc Coosap okii wiiciiwikoon, okii minohse'ikoon kaye aaniin iko kaakii ishihciketc.