Cenisihs 38 - Ojibwe Kihcimasina'ikan

Coota shikwa Temaar

¹ I'i hsa ahpii Coota (Judah) okii nakanaa' wiicihkiweya' ekii anta wiicitaamaatc ininiwan Haaira (Hirah) eshinihkaasonitc wenciinitc weti ootenaank Aatalam (Adullam) ecikaatenik.

² Miihsh weti okii waapamaan ihkwewan Kenan (Canaan) ahkiink wenciinitc wetetenitc Shooa (Shua) eshinihkaasonitc. Miiwan itahsh ini kaa⁠wiiwitc ekii wiihpemaatc.

³ Miihsh kaakii oniicaanihsinitc ekii nihtaawikinitc kwiiwisenhsan Ehr (Er) ekii ishinihkaanaawaatc.

⁴ Miinawaa hsa kiih⁠kikishkawaawahsowan ekii nihtaawikinitc kwiiwisenhsan Oonan (Onan) ekii ishinihkaanaawaatc.

⁵ Keyaapi tahsh kii⁠ani nihtaawikiwan kwiiwisenhsan, Shiila (Shelah) hsa okii ishinihkaanaawaan.

⁶ Coota hsa tahsh okii ontinamawaan nihtam okosihsan Ehr eshinihkaasonitc, ihkwewan ke⁠wiiwinitc Temaar (Tamar) eshinihkaasonitc.

⁷ A'a tahsh Ehr kii⁠maci'ishiwepisi. Kaawiin okii minwaapamikohsiin kaaTipencikenitc, miihsh kaakii nihsikotc.

⁸ Miitahsh Coota kaakii'inaatc ini kotak okosihsan Oonan eshinihkaasonitc, “Maacaan awi wiihpemim kiicihkiwensi wiiwan ci⁠tootawatc a'a ihkwe aaniin kekii ishihcike'ikohpan wiinimoon cini ayaawaatc apinoonciisha' keni nihtaawikinitc, kiicihkiwensi cini ayaanitc opiiwesiima'.”

⁹ Oonan itahsh okii kihkentaan ci⁠tipinawewisihsik i'i apinoonciisha' keni nihtaawikinitc. Miihsh entahsink e⁠wiihpemaatc ini wiicihkiwensiwan wiiwini mihtahkamik ihsa kii‑ishi miinsii ci⁠nihtaawikihsinik wiicihkiwesiwan keni opiiwesiiminihpan.

¹⁰ Kaawiin itahsh okii minwaapantansiini kaaTipencikenitc i'i kaakiih tootank, miihsh kewiin kaakii onci nihsikotc.

¹¹ Miitahsh Coota kaa'inaatc oshiimihsan Temaaran, “Maacaan kitete otaawinink awi ishitaan piinihsh ci⁠kiishaapewitc ninkosihs Shiila. Kiiwaacihkwenk ihsa ci‑ishi pimaatisiyan,” okii'inaan. Miihsh i'i Temaaran kaa⁠ishihcikenitc otetehkaank cishi kiiwenitc. O'o iitok kii‑inentam Coota, “Kewiin maawiin Shiila ta⁠nipo taapishkoo kaakii ishi niponitc wiicihkiweya'.”

¹² Kinwesh itahsh e⁠ani ishihsenik, Coota wiiwan wetetenitc Shooawan (Shua) kii‑ishkwaa pimaatisiwan. Ahpii itahsh kaa⁠ishkwaa maanentank weti Timnah (Timnah) ootenaank kii‑ishaa eshi manatoweshomintc maanahcaanihsha'. Ini hsa osaaki wiiciiwaakanan Haaira eshinihkaasonitc wenciinitc weti ootenaank Aatalam ecikaatenik okii wiiciiwikoon.

¹³ Temaar itahsh kii⁠wiintamawaa, “Kishishehsh iinsan ishaa weti Timnah ootenaank e⁠antawi manatoweshwaatc omaanahcaanihshima'.”

¹⁴ Temaar ihsa tahsh okii kiihcikoshkaanan kiiwaacihkwewi kikishkikanan ekii meshkocihkonayetc. Miihsh kaa⁠ishi pihsihkank aakawiinkwe'on ci⁠kihkencikaniwihsik. I'imaahsh kii‑ishi onapi enishi piintikenk ootenaank Iineim (Enaim) ecikaatenik eyaanik enamoninik weti Timnah. Kaawiin iitok mahshi kii⁠miinaakaniwihsii ci⁠wiitikemikotc Shiilawan.

¹⁵ Ahpii tahsh Coota wayaapamaatc, “Pihshikwaacihkwe a'awe,” kii‑inentam, aaniihsh kii⁠aakawiinkwe'owan.

¹⁶ Miihsh kaa⁠ishi anta waapamaatc eshi'ayaanitc pahkehkana ekii'inaatc, “Taka pakitinihshin ci⁠wiihpeminaan.” Kaawiin iitok okii kihkenimaahsiin ini e⁠oshiimihsitc. Miihsh o'o kaa'ikotc, “Wekonen itahsh ke⁠miishiyampan ci⁠wiihpeminaampaan?”

¹⁷ Miihsh kaa'inaatc, “Oshki ayaape maanatihk ihsa kika miinin ci⁠ontinak eshi ohkwiinowaatc nimaanatihkwak.” Miihsh kaa'ikotc, “Kekoon ina kitaa miish ke⁠onci kehcinaa'entamaan cipwaa piicinisha'watc a'a maanatihk.”

¹⁸ “Wekonen tahsh ke⁠miininaan ke⁠onci kehcinaa'entaman?” okii'inaan. Miihsh kaa⁠ishi nahkwehtaakotc, “I'i kikihkinawaaci'on kaa⁠shinootaakanihkantek, i'i kaye kisahka'on kaa⁠tahkonaman,” okii'ikoon. Miihsh kaa⁠ishi miinaatc ekii wiihpemaatc. Miitahsh kaakiih kikishkawaawahsonitc.

¹⁹ Miihsh Temaar kaa⁠ishi kiiwetc ekii kiihcikoshkank otaakawiinkwe'on ekii pihsihkank itahsh miinawaa kiiwaacihkwewi kikishkikanan.

²⁰ Coota hsa okii anoonaan seyaaki wiiciiwaatc Haairawan ci‑ishiwitawaanitc ini ayaape maanatihkwan ci⁠miinaanitc ini ihkwewan ci⁠kiiwe miinikotc kaakii miinaahpan okihkinawaaci miikiwaanan. Kaawiin itahsh Haaira okii mihkawaahsiin ini ihkwewan.

²¹ Miihsh kaa⁠ishi kakwecimaatc ininiwa' i'imaa eshitaanitc, “Aanti tahsh a'a pihshikwaacihkwe kaa‑ayaahpan pahkehkana weti Iineim ootena.” Miihsh kaa'ikotc, “Kaawiin wiihkaa pi⁠onci ayaahsii pihsikwaacihkwe o'omaa.”

²² Miihsh kaa⁠ishi anta waapamaatc Cootawan ekii'inaatc, “Kaawiin ohshanaa nimihkawaahsii a'a ihkwe. Ininiwak itahsh kaye weti eshitaawaatc ihkitowak wiihkaa eh⁠pi ayaahsinik weti pihshikwaacihkwewan,” okii'inaan.

²³ Miihsh o'o Coota kaa⁠ihkitotc, “Taka maano oka tashi kanawentaanan ini eyaatc. Kaawiin kinantawentansiimin ci⁠paahpi'ikooyank. Nintaanakii ishinisha'waa iitok wa'a maanatihk, kaawiin itahsh kikii mihkawaahsii,” kii‑ihkito.

²⁴ Nihsokiisihs itahsh e⁠ani ishihsenik Coota kii⁠wiintamawaa ekii'inintc, “A'a kishiimihs Temaar kii⁠pihshikwaacihkwe iinsan, miihsh kaa⁠onci kikishkawaawahsotc.” Miihsh Coota kaa⁠ihkitotc, “Saakisi'ihk, ci⁠caakisontc ci⁠nipotc,” kii‑ihkito.

²⁵ Eh⁠pi saakisi'intc itahsh a'a ihkwe kii⁠anoohkii ci⁠awi wiintamawimintc oshihshenshan ci'inimintc, “Wa'a hsa inini ninkiih kikishkawaawahsoo'ik tepentank onoweniwan. Taka tahsh pi⁠waapantan taka ci⁠kihkenimaawatwen awenen tepentank o'o kihkinawaaci'on kaa⁠shinootaakanihkantek, o'o kaye sahka'onaahk.”

²⁶ Coota hsa okii nihsitawinaan miihsh kaa⁠ihkitotc, “Nawac iitok kwayahk wiin kii‑ishihcike ahpiihc niin. Kaawiin iitok ninkii ishihcikehtamawaahsii kekii ishihcikeyaampaan cikii miinakipan ninkosihsan Shiilawan (Shelah) ci⁠onaapemitc.” Kaawiin itahsh miinawaa Coota okii onci wiihpemaahsiin ini ihkwewan.

²⁷ Wecihcihsenik ihsa ahpii ci⁠nihtaawikinaawahsotc, kii⁠kihkenimaa niishoote' iinsan e⁠ayaawaatc.

²⁸ Mekwaa tahsh enihtaawikinaawahsotc, peshik iinsan kii⁠pahpinihkeniwan. Miihsh ini iinsan wetaahpinaawahsonitc kaakii tahkopinaanitc meskosinitc kashkikwaacikaneyaapiin onihkinink ekii ihkitonitc, “Mii hsa wa'a nihtam nehtaawikitc.”

²⁹ Miihsh iinsan kaa⁠ishi ocinihkepani'onitc, inihsh iinsan wiicihkiweyan nihtam kii⁠nihtaawikiwan. Miihsh o'o wetaahpinaawahsotc kaa⁠ihkitotc, “Mii'iinsan i'i nahke eshi saakicipani'oyan!” Piires (Perez) itahsh okii ishinihkaanaan.

³⁰ Ini tahsh wiicihkiweyan kii⁠nihtaawikiwan tehkopisonitc onihkinink misko kashkikwaacikaneyaapiin. Siira (Zerah) hsa kii‑ishi wiinsowan.