Cenisihs 33 - Ojibwe Kihcimasina'ikan

Cekap Kiinakishkawaatc Iihswaan

¹ Cekap (Jacob) tahsh e⁠inaapitc, okii waapamaan Iihswaan (Esau) eh⁠pinaakosinitc niiwaahk (400) ininiwa' eh⁠pi wiiciiwaanitc. Miitahsh kaa⁠ishi nenaawinaatc apinoonciisha' aaninta Liiyawan (Leah) ci⁠wiiciiwaanitc, aaninta kaye Orehcalwan (Rachel), aaninta kaye i'i niishin otanohkii'aakanihkwema'.

² I'i tahsh otanohkii'aakanihkwema', apinoonciisha' kaye kaakii wiiciiwaanitc maawac iko okii niikaanii'aa'. Liiyawan itahsh iko i'imaa apinoonciisha' itahsh kaakii wiiciiwaanitc. Orehcalwan itahsh Coosapoon (Joseph) kaye maawac otaanaank okii ahsaa'.

³ Cekap tahsh wiin maawac kii⁠niikaanii. Niishwaahcink (7) itahsh kii⁠ani ishi animihkohtaa mihtahkamik e⁠ani otihsaapamaatc wiicihkiweyan.

⁴ Tekwac itahsh Iihswaan kiih⁠piicipahtoowan ekiih pi anta nakishkaakotc ekiih kincikwepinikotc ekii ayociimikotc. Minciniish itahsh kii⁠mawiwak.

⁵ Iiswaan tahsh kii⁠ayinaapiwan. Weyaapamaanitc itahsh ihkwewa', apinoonciisha' kaye, miihsh o'o kaa⁠ishi kakwecimikotc, “Awenenak oko kaa⁠wiiciiwihkwaa?” okii'ikoon. Cekap tahsh kii‑ishi nahkwehtam, “Miiwa'i hsa 'i apinoonciisha' Kishemanitoo kaamiinitc niin kitanohkii'aakan,” kii‑ihkito.

⁶ I'i tahsh anohkii'aakanihkwewa' i'i kaye apinoonciisha' pehsho kiih⁠piishaawa' ekii animihkohtaanitc.

⁷ Liiyawan tahsh kaye, apinoonciisha' kaakii wiiciiwikonitc kaye kiih⁠piishaawa' ekii animihkohtaanitc. Ishkwaac itahsh Orehcalwan, Coosapoon tahsh kiih⁠piishaawa', ekii animihkohtaanitc.

⁸ Iihswaan tahsh okii'ikoon, “Aaniin itahsh enwaataman o'o kahkina kaa⁠paahtiinonaaniwank kaakii nakishkamaan?” okii'ikoon. Cekap tahsh okii'inaan, “Mii hsa 'i ci⁠onci minwaapamiyan, kiin nintookimaam,” okii'inaan.

⁹ O'o tahsh Iihswaan okii'ikoon, “Niicihkiwensi aasha ohsha niipiwa' kekoon nintayaan, kanawentan kiin kaa⁠tipinawewisiyan,” okii'ikoon.

¹⁰ Cekap tahsh okii'inaan, “Kaawiin! Kiishpin hsa menwaapamiwanen, taka pisaan otaahpinan ono kaa⁠miininaan. Mii hsa 'i eshinawinaan taapishkoo awiya kaa⁠ishinawaatc kaa⁠waapamaatc Kishemanitoon, kiin tahsh aasha e⁠minwaapamiyan e⁠otaahpiniyan.

¹¹ Taka tahsh pisaan otaahpinan o'o kaa⁠miinikooyan kaa⁠piicikaatekin. Kishemanitoo ohsha etatawe niminotootaak, kahkina tahsh kekoon nintayaan keshi noontehsehsiwaan,” okii'inaan. Okiih kakaansomaan itahsh. Miitahsh kaa⁠ishi kashkimaatc.

¹² Iihswaan tahsh kii‑ihkitowan, “Taka hsa mii 'i ishi maacaataa cini pimi ayaayank, niin tahsh kika niikaaniihtamawin,” okii'ikoon.

¹³ O'o tahsh Cekap kii‑ihkito, “Nintookimaam iitok okihkentaan e⁠niinami ayaanitc apinoonciisha'. Ishinaakwan kaye ci⁠naanaakaci'akwaa noonshe maanahcaanihshak, noonshe pishihkiwak kaye kaa⁠otaya'aansimiwaatc. Kiishpin aaniihsh peshiko kiishik iko kihci kakaancinisha'ontwaa, mii hsa 'i kahkina ci⁠nipowaatc.

¹⁴ Taka pisaan kiin nintookimaam kikani ahpiisihkaa ci⁠niikaaniihtamawiyan. Niin itahsh wiin weweni niwiih pimi ayaa, ehpiisihkaawaatc pishihkiwak ewii ahpiisihkaayaan. Ehpiisihkaawaatc kaye apinoonciishak ninka ahpiisihkaa piinihsh cini takohshinaan Siiyar (Seir) ecikaatek kaashi ayaayan nintookimaam eninaan,” okii'inaan.

¹⁵ Iihswaan tahsh okii'ikoon, “Taka hsa ninka nakanaak aaninta nintininiimak ci⁠wiiciiwininekwaa,” okii'ikoon. Cekap tahsh okii'inaan, “Kaawiin memwehc ina i'i kitaa ishihcikehsii. Taka ehta ci⁠minwaapamiyan nintookimaam,” okii'inaan.

¹⁶ I'i tahsh eh⁠kiishikaninik Iihswaan kii⁠ani maacaawan Siiyar inahke ekii ishi kiiwenitc.

¹⁷ Cekap tahsh wiin kii‑ishaa Sahkat (Succoth) ecikaatenik, miitahsh weti kaa⁠ishi oshihtootc okapehshiwin, ekii oshihtamawaatc kaye keshi tapinawihshimoononitc otawahkaana'. Miitahsh kaakii onci ishinihkaatek i'imaa Tapinawihshimoonowinink.

¹⁸ Weti tahsh Mesopohtemiya (Mesopotamia) kaah⁠pionci takohshink, i'imaa ootenaank Shiihkam (Shechem) kii‑ishi takohshin Kenan (Canaan) ahkiink. Ehko tepaapantank itahsh ootenaani kii‑ishi kapehshi.

¹⁹ Kii⁠ataawe tahsh i'i pankii mihshawahkamik, ninkotwaahk (100) waapaapihko shooniyaak ekii inakintenik. Miitahsh i'imaa kaa⁠ishi onahkitootc opakwaanekamik. Okii ataamaa' i'i Hemarink (Hamor) kaakii ontahkaanesinitc, omihshoomihsini tahsh Shiihkam kaakii ishinihkaasonitc.

²⁰ Miitahsh i'imaa kaa⁠ishi onaapihkinank keshi pakitinaahsonk, El weKishemanitoomiwaatc Isriyalak okii ishinihkaataan.