Cenisihs 31 - Ojibwe Kihcimasina'ikan

Cekap Kiimaaciipa'iwaanaatc Lepanoon

¹ Cekap (Jacob) hsa kii⁠noontam Lepanoon (Laban) okosihsini ekii ihkitonitc, “Cekap iitok inaa omahkamaan kitetenaanin kahkina kekoon tepentaminitc. Miitahsh i'i kaa⁠onci wenootisitc kitetenaaniin eshi tipentaminitc kahkina kekoon,” kii‑ihkitowa'.

² Kaye tahsh Cekap okiih kihkentaan iinsan weweni e⁠inenimikohsik oshihshenshan eh⁠saaki wiiciiwikohsik Lepanoon taapishkoo kaakii ishi saaki wiiciiwikohpan otaanaank.

³ KaaTipenciketc ihsa okii naakosiihtawaan Cekapoon ekii'inaatc, “Weti hsa kitete otahkiink, iki kaye kitinawemaakanak eshi'ayaawaatc ishi kiiwen, keniin itahsh kika wiiciiwin,” ekii'ikotc.

⁴ Cekap hsa okii antomaan Orehcalwan (Rachel), ini kaye Liiyawan (Leah) cishi nakishkaakotc weti mihshawahkamik eshi'ayaanitc otawahkaanima'.

⁵ Miihsh kaa'inaatc, “Niwaapantaan ihsa weweni e⁠inentansik kitetewaa ci⁠saaki wiiciiwitc, taapishkoo kaakii ishi saaki wiiciiwihpan otaanaank. A'a hsa nintete oKishemanitooman nimpi wiiciiwik.

⁶ Kikihkenimim iitok kiinawaa minciniish eh⁠pi anohkiihtawak kitetewaa minihk iko ehko kashkihtooyaan.

⁷ Shaakooc itahsh kitetewaa niwayeshimik ekii aancihtootc mitaahciink minihk kekii ishi tipa'amawihpan. Kaawiin itahsh Kishemanitoon opakitinikohsiin ci⁠maanshipinitc.

⁸ O'o iitok ninkii'ikopan, ‘Iki hsa maanatihkwak kaa⁠paahpaahtewisiwaatc mii 'iwe keshi tipa'amawinaan, kaakii ani nihtaawikiwaatc itahsh mii peshikwan kaa⁠ishinaakosiwaatc.’ O'ohsh kaye ekii'ishihpan, ‘Iki hsa maanatihkwak kaa⁠pehpehshisiwaatc mii 'iwe keshi tipa'amawinaan, kaakii ani nihtaawikiwaatc itahsh mii peshikwan kaa⁠ishinaakosiwaatc.’

⁹ Kishemanitoon itahsh kahkina kitetewaa otawahkaanima' okii otaahpinamaakoon, niin itahsh ekii miishitc i'i awahkaana'.”

¹⁰ “Ahpii hsa kii⁠aamonoosowaatc awahkaanak ninkii inaapantam iinsan ayaape maanatihkwak ekiih pehpehshisiwaatc, e⁠paahpaahtewisiwaatc kaye, kaye tahsh e⁠paapahkaani naakosiwaatc eshihcikewaatc ci⁠nihtaawikinitc awahkaanenhsa' e⁠apinoonciishihkewaatc.

¹¹ Miitahsh kaakii waapamimak Kishemanitoo otencaliman o'o e'ishitc, ‘Cekap.’ Miihsh kaa⁠ihkitoyaan, ‘O'omaa nintayaa.’

¹² Miihsh kaa'ishitc, ‘Inashke inaapin. Iki hsa ayaape maanatihkwak e⁠awahkaanenhsihkewaatc pehpehshisiwak, paahpaahtewisiwak kaye, aaninta tahsh kaye pepahkaani naakosiwak e⁠ishihcikewaatc ci⁠ayaawaawaatc awahkaanenhsa'. Niwaapantamowaan ohsha Lepan kahkina pemitootawihk.

¹³ Niin iitok Kishemanitoo kaakii naakosiihtawihk weti Pehtal (Bethel) ootenaank kiih⁠siikinaman Aalip (Olive) tino pimite kaakii ishi onaapihkinikeyan ahpii kii⁠ahpimoyampan. Shemaak itahsh iko noonkom oshiihtaan kitahkiimink kaakiih tashi nihtaawikiyan cishi kiiweyan.’ ”

¹⁴ Miihsh o'o Cekap kaa'ikotc Orehcalwan, ini kaye Liiyawan, “Kaawiin maawiin kekoon mihsawaa nintaa onci miinikoowisihsiimin nintetenaan eshi tipinawewisitc.

¹⁵ Piiwitek kaa⁠tootawintwaa iitok nintootaakonaan. Ninkii ataawaanikonaan itahsh kaye. Aasha tahsh kaye okiih caakinaan ini shooniyaan minihk kaakiih tipa'okoyaank.

¹⁶ Kehcinaac maawiin kahkina owenootisiwin Kishemanitoon kaakii mahkamikotc niinawint ninka ayaamin, niniicaanihsinaanik kaye. Aaniin hsa piko enihk Kishemanitoo pisaan ishihcikew.”

¹⁷ Miitahsh Cekap kaakiih onapi'aatc wiiwa', oniicaanihsa' kaye pihkwaawikane mihtatimoonk.

¹⁸ Kahkina hsa otawahkaanima' okii niikaaninisha'waa', kaye tahsh ekii maaciitootc kahkina kekoonan kaakii ontinank i'imaa Mesopohtemiya (Mesopotamia). Weti hsa kii‑ishaa Kenan (Canaan) ahkiink eshi'ayaanitc oteten Aaisikoon.

¹⁹ A'a iinsan Orehcal kiih⁠kiimootimaakopan oteten omanitoohkaanini piintik kaa‑apinitc e⁠ontamentinitc eh⁠pashkoshaweshwaanitc omaanahcaanihshimini.

²⁰ Cekap itahsh kaye okii ishi wayeshi'aan oshihshenshan Lepanoon ekii wiintamawaahsik iinsan ewii maacaatc.

²¹ Kahkina hsa kekoon tepentank okii maaciitoon ekii weyiipisitc. I'i hsa siipi Iyoohparetiis (Euphrates) eshinihkaatenik kii⁠aashawishkaa ekii ishi maacaatc inahke Kiliyat (Gilead) ahkiink eshi papiihkwatinaanik.

Lepan Kiipiminisha'waatc Cekapoon

²² Nihsokiishik hsa eshihsenik, Lepan (Laban) kii⁠wiintamawaa Cekapoon (Jacob) ekiih kiimooci maaciipa'iwenitc.

²³ Miihsh Lepan kaakii maaciinaatc enawemaatc, niishwaahsokiishik ihsa kiih⁠piminisha'waawaatc Cekapoon. Weti tahsh Kiliyat (Gilead) ahkiink eshi papiihkwatinaanik okii ishi atimaawaan.

²⁴ Eh⁠tipihkaninik itahsh Lepan e⁠nipaatc okiih pawaanaan Kishemanitoon iinsan e'ikotc, “Ayaankwaamisin ci⁠nishki kanoonaahsiwatc Cekap.”

²⁵ Cekap hsa kii‑ishi kapehshi kihci waciink. A'a tahsh wiin Lepan kii‑ishi kapehshi i'imaa Kiliyat ahkiink eshi papiihkwatinaanik.

²⁶ Lepan tahsh okii'inaan Cekapoon, “Aaniin itahsh inaa kaa⁠ishihcikeyan, ekii wayeshimiyan, ekii maaciipa'atwaa nintaanihsak ekiih tootawatwaa taapishkoo ihkwewak kaashi maaciipa'intwaa kii⁠miikaatink?

²⁷ Wekonen itahsh kaa⁠onci wayeshi'iyan, ekiih kiimooci maacaayan, ekii wiintamawihsiiwan kaye? Kiishpin hsa wiintamawiyampan ewii maacaayan, kehcinaac kitaakii maacinisha'on cikiih ciihkentamaampaan. Taakii nikamonaaniwan, kaye tahsh taakiih kitohcikenaaniwan cikii aapatisihwaahpan matweyaapiikipicikanak, matwehsicikanak kaye.

²⁸ Kaawiin kanake kikiih pakitinihsii ci⁠ociimakwaa nintaanihsak, nooshihsak kaye. Kaawiin kaye cikiih pooshoo'akwaa. Wiinke kite kakiipaatis i'i kaakii ishihcikeyan.

²⁹ Inashke nintaa kashkihtoon ci⁠tootawinaampaan ci⁠wiihsakentaman. Tipihkonk itahsh kitete oKishemanitooman ninkii'ik, ‘Ayaankwaamisin, keko wiin kekoon ishi nishki kanoonaahken Cekap.’

³⁰ Miihsh kaa⁠onci maacaayan ekii noonte wiih kiiwenotamowatc kitete otaawin. Wekonen itahsh kaa⁠onci kiimootiyan nimanitoohkaanak.”

³¹ Miihsh o'o Cekap kaa⁠ishi nahkwehtank, “Kikii kohsin, ekii⁠naniisaaneniminaan ci⁠mahkamiyan iki kitaanihsak.

³² Kiishpin itahsh mihkawatc awiya ayaawaatc i'i kimanitoohkaana', mii hsa 'i keshi nihsintc. O'o hsa kitinawemaakaninaanik eh⁠kanawaapiwaatc pisaan nanaantone'an tepentaman. Kiishpin itahsh mihkaman, pisaan iko otaahpinan.” Kaawiin iitok Cekap okii kihkentansiin inankwana Orehcalwan (Rachel) ekiih kiimootinitc Lepanoon omanitoohkaanini.

³³ Miitahsh Lepan kii⁠nanaantonike Cekapoon opakwaanekamikoniink, Liiyawan (Leah) kaye opakwaanekamikoniink. Kii⁠nanaantonike tahsh kaye otanohkii'aakanini kaa⁠ihkwewinitc opakwaanekamikoniink. Kaawiin itahsh kekoon cikii mihkank. Orehcalwan itahsh opakwaanekamikoniink kii⁠ani ishi piintike.

³⁴ A'a tahsh Orehcal okii otaahpinaa' iinsan i'i manitoohkaana' ekii ishi ahsaatc pihkwaawikane mihtatimowi ahpapiwinink miihsh tako kaa⁠ishi patakoshkawaatc eshi namatapitc. Lepan hsa misiwe kii⁠nanaantonike i'imaa pakwaanekamikonk, kaawiin itahsh kekoon okii mihkasiin.

³⁵ Orehcal tahsh okii'inaan Lepanoon, “Nintete, keko nishkaatisihken e⁠kashkihtoohsiiwaan ci⁠niipawiyaan enaahsamiiyan, nintihkwewaahpine mekwaa.” Misiwe tahsh kii⁠nanaantonikewan, kaawiin kekoon cikii mihkaminitc.

³⁶ Cekap hsa tahsh wiinke kii⁠nishkaatisi ekii'inaatc Lepanoon, “Aaniin itahsh kaa⁠ishi mamaashiiyaan? Aaniin itahsh kaye kaa⁠ishi mamaashiihkantawinaan ekiih kakwe mihkawiyan?

³⁷ Aasha tahsh misiwe kikii nanaantonike nintaya'iimihkaank, kekoon ina tahsh kimihkaan tepentaman? Taka hsa tahsh o'o ishi ahtoon eshi'ayaawaatc oko kitinawemaakanak, nintinawemaakanak kaye, taka hsa wiinawaa kika onaahkonikonaanik o'o kaashi niishiyank.

³⁸ Aasha iitok niishtana (20) tahso pipoon kipi wiiciiwin. Kimaanahcaanihshimak, iki kaye kimaanatihkomak mooshak iko ahpan pi⁠oniicaanihsiwak. Kaawiin itahsh kaye cikii amwak aape maanahcaanihsh cikii ontinakipan eshi ohkwiinowaatc kitawahkaanimak.

³⁹ Iki tahsh kaye awahkaanak kii⁠nihsikowaatc pikwaci aya'aawihsha', niin hsa piko i'i ninkii wanihcike. Miihsh kaye kaah⁠tootawiyan ekiih tipa'ike'iyan wekonen iko kaakii wanihsek eh⁠kiishikahk, komaa kaye eh⁠tipihkahk.

⁴⁰ Mii 'owe kaa⁠ishihseyaan. Kii⁠kiishikahk wiinke ninehtwaas eh⁠kishitek, eh⁠tipihkahk itahsh mooshak ninkiih kiihkac. Mooshak kaawiin ninkii nipaahsii.

⁴¹ Mii 'owe kaa⁠ishihseyaan niishtana (20) tahso pipoon kaakii wiicitaaminaan. Mitaahshiniiwipipoon (14) kikii anohkiihtawin ci⁠kashkihtamaasoyaan iki niishin (2) kitaanihsak, ninkotwaahso (6) pipoon kikii anohkiihtawin ci⁠kashkihtamaasoyaan kitawahkaanimak. Shaakooc itahsh mitaahciink kikii aancihtoon kekii ishi tipa'amawiyampan.

⁴² Kiishpin itahsh naatamawihsinikipan, nintete oKishemanitooman, a'a kaye Eparahaam (Abraham) oKishemanitooman, a'a Aaisik kaakiih kohtaanenimaatc, aasha maawiin kehcinaac ninkoci kitaakii ishinisha'ohsh mewisha kekoon cikii ayaahsiwaampaan. Kishemanitoo hsa nimpi waapamik eshi kakwaatakihsewak, aaniin kaye pemi inanohkiiwak. Wiin itahsh tipihkonk kikiih kipihtinik kaawii ishihcikeyampan.”

Kii'oshihtoowaatc Keshiminowiiciintiwaatc

⁴³ Miitahsh o'o Lepan (Laban) kaa⁠ishi nahkwehtawaatc Cekapoon, “Iki hsa ihkwewak, niin iitok iki nintaanihsak, iki kaye apinoonciishak niin iitok ikiweniwak. Niin kaye nintipenimaak iki awahkaanak. Kahkina hsa kekoon weyaapantaman niin nintipentaan. Aaniin itahsh inaa ke⁠ishihcikeyaampaan onci iki nintaanihsak i'i kaye apinoonciisha' nehtaawiki'aawaatc?

⁴⁴ Taka hsa kiinawint ahshotamaatitaa ke⁠ishi mino wiiciintiyank ke⁠onci nisitawinaakwahk o'o kaawii ishihcikeyank.”

⁴⁵ Miihsh Cekap (Jacob) kaakii otaahpinaatc ahsiniin ekiih patahkaapihkinaatc ci⁠onci maamihkawiwintc.

⁴⁶ Miihsh kaye kaa'inaatc otinawemaakana' ci⁠maamoonshakinaanitc ahsinii' ci⁠ohkohshimaanitc. Miihsh kaa⁠ishi ohkohshimaanitc i'i ahsinii'. Miihsh i'imaa kaakiih tashi wiihsiniwaatc.

⁴⁷ Lepan itahsh Ciikar Sehatoohta (Jegar Sahadutha) okii ishinihkaataan. Cekap itahsh wiin Kaalii'at (Galeed) okii ishinihkaataan.

⁴⁸ Miihsh Lepan kaakii'inaatc Cekapoon, “Iki hsa ahsiniik kaa⁠ohkohshinowaatc mii hsa 'iwe ke⁠onci maamihkawiyank eshi ahshotamaatiyank noonkom kaa⁠kiishikahk.” Mii hsa kaakii onci ishinihkaatek i'imaa kaakii ishi'ayaawaatc Kaalii'at.

⁴⁹ Miihsh kaye Lepan kaakii ihkitotc, “Taka kaaTipenciketc kika naanaakaci'ikonaan ahpii kaa⁠nakanitiyank.” Mispa (Mizpah) iinsan kaye kaakii onci ishinihkaatek i'imaa kaakii ishi'ayaawaatc.

⁵⁰ Miihsh kaye kaa‑ani ihkitotc, “Kiishpin hsa weweni tootawaahsiwatwaa nintaanihsak, pahkaan kaye ihkwewak ani wiitikematwaa, mihsawaa ko aana kihkentansiwaan, ishi maamihkawin itahsh Kishemanitoo eh⁠kanawaapamiyank.

⁵¹ Inashke waapam oko ahsiniik kaa⁠ohkohshinowaatc nahsawaya'ii eshi'ayaayank, i'i kaye patahkaapihkinikan.

⁵² Iki hsa ahsiniik kaa⁠ohkohshinowaatc, a'a kaye patahkaapihkinikan mii hsa 'iwe ke⁠onci maamihkawiyank kitahshotamaatiwininaan. Kaawiin hsa ninka paashicishkawaahsiik oko ahsiniik ci⁠awi maanshi tootawinaan. Kaawiin itahsh kekiin kika paashicishkawaahsiik oko ahsiniik i'i kaye patahkaapihkinikan ci⁠pi maanshi tootawiyan.

⁵³ Taka hsa Eparahaam, a'a kaye Nehor (Nahor) oKishemanitoomiwaan, otetewaan kaye omanitoomini kika onaahkonikonaan.” Miitahsh Cepak kaakii ahpimotc eshinihkaasonitc oKishemanitoomini oteten Aaisikoon kaakii kohtaanenimaanitc kewiin ci‑ishihciketc kaakii ishi ahshotamaakewaatc.

⁵⁴ Miitahsh Cekap kaakiih pakitinaahsotc i'imaa waciink ekii antomaatc otinawemaakana'. Miihsh i'imaa kaah⁠tashi wiihsiniwaatc, miihsh i'imaa kaye kaa⁠ishi nipaawaatc.

⁵⁵ Wiipa tahsh eh⁠kishepaawakaninik Lepan kii⁠wanishkaa ekii ociimaatc ooshihsa', otaanihsa' kaye ekiih pooshoo'aatc, kaye tahsh ekiih shawenimaatc. Miihsh kaakii anishi kiiwetc wenciitc.