Cenisihs 30 - Ojibwe Kihcimasina'ikan

¹ Ahpii tahsh Orehcal (Rachel) e⁠waapantank ekii ayaawaahsik Cekapoon (Jacob) oniicaanihsini, okii ontenimaan ini tipinawe wiicihkwewan. Miitahsh kaakii'inaatc Cekapoon, “Taka miishihshin apinoonciishak, komaa meshkwac ninka nip,” okii'inaan.

² Okii nishki'aan tahsh Cekapoon ekii'ikotc, “Kaawiin niin ninKishemanitoowihsii, wiin iitok kaa⁠ishi'ihk ci⁠ayaawimaahsiwatc apinoonciishak,” okii'ikoon.

³ Miihsh o'o kaa'inaatc, “Ina wa'a Pilha (Bilhah) kaa⁠pamiihtawitc ihkwe. Naasihkaw ci⁠wiihpematc ci⁠ayaahtamawitc apinoonciisha'. Mii hsa imaa keniin ke⁠onci ayaawakwaa apinoonciishak,” okii'inaan.

⁴ Miitahsh kaa⁠ishi miinaatc onaapeman ini opamiihtaakanihkweman Pilhawan. Miitahsh Cekapoon kaa⁠ishi wiihpemaanitc.

⁵ Pilhawan tahsh kiih⁠kikishkawaawahsowan ekii okosihsinitc.

⁶ Orehcal tahsh kii‑ihkito, “KaaTipenciketc hsa ninkii naatamaak, tepwe hsa ninkii noontaak, ekii miishitc ke⁠okosihsiwak.” Ten (Dan) tahsh okii ishinihkaanaan ini kwiiwisenhsan.

⁷ Orehcal tahsh opamiihtaakanihkweman Pilhawan miinawaa kiih⁠kikishkawaawahsowan, mii 'i niishin (2) ke⁠okosihsinitc ekii ontinaanitc Cekapoonk.

⁸ Orehcal tahsh kii‑ihkito, “Miitahsh o'o eshi kakwe shaakooci'itiyaank tipinawe niicihkwe, niin tahsh nimpahkinaake,” kii‑ihkito. Naapihtalaai (Naphtali) tahsh okii ishinihkaanaan.

⁹ Ahpii tahsh Liiya (Leah) eh⁠kihkentank eh⁠poonoonshetc, okii otaahpinaan opamiihtaakanihkweman Silpa (Zilpah) eshinihkaasonitc, okii miinaan tahsh Cekapoon ci⁠aanihke wiiwinitc.

¹⁰ Liiya tahsh opamiihtaakanihkweman Silpawan okii ayaahtamawaani Cekapoon e⁠okosihsinitc.

¹¹ Liiya tahsh kii‑ihkito, “Etatawe minohsewin nintootihsikon,” kii‑ihkito. Kaat (Gad) tahsh okii ishinihkaanaan.

¹² Miinawaa tahsh opamiihtaakanihkweman Silpawan kiih⁠kikishkawaawahsowan. Mii 'i niishin (2) ekii ayaawaanitc ke⁠okosihsinitc Cekapoonk onci.

¹³ Liiya tahsh kii‑ihkito, “Etatawe niminwentam! Ihkwewak hsa ninka ishinihkaanikook, ‘Kaa⁠minwentank,’ ” kii‑ihkito. Aahshar (Asher) tahsh okii ishinihkaanaan.

¹⁴ Mekwaa eshihsenik ahpii kii⁠manishikenk, Oroopin (Reuben) kii‑ishaa mihshawahkamik, okii mihkaanan tahsh kihtikaanan kaa⁠onci oshihcikaatek minwentaakosii mashkihki (mandrake) kaa⁠ishinihkaatek. Okiih kiiwewitoonan tahsh ekiih piitamawaatc omaamaan Liiyawan. Liiya okii'ikoon Orehcalwan, “Taka miishihshin ini aaninta kikosihs minwentaakosii mashkihki kaa‑ayaatc,” okii'ikoon.

¹⁵ O'o tahsh okii'inaan, “Kaawiin ina pankii kitinentansii ekii mahkamiyan ninaapem? Kiwii mahkamaana kaye ninkosihs ominwentaakosii mashkihki?” okii'inaan. Orehcalwan tahsh okii'ikoon, “Cekap hsa meshkwac kika wiihpemik onaakohshininik kiishpin miishiyan ini kikosihs kaa‑ayaatc minwentaakosii mashkihki,” okii'ikoon.

¹⁶ Ahpii tahsh Cekapoon mihshawahkamik ekiih pionci takohshininitc e⁠onaakohshininik, Liiya okii anta nakishkawaan ekii'inaatc, “Mii hsa 'i eshinaakwahk ci⁠wiihpemiyan, aaniihsh kikiih tetipa'on ekii aapacihtooyaan ninkosihs kaa‑ayaatc minwentaakosii mashkihki,” okii'inaan. Miitahsh kaa⁠ishi wiihpemikotc i'i eh⁠tipihkaninik.

¹⁷ Kishemanitoon tahsh Liiya okii noontaakoon, miihsh kaakiih kikishkawaawahsotc. Miitahsh i'i naanan ekii ayaawaatc ke⁠okosihsitc Cekapoonk onci.

¹⁸ Liiya tahsh kii‑ihkito, “Kishemanitoo hsa nintipa'amaak, aaniihsh ninkii miinaa ninaapem nimpamiihtaakanihkweman,” kii‑ihkito. Isahkaar (Issachar) tahsh okii ishinihkaanaan.

¹⁹ Miinawaa tahsh Liiya kiih⁠kikishkawaawahso. Mii 'i ninkotwaahso ekii ayaawaatc ke⁠okosihsitc Cekapoonk onci.

²⁰ Miitahsh kaa⁠ihkitotc, “Kishemanitoo hsa etatawe onishihshinini kaa⁠miishitc; noonkom maawiin ninaapem ninka kihci inenimik, aaniihsh mii 'i aasha ninkotwaahso eyaahtamawak okosihsa',” kii‑ihkito. Sepiyolan (Zebulun) tahsh okii ishinihkaanaan.

²¹ Naanaake tahsh e⁠ani ishihsenik kii⁠otaanihsi, Taaina (Dinah) ekii ishinihkaanaatc.

²² Kishemanitoo tahsh okiih tootawaan Orehcalwan (Rachel) kaakii ishi anami'ehtaakotc, miitahsh kaakii ishi'aatc ci⁠kashkihtoonitc ci⁠otapinoonciishiminitc.

²³ Orehcal tahsh kiih⁠kikishkawaawahso ekii okosihsitc, miihsh kaa⁠ihkitotc, “Kishemanitoo hsa ninkiih tootaak ci⁠otapinoonciishimiwak, miihsh kaa⁠onci pooni miihkinsomikoowak,” kii‑ihkito.

²⁴ Coosap (Joseph) tahsh okii ishinihkaanaan o'o ekii ihkitotc, “Taka kaaTipenciketc ninka miinik kotak ke⁠okosihsiwak,” kii‑ihkito.

²⁵ Ahpii tahsh Coosapoon kaa⁠ishkwaa nihtaawikinitc, Cekap okii'inaan Lepanoon (Laban), “Taka pakitinihshin nintahkiimink cishi kiiweyaan.

²⁶ Miishihshin niwiiwak, niniicaanihsak kaye kaa⁠kashkihtamaasoyaan kaa⁠pi anohkiihtawinaan, miihsh ci⁠pakitiniyan cini maacaayaan. Kikihkentaan iitok weweni eh⁠pi anohkiihtawinaan.”

²⁷ Miihsh o'o Lepanoon kaa'ikotc, “Kiishpin ihsa menwaapamiwanen, keko maacaahken. Nanaanta kihkencikewinink ohsha nintoonci kihkentaan kaaTipenciketc eh⁠shawenimitc kiin onci.”

²⁸ Miihsh kaye kaa'ikotc, “Wiintan keshi tipa'amawinaan, miihsh i'i keshi tipa'amawinaan.”

²⁹ O'o tahsh Cekap kii‑ihkito, “Kikihkentaan iitok aaniin pemishi anohkiihtawinaan, e⁠ani paahtiinowaatc kaye kitawahkaanimak kenawenimakwaa.

³⁰ Cipwaa takohshinaan hsa pankii ehta kekoon kikii ayaan, noonkom itahsh etatawe kiwenootis. KaaTipenciketc hsa wiinke kishawenimik aanti piko pemi ayaawak. Miitahsh e⁠ocihcihsek niin iko ci⁠kashkihtamawakwaa eyaawaatc nintaawinink.”

³¹ Miihsh o'o kaa'ikotc Lepanoon, “Wekonen itahsh ke⁠miininaan?” O'o tahsh okii'inaan, “Kaawiin kekoon ninantawentansiin ci⁠miishiyan. Mii hsa ko 'i keshi naanaakaci'akwaa kitawahkaanak kiishpin inentaman o'o kaawii ihkitoyaan.

³² Pakitinihshin noonkom kaa⁠kiishikahk misiwe ci⁠papaa ishaayaan eshi'ayaawaatc kitawahkaanak ci⁠kakiikinakwaa kahkina mehkatewisiwaatc maanahcaanihshenhsak, iki kaye kaa⁠mamaantitowaatc kaa⁠paahpaahtewisiwaatc. Iki tahsh kaye kaa⁠paahpaahtewisiwaatc maanatihkwak. Mii hsa 'iwe eshi antawentamaan cishi tipa'amawiyan.

³³ Miihsh i'i nahke kenishi kihkentaman kiishpin tepweyentaakosiwaanen ahpii pi⁠anta kihkentaman eshi tipa'amawiyan. Kiishpin ayaawakwaa kaa⁠paahpaahtewisihsikwaa, iki kaye kaa⁠masinisihsikwaa maanahcaanihshak, iki itahsh kaye kaa⁠paahpaahtewisihsikwaa, kaa⁠masinisihsikwaa maanatihkwak, mii 'i iinsan ci⁠kihkentaman ekiih kiimootiyaan.”

³⁴ O'ohsh Lepanoon okii'ikoon, “Mii hsa 'i ke⁠ishihcikeyank i'i ehkitoyan.”

³⁵ I'i tahsh eh⁠kiishikaninik Lepan okii otaahpinaa' kahkina ayaape maanatihkwa' kaa⁠pehpehshisinitc, kaa⁠paahpaahtewisinitc, i'i kaye noonshe maanatihkwa' kaa⁠masinisinitc, pepankii kaa⁠waapinaakosinitc kaye. Kahkina kaye mehkatewi naakosinitc maanahcaanihshenhsa' okii otaahpinaa'. Okosihsa' itahsh okiih kanawenta'aa'.

³⁶ Nihsokiishik itahsh minihk kii‑ishi maacaa eshi'ayaanitc Cekapoon pepahkaan ci⁠ayaawaatc. Cekap itahsh okiih kanawenimaa' i'i kotak Lepanoon otawahkaanini.

³⁷ Cekap iinsan okii otaahpinaan ashkaahtiko watihkwanan ekii ontinank asaatiiwaahtikonk, almaant tinowaahtikonk, nipiiwaahtikonk kaye. Miitahsh kaa⁠ishi pehpehshaapihshakaahkopitootc ini watihkwanan. Kiih⁠pehpehshinaakwanoon itahsh ini watihkwanan ekii naakwahkin eshi mihtikowankin.

³⁸ Miiwan itahsh ono watihkwanan kaakiih pihshakaahkopitootc kaakii ahtootc eshi nihtaa minihkwenitc awahkaana'. Kii⁠pi anta minihkwenitc ihsa ko kii⁠nihtaa awahkaanenhsihkewa' ekii aamanoosonitc.

³⁹ Miitahsh iki awahkaanak kaah⁠tashi awahkaanenhsihkewaatc i'imaa eshi ahtenikin watihkwanan. Awahkaanak itahsh okii nihtaawiki'aawaa' awahkaanenhsa' kaa⁠pehpehshisinitc, kaa⁠masinisinitc, kaye tahsh kaa⁠paahpaahtewisinitc.

⁴⁰ Miitahsh Cekap pepahkaan okii ishi ahsaa' maanatihkwa', maanahcaanihsha' kaye. Miihsh kaye kaa⁠ishihciketc ekii inaahsamikaapawi'aatc eshi'ayaanitc inahke Lepanoon otawahkaanimini kaa⁠masinisinitc, kaa⁠mahkatewi naakosinitc kaye. Miitahsh o'o nahke kaa⁠ishi nenaawinaatc wiin iko otawahkaana', ini tahsh kaye Lepanoon otawahkaanini.

⁴¹ Ahpii tahsh e⁠awahkaanenhsihkenitc kaa⁠soonkaatisinitc awahkaana', mii hsa 'i kaa⁠ishi ahtootc ini watihkwanan eshi minihkwenitc awahkaana'. Miitahsh i'imaa kaah⁠tashi aamanoosonitc mekweya'ii e⁠awahkaanenhsihkenitc.

⁴² Kaawiin itahsh wiin mecentaakosinitc awahkaana' i'imaa okii ahtoohsiinan ini watihkwanan. Miihsh i'i nahke Lepanoon kaa⁠onci miinaatc awahkaanini kaa⁠macentaakosinitc, wiin itahsh wiin Cekap kahkina menowe'ayaanitc ekii ayaawaatc.

⁴³ Miitahsh o'o nahke Cekap kaakii ani onci wenootisitc ekii ayaawaatc niipiwa' awahkaana', maanshi mihtatimoo' kaye, pihkwaawikane mihtatimoo' kaye. Kiih⁠paahtiinowa' kaye otanohkii'aakana' eniniiwinitc, ehkwewinitc kaye.