Cenisihs 3 - Ojibwe Kihcimasina'ikan

Inini Oshashiipihtamowin Ehtashintenik

¹ Inashke tahsh kinepik nawac kiih⁠kakiihtaawentamokopan ahpiihc pahkaan aya'aawihsha' kaakii oshi'aatc kaaTipenciketc Kishemanitoo. Mii 'awe kaa'inaatc ihkwewan, “Tepwe na ko kii‑ihkito Kishemanitoo, ‘Kaawiin kika ontancikehsiim entahswaahkosiwaatc mihtikook o'omaa kihtikewahkamikonk eyaawaatc?’ ”

² A'a tahsh ihkwe okii'inaan ini kinepikoon, “Pisaanihsako nimiicimin miinan kaa‑akootekin mihtikonk i'imaa kihtikewahkamikonk.

³ O'o tahsh kii‑ihkito Kishemanitoo, ‘Kaawiin kika onci amominehsiim a'a mihtik mekweya'ii kihtikewahkamikonk kaa⁠patahkisotc, kaawiin kaye kika taankinaasiwaawaa, mii hsa 'i ci⁠nipoyek kiishpin.’ ”

⁴ A'a tahsh kinepik okii'inaan ihkwewan, “Kaawiin tepwe kika nipohsiim.

⁵ Inashke aaniihsh Kishemanitoo kikihkenimikowaa ahpii i'imaa onci amomineyek, kika ishi'ayaam taapishkoo Kishemanitoo ci⁠kihkentamek mino'ishiwepisiwin, maci'ishiwepisiwin kaye.”

⁶ Ahpii tahsh ihkwe wiyaapamaatc ini mihtikoon e⁠onishihshinitc ci⁠ontancikewintc, aahpici kaye ekii minwentamo naakosinitc, ekii mihsawinaakosinitc kaye ini mihtikoon, okii otaahpinaan a'a ihkwe i'i miin ekii miicitc. Miitahsh kaye kaa⁠ishi ahshamaatc onaapeman.

⁷ Miitahsh kaakii miinintwaa kihkentamowin mii 'i shemaak kaakiih kihkentamowaatc e⁠kikihkonayehsikwaa. Miitahsh kaa⁠ishi maamawikwaatamowaatc kihci shoominaahtikowi aniipiihshan ekii oshihtamaasowaatc aansiyaanan.

⁸ Okii noontawaawaan tahsh kaaTipencikenitc Kishemanitoon eh⁠pimwewenaminitc kihtikewahkamikonk eh⁠tahkinaakohshininik. Miitahsh kaa⁠ishi kaasohtawaawaatc kaaTipencikenitc Kishemanitoon a'a inini, a'a kaye ihkwe, mekweyaahtik ekii ishaawaatc kihtikewahkamikonk.

⁹ KaaTipenciketc Kishemanitoo tahsh okii antomaan ini ininiwan, “Aanti eyaayan?” ekii'inaatc.

¹⁰ Inini tahsh kii‑ihkito, “Kikii noontawin i'imaa kihtikewahkamikonk. Ninkii onci sekis kekoon e⁠kikishkansiwaan kaakii onci kaasoyaan.”

¹¹ Kii‑ishi nahkwehtawaa tahsh, “Awenen kaa⁠inihk kekoon e⁠kikishkansiwan? Kikii onci wiihsin ina a'a mihtik kaakii onci'inaan ci⁠onci wiihsinihsiwan?”

¹² A'a tahsh inini kii‑ihkito, “A'awe ihkwe kaakii miishiyan ci⁠wiiciiwak, mii 'awe kaa⁠onci ahshamitc i'imaa mihtikonk miin. Miitahsh kaa⁠ishi miiciyaan.”

¹³ KaaTipenciketc Kishemanitoo tahsh okii'inaan ihkwewan, “Wekonen tahsh i'i kaa⁠onci ishihcikeyan?” O'o tahsh kii‑ishi nahkwehtam a'a ihkwe, “Kinepik ohsha ninkii wayeshimik kaakii onci ishihcikeyaan.”

Kishemanitoo Kiiwiintank Aaniin Ke'ishiwepisinitc

¹⁴ KaaTipenciketc Kishemanitoo tahsh okii'inaan ini kinepikoon, “Aahpici kikihci paahtaamikoowihs onci o'o kaakii ishihcikeyan, ahpiihc wiin oko kahkina awahkaanak, oko kaye kahkina aya'aawihshak. Kiin tahsh wiin kika mihci mihsate'ote, kika miicin i'i paankwaawank minihk ke⁠pimaatisiyan.

¹⁵ Kika ishi'ininim ci⁠shiinkenintiyek a'a ihkwe, kiniicaanihsiwaak kaye ta⁠shiinkenintiwak. Wiin tahsh a'a ihkwe ke⁠oniicaanihsitc kika shikohtikwaaneshkaakowaan, kiin tahsh kika wiihsakishkawimaan otoontaniniink.”

¹⁶ Ihkwewan tahsh okii'inaan, “Nawac kika ishi'in awahshime ci⁠wiihsakentaman kikishkawaawahsoyan, ci⁠wiihsakentaman kaye waapamaawahsoyan. Kika antawenimaa tahsh kinaapem. Wiin tahsh kika tipenimik.”

¹⁷ Kishemanitoo tahsh okii'inaan Aatamoon (Adam), “Ekiih pisintawatc tahsh a'a kiwiiw i'imaa ekii onci wiihsiniyan mihtikonk kaakii onci'inaampaan ci⁠ontancikehsiwan, mii hsa 'i kiin kiih⁠pahtaahtamaasoyan o'o ahki. Entahso kiishik kika ayaan kihci anohkiiwin ci⁠onci wiihsiniyan minihk ke⁠pimaatisiyan.

¹⁸ Kika nihtaawikihtamaakon tahsh ahki miinenhsaahtikook, okaawiminakashiipakoon kaye. Ini tahsh ashkipakoon kaa⁠nihtaawikinkin ahkiink, miiwan hsa ini ke⁠omiicimimiyan.

¹⁹ Nahkawe ci⁠apwenohkiiyan cipwaa miiciyan kimiicimim piinihsh cini ishkwaa pimaatisiyan cini kiiweyan i'imaa ahkiink kaakii onci oshi'ikooyan. Kipaankwataawankis aaniihsh, miihsh i'imaa keshi kiiweyan.”

²⁰ A'a tahsh inini Aatam (Adam) okii ishinihkaanaan ini ihkwewan Iip (Eve). Mii 'i aaniihsh wa'a keni omaamaamikotc kahkina kaa⁠pimaatisinitc.

²¹ KaaTipenciketc Kishemanitoo tahsh okii oshihtamawaa' Aatamoon, ini kaye ihkwewan ke⁠kikishkaminitc ekii onci oshihtootc aya'aawihshiwayaaniink.

Aatam, Iip Kaye Kiisaakicinisha'ontwaa Kihtikewinink

²² KaaTipenciketc Kishemanitoo tahsh kii‑ihkito, “Inashke wa'a inini noonkom peshik kiinawint kaa⁠ishi'ayaayank ishi'ayaa, e⁠kihkentank mino'ishiwepisiwin, maci'ishiwepisiwin kaye. Taka hsa keko ta⁠shiipinihkenihsii i'imaa pimaatisiwinaahtikoonk. Kiishpin ontanciketc i'imaa ta⁠kaakike pimaatisi.”

²³ Miitahsh kaa⁠ishi saakicinisha'waatc i'imaa kihtikewahkamikonk mino ahkiink Iitin (Eden) kaakii icikaatenik, ekii ishinisha'waatc weti anoociko ci⁠anta kihtikenitc kaakii onci oshi'aatc ahkiink.

²⁴ Okii saakicikonkonaan itahsh ini ininiwan. Okii ahsaa' tahsh cerapiihkaana' (Cherubim) i'imaa nahke waapanonk kihtikewahkamikonk, mino ahkiink Iitin kaa⁠ishinihkaatenik. Kihci moohkomaan kaye e⁠wewepahkonehsek ke⁠kakiiponikotc awiya ci‑ishaahsik i'imaa pimaatisiwinaahtikonk.