Cenisihs 28 - Ojibwe Kihcimasina'ikan

¹ Aaisik tahsh okii antomaan Cekapoon, ekii antawenimaatc ci⁠minohsenitc, miitahsh kaa'inaatc, “Keko wiitikemaahken ihkwe Kenan (Canaan) ahkiink wenciitc.

² Pasikwiin, weti ishaan Mesopohtemiya (Mesopotamia) ci⁠anta waapamatc otaawinink a'a Pehtyoel (Bethuel) kimihshoomis. Mii hsa weti ke⁠ontinihkweweyan. Kimihshoomensh Lepan (Laban) otaanihsan hsa wiiwiwaahkan.

³ Taka Kishemanitoo kaaMaawaci mashkawisiitc kika shawenimik, kika ishi'ik kaye ci⁠paahtiinonitc ke⁠oniicaanihsiwatc, kiin itahsh kika otetemikook niipiwa' kaa⁠tahswewaanakisiwaatc.

⁴ Taka kaye kikashi shawenimik, i'i kaye kipiiwesiima' taapishkoo kaakii ishi shawenimaatc Eparahaaman (Abraham). Kiin hsa ci⁠tipentaman o'o ahki kaa⁠taanotaman, Kishemanitoo kaakii miinaakopanen Eparahaaman,” okii'inaan.

⁵ Aaisik tahsh okii ishinisha'waan Cekapoon Mesopohtemiyaank ci‑ishaanitc kaakii ishi'ayaanitc Lepanoon. Lepan kii⁠otete Pehtyoelwan kaakii nihtaa papaamikosinitc. Lepan kii⁠otawemaa Oripehkawan. Cekap a'a tahsh Iihswaa (Esau) iitok kii⁠omaamaawak Oripehkawan.

Iihswaa Kotak Ihkwewan Kiiwiiwitc

⁶ Iihswaa tahsh okiih kihkentaan oteten Aaisikoon (Isaac) ekii ishinisha'waanitc Cekapoon (Jacob) Mesopohtemiyaank ci⁠ontinihkwewenitc weti. Okiih kihkentaan kaye ahpii kiih⁠shawenimaanitc o'o ekii'inaanitc, “Keko wiitikemaahken ihkwe Kenan (Canaan) ahkiink wenciitc.”

⁷ Okiih kihkentaan kaye Cekapoon ekii ishaanitc Mesopohtemiyaank (Mesopotamia) ekii na'ihtawaanitc oteteni, omaamaani kaye.

⁸ Iihswaa tahsh okiih kihkentaan oteten Aaisikoon ekii na'enimaahsinik i'i ihkwewa' Kenan kaakii onciinitc.

⁹ Kii‑ishaa tahsh Ishmeyalwan (Ishmael) eshi'ayaanitc ekii wiiwitc otaanihsini Mehalat (Mahalath) eshinihkaasonitc. Miihsh kii⁠nankiinowa' wiiwa' aasha kaakiih tahshinitc. Osayensan tahsh Niipeyoht (Nebaioth) kii‑ishinihkaasowan. Ishmeyal iitok Eparahaaman (Abraham) kii⁠otete.

Cekap Opawaacikan Ehtashintenik

¹⁰ Cekap (Jacob) tahsh i'imaa Piiarshiipa (Beersheba) kii⁠onci maacaa ekii ishaatc weti Heran (Haran) ootenaank.

¹¹ Kii⁠ani takohshin tahsh weti kapehshiwinink kaakiih kihtentaakwaninik e⁠ani pankihshimonitc kiisihsoon. Miitahsh i'imaa kaa⁠ishi kapehshitc ekii nipaatc. Ahsiniin tahsh peshik okii otaahpinaan ekii ahpihkwehshimotc ekii anwehshink.

¹² Miitahsh o'o kaa⁠ishi pawaaciketc; okii waapantaan inaantawaan o'omaa ahkiink ekii onci maaciiyaahkwakootenik piinihsh weti kihci kiishikonk ekii otihtaahkwakootenik. Miitahsh i'imaa inaantawaanink, Kishemanitoo otencalimini kaa⁠ishi ayahkwaantawenitc, kaa⁠ishi naaniihsaantawenitc kaye.

¹³ Inashke tahsh kaaTipenciketc kii⁠niipawi wakicaya'ii inaantawaanink ekii'ikotc, “Niin kaaTipenciketc, kaa⁠oKishemanitoomitc Eparahaam (Abraham), kaa⁠oKishemanitoomitc kaye Aaisik (Isaac). I'imaa hsa ahkiink kaashi pimihshinan, mii hsa 'i kaawii miininaan, iki kaye kipiiwesiimak.

¹⁴ Iki hsa kipiiwesiimak aahpici ta⁠paahtiinowak, ci⁠tahshiwaatc taapishkoo kekoon kaa⁠paashkinehsek o'omaa ahkiink. Misiwe hsa tashi misihteshkaawak, ninkaapii'anonk inahke, waapanonk kaye inahke, kiiwetinonk inahke, shaawanonk kaye inahke. Kiin hsa kaye kipiiwesiimak onci ta⁠onci shawentaakosiwak kahkina entahswewaanakisiwaatc pemaatisiwaatc.

¹⁵ Ishi maamihkawin, niin kika wiiciiwin, kika kanawenimin kaye aanti piko eshaayan. Kika pikiiwewinin kaye o'omaa ahkiink, kaawiin kika nakanihsinoon. Kahkina hsa ninka ishihcike kaashi ahshotamawinaan,” okii'ikoon.

¹⁶ Cekap tahsh kiih⁠koshkosi ekii ihkitotc, “Kekeht hsa kaaTipenciketc o'omaa ayaatok, kaawiin tahsh ninkiih kihkentansiin,” kii‑ihkito.

¹⁷ Aahpici tahsh kiih⁠sekisi ekii ihkitotc, “Aahpici o'omaa kohtaanentaakwan, miimaawiin o'oweni Kishemanitoo otaawin. Miimaawiin o'omaa eshi ishkwaantemiwank kihcikiishik,” kii‑ihkito.

¹⁸ Cekap tahsh wiipa kikishep kii⁠wanishkaa, ekii otaahpinaatc ahsiniin kaakii ahpihkwehshimotc ekiih patahkinaatc ekii kihkinawaataapihkinikaaketc, miitahsh kaa⁠ishi siikinank aalip (olive) pimitewaapooni i'imaa wakicaya'ii.

¹⁹ Miitahsh kaa⁠ishi wiintank i'imaa kaakii ishi'ayaatc ekii ishinihkaatank Pehtal (Bethel). I'i tahsh ootenaani Laas (Luz) kii‑ishinihkaatenikopan.

²⁰ Cekap tahsh kii‑ishi ahpimo ekii ihkitotc, “Kiishpin Kishemanitoo wiiciiwitc, kanawenimitc kaye o'omaa kaa⁠pimi ayaawak, miishitc miicim ke⁠miiciwak, kikishkikanan kaye ke⁠kikishkamowak,

²¹ weweni kaye naanaakaci'itc piinihsh ani ashe kiiwewak weti ninteten kaashi ayaanitc, miitahsh i'i kaaTipenciketc ci⁠oKishemanitoomiyaan.

²² I'imaa tahsh kaakii ishi kihkinawaataapihkihshimak a'a ahsin, mii hsa imaa ke⁠tashi anami'ehtawak Kishemanitoo, ninka onci miinaa kaye peshik kekoonini entahso mitaahso kahkina kekoon kaa⁠miishitc,” kii‑ihkito.