Cenisihs 26 - Ojibwe Kihcimasina'ikan

Aaisik Kii'ishitaatc Kiiraar

¹ Miinawaa hsa kaawiin kii⁠ayaahsinoon miicim i'imaa ahkiink kaakii ishiwepahkipan otaanaank mekwaa Eparahaam kii⁠pimaatisitc. Mii hsa Aaisik (Isaac) kaakii ishaatc Pilistiya (Philistine) kaa⁠onciinitc okihciokimaamini Apimelehk eshinihkaasonitc eshi'ayaanitc ootenaank Kiiraar (Gerar).

² KaaTipencikenitc hsa okii naakosiihtaakoon Aaisik ekii'ikotc, “Keko weti Iicipahkiink (Egypt) ishaahken. Aanti hsa piko ke'ininaan ke⁠ishi'ayaayan, mii 'imaa ke⁠ishitaayan.

³ O'omaa hsa ahkiink kika ayaa. Kika wiiciiwin, kaye tahsh kika shawenimin. O'ohsa ahki kika miinin kahkina kaye iki kipiiwesiimak nimiinaak. Taapishkoo hsa kaakii ishi kanawentamowak Eparahaam kaakii inahshotamawakipan, mii hsa peshikwan ke⁠ishihcikehtamawinaan.

⁴ Kaye tahsh kika tootawin ci⁠ani paahtiinowaatc kipiiwesiimak ci⁠tahshiwaatc taapishkoo kaa⁠tahshiwaatc wanankohshak kiishikonk eyaawaatc. Ninka miinaak hsa o'o misiwehkamik iki kipiiwesiimak. Kahkina hsa pemaatisiwaatc o'omaa ahkiink ninka kakwecimikook ci‑ishi shawenimakwaa taapishkoo keshi shawenimakwaa kipiiwesiimak.

⁵ Kika shawenimin hsa kekiin aaniihsh Eparahaam ninkii na'ihtaak ekiih tootank kaakii ishi antawenimak, kaye tahsh ekiih kanawentank kahkina nintinaahkonikewinan,” okii'ikoon.

⁶ Miihsh i'imaa Aaisik ootenaank Kiiraar kaa‑ayaatc.

⁷ Ahpii hsa ininiwa' eh⁠kakwecimikotc onci wiiwan mii hsa kaa'inaatc e⁠otawemaatc. Aaniihsh kii⁠naniisaanentam ci⁠nihsintc kiishpin ihkitotc Oripehkawan (Rebekah) iinsan e⁠wiiwitc. Wiinke iitok kiih⁠tetako minonaakosi a'a Oripehka.

⁸ Naanaake hsa tahsh e⁠ani ayishihsenik kinweshiihsh iko i'imaa kaa‑ayaanitc Aaisikoon, Pilistiya onci kihciokimaa kii⁠pahpaapi waahsehcikanink. Miihsh kaakii waapamaatc Aaisikoon, ini kaye wiiwini Oripehkawan e⁠minwenintinitc.

⁹ Shemaak itahsh Apimelehk okiih kanoonaan Aaisikoon ekii'inaatc, “Tepwe iinsan kiwiiw a'a ihkwe. Wekonen itahsh kaa⁠onci ihkitoyan e⁠otawemaayan a'a ihkwe?” Miihsh o'o Aaisik kaa⁠ishi nahkwehtank, “Mii hsa 'i kaa⁠inentamaan ci⁠onci nihsikooyaan a'a ihkwe.”

¹⁰ Apimelehk hsa tahsh o'o kii‑ihkito, “Aaniin itahsh inaa kaa⁠ishihcikeyan. Inashke peshik nintininiim pisaan kaa⁠wiihpemaakwen kiwiiwan, kiin itahsh iinsan kitaa anaamentaakosi'inaam.”

¹¹ Miihsh Apimelehk kaa'inaatc kahkina opimaatisiima', “Awenen hsa ko ke⁠maanshi tootawaatc ono ininiwan, ini kaye wiiwini, mii hsa awe ke⁠nihsintc.”

¹² Aaisik hsa kii⁠kihtike i'imaa ahkiink. Peshikwan itahsh e⁠niipininik ninkotwaahk (100) awahshime kaakiih kihtikehpan minihk kii⁠manishike, aaniihsh kaaTipencikenitc i'i nahke okii ishi shawenimikoon.

¹³ Wiinke hsa ko kii⁠ani minohse, kaye tahsh wiinke kii⁠ani wiinke wenootisi.

¹⁴ Aahpici hsa eh⁠paahtiino'aatc maanahcaanihsha', pahkaan kaye awahkaana', kaye tahsh anohkii'aakana', mii hsa 'i kaakii onci ayaashenimikotc i'i Pilistiya ahkiink kaa⁠onciinitc.

¹⁵ Miihsh kaah⁠tootaakotc ekii mooshkinahtoonitc onta'ipaanan otetepaniin Eparahaaman otanohkii'aakanini kaakii waanihkaanotaminikopanen mekwaa otetepaniin kii⁠pimaatisinitc.

¹⁶ Miitahsh Apimelehk kaa'inaatc Aaisikoon, “Taka o'omaa nintahkiiminaanink onci maacaan. Onsaam kiin nawac kimashkawentaakos ahpiihc niinawint ehpiihtentaakosiyaank,” okii'ikoon.

¹⁷ Miitahsh Aaisik kaa⁠ishi maacii kositc ekii ishi kapehshitc pahsatinaank Kiiraar (Gerar) eshinihkaatenik. Kinwesh itahsh i'imaa kii‑ishitaa.

¹⁸ Miihsh kaakiih kiiwe waanihkaatank ini onta'ipaanan otetepaniin Eparahaaman kaakii waanihkaataminikopanen. Miiwan iitok ini Pilistiya kaa⁠onciinitc kaakii mooshkinahtoonitc kii‑ishkwaa pimaatisinitc Eparahaaman, ahkamik hsa ekii aapacihtoonitc. Peshikwan hsa okii ishinihkaataanan ini onta'ipaanan kaakii ishinihkaataminitc otetepaniin.

¹⁹ Aaisik hsa tahsh otanohkii'aakana' kii⁠waanihkewa'. Miihsh kaakii mihkwaanihkaataminitc niipiwa' nipi.

²⁰ I'i hsa tahsh ininiwa' Kiiraar wenciinitc neyaakaci'aanitc awahkaana' kii⁠onci kihci kaakiikitowa' ekii kiihkaamaanitc Aaisik otooshkiniikiima', ekii ihkitonitc, “Niinawint iitok i'i ninipiiminaan.” Miihsh Aaisik kaakii ishi wiintak i'i onta'ipaanini, “Kiihkaantiwin,” ekii ishinihkaantank aaniihsh kii⁠onci kiihkaamaawak i'i nipiini.

²¹ Miinawaa tahsh Aaisik otanohkii'aakana' kii⁠waanihkewa'. Miihsh kaa⁠ishi mihkaminitc nipiini. Miitahsh peshikwan kaah⁠tootawimintc otininiima'. “Miikaanikoowin,” itahsh okii ishinihkaatan i'i onta'ipaan.

²² Kii⁠onci kosi tahsh i'imaa miinawaa ekii waanihketc ekii mihkank nipiini. Kaawiin itahsh awiyan okii onci kiihkaamikohsiin. “Tawihshkaakoowin,” hsa okii ishinihkaataan i'i onta'ipaan. Miihsh kaa⁠ihkitotc, “Mii hsa 'i kaaTipenciketc eh⁠tawinamawinank ci⁠minohsewankitc o'omaa ahkiink.”

²³ Piiarshiipa (Beersheba) hsa tahsh inahke kii‑ishi kosi.

²⁴ I'i eh⁠tipihkaninik itahsh okii naakosiihtaakoon kaaTipencikenitc ekii'ikotc, “Niin hsa kitete Eparahaam oKishemanitooman. Keko sekisihken, kiwiiciiwin iitok. Kika shawenimin kaye ci⁠ani paahtiinowaatc kipiiwesiimak aaniihsh i'inahke kaa⁠ishi ahshotamawakipan Eparahaam,” okii'ikoon.

²⁵ Miitahsh Aaisik kaa⁠ishi onaapihkiniketc ekii anami'ehtawaatc kaaTipencikenitc. Miihsh i'i kaa⁠ishi kapehshitc. Otanohkii'aakana' kaye i'imaa okii antwaanihkaatamini nipiini.

Kaashi'ahshotamaatiwaatc Aaisik Shikwa Apimelehk

²⁶ A'a hsa Apimelehk kiih⁠piishaa, ekiih pi wiiciiwikotc Ahaasaht (Ahuzzath) eshinihkaasonitc kaa⁠wiintamaakotc keni ishihciketc, ini kaye Paaihkol (Phicol) eshinihkaasonitc oshimaakanihshiiwikimaan ekiih pi anta waapamaatc Aaisikoon

²⁷ Miitahsh Aaisik kaa⁠ishi kakwecimaatc, “Wekonen itahsh wenci piishaayek eh⁠pi waapamiyek? Kimaanshi wiiciiwim iitok, ninkoci ekii ishinisha'oyek?”

²⁸ Miihsh o'o kaa⁠ishi nahkwehtaakotc, “Ninkihkentaamin iitok kaaTipenciketc e⁠wiiciiwihk, miitahsh kaa⁠inentamaank cikii ahshotamaatiyankipan ci⁠wiiciintiyank, niinawint kekiin itahsh. Taka hsa ishi ahshotamaawishinaam

²⁹ ci⁠miikaashihsiwaank, taapishkoo kaakiih tootaakooyan ekiih papaamenimikoohsiwan, weweni mooshak ekiih tootaakooyan, pisaan kaye weweni ekiih pakitinikooyan cini maacaayan. Tepwe hsa naakwan kaaTipenciketc ekiih shawenimihk,” okii'ikoo'.

³⁰ Miihsh Aaisik ekiih kwayaancihtootc miicim ekii ahshamaatc, ekii wiihsiniwaatc, ekii minihkwewaatc kaye.

³¹ Wiipa hsa tahsh kikishep memeshkwac kii⁠aayiici ahshotamaatiwak i'i kaakii inentamowaatc aaniin inahke waa⁠ishi wiiciintiwaatc. Miihsh kaakiih pooshoo'aatc cini maacaanitc. Pisaan itahsh kii⁠ani maacaawa'.

³² I'i tahsh eh⁠kiishikaninik Aaisik otanohkii'aakana' okiih pi wiintamaakoo' ekii antwaanihkaataminitc nipiini. Miihsh kaa'ikotc, “Nipi hsa ninkii mihkaamin,” okii'ikoo'.

³³ “Ahshotamaatiwin” hsa okii ishinihkaataan i'i onta'ipaan. Miitahsh Piiarshiipa (Beersheba) wenci ishinihkaatek i'i ootena keyaapi o'o ishi ahpii noonkom kaa⁠kiishikahk.

Iihswaa Wiiwa' Ehtashinsonitc

³⁴ Ahpii hsa Iihswaa (Esau) niimitana (40) eh⁠tahso pipoonwetc kii⁠wiiwi niishin Heht (Heth) kaatinowinitc ihkwewa'. Cootaht (Judith) kii‑ishinihkaasowan ini peshik wetetenitc Pii'erii (Beeri). Ini tahsh kotak ihkwewan Paashimaht (Basemath) kii‑ishinihkaasowan wetetenitc Iilan (Elon).

³⁵ Miiwa' itahsh o'o Aaisik a'a kaye Oripehka (Rebekah) wiinke kaakii mikoshkaatentami'ikowaatc.