Cenisihs 25 - Ojibwe Kihcimasina'ikan

Eparahaam Kotak Opiiwesiima'

¹ Eparahaam (Abraham) tahsh kotak miinawaa ihkwewan kii⁠wiiwi, Ketoora (Keturah) ekii ishinihkaasonitc.

² Miitahsh o'o kaa⁠ishinihkaasonitc apinoonciisha' kaakii ayaawaawaatc Simran (Zimran), Cakshan (Jokshan), Miitan (Medan), Mitiyan (Midian), Ishpak (Ishbak), Shooa (Shuah).

³ Cakshan kii⁠ani okosihsi o'o Shiipawan (Sheba), Tiitanan (Dedan) kaye. A'a tahsh Tiitan (Dedan) okosihsa' kii‑ishinihkaasowa' Aahshorim (Asshurim), Litoohshim (Letushim), Liiomim (Leummim) kaye kaatinowinitc.

⁴ Mitiyan tahsh okosihsa' o'o kii‑ishinihkaasowa', Iipah (Ephah), Iipiir (Epher), Henahk (Hanoch), Apaaita (Abida), Elte'ah (Eldaah). Miiwa' hsa onoweniwa' Ketoora opiiwesiima'.

⁵ Eparahaam tahsh okii miinaan Aaisikoon (Isaac) kahkina kekoon kaakii ayaatc.

⁶ I'i tahsh okosihsa' kaakii onciinitc otaanihke wiiwink, Eparahaam okii miinaa' mikiwaanan mekwaa kii⁠pimaatisitc. Waapanonk tahsh inahke okii'inaa' ci‑ishaanitc, ninkoci okii onci ishinisha'waan eshi'ayaanitc Aaisikoon.

Eparahaam Kiinipotc, Kiina'inintc Kaye

⁷ Minihk tahsh kaakiih pimaatisitc, ninkotwaahk niishwaahsimitanashinaanan (175) kiih⁠tahso pipoonwe.

⁸ Miitahsh kaa⁠ishi ishkwaa pimaatisitc ekii na'i tahso pipoonwetc ekii ahkiwensiiwitc. Wiinke kii⁠ahkiwensiiwi, miihsh kaa⁠ishi nipotc ekii na'inintc.

⁹ Okosihsa' itahsh Aaisikoon (Isaac), Ishmeyalwan (Ishmael) kaye okii ishi na'inikoo' eshi wiimpaapihkaanik Mahkpiila (Machpelah) kaakii ishinihkaatenik. I'i hsa wiimpaapihk kii‑ishi'ayaani waapanonk inahke ayaawinink Mamrihkaank (Mamre), otahkiimink a'a Iihparan (Ephron) kii‑ishi'ayaani kaakii otetetc Soohaaran (Zohar) Heht (Hittite) kaakiih tinowinitc.

¹⁰ Eparahaam iitok okii ataamaakopan Heht kaatinowinitc i'i ahkiini. Miitahsh i'imaa kaa⁠ishi na'inaakopanen wiiwan Sera (Sarah) kaakii ishinihkaasonitc.

¹¹ Eparahaaman tahsh kaa⁠ishkwaa pimaatisinitc Aaisik okiih shawenimikoon Kishemanitoon. Kii‑ishitaa tahsh i'imaa ciikaya'ii Otoonta'ipaan Kaa⁠pimaatisitc Kaa⁠waapamitc kaakii icikaatenik.

Ishmeyal Opiiwesiima' Ehtashinsonitc

¹² Miiwa' itahsh ono Ishmeyal (Ishmael) opiiwesiima' Eparahaaman kaakii otetetc, omaamaan itahsh Hekaar (Hagar) kii‑ishinihkaasowan Iicipahkiink (Egypt) kaakii onciinitc. Hekaar hsa Serawan (Sarah) okiih pamiihtawaan.

¹³ Miihsh o'o eshinihkaasonitc Ishmeyal okosihsa' e⁠ishi wiinsonitc kaakii ishi nihtaawikinitc. Niipeyoht (Nebaioth) sesiihkisitc, Kiitar (Kedar), Atpiiyal (Adbeel), Mipsam (Mibsam),

¹⁴ Mishma (Mishma), Tooma (Dumah), Maasa (Massa),

¹⁵ Hetaat (Hadad), Tiima (Tema), Ciihtar (Jetur), Nehpihsh (Naphish) kaye Ketiima (Kedemah).

¹⁶ Miitahsh i'i Ishmeyal okosihsa', e⁠waawiinsonitc kaa⁠niikaanisinitc entahso pepahkaanwewaanakisinitc, eshi kakapehshinitc kaye.

¹⁷ Ninkotwaahk nihsimitanashiniishwaahso (137) hsa kiih⁠tahso pipoonwe Ishmeyal kii‑ishkwaa pimaatisitc. Eshi na'inimintc itahsh otinawemaakana' kii‑ishi na'inaa.

¹⁸ Opiiwesiima' ihsa tahsh kii‑ishi kapehshiwa' Haapila (Havilah) ahkiink piinihsh weti Shoor (Shur) ahkiink ciikaya'ii Iicipahkiink weti inahke kaani ishaaniwank Ahsiiriya ahkiink. Pahkaan itahsh kii‑ishitaawak eshitaanitc i'i otinawemaakaniwaa'.

Kiinihtaawikiwaatc Cekap, A'a Kaye Iihswaa

¹⁹ Miiwa' tahsh o'o Aaisik (Isaac) opiiwesiima'. Aaisik iitok kii⁠otete Eparahaaman (Abraham).

²⁰ Aaisik niimitana (40) kiih⁠tahso pipoonwe ahpii kii⁠wiiwitc Oripehkawan (Rebekah). Oripehka tahsh oteten Pehtyoel (Bethuel) kaakii ishinihkaasonitc kaakii nihtaa papaamikosinitc Mesopohtemiya (Mesopotamia) kaakii onciinitc. Lepan (Laban) kii‑ishinihkaasowan otawemaan a'a ihkwe.

²¹ Aaisik tahsh okii anami'ehtawaan kaaTipencikenitc wiiwan onci, aaniihsh kaawiin okii kashkihtoohsiini ci⁠oniicaanihsinitc. KaaTipencikenitc tahsh okii noontaakoon Aaisik kaakii ishi anami'ehtawaatc. Miitahsh i'i tepwe wiiwan Oripehkawan kaakii kikishkawaawahsonitc.

²² Mekwaa tahsh Oripehka eh⁠kikishkawaawahsotc, i'i niishin apinoonciisha' kaakiih pimiwinaatc kii⁠nihtaa nawatinitiwa'. Miitahsh kaa⁠ihkitotc, “Wekonen tahsh o'o niin wenci ishihseyaan?” KaaTipencikenitc tahsh okii naasihkawaan ekiih kakwecimaatc.

²³ KaaTipencikenitc tahsh okii ishi nahkwehtaakoon, “Niishwewaanakisiwak hsa pemaatisiwaatc kaa⁠pimiwinatwaa o'o kaa⁠kikishkawaawahsoyan. Kika nihtaawiki'aak hsa niishwewaan pemaatisiwaatc ke⁠maamiikaatiwaatc, peshikwewaan hsa iki ta⁠mashkawentaakosiwak ahpiihc wiin iki kotak. A'a tahsh nihtam ke⁠nihtaawikitc oka pamiihtawaan oshiimenshan.”

²⁴ Ahpii tahsh ekii ocihcihsenik ci⁠nihtaawikinaawahsotc, kiih⁠kwiiwisenhsiwiwa' hsa i'i oniishootema'.

²⁵ A'a tahsh nihtam kaakii nihtaawikitc kii⁠miskonaakosi, wiinke kaye misiwe kii⁠miishaahkonawe. Iihswaa (Esau) tahsh kii‑ishinihkaacikaniwi.

²⁶ A'a tahsh ishkwaac kaakii nihtaawikitc okiih sakitoontanenaan Iihswaan. Miitahsh kaakii ishinihkaanintc Cekap (Jacob). Aaisik hsa ninkotwaahsimitana (60) kiih⁠tahso pipoonwe kii⁠nihtaawikinitc okosihsa'.

Iihswaa Kiimiikiwetc Kekiihtipinawewisihpan

²⁷ Ahpii tahsh kaa⁠kiishaapewiwaatc, Iihswaa (Esau) hsa wiinke kii⁠nihtaa antawencike, kii⁠minwentam kaye akwaciink e⁠ayaatc. A'a tahsh wiin Cekap (Jacob) kii⁠nipwaahkaawaatisi, kii⁠nihtaa ayapi kaakii ishitaawaatc.

²⁸ Aaisik (Isaac) tahsh okiih saaki'aan Iihswaan aaniihsh kii⁠onci nihtaa mino wiihsini ekii nihtaa nihsaanitc aya'aawihsha'. Oripehka (Rebekah) tahsh wiin Cekapoon okiih saaki'aan.

²⁹ Aapitink tahsh eh⁠kiishikaninik mekwaa Cekap apoopiihkaanini e⁠oshihtootc, Iihswaa kiih⁠pionci takohshin pikwatahkamik ekii ishkwaa antawenciketc, wiinke ekii noonteskatetc.

³⁰ Miitahsh kaa'inaatc Cekapoon, “Taka ahshamihshin i'i kaa⁠miskonaakwahk kaa⁠oshihtooyan, wiinke ohsha ninoonteskate.” Mii iitok Iitam (Edom) kaakii onci ishinihkaasotc.

³¹ Cekap tahsh okii'inaan Iihswaan, “Pinamaa hsa ahshotamawihshin ci⁠miishiyan i'i kahkina kekoon kaawiih tipinawewisiyan eh⁠tinowiyan okosihsimaa nihtam kaakii nihtaawikitc.”

³² Iihswaa tahsh kii‑ihkito, “Pisaanihsako kika miinin i'i kahkina kekoon kaawiih tipinawewisiyaan nihtam e⁠okosihsimaawiyaan. Aaniin tahsh mihsawaa ke⁠inwaatamaampaan aasha kota kekaa ewii nipoyaan.”

³³ Cekap tahsh kii‑ihkito, “Pinamaa hsa ahpimon ci⁠miishiyan i'i kaa⁠tipinawewisiyan.” Iihswaa tahsh kii⁠ahpimo, miitahsh kaa⁠ishi miinaatc Cekapoon kahkina kekoonini kaa⁠tipinawewisitc nihtam ekii okosihsimaawitc.

³⁴ Miitahsh payesh Cekap kaa⁠ishi ahshamaatc Iihswaan ci⁠amwaanitc pahkweshikanan, ci⁠miicinitc kaye apoopiihkaanini. Iihswaa tahsh kiih⁠wiihsini, ekii minihkwetc kaye. Miitahsh kaa⁠ishi pasikwiitc ekii ani maacaatc. Kaawiin iitok aahpici okiih saapentansiin i'i kahkina kekoonini kaakiih tipinawewisitc nihtam e⁠okosihsimaawitc.