Cenisihs 23 - Ojibwe Kihcimasina'ikan

Sera Ahpii Kii'ishkwaapimaatisitc

¹ Sera (Sarah) hsa ninkotwaahk niishtanashiniishwaahso (127) eh⁠tahso pipoonwetc mii hsa 'i kaakii ishkwaa pimaatisitc.

² Weti tahsh Kiriaht Arpa (Kiriath Arba), Hiiparan (Hebron) kaye ecikaatek Kenan (Canaan) ahkiink kiih⁠tashi ishkwaa pimaatisi. Eparahaam (Abraham) hsa kii‑ishaa weti ekii mawimaatc Serawan.

³ Kiih⁠pasikwii tahsh ekii onci maacaatc eshi pimihshininitc ini wiiwan ekii ishaatc eshi'ayaanitc Heht (Heth) kaatinowinitc pemaatisinitc. Miihsh o'o kaa'inaatc,

⁴ “Nimpiiwitew iitok o'omaa e⁠wiicitaaminakook. Taka kika ataamininim ahki keshi na'inakwaa ke⁠ishkwaa pimaatisiwaatc.”

⁵ Miihsh o'o Eparahaam kaa'ikotc Heht kaa'inimintc,

⁶ “Nintookimaam, kiniikaanentaakos iitok o'omaa ahkiink. Pisaan ihsa koonaapantan maawac wenishihshinkin na'initiiwikamikoon keshi na'ihshimatwaa nepowaatc. Kaawiin hsa awiya kaa⁠tahshiyaank kitaa anwehtaakoohsii kaashi na'ahsankitwaa nepowaatc, wii ishi na'ahsatc kaakii ishkwaa pimaatisitc kiwiiw.”

⁷ Miihsh Eparahaam kaa⁠ishi animihkohtaatc enaahsamiinitc Heht kaatinowinitc i'imaa otahkiiminink.

⁸ Miihsh o'o kaa'inaatc, “Kiishpin hsa inentamek pisaan ci⁠na'ihshimak kaakii ishkwaa pimaatisitc, taka hsa kanootamawihshik ci⁠awi kanoonek a'a Iihparan (Ephron) wetetetc Soohaar (Zohar) enimintc,

⁹ e⁠antawentamaan ci⁠ataamak i'i kaa⁠tipentank piintaapihk Maahkpila (Machpelah) eshinihkaatek eyaanik weti wiihkweya'ii mihshawahkamik. Kakwecimihk minihk iko enakintank ewii misiwe tipa'amawak enaahsamiiwek. Niin itahsh ewiih tipinawewisiyaan i'i na'initiiwikamik.”

¹⁰ A'a hsa Iihparan okii wiitapimaa' i'i kotak Heht kaatinowinitc weti ootenaank e⁠onaahkonikewaatc. Miihsh o'o kaashi nahkwehtank Eparahaaman ci⁠noontaakotc kahkina Heht kaatinowinitc i'imaa eyaanitc. Miihsh o'o kaa⁠ihkitotc:

¹¹ “Nintookimaam, kika miinin hsa kahkina i'i mihshawahkamik i'i kaye piintaapihk. Mii hsa piko 'i e⁠miininaan enaahsamiiwaatc oko kahkina nimpimaatisiimak. Kimiinin ci⁠tipinawewisiyan keshi na'inatwaa kinipoomak.”

¹² Miitahsh miinawaa Eparahaam kaa⁠ishi animihkohtaatc enaahsamiinitc i'i Heht kaatinowinitc.

¹³ Miihsh o'o kaa'inaatc Iihparanoon kahkina i'imaa eyaanitc ci⁠noontaakotc, “Taka pisintawihshik. Ninka misiwe tipa'aan ihsa enakintek i'i mihshawahkamik. Otaahpinan o'o nintipa'ikewin pisaan itahsh wa'a ci⁠na'ihshimak kaakii ishkwaa pimaatisitc.”

¹⁴ Iihparan hsa tahsh okii'inaan Eparahaaman,

¹⁵ “Nintookimaam, pisintawihshin, niiwaahk (400) minihk waapaapihko shooniyaak hsa ahpiihtentaakwan i'i mihshawahkamik. Kaawiin maawiin kekoon kitaa inentansiimin. Pisaan na'ihshim kaakii ishkwaa pimaatisitc.”

¹⁶ Eparahaam hsa kii‑inentam, miihsh kaa⁠ishi tipa'amawaatc ini Iihparanoon kaakii ishi wiintamaakotc minihk kaa⁠inakintenik. Heht kaatinowiwaatc iitok kii⁠noontamok minihk kaa⁠inakitenik. Niiwaahk (400) minihk waapaapihko shooniyaan minihk hsa kii‑ishi tipa'ike. Mii hsa 'iwe nahke ataawewikimaak kaa‑aapacihtoowaatc i'i tino tipa'ikewin.

¹⁷ Mii hsa tahsh o'o nahke Eparahaam kaakii ani onci tipentank i'i ahkiini waapanonk inahke eyaanik Mamri, ciikaya'ii inahke kaashi ayaak Maahkpila (Machpelah) eshinihkaatenik. Kaye hsa mihshawahkamik, i'i kaye piintaapihk kiih⁠tako miinaakaniwi, i'i kaye kahkina mihtikoo' kaakiih patahkisonitc i'imaa waahkaaya'ii. Mii hsa 'oweni Iihparan (Ephron) kaakiih tipentankipan ahkiini.

¹⁸ Mii hsa tahsh kaakii inakintaminitc kahkina Heht kaatinowinitc wenaahkonikenitc iinsan Eparahaam eh⁠tipinawewisitc i'i ahkiini.

¹⁹ Miitahsh Eparahaam kaakii ishi na'inaatc wiiwan Serawan (Sarah) i'imaa piintaapihk Kenan (Canaan) ahkiink.

²⁰ I'i hsa mihshawahkamik tepentaminihpan i'i Heht kaatinowinitc, i'i kaye piintaapihk. Miitahsh Eparahaam kiih⁠tipinawewisitc i'i piintaapihk ewii inaapacihtootc na'initiiwikamik.